အယ်လမာ ၅၁

အခန်းကြီး ၅၁

ဘုရင့်လူများသည် ဥပဒေကိုပြောင်းလဲ၍၊ ရှင်ဘုရင်တင်မြှောက်ရန် ကြိုးစား၏—ပါဟောရန်နှင့် လွတ်လပ်သူများသည် လူတို့၏မဲဆန္ဒအားဖြင့် ထောက်ခံမှုကို ရရှိ၏—မော်ရော်နိုင်းသည် ဘုရင့်လူများကို မိမိတို့တိုင်းပြည်ကို ကာကွယ်စေရန် သို့မဟုတ် အသေသတ်ခံရစေရန် အနိုင်အထက်စီရင်၏—အာမလိခိယနှင့် လာမန်အမျိုးသားတို့သည် အင်အားခိုင်မာသည့် မြို့များစွာကို သိမ်းယူကြ၏—တေအန်ကမ်သည် လာမန်အမျိုးသားတို့၏ကျူးကျော်ခြင်းကို ခုခံတိုက်ခိုက်၍ အာမလိခိယကို သူ၏တဲထဲ၌ ကွပ်မျက်၏။ ဘီစီ ၆၇–၆၆ ခန့်။

၁ ယခုမူကား၊ အချိန်တန်လာသောအခါ၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်း နှစ်ဆယ်ငါးနှစ်မြောက်အစတွင်၊ သူတို့သည် လေဟိလူမျိုးနှင့် မော်ရန်တန်လူမျိုးတို့ကြား၌ သူတို့ပြည်များနှင့်စပ်လျဉ်း၍ ငြိမ်းချမ်းခြင်းကို ထူထောင်လျက်၊ နှစ်ဆယ်ငါးနှစ်မြောက်ကို ငြိမ်းချမ်းခြင်းဖြင့်စတင်၏။

၂ သို့သော်လည်း၊ သူတို့သည် ထိုပြည်၌ အလုံးစုံသောငြိမ်းချမ်းခြင်းကို ကြာရှည်စွာ မထိန်းသိမ်းပေ။ အကြောင်းမူကား၊ တရားသူကြီးချုပ်ပါဟောရန်နှင့်စပ်လျဉ်း၍၊ ထိုလူတို့ကြား၌ ငြင်းခုံခြင်း အစပြု၏။ ရှုလော့၊ ဥပဒေ၏အချို့သောအချက်များကို ပြောင်းလဲလိုသူ တစ်ချို့ ရှိ၏။

၃ သို့ရာတွင်၊ ရှုလော့၊ ပါဟောရန်သည် ဥပဒေကို မပြောင်းလဲလို၊ ပြောင်းလဲရန်လည်း အခွင့်မပေးလို။ ထို့ကြောင့်၊ ဥပဒေကို ပြောင်းလဲခြင်းနှင့်စပ်လျဉ်း၍ အသနားခံခြင်းတို့နှင့်အတူ၊ မဲဆန္ဒအားဖြင့် ဖော်ပြသောသူတို့ကို စေ့စေ့နားမထောင်ချေ။

၄ ထို့ကြောင့်၊ ဥပဒေကို ပြောင်းလဲစေရန် အလိုရှိသောသူတို့သည် သူ့ကို အမျက်ထွက်ပြီး၊ ထိုပြည်အပေါ် တရားသူကြီးချုပ် ဖြစ်စေရန် အလိုမရှိကြတော့။ ထို့ကြောင့်သူတို့၌ ထိုအမှုနှင့်စပ်လျဉ်း၍ အမျက်ပါသောငြင်းခုံခြင်း ဖြစ်ပေါ်လာ၏။ သို့ရာတွင်၊ အသွေးသွန်းလောင်းခြင်းသို့ မရောက်။

