အယ်လမာ ၄၁

အခန်းကြီး ၄၁

ရှင်ပြန်ထမြောက်ရာတွင်၊ လူသားတို့သည် အဆုံးမရှိသည့်ပျော်ရွှင်ခြင်း၊ သို့မဟုတ်၊ အဆုံးမရှိသည့်ဝမ်းနည်းပူဆွေးခြင်းအခြေအနေသို့ ထွက်လာကြ၏—ဆိုးညစ်ခြင်းသည် အဘယ်သောအခါကမျှ ပျော်ရွှင်ခြင်း မဖြစ်စဖူးပေ—လောကီဆိုင်ရာလူသားတို့သည် ဘုရားသခင်မရှိဘဲနှင့် လောကထဲမှာ နေကြ၏—လူတိုင်းသည် ပြန်လည်ပေါင်းစည်းရာတွင်၊ သေခြင်းရှိရာ၌ ရရှိခဲ့သည့် ဝိသေသလက္ခဏာများနှင့် ဂုဏ်ရည်တို့ကို တစ်ဖန်ပြန်၍လက်ခံရရှိကြ၏။ ဘီစီ ၇၄ ခန့်။

၁ ယခုမူကား၊ ငါ့သား၊ ပြောထားလေသော ပြန်လည်ဆောင်ယူခြင်းနှင့် စပ်လျဉ်း၍၊ သင့်ကိုပြောစရာ ငါ့မှာအတော်အသင့်ရှိ၏။ အကြောင်းမူကား၊ ရှုလော့၊ အချို့သောသူတို့သည် ကျမ်းစာများကို မှောက်လှန်၍၊ ဤအမှုကြောင့်၊ ကြီးစွာလမ်းလွဲကြလေပြီ။ သင့်စိတ်သည်လည်း ဤအမှုနှင့်စပ်လျဉ်း၍၊ စိုးရိမ်သည်ကို ငါသိမြင်၏။ သို့ရာတွင်၊ ရှုလော့၊ ငါသည် ထိုအမှုကို သင့်အား ရှင်းပြမည်။

၂ ငါ့သား၊ သင့်ကို ငါဆိုသည်ကား၊ ဘုရားသခင်၏တရားတော်မူခြင်းနှင့်စပ်လျဉ်း၍ ပြန်လည်ဆောင်ယူခြင်းအစီအစဉ် မရှိမဖြစ်လိုအပ်၏။ အကြောင်းမူကား၊ ခပ်သိမ်းသောအရာတို့သည် မိမိတို့သင့်လျော်ရာသို့ ပြန်လည်ဆောင်ယူခံရရန် မရှိမဖြစ်လိုအပ်၏။ ရှုလော့၊ လူသား၏စိတ်ဝိညာဉ်သည် မိမိကိုယ်ခန္ဓာသို့ ပြန်လည်ပေါင်းစည်းရမည့်အကြောင်းနှင့် ကိုယ်ခန္ဓာ၏အစိတ်အပိုင်းမှန်သမျှသည် ကိုယ်ခန္ဓာသို့ ပြန်လည်ပေါင်းစည်းရမည့်အကြောင်း မရှိမဖြစ်လိုအပ်၍၊ ခရစ်တော်၏တန်ခိုးတော်နှင့်ရှင်ပြန်ထမြောက်ခြင်းတို့အတိုင်း တရားမျှတ၏။

၃ ထို့အတူ၊ ဘုရားသခင်၏ တရားတော်မူခြင်းနှင့်စပ်လျဉ်း၍၊ မရှိမဖြစ်လိုအပ်သည်ကား၊ လူသားတို့သည် မိမိတို့အကျင့်များအတိုင်း တရားစီရင်ခံရကြမည်။ ယခုဘဝ၌ သူတို့အကျင့်များကောင်းမြတ်လျှင်၊ ထို့အတူ၊ သူတို့စိတ်နှလုံး၏ အလိုဆန္ဒများ ကောင်းမြတ်လျှင်၊ သူတို့သည်လည်း နောက်ဆုံးသောနေ့၌ ကောင်းမြတ်သည့်အရာသို့ ပြန်လည်ဆောင်ယူ ခံရလိမ့်မည်။

