Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Hailame Sāmita, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Hailame Sāmita, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Hailame Sāmita
(1800–44)
Hailame Sāmita, laʻitā ʻo ha tā tongitongi ʻe Frederick Piercy, Charles R. Savage Studio, Church History Library, PH 4521.
Naʻe fāʻeleʻi ʻa Hailame Sāmita, ko ha taʻokete ʻo Siosefa Sāmita ko e Siʻí, ʻi Tanipilisi, Veamoni. Naʻá ne mali mo Selusa Pāteni ʻi he 1826. Naʻe papitaiso ia ʻe Siosefa Sāmita ʻi Sune ʻo e 1829, ko e taha ia ʻo e Kau Fakamoʻoni ʻe Toko Valu ʻo e Tohi ʻa Molomoná, pea ko e taha ia ʻo e kau fuofua mēmipa ʻe toko ono ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe fokotuʻu ʻi he ʻaho 6 ʻo ʻEpeleli 1830. Naʻe ʻi ai ha ngaahi fakahā lahi kimuʻa naʻe fakataumuʻa kiate ia (Tokāteline mo e Ngaahi Fuakava 11; 23). Naʻá ne hiki mo e Kāingalotú ki Ketilani, ʻOhaiō ʻi he 1831. ʻI he 1831–1832, naʻe ui ia ʻi he maʻu fakahā ke ne ngāue fakafaifekau (Tokāteline mo e Ngaahi Fuakava 52:8; 75:32). Naʻá ne laka atu mei ʻOhaiō ki Mīsuli ʻi he 1834 ko ha konga ʻo e fononga ʻa e ʻApitanga ʻo ʻIsilelí (vakai, Tokāteline mo e Ngaahi Fuakava 103:39).
Hili ha taimi nounou mei he mālōlō hono ʻuluaki uaifí ʻi he 1837, naʻá ne mali mo Mele Filitingi. ʻI he 1837 foki naʻe fakanofo ia ke tokoni ua ʻi he Kau Palesitenisī ʻUluakí (vakai, Tokāteline mo e Ngaahi Fuakava 115:1). Naʻá ne hiki ki Mīsuli ʻi he 1838. ʻI he faʻahitaʻu momoko ko iá, naʻe tuku pōpula ia mo Siosefa Sāmita mo ha niʻihi kehe ʻi he fale fakapōpula ʻi Lipetī, Mīsulí. Naʻá ne hoko atu ʻo hiki ki Nāvū, ʻIlinoisi.
Naʻe fetongi ʻe Hailame ʻene tamaí ʻo hoko ko e pēteliake ʻa e Siasí ʻi he 1840. ʻI Sānuali ʻo e 1841, naʻe maʻu ai ha fakahā ke tukuange ʻa Hailame mei hono lakanga ko e tokoní pea ui ia ko ha palōfita, tangata kikite, mo e tangata maʻu fakahā ʻi he Kau Palesitenisī ʻUluakí (Tokāteline mo e Ngaahi Fuakava 124:91–96). Naʻe fakapoongi ʻa Hailame fakataha mo hono tehiná ʻi Kātesi, ʻIlinoisi ʻi Sune ʻo e 1844 (Tokāteline mo e Ngaahi Fuakava 135). Naʻe kau ʻa Hailame ʻi he kau tangata ʻiloa naʻe mamata ki ai ʻa hono foha ko Siosefa F. Sāmitá ʻi he maama tataliʻanga ʻo e ngaahi laumālié ʻi heʻene maʻu fakahā ʻi he 1918 (Tokāteline mo e Ngaahi Fuakava 138:53).
Ngaahi Fakamoʻoni Fakafolofola ʻi he Tokāteline mo e Ngaahi Fuakavá
Tokāteline mo e Ngaahi Fuakava 11, 23, 53, 75, 94, 103, 111, 112, 115, 124, 135, 138