အယ်လမာ ၄၅

ဟေလမန်လက်ထက်၌ သိမ်းဆည်းထားခဲ့သည့် သူ၏မှတ်တမ်းများအတိုင်း၊ ဟေလမန်လက်ထက်၌ နီဖိုင်းလူမျိုးများ၊ ထို့အတူ၊ သူတို့၏စစ်တိုက်ခြင်းများနှင့် ငြင်းခုံခြင်းများအကြောင်းမှတ်တမ်း။

အခန်းကြီး ၄၅ မှ ၆၂ အထိ ဖွဲ့စည်းပါဝင်၏။

အခန်းကြီး ၄၅

ဟေလမန်သည် အယ်လမာ၏စကားများကို ယုံကြည်၏—အယ်လမာသည် နီဖိုင်းအမျိုးသားတို့၏ ပျက်စီးခြင်းကို ပရောဖက်ပြု၍ဟော၏—သူသည် ထိုပြည်ကို ကောင်းချီးပေးလျက်၊ ကျိန်၏—အယ်လမာသည် မောရှေကဲ့သို့ပင်၊ ဝိညာဉ်တော်အားဖြင့် ဆောင်ယူတော်မူခြင်းကို ခံရနိုင်၏—အသင်းတော်၌ ငြင်းခုံခြင်း တိုးပွားလာ၏။ ဘီစီ ၇၃ ခန့်။

၁ ရှုလော့၊ ယခုတွင်၊ အချိန်တန်လာသောအခါ၊ နီဖိုင်းလူမျိုးတို့သည် လွန်စွာရွှင်လန်းဝမ်းမြောက်ကြ၏၊ အကြောင်းမူကား၊ ကိုယ်တော်ရှင်သည် သူတို့ကို သူတို့ရန်သူများလက်မှ တစ်ဖန်ကယ်လွှတ်တော်မူခဲ့၏။ ထို့ကြောင့်၊ သူတို့သည် သူတို့၏ဘုရားသခင်ကိုယ်တော်ရှင်အား ကျေးဇူးတော် ချီးမွမ်းကြ၏။ ထိုမှတစ်ပါး၊ များစွာအစာရှောင်၍ ဆုတောင်းကြ၏၊ ဘုရားသခင်အား အလွန်ကြီးစွာသော ဝမ်းမြောက်ခြင်းနှင့်လည်း ကိုးကွယ်ကြ၏။

၂ ဤသို့အားဖြင့်အချိန်တန်လာသောအခါ၊ နီဖိုင်းလူမျိုးတို့အပေါ်တရားသူကြီးများအုပ်စိုးခြင်း တစ်ဆယ်ကိုးနှစ်မြောက်တွင်၊ အယ်လမာသည် သူ၏သား ဟေလမန်ထံသို့လာ၍၊ ဆိုသည်မှာ သိမ်းဆည်းထားသည့် မှတ်တမ်းများအကြောင်း သင့်ကို ငါပြောခဲ့သည့်စကားများကို သင်ယုံကြည်သလောဟုမေးလျှင်၊

၃ ဟေလမန်ကလည်း၊ ဟုတ်ကဲ့ အကျွန်ုပ်ယုံကြည်ပါ၏ဟုဖြေ၏။

၄ အယ်လမာကလည်း၊ သင်သည် ကြွလာတော်မူမည့် ယေရှုခရစ်တော်ကို ယုံကြည်သလောဟု တစ်ဖန်မေး၏။

၅ သူကလည်း၊ ဟုတ်ကဲ့။ သင်ပြောလေသည့် စကားမှန်သမျှကို အကျွန်ုပ် ယုံကြည်ပါ၏ဟု ဖြေ၏။

၆ အယ်လမာကလည်း၊ သင်သည် ငါ၏မိန့်မှာချက်များကို စောင့်ထိန်းမည်လောဟု တစ်ဖန်မေး၏။

၇ သူကလည်း၊ ဟုတ်ကဲ့၊ သင်၏မိန့်မှာချက်များကို အကျွန်ုပ်စိတ်နှလုံး အကြွင်းမဲ့ဖြင့် စောင့်ထိန်းပါမည်ဟုဖြေ၏။