၄ သူတို့၏အကျင့်များ ဆိုးလျှင်၊ သူတို့သည် မကောင်းမှုအဖြစ် ပြန်လည်ဆောင်ယူခံရလိမ့်မည်။ ထို့ကြောင့်၊ ခပ်သိမ်းသောအရာတို့သည် ၎င်းတို့၏သင့်လျော်ရာသို့၊ အရာမှန်သမျှ မိမိပကတိကိုယ်သို့ ပြန်လည်ဆောင်ယူခံရ၍—သေခြင်းရှိရာကို သေခြင်းမရှိရာသို့၊ ပုပ်ပျက်ခြင်းကို မပုပ်ပျက်ခြင်းသို့ ထမြောက်စေသဖြင့်—ဘုရားသခင်၏နိုင်ငံတော်ကို အမွေခံရန် အဆုံးမရှိသည့်ပျော်ရွှင်ခြင်းသို့၊ သို့မဟုတ် နတ်ဆိုး၏နိုင်ငံကို အမွေခံရန် အဆုံးမရှိသည့်ဝမ်းနည်းပူဆွေးခြင်းသို့၊ တစ်ဖက်တွင်တစ်မျိုး၊ အခြားတစ်ဖက်တွင် အခြားတစ်မျိုး ထမြောက်စေလိမ့်မည်—

၅ တစ်ယောက်သောသူကို ပျော်ရွှင်ခြင်းအတွက်ရှိသည့် သူ၏အလိုဆန္ဒများအတိုင်း ပျော်ရွှင်ခြင်းသို့၊ သို့မဟုတ် ကောင်းမြတ်ခြင်းအတွက်ရှိသည့် သူ၏အလိုဆန္ဒများအတိုင်း ကောင်းမြတ်ခြင်းသို့ ထမြောက်စေခဲ့၏။ ထို့အတူ၊ အခြားသောသူကို မကောင်းမှုအတွက်ရှိသည့် သူ၏အလိုဆန္ဒများအတိုင်း၊ မကောင်းမှုသို့ ထမြောက်စေခဲ့၏။ အကြောင်းမူကား၊ သူသည် တစ်နေ့လုံး မကောင်းမှုကိုပြုရန် အလိုရှိခဲ့ပြီးလျှင်၊ ညဉ့်အချိန်ကျရောက်လာသောအခါ၊ ထိုကဲ့သို့ပင်၊ သူ၏မကောင်းကျိုးကို ရရှိလိမ့်မည်။

၆ အခြားတစ်ဖက်တွင်လည်း ထိုကဲ့သို့ပင်ဖြစ်၏။ သူသည် မိမိအပြစ်များမှ နောင်တရ၍၊ သူ့ဘဝ၏ အဆုံးတိုင်အောင် ဖြောင့်မတ်ခြင်းကို အလိုရှိလျှင်၊ ထိုကဲ့သို့ပင် ဖြောင့်မတ်ခြင်း အကျိုးကို ခံရလိမ့်မည်။

၇ ဤသူတို့သည်ကား၊ ကိုယ်တော်ရှင်၏ရွေးနှုတ်တော်မူခြင်း ခံရသူများဖြစ်၏။ ထိုမှတစ်ပါး၊ ဤသူတို့သည်ကား၊ ထိုအဆုံးမရှိသော မှောင်မိုက်၏ညဉ့်မှ နှုတ်ယူခံရသောသူများ၊ ကယ်လွှတ်ခံရသူများ ဖြစ်ကြ၏။ အကြောင်းမူကား၊ ရှုလော့၊ ကောင်းမှုကိုပြုသည်ဖြစ်စေ၊ မကောင်းမှုကိုပြုသည်ဖြစ်စေ၊ သူတို့သည် သူတို့ကိုယ်တိုင်၏ တရားသူကြီးများဖြစ်ကြ၏။

၈ ယခုတွင်၊ ဘုရားသခင်၏စီရင်ချက်များသည်ကား၊ ပြောင်းလဲ၍မရနိုင်သောအရာများဖြစ်၏။ ထို့ကြောင့်၊ လမ်းခရီးကို ပြင်ဆင်ထားသဖြင့်၊ ထိုလမ်းခရီး၌လျှောက်လိုသူ အဘယ်သူမဆို လျှောက်နိုင်ပြီးလျှင်၊ ကယ်တင်ခြင်းသို့ ရောက်နိုင်စေရန်ဖြစ်၏။

၉ ယခုမူကား၊ ရှုလော့၊ ငါ့သား၊ အပြစ်ကျူးလွန်ရန် ယခုတိုင်အောင် သင်စွန့်စားခဲ့လေသော ဩဝါဒအချက်များနှင့် စပ်လျဉ်းပြီး၊ ဘုရားသခင်ကို ဆန့်ကျင်၍၊ နောက်ထပ် စွန့်စားခြင်းမပြုတော့နှင့်။

၁၀ ပြန်လည်ဆောင်ယူခြင်းအကြောင်း ပြောထားလေသောကြောင့်၊ သင်သည် အပြစ်မှနေ၍ ပျော်ရွှင်ခြင်းသို့ ပြန်လည်ဆောင်ယူခံရလိမ့်မည်ဟု မထင်မှတ်နှင့်။ ရှုလော့၊ သင့်ကို ငါဆိုသည်ကား၊ ဆိုးညစ်ခြင်းသည် အဘယ်သောအခါကမျှ ပျော်ရွှင်ခြင်းမဖြစ်ခဲ့စဖူး။

