Toefuataiga o le Perisitua Mekisateko

Na molimau Iosefa Samita ma Oliva Kaotui o le aso 15 o Me, 1829, na faaali ai Ioane le Papatiso ia i laua ma avatu ia i laua le pule e papatiso ai. E tusa ai ma le talafaasolopito a Iosefa Samita i le 1838, na tau atu e Ioane ia i laua e le o ia i laua i lea taimi le “mana o le faaee atu o lima, mo le meaalofa o le Agaga Paia, ae o le a faaee mai lea mana i luga o i maʼua i se taimi o mulimuli mai.”¹ O lenei faamalamalamaga na toe tauina mai ai le faamatalaga a le Papatiso i le Feagaiga Fou, lea e ui na ia papatisoina e na mulimuli ia te ia “i le vai ina ia salamo,” o se tasi “e sili o ia ia te au” o le a “papatisoina atu ia te outou i le Agaga Paia ma le afi.”² Ina ua uma ona faauuina Iosefa ma Oliva, na faamalamalama atu e Ioane le Papatiso na “ia galue i lalo o le faatonuga a Peteru, Iakopo, ma Ioane,” o e na avea ma e nafa ma lea pule e sili atu ma o lea mana e tuuina atu le meaalofa o le Agaga Paia “o le a i ai le taimi e tuuina mai ai ia te i maua.”³

O le faaali atu o Peteru, Iakopo, ma Ioane ia Iosefa Samita ma Oliva Kaotui ua faamaonia mai i le anoanoai o faamatalaga. O se faaaliga ia Iosefa Samita na tautalagia ai le asiasiga a Peteru, ma Iakopo, ma Ioane, “o e na Ou auina atu ia te oulua, ma o e na Ou faauuina ai oulua ma faamauina ai oulua e avea o ni aposetolo, ma molimau faapitoa o loʼu igoa, ma umia ki o la oulua auaunaga.”⁴ I se faamanuiaga na tuuina atu e Iosefa Samita ia Oliva Kaotui lea na faamaumauina ia Oketopa i le 1835, na ia saunoa ai i le mauaina e Oliva “o le perisitua paia i lalo o lima o e ua tofia mai se taimi ua leva, ma i latou foi na mauaina i lalo o aoao o le Mesia.”⁵ I le tele o tusi i lona olaga matua, na saunoa mai ai Oliva Kaotui e uiga i lea vaega paia. I se tasi na ia faamatalaina ai lona tu ma le maofa “i le faatasi mai o Peteru, e mauaina le perisitua maualuga” atu.⁶

Ua faaali atu Aposetolo o Peteru, Iakopo, ma Ioane ia Iosefa Samita ma Oliva Kaotui.

E le mafai ona maua sao le aso o lea faaaliga faalelagi mai faamatalaga o i ai. Na o le pau le faamatalaga mai ia Iosefa lava ia lea e faamatalaina ai e uiga i tulaga o le faaaliga i se tusi i le 1842 (lea ua iloga o le Mataupu Faavae ma Feagaiga 128) lea na ia molimau ai na ia faalogo “i le siufofoga o Peteru, Iakopo, ma Ioane i le vao i le va o Haramoni, i le itumalo o Susikuana, ma Kolesavile, i le itumalo o Perume, i luga o le vaitafe o Susikuana, ma taʼu mai o i latou lava ua i ai ki o le malo.”⁷ O tagata faitau i nei vaitaimi ua tofu ma faaiuga eseese mai ia faamatalaga eseese e tusa ma le taimi na faaali atu ai Peteru, Iakopo, ma Ioane. O a latou taumatega e amata mai i ni nai vaiaso ina ua uma ona faaali mai Ioane le Papatiso i le aso 15 o Me, 1829, i le tele o masina mulimuli ane.⁸ E ui o le tele o tala i lea faaaliga faalelagi na tusia i tausaga mulimuli ane, o loo tuufaatasia ma isi tala muamua, e ui e le o auiliilia, i galuega a agelu ia na tuuina atu ia Iosefa ma Oliva se tiute paia.⁹

O le talafaasolopito na lomia a Iosefa Samita e le o taua ai le toefuataiga o le pule e maualuga atu i se auiliiliga, ae ua faamatalaina ai faapea o se taimi ina ua siitia atu i Feieti, Niu Ioka, i le taumafanfana o le 1829, o Iosefa ma isi “na popole ina ia iloaina lena folafolaga ia i tatou”—ina ia mafai ona latou maua “le pule o le faaee o lima mo le meaalofa o le Agaga Paia.”¹⁰ O loo faamatala mai e le talafaasolopito faapea i le fale o Peteru Uitimera le Matua i Feieti, Niu Ioka, ina ua mavae le tatalo ai ma fesili atu i le Atua mo le taitaiga, na poloai mai le siufofoga o le Alii ia i latou ia faauuina e le tasi le isi. Na faatonuina i latou, e ui i lea, e faatali lenei faauuga seia latou mafai ona fono ma e na papatisoina ma taliaina i latou o ni faiaoga faaleagaga.