၈ ထို့နောက်တွင်၊ အယ်လမာက ဆိုလေသည်ကား၊ သင်သည် မင်္ဂလာရှိ၏။ ကိုယ်တော်ရှင်ကလည်း သင့်ကို ဤပြည်၌ အောင်မြင်စေလိမ့်မည်။

၉ သို့ရာတွင်၊ ရှုလော့၊ သင့်ကို ပရောဖက်ပြု၍ဟောစရာ ငါ့မှာအတော်အသင့်ရှိ၏။ သို့ရာတွင်၊ သင့်အား ငါပရောဖက်ပြု၍ဟောသည့်အရာကို မဖော်ပြရ။ ထိုမှတစ်ပါး၊ သင့်အား ငါပရောဖက်ပြု၍ဟောသည့်အရာသည် ဖော်ပြခံရမည်မဟုတ်၊ ပရောဖက်ပြုဟောချက်ကို ပြီးပြည့်စုံစေသည့်အချိန်အထိတိုင်အောင်ပင်တည်း။ ထို့ကြောင့်၊ ငါပြောမည့်စကားများကို ရေးလော့။

၁၀ ဤစကားများသည်ကား၊ ရှုလော့၊ ဤလူမျိုးပင်ဖြစ်သည့်၊ နီဖိုင်းအမျိုးသားတို့သည် သူတို့ထံ ယေရှုခရစ်တော်ကိုယ်တိုင် ထင်ရှားစွာပြတော်မူမည့် အချိန်မှ နှစ်ပေါင်းလေးရာကြာသောအခါ၌၊ ယုံကြည်မှုလျော့ပါးဆုတ်ယုတ်လာမည်ကို ငါ့၌ရှိသည့် ဗျာဒိတ်တော်ဝိညာဉ်အတိုင်း ငါသိမြင်၏။

၁၁ ထိုမှတစ်ပါး၊ ယင်းအချိန်၌၊ သူတို့သည် စစ်တိုက်ခြင်းများနှင့် ကာလနာဘေး၊ အမှန်စင်စစ်၊ နီဖိုင်းလူမျိုးတို့ ဆိတ်သုဉ်းသွားသည့်တိုင်အောင်ပင်၊ ငတ်မွတ်ခေါင်းပါးခြင်းဘေးနှင့် အသွေးသွန်းလောင်းခြင်းတို့ကို တွေ့ကြုံရလိမ့်မည်—

၁၂ ထိုမှတစ်ပါး၊ ဤအမှုသည်ကား၊ သူတို့ယုံကြည်မှုလျော့ပါးဆုတ်ယုတ်လာ၍၊ မှောင်မိုက်ခြင်းအမှုများ၊ ကိလေသာလွန်ကျူးခြင်းနှင့် အမျိုးမျိုးသောဒုစရိုက်များထဲသို့ လဲကျလိမ့်မည်ဖြစ်သောကြောင့်ပေတည်း။ ထိုမှတစ်ပါး၊ သင့်ကို ငါဆိုသည်ကား၊ သူတို့သည် ထိုမျှလောက်ကြီးစွာသော အလင်းနှင့် အသိပညာကို ဆန့်ကျင်၍ အပြစ်ပြုလိမ့်မည်ဖြစ်သောကြောင့်၊ ထိုမှတစ်ပါး၊ သင့်ကို ငါဆိုသည်ကား၊ ထိုကာလမှစ၍၊ ဤကြီးစွာသောဒုစရိုက် မကျရောက်မီ၊ လေးဆက်မြောက်သော မျိုးဆက်အားလုံး ကွန်လွန်သွားလိမ့်မည်မဟုတ်။

၁၃ ထိုကြီးစွာသောနေ့ ကျရောက်လာသောအခါ၊ ရှုလော့၊ ယခုရှိလေသူများ၊ သို့မဟုတ် နီဖိုင်းလူမျိုးတို့၌ ယခုရေတွက်ခြင်းကို ခံရသူတို့၏ အမျိုးအနွယ်တို့ နီဖိုင်းလူမျိုးတို့၌ ရေတွက်မခံရတော့မည့် အချိန်ကာလသည် မကြာမြင့်မီ ကျရောက်လာပေမည်။

