Toko 37
Mpitarika ao amin’ny fisoronana
Febroary–martsa1835
Nangataka ireo lehilahy tao amin’ny Tobin’i Ziona sy ireo hafa mba hamonjy fivoriana manan-danja iray tao Kirtland, Ohio i Joseph Smith. Nolazain’i Joseph tamin’ireo lehilahy fa naniry ny hiantso Apôstôly roa ambin’ny folo i Jesoa hanampy hitarika ny Fiangonana.
Nasain’ny Tompo nisafidy ireo Apôstôly i Oliver Cowdery, sy i David Whitmer, ary i Martin Harris. Nomen’ny Fiadidiana Voalohan’ny Fiangonana tsodrano i Oliver sy i David ary i Martin taorian’ilay fivoriana. Dia niara-nivavaka izy ireo avy eo ka nisafidy lehilahy tsara roa ambin’ny folo.
Notendrena ho Apôstôly ireo lehilahy roa ambin’ny folo. Anisan’ny tranga nanan-danja indrindra teo amin’ny famerenana amin’ny laoniny ny Fiangonan’ny Tompo ny fiantsoana Apôstôly.
Mpitarika tena manan-danja ato amin’ny Fiangonana ireo Apôstôly. Fantatr’izy ireo fa i Jesoa no Mpamonjy antsika. Mampianatra ny filazantsara manerana izao tontolo izao izy ireo.
Rehefa afaka andro vitsivitsy dia nisy lehilahy hafa nosafidina ho mpitarika tao amin’ny Fiangonana. Antsoina hoe Fitopololahy izy ireo. Manampy ny Apôstôly ny Fitopololahy.
Nivory ireo Apôstôly Roambinifolo indray andro. Nivonona handeha hanao asa fitoriana izy ireo ka naniry ny fanampian’ny Ray any An-danitra.
Nangataka an’i Joseph Smith mba hivavaka hangataka fanambarana iray hanampiana azy ireo any amin’ny asa fitoriany ireo Apôstôly. Nanome fanambarana lehibe iray an’i Joseph sy ireo Apôstôly i Jesoa, izay nilazany momba ny fisoronana tamin’izy ireo.
Fotopampianarana sy Fanekempihavanana 107, sasin-tenin’ny fizarana.
Ny fisoronana dia herin’ Andriamanitra. Hery faran’ izay lehibe indrindra eto an-tany izany. Omen’ Andriamanitra an’ireo lehilahy marin-toetra ny fisoronana. Ireo lehilahy izay manana ny fisoronana dia azo omena lalana hitory ny filazantsara, sy hanatanteraka ôrdônansy, ary ho mpitarika ao amin’ny Fiangonana.
Misy fisoronana anankiroa ao amin’ny Fiangonana. Fisoronana Melkizedeka ny iray, izay antsoina ihany koa hoe ny fisoronana ambony. Manana ny Fisoronana Melkizedeka avokoa ny Filohan’ny Fiangonana, ireo mpanolotsaina azy, sy ireo Apôstôly Roambinifolo, ary ny Fitopololahy.
Mpaminanin’ Andriamanitra ny Filohan’ny Fiangonana. Milaza amin’ny olona izay tian’i Jesoa hataon’izy ireo izy. Manana mpanolotsaina izay manampy azy ny mpaminany. Ny mpaminany sy ireo mpanolotsaina azy no Fiadidiana Voalohan’ny Fiangonana.
Manana ny Fisoronana Melkizedeka ihany koa ireo mpisorona avo. Mpitarika maro ao amin’ireo tsatòka sy paroasy no mpisorona avo. Anisan’izany ireo filohan’ny tsatòka, sy eveka, ary ny mpikambana ao amin’ny filankevitra avo.
Manana ny Fisoronana Melkizedeka ihany koa ireo lehilahy izay tendrena ho loholona. Natao hampianatra ireo mpikamban’ny Fiangonana sy hikarakara azy ireo ny loholona.
Antsoina hitory ny filazantsara amin’izao tontolo izao ihany koa ireo loholona.
Afaka manome tsodrano olona ny lehilahy rehetra izay manana ny Fisoronana Melkizedeka. Afaka manome ny Fanahy Masina ihany koa izy ireo.
Ny Fisoronana Aharôna ilay fisoronana iray hafa, izay antsoina ihany koa hoe ny fisoronana ambany. Ao anatin’ny Fisoronana Aharôna ny anjara fanompoan’ny eveka, mpisorona, mpampianatra, ary diakona. Afaka manao batisa olona, sy manamasina ny fanasan’ny Tompo, ary manampy ny loholona ireo mpisorona.
Manomana ny fanasan’ny Tompo ireo mpampianatra. Mandeha mampianatra isan-tokantrano sy manampy ireo mpikamban’ny Fiangonana hiaina fiainana tsara izy ireo.
Mizara ny fanasan’ny Tompo ny diakona. Manangona ny fanatitra amin’ny fifadian-kanina sy manampy ny eveka ihany koa izy ireo.
Nilaza i Jesoa fa tokony hianatra ny zavatra tian’ Andriamanitra hataon’izy ireo ny lehilahy rehetra izay manana ny fisoronana. Raha miasa mafy izy ireo dia hitahy azy ireo ny Ray any An-danitra.