Toko 31
Ny Tenin’ny Fahendrena
Febroary 1833
Nanokatra sekoly ho an’ireo lehilahy tao amin’ny Fiangonana i Joseph Smith. Nantsoina hoe sekolin’ny mpaminany izany.
Ilay sekolin’ny mpaminany dia natao tao amin’ny efitrano ambonin’ny trano fivarotan’i Newel Knight tao Kirtland Ohio. Nifampianatra momba ny fisoronana, ny soratra masina, ary ireo zavatra hafa i Joseph sy ireo mpitarika hafa tao amin’ny Fiangonana tao amin’io sekoly io. Ilay sekoly ihany koa dia natao hanomanana ho amin’ny fitantanana ny Fiangonana sy ny asa fitoriana ny filazantsara.
Maro tamin’ireo lehilahy no nifoka pipa na sigara be, ka nanenika ilay efitrano ny setroka. Ny lehilahy sasany nihinam-paraky sy nandrora tamin’ny tany, nahatonga izany ho tena naloto.
Nanadio ilay efitrano i Emma Smith vadin’i Joseph taorian’ny fivoriana tsirairay. Lasa niahiahy momba ny fampiasan’ireo rahalahy paraky izy sy i Joseph. Nanontany tena i Joseph raha toa ka tokony hifoka sy hihinam-paraky ny olona.
Nivavaka i Joseph mba hahafantarana izay mety. Nomen’i Jesoa fanambarana iray izay antsoina hoe ny Tenin’ny Fahendrena izy. Nolazain’i Jesoa fa ny olona sasany dia maniry ny hanaovan’ny hafa zavatra ratsy ho an’ny vatan’izy ireo. Ao amin’ny Tenin’ny Fahendrena i Jesoa dia nilaza tamin’ny Olomasina ny momba ireo zavatra izay ratsy ho an’ny vatan’izy ireo. Nilaza momba ireo zavatra izay tsara ho an’ny vatan’izy ireo ihany koa izy.
Nolazain’i Jesoa fa tsy tsara ho an’ny olona ny alikaola. Tsy tokony hisotro zava-pisotro misy alikaola izy ireo. Tokony hampiasaina amin’ny ivelan’ny vatana ihany ny alikaola.
Nilaza i Jesoa fa tsy tsara ho an’ny olona ny paraky. Tsy tokony hifoka sigara, sigara be, na pipa izy ireo. Tsy tokony hihinana paraky izy ireo.
Nolazain’i Jesoa tamin’ny Olomasina fa tsy tokony hisotro zava-pisotro mafana toy ny dite sy kafe izy ireo. Tsy tsara ho an’ny vatana ireny zava-pisotro ireny.
Nilaza i Jesoa fa maro ireo zava-maniry sy biby tsara hohanin’ny olona. Tokony hankasitraka ny Ray any An-danitra noho ny sakafo tsara ny olona.
Nilaza i Jesoa fa tsy tokony hihinana hena be loatra ny olona.
Nilaza ny Tompo fa tsara ho an’ny vatana ny voa. Sasany amin’ny voa ny varim-bazaha, vary, katsaka, na avoanina. Tsara ho an’ny vatana ihany koa ny voankazo sy legioma.
Nampanantena fitahiana lehibe ho an’ireo izay mankatò ny Tenin’ny Fahendrena i Jesoa. Ho matanjaka sy salama kokoa mihoatra noho ny rehefa tsy mankatò izany ny vatan’izy ireo. Ho salama kokoa ihany koa ny sain’izy ireo, ary hahazo fahendrena sy harem-pahalalana izy ireo.