“O Talitonuga Faalelotu i Ona Po o Iosefa Samita,” Autu o le Talafaasolopito o le Ekalesia
“O Talitonuga Faalelotu i Ona Po o Iosefa Samita”
O Talitonuga Faalelotu i Ona Po o Iosefa Samita
A’o soloai atu uluai tagata o le Ekalesia i lo latou faatuatuaga fou, sa latou aumaia ma i latou talitonuga, tu ma aga masani, ma tulaga faatauaina mai o latou aafiaga faalelotu anamua. O tagata e toaaga i le lotu i le Iunaite Setete i lea taimi na mafaufau i se vaega lautele o talitonuga, o le toatele lava e afua mai seneturi o fefinauaiga e uiga i aoaoga faavae faaKerisiano. A’o auai mai tagata liliu mai i le Ekalesia, latou te lei lafoaia uma o latou talitonuga talu ai ma e masani ona malamalama i faaaliga ma aoaoga a Iosefa Samita e tusa ai ma o latou manatu anamua. O le tele o faaaliga i le Mataupu Faavae ma Feagaiga na oo mai e tali atu i fesili na mafua mai i talaaga faalelotu a Iosefa ma ona fesoasoani.1
Ina ua mavae le Taua i totonu o Amerika lava ia i le faaiuga o le vaitau o le 1700, sa faasaina e le tulafono fou a le malo se tapuaiga aloaia e lagolagoina e le malo. Na vave ona mulimulitaia e malo o setete taitasi, le saunia o le avanoa mo tauvaga malosi i le va o ekalesia ma faifeau. Sa taliaina e tagata lautele atamamai se vaega lautele o manatu eseese ma aoaoga faavae na faia i ai ni felafolafoaiga i lomiga tusitusia mo tagata lautele. O le faailoaina e avea ma se Universalist, Arminian, po o se Calvinist na vave ona oo mai i uluai Au Paia ma o latou paaga e pei o le faailoaina o se pati faaupufai i aso nei. O talanoaga faalelotu masani i ona po o Iosefa Samita na matele agai i popolega e uiga i faaliliuga o le Tusi Paia, o le natura o le Atua ma tagata soifua, faaolataga, ma faamanatuga.
O Le Tusi Paia
E sili atu nai lo se isi lava tusitusiga, o le Tusi Paia ua faatosinaina manatu, gagana, ma aganuu i Amerika. Ua faavaeina e tagata faiupufai o malo ma faifeau a latou finauga i tusitusiga paia ma faaaogaina gagana faatusi paia. O le toatele o tagata Porotesano ua latou manatu i le Tusi Paia o le pule toatasi i aoaoga faavae, ma o le toatele e taulimaina ona upu ma le atoatoa ma e leai ni mea sese. E masani lava ona eseese faaliliuga o le Tusi Paia e le au faitau, ae e toalaiti lava e fesiligia lona tulaga. O nisi o tupulaga a Iosefa Samita na faatulagaina ni auala fou ma sili ona atamai i faaliliuga faatusi paia ma faaakatemia, ae o le toatele na tumau i le masalosalo e uiga i nei metotia fou ma fiafia i le faaaogaaga sili ona aoga o fuaitau o le Tusi Paia. O le toatele o Au Paia o Aso e Gata Ai anamua, e pei o o latou tuaoi Porotesano, na uunaia se faitauga sili ona moni o le Tusi Paia.
O le toatele o tagata Amerika i ona po o Iosefa Samita na tausisi i le tulaga o le lava o le Tusi Paia ma e latou te manatu faatauvaa i le ala na taulimaina ai e le Au Paia o Aso e Gata Ai le Tusi a Mamona ma le Mataupu Faavae ma Feagaiga o ni tusitusiga paia. Na faagaeetia e tusitusiga faa-Apokerifa le toatele o le au faitau o le Tusi Paia, ae o le toatele atu na manatu o tusitusiga paia (o tusi ia na taliaina masani e le au Porotesano ma Katoliko Kerisiano le talafeagai) ua tapunia tumau.