၁၁ ယခုမူကား၊ ငါ့သား၊ ပကတိအခြေအနေ၌ ရှိသော သို့မဟုတ်၊ ငါဆိုလိုသည့်၊ လောကီဆိုင်ရာအခြေအနေ၌ရှိသော လူသားခပ်သိမ်းတို့သည် ခါးစွာသောသည်းခြေ၌လည်းကောင်း၊ ဒုစရိုက်အနှောင်အဖွဲ့တို့၌လည်းကောင်း ရှိကြ၏။ သူတို့သည် လောကထဲ၌ ဘုရားမဲ့နေသောသူများဖြစ်ကြ၏၊ ဘုရားသခင်၏သဘောကိုလည်း ဆန့်ကျင်ကြလေပြီ။ ထို့ကြောင့်၊ သူတို့သည် ပျော်ရွှင်ခြင်း၏ သဘောနှင့် ဆန့်ကျင်ရာ၌ ရှိကြ၏။

၁၂ ယခုမူကား၊ ရှုလော့၊ ပြန်လည်ဆောင်ယူခြင်းဟူသောစကား၏အနက်မှာ ပကတိအခြေအနေ၌ရှိသော အရာတစ်ခုကို ယူ၍၊ ထိုအရာ၏ ပကတိမဟုတ်သော အခြေအနေ၌ထားရန်၊ သို့မဟုတ်၊ ထိုအရာ၏ ပကတိသဘောနှင့် ဆန့်ကျင်ဘက်ဖြစ်သော အခြေအနေ၌ ထားရန် ဖြစ်သလော။

၁၃ အို ငါ့သား၊ ဤသို့မဟုတ်။ ပြန်လည်ဆောင်ယူခြင်းဟူသောစကား၏ အနက်သည်ကား၊ မကောင်းမှုအတွက် မကောင်းမှု၊ သို့မဟုတ် လောကီဆိုင်ရာအတွက် လောကီဆိုင်ရာ၊ သို့မဟုတ်၊ နတ်ဆိုးနှင့်ဆိုင်သောအရာအတွက် နတ်ဆိုးနှင့်ဆိုင်သောအရာ—ကောင်းမြတ်သောအရာအတွက် ကောင်းမြတ်ရာ၊ ဖြောင့်မတ်သောအရာအတွက် ဖြောင့်မတ်ရာ၊ တရားမျှတသောအရာအတွက် တရားမျှတရာ၊ ကရုဏာကြီးသော အရာအတွက် ကရုဏာကြီးရာသို့ တစ်ဖန်ပြန်၍ ဆောင်ယူခြင်းသာဖြစ်၏။

၁၄ ထို့ကြောင့်၊ ငါ့သား၊ သင်သည် သင်၏ညီအစ်ကိုတို့ကို ကရုဏာကြီးရမည့်အကြောင်း ဂရုပြုလော့။ တရားမျှတစွာ ဆက်ဆံလော့။ ဖြောင့်မတ်စွာတရားစီရင်၍၊ ကောင်းမြတ်သည်ကို အစဉ်မပြတ်ပြုလော့။ သင်သည် ဤအရာခပ်သိမ်းတို့ကို ပြုလျှင်၊ သင်၏အကျိုးကျေးဇူးကို လက်ခံရရှိလိမ့်မည်။ ထိုမှတစ်ပါး၊ သင့်ထံသို့တစ်ဖန် ပြန်ပေးသည့် ကရုဏာကို ရရှိလိမ့်မည်။ ထိုမှတစ်ပါး၊ သင့်ထံသို့ တစ်ဖန်ပြန်ပေးသည့် တရားမျှတခြင်းကို ရရှိလိမ့်မည်။ သင့်ထံသို့ တစ်ဖန်ပြန်ပေးသည့် ဖြောင့်မတ်သောစီရင်ချက်ကို ရရှိလိမ့်မည်။ ထို့အတူ၊ သင့်ထံသို့ ကောင်းမြတ်သောအကျိုးကျေးဇူးပေးသည်ကို တစ်ဖန်ရရှိလိမ့်မည်။

၁၅ အကြောင်းမူကား၊ သင်စေလွှတ်သောအရာသည် သင့်ထံသို့ တစ်ဖန်ပြန်လာ၍၊ ပြန်လည်ဆောင်ယူခံရလိမ့်မည်။ ထို့ကြောင့်၊ ပြန်လည်ဆောင်ယူခြင်းဟူသောစကားက အပြစ်ရှိသူကို ပို၍ ပြည့်စုံစွာပြစ်ဒဏ်ချမှတ်၏၊ အဘယ်နည်းနှင့်မျှ အပြစ်ကင်းစေမည်မဟုတ်။