Ina ua faatulagaina le Ekalesia i le aso 6 o Aperila, 1830, na faatino loa e Iosefa ma Oliva i le pule paia e papatiso ai ma tuuina atu le meaalofa o le Agaga Paia. O i latou na auai i le fonotaga o le faatulagaina na taliaina le taitaiga a Iosefa ma Oliva, ma na faauuina e Iosefa ma Oliva le tasi ma le isi o ni toeaina e pei ona faatonuina e le Alii i laua e fai. I le taimi lava lea i lena fonotaga, na faaiuina ai e Iosefa Samita le “Mataupu Faavae ma Feagaiga o le Ekalesia a Keriso” (lea ua Mataupu Faavae ma Feagaiga 20), lea na folafola mai ai faapea o isi a latou tiutetauave o ni toeaina o le “faamauina le ekalesia e ala i le faaee o lima ma le tuuina atu o le Agaga Paia.”¹¹

Atiina ae le Malamalama.

I le vaitau o nai tausaga muamua ina ua mavae le faatulagaina o le Ekalesia, e lei faaaogaina e Iosefa Samita ma isi tagata o le Ekalesia upu Perisitua Arona po o Perisitua Mekisateko e faamatala ai le pule na latou mauaina. Na atiina ae lo latou malamalama i le perisitua mai i lea taimi i lea taimi faatasi ai ma le fesoasoani o faaaliga faaauau pea.

O loo i ai i le Feagaiga Fou ni fuaitau o loo tautala i faitaulaga ma faitaulaga sili ma e fesootaia le perisitua ia Arona ma Mekisateko.¹² O loo aoao mai foi faapea le Tusi a Mamona faapea o le tagata o le Feagaiga Tuai o Mekisateko “na mauaina le tofi o le Perisitua Maualuga, e tusa ai ma le faatulagaga paia a le Atua.”¹³ Na fausia i luga o nei mau, o faaaliga ia Iosefa Samita i le va o le 1831 ma le 1835 na faatuina ai nisi tofi o le perisitua ma faamanino ai le faaupuga. Ia Iuni o le 1831, na faauuina ai e Iosefa Samita ma Laimani Wight ni nai alii (e aofia ai le tasi ma le isi) “i le Perisitua Maualuga,” o lona uiga o le tofi i le faitaulaga sili.¹⁴ I le manatu ai i lo latou malamalama i le Tusi Paia, o nisi o uluai tagata o le Ekalesia na faasino i lenei perisitua maualuga o “le faatulagaga a Mekisateko,”¹⁵ Ia Setema o le 1832, na tau mai ai e se faaaliga faapea o le perisitua maualalo e totonugalemu i le tofi o le faitaulaga, faatasi ai ma aoao ma tiakono o ni vaega faaopoopo. O le “perisitua maualuga,” pe sili atu e totonugalemu i le tofi o le faitaulaga sili, faatasi ma tofi o le epikopo ma le toeaina o ni vaega faaopoopo. Ao faatautaia e le perisitua maualalo “le talalelei sauniuni,” e aofia ai le sauniga o le papatisoga, o le perisitua maualuga “e umia le ki o mealilo o le malo, o le ki lava lea o le malamalama e uiga i le Atua.”¹⁶

O se faatonuga i le perisitua na lomia i le Mataupu Faavae ma Feagaiga o le 1835 na maua ai le faaupuga o loo faaaogaina pea i le aso e faamatala ai le Perisitua Mekisateko. O le manatuaina o manatu na maua mai faaaliga, o le faatonuga na taua ai le perisitua maualuga ma le maualalo “o le Mekisateko, ma le Arona.” Ao lei oo i aso o Mekisateko, o le perisitua maualuga “sa taua o le Perisitua Paia, e tusa ma le Faatulagaga a le Alo o le Atua,” ae na taua mulimuli ane “o le perisitua Mekisateko.” Na faamatalaina e le faatonuga faapea “O isi pule uma po o tofi i le ekalesia o ni faaopoopoga i lenei perisitua,” ma e i ai “le pule i luga o tofi uma i le ekalesia,” ma o “le Au Peresitene o le Perisitua Maualuga, e tusa ma le faatulagaga a Mekisateko,” na taua mulimuli ane o le Au Peresitene Sili, na i ai le pule e taitai ai le Ekalesia.¹⁷

