Toko 2
Ny Fahitana Voalohany hitan’i Joseph Smith
1820
Nino an’ Andriamanitra i Joseph Smith sy ny fianakaviany. Niara-namaky ny Baiboly izy ireo. Nampianarin’ny ray aman-drenin’i Joseph mba ho olona tsara ireo zanany.
Nisy fiangonana maro tao amin’ny toerana nipetrahan’i Joseph. Samy tsy nitovy hevitra tamin’izay fiangonana marina ny olona rehetra. Tsy fantatr’i Joseph izay fiangonana tokony hidirany ho mpikambana. Naniry ny hahafantatra ny Fiangonana marin’i Jesoa Kristy izy.
Indray andro fony 14 taona i Joseph dia namaky tao amin’ny Baiboly izy fa tokony hanontany an’ Andriamanitra rehefa te hahafantatra zavatra iray. Nanapa-kevitra ny hivavaka sy hanontany an’ Andriamanitra ny amin’izay fiangonana tokony hidirany ho mpikambana i Joseph.
Indray marainan’ny lohataona dia nandeha tany an’ala teo akaikin’ny tranony i Joseph. Nandohalika izy ka nivavaka tamin’ny feo mafy. Nanana finoana izy fa hamaly ny vavaka izay hataony ny Ray any An-danitra.
Tsy tian’i Satana hivavaka i Joseph. Niezaka nampijanona an’i Joseph izy ka nataony maizina ny manodidina azy rehetra. Natahotra i Joseph ka tsy afaka niteny.
Saingy tsy nitsahatra nivavaka i Joseph. Tsy afaka nampijanona azy i Satana.
Dia nahita fahitana iray i Joseph avy eo. Nahita hazavana tsara sy namirapiratra nanodidina azy izy. Nahita ny Ray any An-danitra sy i Jesoa Kristy nijoro nitsingevaheva teo amboniny izy. Nanondro an’i Jesoa ny Ray any An-danitra sady niteny hoe: “Ity no Zanako Malalako. Henoy Izy!”
Nanontany an’i Jesoa i Joseph hoe iza no fiangonana tokony hidirany ho mpikambana. Nolazain’i Jesoa tamin’i Joseph fa tsy misy amin’izy ireo tokony hidirany ho mpikambana satria diso avokoa izy rehetra. Tsy misy Fiangonany na ny iray amin’izy ireo aza. Nilaza zavatra hafa maro tamin’i Joseph Izy. Dia tapitra ilay fahitana.
Rehefa nody i Joseph dia nanontany azy ny reniny raha toa ka nanana olana izy. Nilaza i Joseph fa tsy nanana olana izy. Dia nolazainy tamin-dreniny avy eo fa nahita fahitana iray izy. Nolazainy azy izay nianarany tao amin’ny fahitany.
Nolazain’i Joseph tamin’ny olona sasany tao an-tanàna ihany koa ny momba ny fahitana hitany. Tsy nino azy ny olona. Nolazain’izy ireo fa nandainga izy, ka lasa tezitra sy ratsy fanahy taminy izy ireo.
Nilaza ny marina hatrany momba ny fahitana hitany i Joseph. Fantany fa nahita ny Ray any An-danitra sy i Jesoa Kristy izy. Fantany fa tsy nisy marina ireo fiangonana teto ambonin’ny tany.