Natura o le Atua ma Tagata Soifua
O le toatele o tagata Kerisiano Amerika e talitonu i le aoaoga faavae o le Tolutasi Paia e pei ona faaalia i le tautau atu masani ma talitonuga. O lenei mea e talanoa ai e uiga i le Atua o ni tagata se toatolu—Tama, le Alo, ma le Agaga Paia—o loo i ai faatasi i se tagata e toatasi. O lenei mataupu e lei foliga le talafeagai i le au talitonu, ae nai lo lena o se mea lilo ofoofogia a le Atua e sili atu i le malamalama faaletagata. E ui na toatele atu tagata na talitonu i le Tolutasi Paia, ae na tosina atu se vaega toatele i nisi manatu e uiga i le Aiga Atua. O le Deism, o se vaaiga iloga lea i le au mafaufau saoloto ma le au faitofa i Europa ma Amerika, sa finau mo se Atua agaalofa ae le o i ai, o se Foafoa o le na faatuina le lalolagi ae na tuulafoaia o ia lava. O le atuatuvale ai i manatu o le tetee ae o loo sailia pea se isi manatu faatusi paia i le Tolutasi Paia, sa muai faailoa mai ai e nisi o le au failotu le mea o le a faailoaina o le Unitarianism (o le talitonuga lea o le Atua le Tama, ma Iesu Keriso o ni tagata mavaevae). Sa tau mai e ia au failotu o le Atua o se tagata e toatasi, o Iesu o le Faaola na soifua faaletagata, ma o le Agaga Paia o se faatusa o le mana o le Atua.
Mo le toatele naua o faifeau Kerisiano ma tusitala, o le Pau o le tagata e pei ona faamatalaina i le Kenese na faamatala ai le tulaga o le tagata soifua: tagata na feola i se lalolagi pau ona o le uluai agasala, ma e na o le fesoasoani faalelagai e mafai ai ona faaleleia lenei tulaga. O le toatele o Porotesano i Amerika na talitonu faapea ua matua amioleaga le tagata ma o le manatu ai e mafai e tagata soifua ona avea faapei o le Atua o se upuvale.
Faaolataga
E leai se autu na sili ona tulai mai ai se feeseeseaiga nai lo le natura o le faaolataga. Ua leva ona taumafai le au failotu atamamai ina ia malamalama i le sootaga i le va o le faaolataga, loto fuatiaifo, muai vaaiga i le taunuuga, ma le muai silafaga ma le alofa tunoa o le Atua. E oo atu i le amataga o le vaitau o le 1800, o le toatele o Porotesano i Amerika, po o le a lava le ekalesia sa latou auai, ua ogatusa ma se tasi o vaega nei: Calvinism, Arminianism, po o le Universalism.
Na manatunatu John Calvin o se tagata na faatuina le Porotesano faapea ua i ai i le Atua le atamai atoa e uiga i le taunuuga o Ana foafoaga ma, o le mea lea, ua ia muai valoia ai po o ai lava o le a ia faaolaina mo sea taunuuga. Na iloiloina e le au Calvinists le loto fuatiaifo o se faalauteleina o le finagalo o le Atua nai lo o se filifiliga tutoatasi. O Jacobus Arminius, o se failotu Calvinist, na ia tetee i le muai filifilia ma finau atu o le filifiliga a le tagata e i ai sona sao i le faaolataga. E oo lava ia i latou na muai faauuina mo le faaolataga, o le finau lea a le au Arminius, e mafai ona teenaina le Agaga Paia. O nisi tagata Arminians mulimuli ane, na aofia ai se tagata iloga o le lotu Metotisi o Ioane Uesele, na talitonu e mafai e se tagata, e ala i le filifiliga ma le alofa tunoa o le Atua, ona maua se vaega o le alofa atoatoa ma oo ai ina aveesea le manao mo le agasala. O tagata faatuiese i lenei aoaoga faavae faaatoatoaina na finau faapea o sea tagata e mafai ona tulai mai i se olaga mamalu pe a mavae lenei olaga ae le o le olaga faitino.