၅ ဤသို့အားဖြင့်အချိန်တန်လာသောအခါ၊ ပါဟောရန်ကို တရားပလ္လင်မှ ဖယ်ရှားစေရန် အလိုရှိသောသူများကို ဘုရင့်လူများဟု ခေါ်၏။ အကြောင်းမူကား၊ သူတို့သည် လွတ်လပ်သောအစိုးရကို ဖျက်ဆီးခြင်းနည်း အားဖြင့် ဥပဒေကို ပြောင်းလဲစေရန်နှင့် ထိုပြည်အပေါ်၌ ဘုရင်တစ်ပါးကို တင်မြှောက်ရန် အလိုရှိလေ၏။

၆ ထိုပြည်အပေါ်၌ ပါဟောရန်ကို တရားသူကြီးချုပ်အဖြစ် ဆက်၍ရှိစေရန် အလိုရှိသောသူများသည်လည်း မိမိတို့အပေါ်၌ လွတ်လပ်သူများဟူသောအမည်ကို ခံယူ၏။ ထိုကဲ့သို့အားဖြင့်၊ သူတို့၌ ကွဲပြားခြင်း ရှိလေ၏။ အကြောင်းမူကား၊ လွတ်လပ်သူများသည် သူတို့၏အခွင့်အရေးများနှင့် သူတို့ဘာသာတရား၏အထူးအခွင့်အရေးများကို လွတ်လပ်သောအစိုးရအားဖြင့် ထိန်းသိမ်းမည်ဟု ကျိန်ဆိုကြ၏၊ သို့မဟုတ်၊ ပဋိညာဉ်ပြုကြလေ၏။

၇ ဤသို့အားဖြင့်အချိန်တန်လာသောအခါ၊ ဤအမှုအကြောင်း သူတို့၏ငြင်းခုံခြင်းကို လူတို့၏မဲဆန္ဒအားဖြင့် ဖြေရှင်း၏။ ဤသို့အားဖြင့်အချိန်တန်လာသောအခါ၊ လူတို့၏မဲဆန္ဒမှာ လွတ်လပ်သူများကို နှစ်သက်၍၊ တရားပလ္လင်ကို ပါဟောရန်ထိန်းသိမ်းထားခြင်းက ပါဟောရန်၏ညီအစ်ကိုများ၊ ထို့အတူ၊ လွတ်လပ်ခြင်းကို မြတ်နိုးသည့် များစွာသောလူများနှင့် ဘုရင့်လူများကို တိတ်ဆိတ်သွားစေသူတို့အား များစွာသော ရွှင်လန်းဝမ်းမြောက်ခြင်းကို ဖြစ်စေလျက်၊ ထိုသူတို့သည်လည်း မဆန့်ကျင်ဝံ့ကြ၊ လွတ်လပ်ခွင့်အမှုကို ထိန်းသိမ်းစေရန် အနိုင်ပြုခြင်းသာခံရလေ၏။

၈ ယခုတွင်၊ ဘုရင်တို့ကို နှစ်သက်လေသူတို့သည်ကား၊ မျိုးရိုးကြီးမြင့်သောသူများဖြစ်၍၊ ဘုရင်ဖြစ်ရန် ကြိုးစားအားထုတ်ကြ၏။ ထို့အတူ၊ လူတို့အပေါ် တန်ခိုးနှင့် အခွင့်အာဏာကို ရရှိရန်ကြိုးစားအားထုတ်သူများ၏ ထောက်ခံခြင်းကို သူတို့ရရှိလေ၏။

၉ သို့ရာတွင်၊ ရှုလော့၊ နီဖိုင်းလူမျိုးတို့၌ ထိုကဲ့သို့သောငြင်းခုံခြင်းများရှိရခြင်းကြောင့် ဤကာလမှာ၊ အလွန်အရေးကြီးသောအချိန်ဖြစ်၏။ အကြောင်းမူကား၊ ရှုလော့၊ အာမလိခိယသည် နီဖိုင်းလူမျိုးတို့ကို ဆန့်ကျင်၍၊ လာမန်လူမျိုးတို့၏စိတ်နှလုံးကို တစ်ဖန်နှိုးဆော်လျက်၊ စစ်သူရဲတို့ကို မိမိပြည်၏ခပ်သိမ်းသောအရပ်တို့မှ အတူတကွစုဝေးလျက်၊ လက်နက်များထောက်ပံ့၍၊စစ်တိုက်ခြင်းအတွက် လုံ့လဝီရိယရှိသမျှနှင့် ပြင်ဆင်၏။ အကြောင်းမူကား၊ သူသည် မော်ရော်နိုင်း၏အသွေးကို သောက်ရန် ကျိန်ဆို၏။