၁၄ သို့ရာတွင်၊ ကိုယ်တော်ရှင်၏တပည့်တော်များဟု အခေါ်ခံရမည့်သူ အနည်းငယ်တို့မှတစ်ပါး၊ ကျန်ကြွင်းသောသူမှန်သမျှသည် ထိုကြီးစွာသောကြောက်မက်ဖွယ်နေ့၌၊ ဖျက်ဆီးမခံရ။ လာမန်အမျိုးသားတို့၌ ရေတွက်ခံရမည်၊ သူတို့ကဲ့သို့ဖြစ်လာလိမ့်မည်။ သူတို့ကို ဆိတ်သုဉ်းသွားသည့်တိုင်အောင်ပင် လာမန်အမျိုးသားတို့က လိုက်လိမ့်မည်။ ယခုမူကား၊ ဒုစရိုက်ကြောင့်၊ ဤပရောဖက်ပြုဟောချက်သည် ပြီးပြည့်စုံလိမ့်မည်။

၁၅ ယခုမူကား၊ အချိန်တန်လာသောအခါ၊ အယ်လမာသည် ဟေလမန်အား ဤအရာတို့ကို ပြောလေပြီးနောက်၊ သူနှင့် မိမိအခြားသော သားများကိုလည်း ကောင်းချီးပေး၏။ ဖြောင့်မတ်သောသူများအတွက် မြေကြီးကိုလည်း ကောင်းချီးပေး၏။

၁၆ သူပြောလေသည်မှာ၊ ကိုယ်တော်ရှင်ဘုရားသခင်မိန့်တော်မူလေသည်ကား ကျိန်ခြင်းသည် ဤပြည်၌ ရှိလိမ့်မည်၊ အမှန်စင်စစ်၊ ဤပြည်သည် ဆိုးညစ်စွာပြုသည့် ပြည်သား၊ အမျိုးစု၊ အသီးသီးဘာသာစကားကိုပြောသူနှင့် လူမျိုးမှန်သမျှ၊ လုံးလုံးရင့်မှည့်သောအခါ၊ သူတို့အတွက် ပျက်စီးခြင်းသို့တိုင်အောင်ရှိလိမ့်မည်ဟု ဖြစ်လေသတည်း။ ငါပြောလေသကဲ့သို့ပင် ဖြစ်လိမ့်မည်။ အကြာင်းမူကား၊ ဤအမှုမှာ၊ ထိုပြည်ပေါ်၌ရှိသည့် ဘုရားသခင်၏ကျိန်ခြင်းအမင်္ဂလာနှင့် ကောင်းချီးမင်္ဂလာများဖြစ်၏၊ ကိုယ်တော်ရှင်သည် အပြစ်တရားကို အနည်းဆုံးသောပမာဏဖြင့် အခွင့်ပေးခြင်းကိုပင် မစဉ်းစားနိုင်။

၁၇ ယခုမူကား၊ အယ်လမာသည် ဤစကားများကို ပြောခဲ့ပြီးလေလျှင်၊ အသင်းတော်ကို၊ အထူးသဖြင့်၊ ထိုအချိန်မှစ၍၊ ယုံကြည်ခြင်း၌ မြဲမြံစွာတည်သော သူခပ်သိမ်းတို့ကို ကောင်းချီးပေး၏။

၁၈ အယ်လမာသည်လည်း ဤအမှုကို ပြုပြီးလေလျှင်၊ မိလက်ပြည်ထဲသို့ သွားခြင်းငှာ၊ ဇရဟင်မလပြည်မှ ထွက်ခွာ၏။ ဤသို့အားဖြင့်အချိန်တန်လာသောအခါ၊ သူ့အကြောင်းကို မကြားရတော့။ သူ၏သေခြင်း၊ သို့မဟုတ် သင်္ဂြိုဟ်ခြင်း အကြောင်းနှင့်စပ်လျဉ်း၍၊ ငါတို့သိရခြင်းမရှိ။