Toefuataiga o le Atoatoaga

I le 1836 i le Malumalu o Katelani, na faaali mai ai Elia ia Iosefa Samita ma Oliva Kaotui ma tuuina atu ia i laua ki, po o le pule, o le a mafai ai e i laua ona “liliu loto o tamā i fanau, ma fanau i tamā, ne’i taia le lalolagi atoa i se fetuu.”¹⁸ Sa faamatala mai e le Perofeta o Iosefa Samita i Navu, “o mana, ma le valaauga o Elia o le a ia te outou le mana e umia ai le ki o faaaliga, sauniga, uunaiga, mana, ma faaeega paia o le atoaga o le Perisitua Mekisateko.” O lenei pule na mafai ai e taitai o le Ekalesia ona tuuina atu “sauniga faamau o le perisitua Mekisateko i luga o le aiga o Isaraelu” e saunia ai mo le afio mai o le Mesia i Lona malumalu.¹⁹ I le galue ai i lalo o lenei pule ua toefuataiina, na faailoa atu ai e Iosefa Samita le faaeega paia o le malumalu ma sauniga faamau i Navu, Ilinoi, i le 1840 e saunia ai mo le faamaeaina o le malumalu iina.²⁰

I le latalata i le faaiuga o lona soifua, na saunoa ai Iosefa Samita ma le fiafia i faamanuiaga a le Alii i le toefuataiina o le atoaga o le perisitua. Na ia faamatalaina lenei toefuataiina e le gata i se tulaga se tasi, ae i ni faagasologa o le tele o taimi i lana galuega faaperofeta. Na taua e le Perofeta ua toefuataiina le perisitua “i lea fuaiupu ma lea fuaiupu, o lea mataupu ma lea mataupu, o si mea itiiti iinei, ma si mea itiiti iina.” Na ia faamatalaina le faaali faavavega mai o “au Agelu,” ma tuuina mai taitasi “a latou tisipenisione, a latou aiā, a latou ki, o latou mamalu, o latou malualiʼi ma viiga, ma le mana o lo latou perisitua.”²¹

Punaoa o le Ekalesia

“Priesthood Restoration,” josephsmithpapers.org.

Mark L. Staker and Curtis Ashton, “Where Was the Priesthood Restored?” Historic Sites, Aug. 21, 2015, history.lds.org.

“Restoration of the Priesthood,” Gospel Topics, topics.lds.org.

“Introduction to Documents, Volume 1: July 1828–June 1831,” josephsmithpapers.org.

Larry C. Porter, “The Restoration of the Aaronic and Melchizedek Priesthoods,” Ensign, Dec. 1996, 30–47.

Autu e Fesootai: Restoration of the Aaronic Priesthood [Toefuataiga o le Perisitua Arona]

Faamatalaga

1. “History, 1838–1856, volume A-1 [23 December 1805–30 August 1834],” 17–18, josephsmithpapers.org; tagai foi Autu: Restoration of the Aaronic Priesthood [Toefuataiga o le Perisitua Arona].

2. Mataio 3:11; tagai foi Mareko 1:7–8; Luka 3:16. I le 1844 na vaai ai Iosefa Samita i nei mea na tutupu i le Feagaiga Fou i le faamatalaina o ona aafiaga faatasi ma Ioane le Papatiso. Tagai Joseph Smith sermon, Wilford Woodruff journal, Mar. 10, 1844, i le Andrew F. Ehat and Lyndon W. Cook, eds., The Words of Joseph Smith: The Contemporary Accounts of the Nauvoo Discourses of the Prophet Joseph (Provo, Utah: Grandin Book, 1991), 327–28.

3. “History, 1838–1856, volume A-1 [23 December 1805–30 August 1834],” 18.

4. “Revelation, circa August 1835 [DC 27],” i le Doctrine and Covenants, 1835 ed., 180, josephsmithpapers.org; tagai “Revelation, circa August 1830 [DC 27],” 35–36.

5. “Blessing to Oliver Cowdery, 2 October 1835,” i le Patriarchal Blessing Book 1, 12, josephsmithpapers.org.