၁၀ သို့ရာတွင်၊ ရှုလော့၊ သူပြုလေသည့် ကတိသည် အလောတကြီးပြုသောအရာဖြစ်ကြောင်းကို ငါတို့ သိမြင်ကြလိမ့်မည်။ အဘယ်သို့ပင်ဖြစ်စေ၊ သူသည် နီဖိုင်းအမျိုးသားတို့ကို ဆန့်ကျင်၍ စစ်တိုက် ခြင်းငှာ သူ့ကိုယ်သူနှင့် သူ့တပ်များကို ပြင်ဆင်၏။

၁၁ ယခုတွင်၊ နီဖိုင်းအမျိုးသားတို့၏လက်အားဖြင့်၊ ကွပ်မျက်ခံရလေသည့် ထောင်ပေါင်းများစွာသောသူတို့ကြောင့်၊ သူ၏တပ်များသည် ယခင်က ရှိလေသလောက် အလွန်မကြီးမားချေ။ သို့ရာတွင်၊ သူတို့၏ကြီးစွာသော ဆုံးရှုံးခြင်းရှိသော်ငြားလည်း၊ အာမလိခိယသည် အံ့မခန်းချီးမွမ်းဖွယ်ကောင်းအောင်ကြီးမားသောတပ်ကို အတူတကွစုဝေးသဖြင့်၊ ဇရဟင်မလပြည်သို့ ဆင်းလာရန် ကြောက်ရွံ့ခြင်းမရှိ။

၁၂ ထိုမှတစ်ပါး၊ အာမလိခိယသည် သူကိုယ်တိုင် လာမန်အမျိုးသားတို့၏ တပ်ဦးမှနေ၍၊ ဆင်းလာ၏။ ထိုအမှုသည်ကား၊ တရားသူကြီးများအုပ်စိုးခြင်းနှစ်ဆယ်ငါးနှစ်မြောက်၌ ဖြစ်လေ၏။ တရားသူကြီးချုပ် ပါဟောရန်နှင့်စပ်လျဉ်းသည့် အမှုများကို သူတို့ဖြေရှင်းရန်အစပြုလေသည့် အချိန်လည်းဖြစ်၏။

၁၃ ဤသို့အားဖြင့်အချိန်တန်လာသောအခါ၊ ဘုရင့်လူများဟုခေါ်သူတို့သည် လာမန်အမျိုးသားတို့ သူတို့ကို ဆန့်ကျင်၍စစ်တိုက်ရန် ဆင်းလာနေကြောင်းကို ကြားလျှင်၊ စိတ်နှလုံး၌ ဝမ်းသာကြ၏။ လက်နက်စွဲကိုင်ရန်လည်း ငြင်းပယ်ကြ၏။ အကြောင်းမူကား၊ သူတို့သည် တရားသူကြီးချုပ်နှင့် လွတ်လပ်ခြင်းကိုမြတ်နိုးသောလူတို့ကို အလွန်အမျက်ထွက်လေသဖြင့်၊ သူတို့တိုင်းပြည်ကို ကာကွယ်ရန် လက်နက်မစွဲကိုင်လိုကြ။

