Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Niueli K. Uitenī, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Niueli K. Uitenī, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Niueli K. Uitenī
(1795–1850)
Niueli K. Uitenī, 1884, tā fakatātā ʻe H.B. Hall and Sons, fakatefito ʻi ha tā fakatātā ʻa Danquart A. Weggeland ʻo ha tā-valivali ʻa William W. Major, Church History Library, PH 2592.
Naʻe fanauʻi ʻa Niueli K. Uitenī ʻi Malapolou, Veamoni. Naʻá ne mali mo ʻElisapeti ʻAna Sāmita ʻi he 1822 pea naʻe papitaiso ia ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Nōvema 1830. Naʻe fakanofo ia ʻi he taʻu hono hokó ko ha taulaʻeiki lahi pea naʻe fili ke hoko ko ha pīsope ʻi Ketilani, ʻOhaiō (Tokāteline mo e Ngaahi Fuakava 72:7–8). Naʻá ne faʻa fononga mo Siosefa Sāmita ki Mīsuli (vakai, Tokāteline mo e Ngaahi Fuakava 78:9) pea hoko atu ki Niu ʻIoke, ʻAlapanī, mo Positoni (Tokāteline mo e Ngaahi Fuakava 84:114).
Naʻe hoko ʻa Uitenī ko ha mēmipa ʻo e Kautaha Uouangatahá ʻi he 1832 (Tokāteline mo e Ngaahi Fuakava 82:11). ʻI ha fakahā naʻe fakafou mai ʻia Siosefa Sāmita, naʻe fakahinohinoʻi ia ke ne fakalele ha falekoloa maʻá e lelei ʻa e Kāingalotú (Tokāteline mo e Ngaahi Fuakava 63:42; 72:9–10; 104:39–41). Naʻá ne ʻalu ki he fakataha ki hono fokotuʻutuʻu ʻo e Akoʻanga ʻo e Kau Palōfitá ʻi Ketilani ʻi Sānuali 1833. Naʻe toe fakatau mai foki ʻe Uitenī ʻa e faama faka-Falanisē ʻa Pitá, ʻa ia naʻe langa ai kimui ange ʻa e temipale Ketilaní. Naʻe maʻu ha fakahā ʻi he 1838 ʻo fakahinohinoʻi ʻa Uitenī ke ne mavahe mei Ketilani (Tokāteline mo e Ngaahi Fuakava 117:1), pea naʻe faifai peá ne hiki mo hono fāmilí ki Kōmeesi (ko Nāvū kimui ange), ʻIlinoisi, ʻa ia naʻe fili ai ia ke hoko ko ha pīsope ʻi he 1839. Naʻe fakakau ia ki he Fakataha Alēlea ʻa e Toko Nimangofulú ʻi Māʻasi 1844.
Hili e pekia ʻa Siosefa Sāmitá, naʻe fakahingoa ʻa Uitenī ko e talāsitimaʻá e Siasí. ʻI he konga kimui ʻo e 1844 naʻe fokotuʻu ia ko e “fuofua pīsope” ʻo e Siasí. Naʻá ne hiki mo e Kāingalotú ki he Teleʻa Sōlekí ʻi he 1848, pea ʻi he taʻu hono hokó, naʻe toe ui ia ke hoko ko e pīsope.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá
Tokāteline mo e Ngaahi Fuakava 63, 64, 72, 78, 82, 84, 93, 96, 104, 117