Toko 53

Korontana tao Nauvoo

Mey–aogositra 1842

Olomasina an’arivony no nandeha nonina tany Nauvoo. Nanangana tanàna mahafinaritra izy ireo ary nanomboka nanangana tempoly iray.

Nisafidy an’i John C. Bennett ho ben’ny tanànan’i Nauvoo ireo Olomasina. Ben’ny tanàna nahafinaritra izy tamin’ny voalohany kanefa nanomboka nanao zavatra ratsy izy ka nivadika tamin’i Joseph Smith.

Naniry ny hanana andro fankalazana manokana ny olona tao Nauvoo, niaraka tamin’ny matso ataon’ireo miaramila manao andrimaso tao Nauvoo.

Nanapa-kevitra i John Bennett fa tokony hanao sarin’ady ny miaramila. Midika izany fa tsy tena ady no atao.

Nangataka an’i Joseph Smith mba hitarika vondrona miaramila iray tao anatin’ilay ady Andriamatoa Bennett, kanefa tsy nanaiky ny hanao izany i Joseph Smith. Nilaza tamin’i Joseph ny Fanahy Masina fa nanao drafitra ny hampiasa ilay ady i John Bennett mba hamonoana azy. Tezitra i John Bennett.

Satria nivadika tamin’ny Mpaminany sy nanao zava-dratsy hafa i John Bennett, dia nesorina tsy ho mpikamban’ny Fiangonana izy ary tsy ben’ny tanànan’i Nauvoo intsony. Lasa ben’ny tanàna vaovao i Joseph Smith.

Lasa ratsy fanahy i John Bennett. Niala tao Nauvoo izy ka nanomboka nilaza sy nanoratra zavatra ratsy momba an’i Joseph Smith sy ny Fiangonana. Naka olona niaraka taminy ihany koa izy.

Nilaza tamin’ny sasany tamin’ireo lehilahy tao amin’ny Fiangonana i Joseph Smith fa hiaina korontana bebe kokoa ny Olomasina. Tsy maintsy handao an’i Nauvoo izy ireo indray andro any. Hitan’i Joseph mialoha fa handeha any amin’ireo Tendrombohitra Haram-bato izy ireo ka hanangana tanàna any. Hankatò an’ Andriamanitra izy ireo ka ho lasa vahoaka matanjaka.