၁၄ ဤသို့အားဖြင့်အချိန်တန်လာသောအခါ၊ မော်ရော်နိုင်းသည် ဤအမှုကိုမြင်လျှင်၊ ထို့အတူ၊ လာမန်အမျိုးသားတို့ ထိုပြည်၏နယ်နိမိတ်ထဲသို့ ဝင်လာကြသည်ကိုလည်းမြင်လျှင်၊ ကာကွယ်စောင့်မခြင်းငှာ၊ အလွန်များစွာသောလုံ့လဝီရိယနှင့် သူအလုပ်လုပ်ပေးသည့် ထိုလူတို့၏ ခေါင်းမာခြင်းကြောင့်၊ လွန်စွာအမျက်ထွက်၏။ ထိုမှတစ်ပါး၊ လွန်စွာအမျက်ထွက်၍၊ သူ၏စိတ်ဝိညာဉ်သည် ထိုသူတို့တစ်ဖက်၌ အမျက်နှင့်ပြည့်လေ၏။

၁၅ ဤသို့အားဖြင့်အချိန်တန်လာသောအခါ၊ လူတို့၏မဲဆန္ဒနှင့် အသနားခံခြင်းကို ထိုပြည်၏အုပ်ချုပ်သူ ဖတ်ပါမည့်အကြောင်းနှင့် သူ (မော်ရော်နိုင်း) အား၊ သူတို့တိုင်းပြည်ကို ကာကွယ်ခြင်းငှာ၊ ထိုသဘောကွဲလွဲသူတို့ကို အနိုင်အထက်စီရင်ရန်၊ သို့မဟုတ်၊ သတ်ရန် အခွင့်ပေးပါမည့်အကြောင်း တောင်းဆိုလျက်ပို့လွှတ်၏။

၁၆ အကြောင်းမူကား၊ ထိုအမှုမှာ လူတို့၌ ယင်းကဲ့သို့သော ရန်တွေ့ခြင်းများနှင့် ငြင်းခုံခြင်းများကို အဆုံးသတ်ခြင်းငှာ၊ သူ၏ပထမဦးဆုံးသော ဂရုစိုက်ခြင်းဖြစ်၏။ အကြောင်းမူကား၊ ရှုလော့၊ ဤအမှုမှာ၊ ယခင်က သူတို့၏အလုံးစုံသောပျက်စီးခြင်း၏ အကြောင်းရင်း ဖြစ်ဖူးလေပြီ။ ဤသို့အားဖြင့်အချိန်တန်လာသောအခါ၊ လူတို့၏မဲဆန္ဒအတိုင်း အခွင့်ရလေ၏။

၁၇ ဤသို့အားဖြင့်အချိန်တန်လာသောအခါ၊ ထိုဘုရင့်လူများအား ဆန့်ကျင်တိုက်ခိုက်လျက်၊ ထိုသူတို့၏မာနတရားနှင့် မြင့်မြတ်ခြင်းကို ဖြိုချခြင်းငှာ၊ ထိုသူတို့ကို မြေကြီးသို့ ဆွဲချရန်၊ သို့မဟုတ်၊ ထိုသူတို့ လက်နက်စွဲကိုင်၍ လွတ်လပ်ခြင်းအမှုကို ထောက်မစေရမည့်အကြောင်း မော်ရော်နိုင်းသည် သူ့တပ်ကို အမိန့်ပေး၏။

၁၈ ဤသို့အားဖြင့်အချိန်တန်လာသောအခါ၊ တပ်များသည်လည်း သူတို့ကို ဆန့်ကျင်၍ချီတက်ကြ၏။ သူတို့၏မာနတရားနှင့် မြင့်မြတ်ခြင်းကို ဖြိုချသဖြင့်၊ မော်ရော်နိုင်း၏လူများကို ဆန့်ကျင်၍တိုက်ခိုက်ရန်၊ စစ်တိုက်ရာလက်နက်များကို သူတို့မြှောက်သောအခါ ခုတ်ချ၍ မြေကြီးသို့ ဆွဲချခံရလေ၏။

၁၉ ဤသို့အားဖြင့်အချိန်တန်လာသောအခါ၊ ဓားဖြင့် ခုတ်ချခံရလေသည့် သဘောကွဲလွဲသူ လေးထောင်ရှိလေ၏။ တိုက်ပွဲ၌ ကွပ်မျက်မခံရလေသူ၊ သူတို့၏ခေါင်းဆောင်တို့သည်လည်း ဖမ်းဆီး၍၊ ထောင်ထဲ၌လှောင်ထားသည်ကို ခံရလေ၏။ အကြောင်းမူကား၊ ဤကာလ၌ သူတို့၏အမှုများကို စစ်ဆေးရာအတွက် အချိန်မရှိ။

