Toko 58
Mpitarika vaovao ho an’ny Fiangonana
Jolay–aogositra 1844
Taorian’ny namonoana ny Mpaminany Joseph Smith dia tsy nanana Filoha ny Fiangonana. Tsy azon’ny Olomasina antoka izay tokony ho mpitarika azy ireo.
Lasa nanao asa fitoriana ny ankamaroan’ireo Apôstôly.
Mpanolotsaina an’i Joseph Smith i Sidney Rigdon. Kanefa tsy nankatò ny Tompo izy ka niala an’i Nauvoo.
Rehefa ren’i Sidney Rigdon fa maty i Joseph Smith dia niverina tany Nauvoo izy. Naniry ny ho mpitarika ny Fiangonana izy.
Niverina tany Nauvoo ihany koa ireo Apôstôly izay lasa nanao asa fitoriana rehefa nahafantatra momba ny fahafatesan’i Joseph. I Brigham Young no mpitarika ny Apôstôly. Nilaza izy fa nomen’ny Tompo ny Apôstôly ny fahefana hitarihana ny Fiangonana mandra-pisafidianana ny Filoha vaovao.
Nanao fivoriana ireo mpikamban’ny Fiangonana. Niresaka tamin’izy ireo voalohany i Sidney Rigdon ka nilaza fa izy no tokony ho mpitarika ny Fiangonana.
Dia niteny i Brigham Young avy eo ka nilaza fa ny Apôstôly no tokony hitarika ny Fiangonana. Niaraka taminy ny Fanahy Masina. Toy ny feon’i Joseph Smith ny feon’i Brigham Young, ary niendrika an’i Joseph Smith izy tamin’ny olona sasany. Fantatry ny Olomasina fa nisafidy ny Apôstôly Andriamanitra mba hitarika ny Fiangonana ka nifidy ny hanaiky ny Apôstôly ho mpitarika azy ireo ny rehetra. Tezitra i Sidney Rigdon. Niverina tany an-tranony izy ka nanokatra ny fiangonanany manokana. Niala tsy ho mpikamban’ Ny Fiangonan’i Jesoa Kristy ho an’ny Olomasin’ny Andro Farany intsony izy.