အယ်လမာ ၄၆

အခန်းကြီး ၄၆

အာမလိခိယသည် ရှင်ဘုရင်ဖြစ်ရန် လျှို့ဝှက်ကြံစည်၏—မော်ရော်နိုင်းသည် လွတ်လပ်ခြင်းကမ္ပည်းစာကို လွှင့်၏—သူသည် လူတို့အား သူတို့ဘာသာတရားကို ကာကွယ်ရန် စုရုံး၏—မှန်ကန်သောယုံကြည်သူများကို ခရစ်ယာန်များဟု ခေါ်၏—ယောသပ်အမျိုး၏ ကျန်ကြွင်းသောသူတို့သည် ကာကွယ်စောင့်မခြင်းကို ခံရမည်—သဘောကွဲလွဲသူများနှင့် အာမလိခိယသည် နီဖိုင်းပြည်သို့ ထွက်ပြေး၏—လွတ်လပ်ခွင့်အမှုကို မထောက်မလိုသူတို့သည် အသေသတ်ခံရ၏။ ဘီစီ ၇၃–၇၄ ခန့်။

၁ ဤသို့အားဖြင့်အချိန်တန်လာသောအခါ၊ ဟေလမန်နှင့် သူ၏ညီအစ်ကိုတို့၏စကားများကို စေ့စေ့နားမထောင်လိုသူမှန်သမျှသည် မိမိတို့ညီအစ်ကိုများတစ်ဖက်၌ အတူတကွ စုဝေးကြ၏။

၂ ယခုမူကား၊ ရှုလော့၊ သူတို့သည် လွန်စွာအမျက်ထွက်၍၊ ညီအစ်ကိုတို့ကို ကွပ်မျက်ရန် သန္နိဌာန်ချကြ၏။

၃ ယခုတွင်၊ သူတို့ညီအစ်ကိုတို့ကိုဆန့်ကျင်၍ အမျက်ထွက်သောသူတို့၏ခေါင်းဆောင်သည် ကြီးမား၍၊ အားကြီးသောသူတစ်ဦးဖြစ်၏။ သူ၏အမည်မှာ အာမလိခိယဖြစ်၏။

၄ အာမလိခိယသည်လည်း ရှင်ဘုရင်ဖြစ်ရန် အလိုရှိ၏။ အမျက်ထွက်သော ထိုလူတို့ကလည်း၊ သူ့ကို မိမိတို့၏ရှင်ဘုရင်ဖြစ်စေခြင်းငှာ အလိုရှိကြ၏။ သူတို့မှ သာ၍များသောသူတို့သည် အောက်တရားသူကြီးများ ဖြစ်၏၊ အခွင့်အာဏာကို ရရှိခြင်းငှာလည်း ကြိုးစားအားထုတ်နေကြ၏။

၅ သူတို့သည် အာမလိခိယကို ထောက်မ၍၊ သူတို့၏ရှင်ဘုရင်ဖြစ်စေရန် တင်မြှောက်လျှင်၊ သူတို့အား လူတို့အပေါ် အုပ်စိုးသူများ ဖြစ်စေမည်ဟူသော သူ၏မြှောက်ပင့်ခြင်းတို့ဖြင့် ပို့ဆောင်သည်ကိုလည်း ခံရလေပြီ။

၆ ထိုကဲ့သို့အားဖြင့်၊ သူတို့သည် ဟေလမန်နှင့် သူ့ ညီအစ်ကိုတို့၏ဟောပြောခြင်းများ ရှိသော်ငြားလည်း၊ ထိုမှတစ်ပါး၊ အသင်းတော်၌ ယဇ်ပုရောဟိတ်မင်းများဖြစ်၍၊ အသင်းတော်အပေါ်၌ သူတို့၏ အလွန်ကြီးစွာသော ဂရုစိုက်ခြင်းရှိသော်ငြားလည်း၊ အာမလိခိယအားဖြင့်၊ ကူးပြောင်းခြင်းသို့ လှည့်ဖြားခေါ်ဆောင်သွားခံရကြ၏။