O le toatele o tagata Calvinists ma Arminians na vaai i le faaolataga o se mea e tuuina atu i sina vaega toalaiti, ae o le toatele e feagai ma le malaia. O le au Universalists, i le isi itu, e tumau faapea ona sa faia e Iesu Keriso se Togiola atoatoa, o le a faaolaina tagata uma i le iuga. Latou te malamalama i aoaoga faavae faatusipaia o le faasalaga faalelagi o se tulaga le tumau ma faasa’o ai. E matua alofa atoatoa le Atua i le lalolagi, ua latou faapea mai ai, o le a iu lava ina Ia faataunuuina le faaolataga o tagata uma.
O nei felafolafoaiga i tulaga o le faaolataga na taitai atu ai le au talitonu ia lagona le naunau e uiga i o latou lava tulaga. O le sailiga mo le faamautinoaga o le faaolataga na eseese ai tulaga mo le au Calvinists ma le Arminians. Na taumafai le au Calvinists e faitau a latou aafiaga faaleagaga patino, o latou lagona, ma a latou faatinoga faapea o ni faailoga lea ua filifilia i latou e le Atua mo le faaolataga. O le au Arminians e masani ona saili mo le faamautinoaga i molimau mamana a le Agaga Paia. O isi e mafaufau i sauniga faalelotu e pei o le papatisoga ma le Eucharist (o le faamanatuga o le Talisuaga a le Alii) e tatau mo le faaolataga.
Faamanatuga ma le Pule
E masani ona faatatau tagata Kerisiano i sauniga po o sauniga paia e pei o le papatisoga i le upu faamanatuga. I tu ma aga o le Katoliko Roma ma Orthodox i Sasae, o faamanatuga o sauniga ia na manatu e taua mo le faaolataga. E fesootai atu e faifeau la latou pule e faatautaia ai ia faamanatuga e ala i le faagasologa o epikopo i tua atu o Aposetolo anamua na taitaiina e Peteru. O tagata Porotesano toefaatulaga, aemaise lava Matini Luteru ma Ioane Kalavini, na mafaufau i faamanatuga o ni faailoga o le faatuatua; na taoto atu le pule i le faapotopotoga o tagata talitonu nai lo sina vaega na faauuina; ma o le aoga o le faamanatuga na taoto lea i le Agaga Paia lava ia.
O le tulaga, taimi, ma le manaomia o le papatisoga na matua finauina. O tu masani a le au Katoliko ma le au Orthodox e uiga i le papatisoina o pepe po o fanau iti sa i lalo o se suesuega i le taimi o le Toefaatulagaina, e ui ina tumau ai le vaeluaina o Porotesano i Amerika i le faiga. O talitonuga o le lotu Papatiso e faapea e na o i latou o loo galulue ma le faatuatua, ua matua iloa lelei a latou filifiliga ia o mai ia Keriso, e mafai ona maua se papatisoga aoga. O isi tagata e talitonu o le sauniga o le papatisoga e tumau pea le aoga e tusa lava po o le a le tausaga po o le matua. Na finauina foi ia tulaga o le papatisoga. Na faamamafa mai e le lotu Papatiso ma isi le faatofuina, a’o le au Luteru, Episcopalians, Congregationals, Presbyterians, ma le Metotisi e faatagaina le papatisoga e ala i le saasaaina po o le faatulutulu.
O nei ma isi felafolafoaiga na uunaia ai Iosefa Samita agai i le tele o ana faaaliga sili ona faamamaluina. Ua tumu tusitusiga paia a le Au Paia o Aso e Gata Ai i tali musuia i fesili e faatatau i le mana o le Tusi Paia, le natura o le Aiga Atua, le taunuuga o le agaga o le tagata, o le tatau ma le ituaiga o papatisoga, le pule o le perisitua, ma galuega a le Agaga Paia. O nei faaaliga o aso nei o loo otooto atu ai se faatulagaga o aoaoga faavae ma sauniga paia e ese mai ia i latou o loo maua i aganuu o loo siomia ai le uluai Au Paia o Aso e Gata Ai.
Autu Fesootai: O Lotu Kerisiano i Ona Po o Iosefa Samita, O Fafagu ma le Toefaaolaolaina, O Tala i le Uluai Faaaliga Vaaia a Iosefa Samita