၂၀ ထိုသဘောကွဲလွဲသူတို့မှ ကျန်ကြွင်းသောသူတို့သည်လည်း ဓားဖြင့်မြေကြီးသို့ ခုတ်ချ ခံရမည့်အစား၊ လွတ်လပ်ခြင်းအလံသို့ အရှုံးပေးသဖြင့်၊ လွတ်လပ်ခြင်းကမ္ပည်းစာကို သူတို့လင့်စင်များနှင့် သူတို့မြို့များ၌ လွှင့်ထူစေရန်၊ ထို့အတူ သူတို့၏တိုင်းပြည်ကို ကာကွယ်ရာ၌ လက်နက်စွဲကိုင်စေရန် အနိုင်အထက်စီရင် ခံရလေ၏။

၂၁ ထိုကဲ့သို့အားဖြင့်၊ မော်ရော်နိုင်းသည် ထိုဘုရင့်လူများကို အဆုံးသတ်သဖြင့်၊ ဘုရင့်လူများဟူသော အမည်ကို ခေါ်စရာ တစ်ခုမျှမရှိလေတော့။ ထိုကဲ့သို့အားဖြင့်၊ သူသည် မျိုးရိုးမြင့်မြတ်ခြင်းအခွင့်ကို တောင်းဆိုသောထိုလူတို့၏ ခေါင်းမာခြင်းနှင့် မာနတရားတို့ကို အဆုံးသတ်၏။ သို့ရာတွင်၊ သူတို့ကိုယ်ကို သူတို့ညီအစ်ကိုများကဲ့သို့ နှိမ့်ချစေရန်နှင့် သူတို့ကျွန်ခံရာမှလွတ်လပ်ခွင့်အတွက် ရဲရင့်စွာတိုက်ခိုက်စေရန် နှိမ့်ချခံရလေ၏။

၂၂ ရှုလော့၊ အချိန်တန်လာသောအခါ၊ မော်ရော်နိုင်းသည် သူ့လူမျိုးတို့ ၌ စစ်တိုက်ခြင်းများနှင့် ရန်တွေ့ခြင်းများကို ထိုကဲ့သို့ အားဖြင့် ပယ်ရှင်း၍၊ သူတို့ကို ငြိမ်းချမ်းခြင်းနှင့် ယဉ်ကျေးမှုတို့အားဖြင့် လွှမ်းမိုးလျက်၊ လာမန်အမျိုးသားတို့ကို ဆန့်ကျင်၍စစ်တိုက်ခြင်းအတွက် ပြင်ဆင်ရန် စည်းမျဉ်းများကို ပြုလျက်ရှိစဉ်တွင်၊ ရှုလော့၊ လာမန်အမျိုးသားတို့သည် ပင်လယ်ကမ်းနားအနီး နယ်နိမိတ်တို့ ၌ ရှိလေသည့် မော်ရော်နိုင်းပြည်ထဲသို့ ဝင်လာကြ၏။

၂၃ ဤသို့အားဖြင့်အချိန်တန်လာသောအခါ၊ မော်ရော်နိုင်းမြို့ ၌ နီဖိုင်းအမျိုးသားတို့သည် လုံလုံလောက်လောက်အားမကြီးကြ။ ထို့ကြောင့်၊ အာမလိခိယက များစွာသောသူတို့ကို မောင်းထုတ်၍၊ ကွပ်မျက်လျက်ရှိ၏။ ဤသို့အားဖြင့်အချိန်တန်လာသောအခါ၊ အာမလိခိယသည် ထိုမြို့ကို၊ အမှန်စင်စစ်၊ သူတို့၏ခပ်သိမ်းသော ခံတပ်များကို သိမ်းယူ၏။