၇ အာမလိခိယ၏ မြှောက်ပင့်သောစကားများကို ယုံကြည်သူတို့လည်း အသင်းတော်ထဲ၌ များစွာရှိ၏။ ထို့ကြောင့်၊ သူတို့သည် အသင်းတော်မှပင် ခွဲထွက်၏။ ထိုကဲ့သို့အားဖြင့်၊ နီဖိုင်းလူမျိုးတို့၏အမှုအမျိုးမျိုးတို့သည်ကား၊ လာမန်အမျိုးသားတို့အပေါ်၌ သူတို့၏ ကြီးစွာသောအောင်နိုင်ခြင်း၊ ကိုယ်တော်ရှင်၏လက်တော်အားဖြင့် သူတို့၏လွတ်မြောက်မှုကြောင့် ရရှိလေသည့် သူတို့၏ကြီးစွားသော ရွှင်လန်းဝမ်းမြောက်ခြင်းတို့ ရှိသော်ငြားလည်း၊ အလွန်မသေမချာမရေမရာနှင့် ဘေးအန္တရာယ်များလှ၏။

၈ ထိုကဲ့သို့အားဖြင့်၊ လူသားတို့သည် သူတို့၏ဘုရားသခင်ကိုယ်တော်ရှင်ကို မေ့လျော့ရန် အဘယ်မျှလောက် လျင်မြန်သည်ကိုလည်းကောင်း၊ ထိုမှတစ်ပါး၊ ဒုစရိုက်ကိုပြုရန်နှင့် မာရ်နတ်အားဖြင့် လှည့်ဖြားခေါ်ဆောင်သွား ခံရစေရန် အဘယ်မျှလောက် လျင်မြန်သည်ကိုလည်းကောင်း ငါတို့သိမြင်ကြ၏။

၉ ထိုမှတစ်ပါး၊ ကြီးစွာသောဆိုးညစ်ခြင်းကို အလွန်ဆိုးညစ်သောသူတစ်ဦးက လူသားတို့၌ ဖြစ်ပေါ်စေရန် ပြုနိုင်ကြောင်းကိုလည်း ငါတို့သိမြင်ကြ၏။

၁၀ ထိုမှတစ်ပါး၊ အာမလိခိယသည် စဉ်းလဲသောအစီအမံများရှိသူဖြစ်၏၊ များစွာသော မြှောက်ပင့်သည့်စကားများကိုလည်း ပြောသူဖြစ်၍၊ များစွာသောလူတို့၏ စိတ်နှလုံးကို ဆိုးညစ်စွာပြုကြစေခြင်းငှာလည်းကောင်း၊ ဘုရားသခင်၏ အသင်းတော်ကို ဖျက်ဆီးရန် ကြိုးစားကြစေခြင်းငှာလည်းကောင်း၊ သူတို့အား ဘုရားသခင်ပေးထားတော်မူလေသည့် လွတ်လပ်ခြင်းအုတ်မြစ်သို့မဟုတ်၊ ဖြောင့်မတ်သောသူတို့အတွက် ထိုပြည်၏ မျက်နှာပြင်ပေါ်သို့ ဘုရားသခင်ပို့တော်မူလေသည့် ကောင်းချီးမင်္ဂလာကို ဖျက်ဆီးကြစေခြင်းငှာလည်းကောင်း လှည့်ဖြားခေါ်ဆောင်သွားကြောင်းကို ငါတို့သိမြင်ကြ၏။

၁၁ ယခုမူကား၊ အချိန်တန်လာသောအခါ၊ နီဖိုင်းအမျိုးသားတပ်တို့၏ တပ်မှူးမင်းဖြစ်လေသူ မော်ရော်နိုင်းသည် ဤကူးပြောင်းခြင်းကို ကြားရလေသောအခါ အာမလိခိယကို အမျက်ထွက်လေ၏။

