Toko 35
Nandao ny Fivondronan’i Jackson Missouri ny Olomasina
Septambra-desambra 1833
Satria nanakorontana izay tsy izy ireo andian’olona mpihetraketraka tao amin’ny Fivondronan’i Jackson, dia niezaka nitady fanampiana avy tamin’ny governoran’i Missouri ny Olomasina. Nandeha nihaona tamin’ny governora i William Phelps sy i Orson Hyde. Nolazain’izy ireo taminy ny momba ireo andian’olona mpihetraketraka sy ny fomba nandravana ny tranon’izy ireo.
Tsy nety nanampy ny governora. Nasainy nangataka fanampiana tamin’ireo mpitsara izy ireo. Kanefa naman’ireo andian’olona mpihetraketraka ireo mpitsara ka tsy nety nanampy ihany koa izy ireo.
Nanafika ny Olomasina nandritra ny enina andro ireo andian’olona mpihetraketraka. Naongan’izy ireo ny tranony, noratrainy ny lehilahy, ary notafihany ny tranombarotra ka nariana tamin’ny tany ny zavatra rehetra.
Nasain’ireo andian’olona mpihetraketraka nandao ny tranony ny Olomasina. Ririnina tamin’izany, ary olona maro no maty satria tsy nanan-kialofana izy ireo tao anatin’ny toetr’andro nangatsiaka sy mando. Nandeha tany amin’ny faritra hafa tao Missouri ny Olomasina mba hitsoahana ireo andian’olona mpihetraketraka.
Nalahelo ireo Olomasina. Noravana ny trano, ny toeram-piompiana sy fambolena, ary ny tranombarotr’izy ireo. Nangalarina ny biby fiompin’izy ireo. Tsy nety nanampy ny governora sy ireo mpitsara.
Kanefa mbola nanana finoana an’ Andriamanitra ny Olomasina. Fantany fa marina ny Fiangonan’i Jesoa Kristy, ary fantany fa mpaminanin’ Andriamanitra i Joseph Smith.
Nandritra ny fotoana nanenjehana ireo Olomasina tao Missouri dia tany Kirtland, Ohio i Joseph Smith. Nomen’i Jesoa fanambarana iray i Joseph izay manazava ny antony niainan’ny Olomasina tao Missouri fahasahiranana.
Nolazain’i Jesoa fa tsy nankatò ny didy ny sasany tamin’ireo Olomasina. Tsy niray hina araka ny tokony hataon’ny vahoakan’i Ziona izy ireo. Nifanditra sy nifampiteny zavatra ratsy ny sasany tamin’izy ireo. Nialona ny sasany, ary tsy nety nizara ny sasany.
Na dia teo aza ireo olana ireo dia nilaza i Jesoa fa tia ny Olomasina ary tsy nanadino azy ireo Izy. Nilaza Izy fa tokony hahazo hery izy ireo satria ny madio am-po dia hiverina sy hanangana an’i Ziona indray andro any. Nasain’i Jesoa niomana amin’ny fotoana hiverenany eto an-tany indray ny Olomasina. Rehefa miverina Izy dia hifankatia sy hanana fiadanana ny olona. Ho voatahy ireo izay nenjehina noho ny fanarahana an’i Jesoa. Tsy hanana hery hakana fanahy ny olona i Satana. Tsy hisy ny fahafatesana araka ny fantatra ankehitriny. Ho faly ny rehetra.