၂၄ မော်ရော်နိုင်းမြို့၏အပြင်သို့ ထွက်ပြေးသောသူတို့သည်လည်း နီဖိုင်းဟမြို့သို့ လာကြ၏။ ထို့အတူ၊ လေဟိမြို့မှလူတို့သည်လည်း သူတို့ကိုယ်သူတို့ အတူတကွစုဝေးလျက်၊ ပြင်ဆင်ခြင်းများ ပြုလုပ်၍၊ လာမန်အမျိုးသားတို့နှင့် စစ်တိုက်ရန် အဆင်သင့်ဖြစ်လေ၏။

၂၅ သို့ရာတွင်၊ အချိန်တန်လာသောအခါ၊ အာမလိခိယသည် လာမန်အမျိုးသားတို့အား နီဖိုင်းဟမြို့ကို ဆန့်ကျင်၍ စစ်တိုက်သွားစေရန် အခွင့်မပေး၊ မြို့တိုင်း၌ ထိန်းသိမ်းကာကွယ်စေရန် လူတို့ကို ချန်ထားလျက်၊ သူတို့ကို ပင်လယ်ကမ်းနားအနီး၌သာ နေစေ၏။

၂၆ ထိုကဲ့သို့အားဖြင့်၊ သူသည် နီဖိုင်းဟမြို့၊ လေဟိမြို့၊ မော်ရန်တန်မြို့၊ ဩမနာမြို့၊ ဂိဒမြို့နှင့် မြူးလက်မြို့တို့ကို ဆက်၍ သိမ်းယူ၏။ ထိုခပ်သိမ်းသော မြို့များသည် ပင်လယ်ကမ်းနားအနီး အရှေ့အရပ် နယ်နိမိတ်တို့၌ ရှိလေ၏။

၂၇ ထိုကဲ့သို့အားဖြင့် လာမန်အမျိုးသားတို့သည် အာမလိခိယ၏စဉ်းလဲခြင်းအားဖြင့်၊ သူတို့၏မရေမတွက်နိုင်သောဗိုလ်ခြေတို့အားဖြင့် များစွာသောမြို့များကို ရရှိလေ၏။ ထိုမြို့အားလုံးကို မော်ရော်နိုင်း၏ခံတပ်များအတိုင်း ခိုင်ခိုင်ခံ့ခံ့ အင်အားခိုင်မာစေ၏။ ထိုမြို့အားလုံးသည် လာမန်အမျိုးသားတို့အတွက် အခိုင်အမာစခန်းများအဖြစ်ရှိ၏။

၂၈ ဤသို့အားဖြင့်အချိန်တန်လာသောအခါ၊ သူတို့သည် နီဖိုင်းအမျိုးသားတို့ကို သူတို့ရှေ့မှ မောင်းထုတ်လျက်၊ များစွာသောသူတို့ကို ကွပ်မျက်လျက်၊ အလျှံပယ်ပြည်၏နယ်နိမိတ်သို့ ချီတက်၏။

၂၉ သို့ရာတွင်၊ အချိန်တန်လာသောအခါ၊ သူတို့သည် မော်ရန်တန်ကိုကွပ်မျက်လေသူ၊ သူနှင့်အတူထွက်ပြေးသည့် သူ့လူတို့ကို ဟန့်တားသည့်သူတည်းဟူသော တေအန်ကမ်နှင့် ရင်ဆိုင်ရကြ၏။

၃၀ ဤသို့အားဖြင့်အချိန်တန်လာသောအခါ၊ အာမလိခိယကိုလည်း မြောက်မြားစွာသောတပ်ဖြင့် အလျှံပယ်ပြည်နှင့်အတူ၊ မြောက်ဘက်လားရာပြည်ကို သိမ်းယူနိုင်ခြင်းငှာ ချီတက်လျက်ရှိစဉ် ဟန့်တား၏။