၁၂ ဤသို့အားဖြင့်အချိန်တန်လာသောအခါ၊ သူသည် မိမိအင်္ကျီကို ဆွဲဆုတ်၏။ ထိုအင်္ကျီမှ တစ်စကိုယူ၍ အပေါ်တွင်—ငါတို့၏ဘုရားသခင်၊ ငါတို့၏ဘာသာတရား၊ ထို့အတူ ငါတို့၏လွတ်လပ်ခွင့်၊ ထို့အတူ ငါတို့၏ငြိမ်းချမ်းခြင်း၊ ငါတို့ဇနီးများနှင့် ငါတို့သားသမီးများ၏ အထိမ်းအမှတ်—ဟုရေး၍၊ တိုင်တစ်တိုင်၏အစွန်း၌ ချည်၏။

၁၃ သူ၏ဦးခေါင်းတန်ဆာ၊ သူ၏ရင်အုပ်တန်ဆာ၊ သူ၏ဒိုင်းများ၌လည်း ချည်၍၊ သူ၏ချပ်ဝတ်တန်ဆာကို ခါး၌ စည်း၏။ အစွန်း၌ သူ၏ဆွဲဆုတ်ထားသောအင်္ကျီရှိလေသည့် တိုင်ကိုယူ၍ (သူသည်လည်း ထိုစာကို လွတ်လပ်ခြင်းကမ္ပည်းစာဟု ခေါ်၏) သူ့ကိုယ်ကို မြေကြီးသို့ ဦးညွှတ်၍ ထိုပြည်ကိုပိုင်ဆိုင်ရန် ခရစ်ယာန်တစ်စု ကျန်ရှိလေသမျှကာလအတွင်း၌၊ လွတ်လပ်ခြင်းကောင်းချီးမင်္ဂလာများ သူ့ ညီအစ်ကိုများအပေါ် ကျရောက်စေခြင်းငှာ၊ သူ၏ဘုရားသခင်ထံသို့ စိတ်အားထက်သန်စွာ ဆုတောင်း၏—

၁၄ အကြောင်းမူကား၊ ထိုသူတို့မှာ ဘုရားသခင်၏အသင်းတော်အသင်းဝင်များ၊ ခရစ်တော်၌ အမှန်ယုံကြည်သောသူခပ်သိမ်းတို့ဖြစ်သည်ဟု အသင်းတော်နှင့် မဆိုင်သောသူတို့က ခေါ်သောသူများပေတည်း။

၁၅ ထို့အတူ၊ အသင်းတော်နှင့် ဆိုင်သောသူတို့သည် သစ္စာရှိကြ၏။ ထိုမှတစ်ပါး၊ ခရစ်တော်၌ အမှန်ယုံကြည်သည့် ထိုသူခပ်သိမ်းတို့သည် သူတို့အပေါ်၌ ခရစ်တော်၏နာမတော်ကို ဝမ်းပန်းတသာခံယူကြ သို့မဟုတ်၊ ကြွရောက်လာတော်မူမည့် ခရစ်တော်၌ သူတို့၏ယုံကြည်ခြင်းကြောင့်၊ ခရစ်ယာန်ဟု အခေါ်ခံကြလေ၏။

၁၆ ထို့ကြောင့်၊ ယခုကာလတွင်၊ ခရစ်ယာန်တို့၏အမှုနှင့် ထိုပြည်၏လွတ်လပ်ခွင့်ကို ထောက်မခံရနိုင်စေခြင်းငှာ မော်ရော်နိုင်းဆုတောင်း၏။

၁၇ ဤသို့အားဖြင့်အချိန်တန်လာသောအခါ၊ သူ၏စိတ်ဝိညာဉ်ကို ဘုရားသခင်ထံသို့ သွန်းလောင်းလေပြီးလျှင်၊ လူဆိတ်ညံရာပြည်၏တောင်ဘက်အရပ်၌ရှိသည့် ပြည်ခပ်သိမ်းကို၊ အမှန်စင်စစ်၊ အချုပ်အားဖြင့်၊ တောင်ဘက်အရပ်နှင့် မြောက်ဘက်အရပ် နှစ်ဖက်စလုံး၌ရှိသည့်ပြည်ခပ်သိမ်းကို—ရွေးကောက်ထားသောပြည်နှင့် လွတ်လပ်ရာပြည်ဟု အမည်ပေး၏။