6. Oliver Cowdery letter to Phinehas H. Young, Mar. 23, 1846, Church History Library, Salt Lake City; see also Reuben Miller journal, Oct. 21, 1848, microfilm of holograph, 14, Church History Library, Salt Lake City; spelling standardized; Oliver Cowdery letter to Elder Samuel W. Richards, Jan. 13, 1849, i le Deseret News, Mar. 26, 1884, 9

7. “Letter to ‘The Church of Jesus Christ of Latter Day Saints,’ 6 September 1842 [DC 128],” 7, josephsmithpapers.org; faasaoina sipelaga.

8. Mo se vaaiga lautele i nei taimi, tagai Cannon and BYU Studies staff, “Seventy Contemporaneous Priesthood Restoration Documents,” 222–25; tagai foi Larry C. Porter, “Dating the Restoration of the Melchizedek Priesthood,” Ensign, June 1979, 4–10; Richard Lyman Bushman, Joseph Smith: Rough Stone Rolling (New York: Knopf, 2005), 116–18, and 588, note 35. I le 1880, na tuuina mai ai e Addison Everett ni tala se lua faapea na ia fai mai e faatatau i tala na ia faalogo o tuuina mai e Iosefa Samita i le 1844. Ua faauigaina e nisi tala a Everett e faapea ai o le 1830 le taimi o le faaaliga, ae o tala e le patino, e i ai le le atoatoa, ma na tuuina atu i le fiasefulu o tausaga i le mavae ai ona tauina atu e Iosefa Samita ma o se afa seneturi talu ona mavae le oo mai o agelu. Mo tusiga atoa o tala uma a Everett, tagai Brian Q. Cannon and BYU Studies staff, “Seventy Contemporaneous Priesthood Restoration Documents,” i le John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 228–30, note 11.

9. Tagai “The Golden Bible,” Painesville Telegraph (Ohio), Nov. 16, 1830; Painesville Telegraph, Dec. 7, 1830; Palmyra Reflector, Feb. 14, 1831.

10. “History, 1838–1856, volume A-1 [23 December 1805–30 August 1834],” 26–27.

11. “Articles and Covenants, circa April 1830 [DC 20],” i le Painesville Telegraph, Apr. 19, 1831, 4, josephsmithpapers.org.

12. Tagai Eperu 4:12–16, 5:1–10; tagai foi Levitiko 21:1–23.

13. Tusi a Mamona, 1830 ed., 260, josephsmithpapers.org; tagai Alema 13:18.

14. “Minutes, circa 3–4 June 1831,” i le Minute Book 2, 4, josephsmithpapers.org. Atonu na faatatau Iosefa a le o lenei tulaga po o le oo mai o Peteru, Iakopo, ma Ioane i lana talafaasolopito o le 1832 ina ua ia saunoa mai i “se faamauga ma le taliaina o le Perisitua maualuga i le faatulagaga paia a le alo o le Atua soifua” (“History, circa Summer 1832,” 1, josephsmithpapers.org).

15. Ezra Booth, “Mormonism—No. II,” Ohio Star (Ravenna), Oct. 20, 1831, 3; faasaoina sipelaga. O loo taua foi i le faaliliuga e Iosefa Samita o le Kenese le fesootaiga a Mekisateko i le perisitua. Tagai “Old Testament Revision 1,” 33–34, josephsmithpapers.org.

16. “Revelation, 22–23 September 1832 [DC 84],” 1–2, josephsmithpapers.org; faasaoina sipelaga; tagai MF&F 84:29–30. Tagai foi Joseph Smith, “Letter to John S. Carter, 13 April 1833,” i le Joseph Smith Letterbook 1, 30, josephsmithpapers.org.

17. “Instruction on Priesthood, between circa 1 March and circa 4 May 1835 [DC 107],” i le Doctrine and Covenants, 1835 ed., 82–83, josephsmithpapers.org; tagai DC 107:4. Tagai foi Autu: First Presidency [Au Peresitene Sili].

18. “Visions, 3 April 1836 [DC 110],” i le Joseph Smith, Journal, September 1835–April 1836, 193, josephsmithpapers.org.

19. Joseph Smith sermon, Wilford Woodruff journal, Mar. 10, 1844, i le Ehat and Cook, The Words of Joseph Smith, 328–29, 331–32; faasaoina sipelaga ma faailoga.

20. Tagai Autu: Temple Endowment [Faaeega Paia o le Malumalu], Sealing [Faamauga].

21. “Letter to ‘The Church of Jesus Christ of Latter Day Saints,’ 6 September 1842 [DC 128],” 7;tagai MF&F 128:21. “Instruction on Priesthood, 5 October 1840,” josephsmithpapers.org.