၃၁ သို့ရာတွင်၊ ရှုလော့၊ သူသည် တေအန်ကမ်နှင့် သူ၏လူတို့အားဖြင့် ခုခံတိုက်ခိုက်ခံရ၍၊ စိတ်ပျက်ခြင်းနှင့် ရင်ဆိုင်ရ၏။ အကြောင်းမူကား၊ သူတို့သည် ကြီးစွာသောစစ်သူရဲများဖြစ်၏။ တေအန်ကမ်၏လူတိုင်းသည် ခွန်အားအရာနှင့် စစ်တိုက်ကျွမ်းကျင်မှု၌ လာမန်အမျိုးသားတို့ထက် သာလွန်သဖြင့်၊ လာမန်အမျိုးသားတို့အပေါ်၌ အခွင့်သာခြင်းကို ရကြ၏။

၃၂ ဤသို့အားဖြင့်အချိန်တန်လာသောအခါ၊ သူတို့သည် တိုက်ခိုက်၍၊ မှောင်မိုက်သည့်တိုင်အောင်ပင် ကွပ်မျက်ကြ၏။ ဤသို့အားဖြင့်အချိန်တန်လာသောအခါ၊ တေအန်ကမ်နှင့် သူ၏လူတို့သည် သူတို့၏တဲများကို အလျှံပယ်ပြည်၏နယ်နိမိတ်တို့၌ ဆောက်ကြ၏။ အာမလိခိယကလည်း သူ၏တဲများကို ပင်လယ်ကမ်းနားအနီး ကမ်းခြေ၌ ဆောက်၏။ ဤကဲ့သို့အားဖြင့် မောင်းထုတ်ခံရကြ၏။

၃၃ ဤသို့အားဖြင့်အချိန်တန်လာသောအခါ၊ ညဉ့်အချိန်သို့ ရောက်လာခဲ့လေလျှင်၊ တေအန်ကမ်နှင့် သူ၏ကျွန်သည် ညဉ့်အချိန်၌ တိတ်တဆိတ်အပြင်သို့ထွက်၍၊ အာမလိခိယ၏တပ်စခန်းထဲသို့ ဝင်ရောက်ကြ၏။ ရှုလော့၊ နေ့၏အပူနှင့် အလုပ်လုပ်ခြင်းတို့ကြောင့်ဖြစ်သည့် သူတို့၏များစွာသောပင်ပန်းခြင်းကြောင့်၊ အိပ်ပျော်ခြင်းက သူတို့ကိုလွှမ်းမိုးလေ၏။

၃၄ ဤသို့အားဖြင့်အချိန်တန်လာသောအခါ၊ တေအန်ကမ်သည် မင်းကြီး၏တဲထဲသို့ လျှို့ဝှက်စွာ တိတ်တဆိတ်ဝင်၍၊ လှံတိုဖြင့်မင်းကြီး၏နှလုံးကို ထိုး၏။ မင်းကြီးကို ရုတ်တရက် သေစေသဖြင့်၊ သူ့ကျွန်များကို မနှိုးခဲ့။

၃၅ သူသည်လည်း မိမိတပ်စခန်းသို့ လျှို့ဝှက်စွာ တစ်ဖန်ပြန်လာ၏။ ရှုဦးလော့၊ သူ၏လူတို့ အိပ်ပျော်လျက်ရှိသဖြင့်၊ နှိုး၍၊ သူပြုခဲ့လေသမျှကို ပြောပြ၏။

၃၆ လာမန်အမျိုးသားတို့ နိုးလာပြီး မိမိတို့ကို လာ၍တိုက်ခိုက်ကြမည်ကို စိုးရိမ်သဖြင့်၊ သူ၏တပ်များကိုလည်း အသင့်ပြင်ထားစေ၏။

၃၇ ထိုကဲ့သို့အားဖြင့်၊ နီဖိုင်းလူမျိုးတို့အပေါ် တရားသူကြီးများအုပ်စိုးခြင်း နှစ်ဆယ်ငါးနှစ်မြောက် ပြီးဆုံး၏။ ထိုကဲ့သို့အားဖြင့် အာမလိခိယ၏ဘဝ ပြီးဆုံး၏။