Māteni Hālisi

(1783–1875)

Māteni Hālisi, 1870, laʻitā ʻa Charles William Carter, Church History Library, PH 1700 4449.

Naʻe fanauʻi ʻa Māteni Hālisi ʻi ʻIsitoni, Niu ʻIoke. Naʻá ne mali mo Lusi Hālisi ʻi he 1808. Naʻe hoko ʻa Māteni Hālisi ko ha tangata faama tuʻumālie ʻi Palemaila, Niu ʻIoke. Hili haʻane fekumi ʻi ha ngaahi siasi faka-Kalisitiane kehekehe, naʻá ne maheni mo Siosefa Sāmita, pea iku ʻo ne ului ai ki he ongoongoleleí. Naʻe ʻalu ʻa Hālisi mo ha ʻū tatau ʻo e ʻū mataʻitohi mei he ʻū lauʻi peleti koulá ki ha kau ako mataotao ʻi Fēpueli 1828 peá ne hoko ko ha tangata tohi ʻa Siosefa Sāmita ʻi heʻene liliu ʻa e Tohi ʻa Molomoná ʻi he konga kimui ʻo e faʻahitaʻu failau ko iá. Naʻá ne kau ʻi hono fakamoleki ʻo e ʻuluaki liliu ʻo e Tohi ʻa Molomoná ʻi Sune 1828 (Tokēteline mo e Ngaahi Fuakava 3, 10). ʻI he taʻu hono hokó, naʻe hoko ʻa Māteni Hālisi ko e taha ʻo e Kau Fakamoʻoni ʻe Toko Tolu ʻo e Tohi ʻa Molomoná (Tokāteline mo e Ngaahi Fuakava 5). ʻI heʻene fakatau atu ʻa e ʻeka ʻe 151 ʻo ʻene fāmá, naʻá ne totongi ai e fakamole ki hono pulusi ʻa e pulusinga ʻuluaki ʻo e Tohi ʻa Molomoná (vakai Tokāteline mo e Ngaahi Fuakava 19:26).

ʻI hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he ʻaho 6 ʻo ʻEpeleli 1830, naʻe ʻi ai ʻa Hālisi pea naʻe papitaiso ia he ʻaho pē ko iá. Naʻá ne hiki mo e Kāingalotú ki Ketilani, ʻOhaiō ʻi he 1831 pea, hili hano uiuiʻi ia ʻe ha fakahā (Tokāteline mo e Ngaahi Fuakava 52:24), naʻá ne ngāue fakafaifekau ki Mīsuli ʻi he taʻu tatau pē ko iá. Naʻá ne kau ʻi he fononga ‘a e ʻApitanga ‘o ʻIsilelí ki Mīsuli ʻi he 1834. Naʻá ne māvae mo hono ʻuluaki malí, pea naʻá ne mali leva mo Kalolaine ʻIongi ʻi he 1836 pe 1837. Naʻá ne mavahe kimui ange mei he Siasí, ka ʻi he 1870 naʻá ne hiki ki he Teleʻa Sōlekí ʻi ʻIutā pea naʻe toe papitaiso ia.

Ngaahi Fakamoʻoni Fakafolofola ʻi he Tokāteline mo e Ngaahi Fuakavá

Tokāteline mo e Ngaahi Fuakava 3, 5, 10, 17, 19, 52, 58, 70, 82, 102, 104

Fakamatala Lahi Ange

Ngaahi moʻoniʻi meʻa mo e maʻuʻanga fakamatala fakapiokālafi, The Joseph Smith Papers (Ko e Ngaahi Pepa ʻa Siosefa Sāmitá)

Kau Māʻoniʻoní, voliume 1, Ko e Fuka ʻo e Moʻoní

Revelations In Context (Puipuituʻa ʻo e Ngaahi Fakahaá)

• The Contributions of Martin Harris (Ko e Ngaahi Tokoni ʻa Māteni Hālisí)

• The Experience of the Three Witnesses (Ko e Aʻusia ʻa e Kau Fakamoʻoni ʻe Toko Tolú)

• Newel K. Whitney and the United Firm (Ko Niueli K. Uitenī pea mo e Kautaha Uouangatahá)

Martin Harris ʻi he Church History Biographical Database

Vakai, Martin Harris ʻi he FamilySearch