Toko 50
Ireo Olomasina tao Nauvoo
Janoary–jolay 1841
Nanangana an’i Nauvoo ho lasa tanàna tsara tarehy ny Olomasina. Nivoatra haingana ilay tanàna rehefa nivondrona tao ireo mpikamban’ny Fiangonana vaovao avy tany Angletera sy ireo faritra hafa. Nomen’i Jesoa fanambarana iray manan-danja i Joseph Smith momba izay tokony hataon’ny Olomasina tao Nauvoo.
Nasain’i Jesoa nanoratra taratasy iray mampahafantatra ny filazantsara naverina tamin’ny laoniny ho an’ireo mpanjaka sy mpitarika rehetra teto amin’izao tontolo izao i Joseph Smith. Nilaza ihany koa i Jesoa fa tokony hanorina tempoly iray ao Nauvoo ny Olomasina. Niriny izy ireo hitondra volamena, volafotsy, sy vy hafa, ary karazana hazo sarobidy hanorenana ny tempoly.
Nilaza i Jesoa fa ho avy ao amin’ilay tempoly Izy. Ao no hanomezany fanambarana momba ny fisoronana. Hamerina amin’ny laoniny ireo ôrdônansy ihany koa Izy ary hanambara fahalalana bebe kokoa.
Nolazain’i Jesoa tamin’i Joseph fa azo hatao batisa ho an’ireo olona izay efa nodimandry ny Olomasina. Nilaza i Jesoa fa tokony hanangana dobo fanaovana batisa izay hanaovana batisa ny maty tao anatin’ny tempoly ny Olomasina.
Nambaran’i Jesoa ihany koa fa i Hyrum Smith, rahalahin’i Joseph, no tokony ho patriarkan’ny Fiangonana. Amin’ny maha-patriarka azy dia nanome tsodrano miavaka ho an’ny mpikamban’ny Fiangonana i Hyrum.
Nanome fanambarana iray an’i Joseph Smith mikasika an’i Brigham Young ihany koa i Jesoa. Nilaza i Jesoa fa fantany fa niasa mafy ho an’ny Fiangonana i Brigham. Nandao ny tranony sy ny ankohonany imbetsaka izy mba hanaovana asa fitoriana.
Nilaza tamin’i Brigham Young i Jesoa fa tokony hijanona miaraka amin’ny ankohonany izy ary hikarakara manokana azy ireo.