Toko 22
Manomboka miorim-ponenana ao Missouri ny Olomasina
Jolay–aogositra 1831
Nandeha tany Missouri ny Mpaminany Joseph Smith, i Sidney Rigdon, sy i Edward Partridge ary ireo hafa. Faly be izy ireo ny handeha ho any satria te hahafantatra bebe kokoa momba ny fanorenana ny tanànan’i Ziona.
Nandeha sambo iray izy ireo. Rehefa tonga tao Missouri izy ireo dia naniry ny handeha an-tongotra i Joseph. Fantany fa masina ny tanin’i Missouri, ka naniry ny hahita izany izy.
Nandeha teo amin’ny 480 kilaometra teo nanerana an’i Missouri nankany amin’ny Fivondronan’i Jackson i Joseph sy ireo namany.
Andro vitsivitsy taty aorian’ny nahatongavan’i Joseph sy ireo namany tao amin’ny Fivondronan’i Jackson dia tonga tao ireo Olomasina avy tany New York.
Tonga tao amin’ny Fivondronan’i Jackson ihany koa ireo misiônera avy tany Kirtland.
Nolazain’i Joseph Smith sy ny Eveka Edward Partridge tamin’ny olona izay tokony hatao. Ny sasany nasaina nividy tany tao Missouri. Nasaina nanokatra sekoly i Oliver Cowdery sy i William W. Phelps. Nasaina nisafidy sy nanoratra boky hovakin’ny ankizy any an-tsekoly izy ireo.
Naniry ny hahafantatra ny toerana hanorenana ny tanànan’i Ziona i Joseph. Nivavaka tamin’ny Ray any An-danitra izy ka novaliana ny vavaka nataony.
Fotopampianarana sy Fanekempihavanana 57, sasin-tenin’ny fizarana.
Nambaran’ny Tompo fa ao amin’ny Fivondronan’i Jackson Missouri no hisy ny tanànan’i Ziona. Nambarany ihany koa fa haorina ao Independence, tanàna iray ao amin’ny Fivondronan’i Jackson ny tempoly iray (jereo ny sarintany ao amin’ny pejy 89). Nampanantena ihany koa ny Tompo fa ireo izay mitandrina ny didiny sy maharitra hatramin’ny farany dia hosatrohina voninahitra.
Nolazain’ny Tompo tamin’ireo Olomasina tao Missouri fa tokony hankatò ny lalànan’ny tany izy ireo. Tokony hanao zavatra maro amin’ny nahim-po izy ireo. Nampanantena ihany koa ny Tompo fa rehefa mibebaka izy ireo dia tsy hahatsiaro ny fahotan’izy ireo intsony Izy.
Nolazain’ny Tompo fa tokony hitokana ilay tany i Sidney Rigdon. Nanontany ny Olomasina i Sidney Rigdon raha toa ka noraisin’izy ireo tamin’ny fo feno fisaorana ilay tany ary raha toa ka nampanantena ny hitandrina ireo didy izy ireo. “Eny,” hoy izy ireo namaly. Dia nivavaka i Sidney Rigdon ka nitokana ny tany.
Ny ampitson’io dia nanao fivoriana iray tao amin’ny toerana miavaka tao Independence i Joseph Smith, sy i Oliver Cowdery, ary i Sidney Rigdon. Namaky soratra masina sy nivavaka izy ireo. Dia nitokana ilay toerana hananganana tempoly i Joseph Smith.
Nanatrika fihaonambe iray ny Olomasina tao Missouri ny ampitson’io. Heniky ny Fanahy Masina izy ireo, ary nifaly. Nolazain’i Joseph tamin’izy ireo fa hitahy azy ireo Andriamanitra raha toa ka mahatoky izy ireo.
Andro vitsivitsy taty aoriana dia nomen’i Jesoa fanambarana iray momba ny andro Sabata, na alahady, i Joseph. Nolazain’i Jesoa fa androny masina ny alahady. Tokony hanao ireo zavatra izay mampahatsiahy antsika Azy isika rehefa alahady. Tokony hitsahatra amin’ny asa isika. Tokony handeha any am-piangonana sy handray ny fanasan’ny Tompo isika. Tokony hibebaka amin’ny fahotantsika isika. Tokony hifady hanina sy hivavaka isika. Tokony hankasitraka noho ireo fitahiana rehetra azontsika isika.
Ireo Olomasina izay manao ireo dia hahazo ireo zavatra tsara ilain’izy ireo. Ho faly izy ireo, hanana fiadanana, ary handray ny fiainana mandrakizay.