၁၉ ရှုလော့၊ ငါတို့သိရသည်မှာ၊ သူသည် ဖြောင့်မတ်သောသူတစ်ဦး ဖြစ်ကြောင်းပေတည်း။ သူသည် မောရှေကဲ့သို့ပင် ဝိညာဉ်တော်အားဖြင့် ဆောင်ယူခြင်းကို သို့မဟုတ် ကိုယ်တော်ရှင်၏လက်တော်ဖြင့် သင်္ဂြိုဟ်ခြင်းကို ခံရသည်ဟူသောသတင်းစကားသည် အသင်းတော်ထဲ၌ ပျံ့နှံ့၏။ သို့ရာတွင်၊ ရှုလော့၊ ကျမ်းစာလာသည်ကား၊ ကိုယ်တော်ရှင်သည် မောရှေကို သူ့ထံသို့ ဆောင်ယူတော်မူခဲ့၏။ အယ်လမာကိုလည်း ဝိညာဉ်အားဖြင့် သူ့ထံ၌ လက်ခံသည်ဟု ငါတို့ထင်မှတ်ကြ၏။ ထို့ကြောင့်၊ ဤအကြောင်းရင်းကြောင့်ပင်၊ ငါတို့သည် သူ၏သေခြင်းနှင့် သင်္ဂြိုဟ်ခြင်းအကြောင်း အဘယ်အရာကိုမျှ မသိကြ။

၂၀ ယခုမူကား၊ အချိန်တန်လာသောအခါ၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်း တစ်ဆယ်ကိုးနှစ်မြောက်အစတွင်၊ ဟေလမန်သည် လူတို့၌ နှုတ်ကပတ်တော်ကို ဟောကြားခြင်းငှာ ထွက်သွား၏။

၂၁ အကြောင်းမူကား၊ ရှုလော့၊ လာမန်အမျိုးသားတို့နှင့်တိုက်သည့် သူတို့၏စစ်တိုက်ခြင်းများ၊ လူတို့၌ ရှိလေသည့် သေးငယ်သည့် ငြင်းခုံခြင်းနှင့် နှောင့်ယှက်ခြင်းများစွာတို့ကြောင့်၊ ဘုရားသခင်၏နှုတ်ကပတ်တော်ကို သူတို့၌ဟောကြားရမည်မှာ မရှိမဖြစ်လိုအပ်လာပေ၏။ ထိုမှတစ်ပါး၊ စည်းမျဉ်းတစ်ခုကိုလည်း အသင်းတော်တစ်ခုလုံး၌ တည်ထောင်ရပေမည်။

၂၂ ထို့ကြောင့်၊ ဟေလမန်နှင့် သူ၏ညီအစ်ကိုတို့သည် အသင်းတော်ကို ထိုပြည်တစ်ခုလုံး၌၊ အထူးသဖြင့်၊ ထိုပြည်တစ်လျှောက်ရှိ၊ နီဖိုင်းလူမျိုးတို့ပိုင်သည့် မြို့တိုင်း၌ တစ်ဖန်တည်ထောင်ခြင်းငှာ၊ ထွက်သွားကြ၏။ ဤသို့အားဖြင့်အချိန်တန်လာသောအခါ၊ သူတို့သည် ထိုပြည်တစ်လျှောက်လုံးရှိ၊ ခပ်သိမ်းသောအသင်းတော်တို့၌ ယဇ်ပုရောဟိတ်များနှင့် ဆရာများကို ခန့်အပ်ထားကြ၏။

၂၃ ယခုမူကား၊ အချိန်တန်လာသောအခါ၊ ဟေလမန်နှင့် သူ၏ညီအစ်ကိုတို့က အသင်းတော်များ၌ ယဇ်ပုရောဟိတ်များနှင့် ဆရာများကို ခန့်အပ်ထားလေပြီးနောက်တွင်၊ သူတို့ကြား၌ ငြင်းခုံခြင်းဖြစ်ပွားလာ၏၊ သူတို့သည် ဟေလမန်နှင့် သူ၏ညီအစ်ကိုတို့၏စကားကို ပမာဏမပြုလိုကြ။

၂၄ သို့ရာတွင်၊ သူတို့သည် အလွန်ကြီးစွာသော စည်းစိမ်ဥစ္စာများကြောင့်၊ စိတ်နှလုံး၌ ဘဝင်မြင့်၍၊ မာနတရားတိုးပွား၏။ ထို့ကြောင့်၊ ကိုယ်တိုင်၏အမြင်၌ ကြွယ်ဝလာလျက်၊ ဘုရားသခင်ရှေ့၌ ဖြောင့်မတ်စွာကျင့်ရန် သူတို့စကားကို ပမာဏမပြုလိုကြ။