၁၈ ထို့အတူ၊ ဆိုလေသည်ကား၊ ငါတို့အပေါ်၌ ခရစ်တော်၏ နာမတော်ကို ခံယူသောကြောင့်၊ မထီမဲ့မြင်ပြုခြင်းခံရသူ ငါတို့သည် နင်းချေခြင်းနှင့် ဖျက်ဆီးခြင်းခံရရန်၊ ငါတို့ကိုယ်တိုင်၏ လွန်ကျူးခြင်းများအားဖြင့် ထိုအမှုကို ငါတို့အပေါ်ရောက်စေကြောင်း မပြုမချင်း ဘုရားသခင် အခွင့်မပေးလတ္တံ့။

၁၉ မော်ရော်နိုင်းသည်လည်း ဤစကားများကို ပြောပြီးလေလျှင်၊ ဆွဲဆုတ်ထားသည့်အစပေါ်၌ သူရေးထားလေသော စာများကို ခပ်သိမ်းသောသူတို့ မြင်နိုင်စေခြင်းငှာ၊ သူ၏ဆွဲဆုတ်ထားသောအဝတ်တန်ဆာအစကို လေထဲ၌ ဝှေ့ယမ်း၍၊ လူတို့ထံ ထွက်သွားပြီးလျှင်၊ ကျယ်သောအသံနှင့် ဆို၍ ဟစ်ကြွေးလေသည်ကား၊

၂၀ ရှုလော့၊ ဤပြည်ပေါ်၌ ဤကမ္ပည်းစာကို ထိန်းသိမ်းလိုသူမှန်သမျှတို့အား၊ ကိုယ်တော်ရှင်၏ခွန်အားဖြင့် ထွက်လာ၍၊ ကိုယ်တော်ရှင်ဘုရားသခင် သူတို့ကို ကောင်းချီးပေးတော်မူစေကြောင်း၊ သူတို့အခွင့်အရေးများနှင့် သူတို့ဘာသာတရားကို ထိန်းသိမ်းမည့်အကြောင်း ပဋိညာဉ်ပြုစေလော့။

၂၁ ဤသို့အားဖြင့်အချိန်တန်လာသောအခါ၊ မော်ရော်နိုင်းက ဤစကားများကို ကြေညာလေပြီးလျှင်၊ ရှုလော့၊ လူတို့သည် သူတို့ချပ်ဝတ်တန်ဆာများကို ခါး၌ စည်း၍ အတူတကွ ပြေးလျက်၊ လက္ခဏာသက်သေ သို့မဟုတ်၊ သူတို့၏ဘုရားသခင်ကိုယ်တော်ရှင်ကို စွန့်ပစ်လိုမည်မဟုတ်ကြောင်း ပဋိညာဉ်အဖြစ် သူတို့အဝတ်တန်ဆာများကို ဆွဲဆုတ်လျက် လာကြ၏။ သို့မဟုတ်၊ တစ်နည်းအားဖြင့်၊ သူတို့သည် ဘုရားသခင်၏ ပညတ်တော်များကို လွန်ကျူးကြ သို့မဟုတ် လွန်ကျူးခြင်းထဲသို့ လဲကျ၍၊ ခရစ်တော်၏နာမတော်ကို သူတို့အပေါ်မှာ ခံယူရန် ရှက်ကြောက်မည်ဆိုလျှင်၊ အဝတ်တန်ဆာများကို သူတို့ဆွဲဆုတ်ခဲ့လေသကဲ့သို့ပင် ကိုယ်တော်ရှင်သည် သူတို့ကို ဆွဲဆုတ်လိမ့်မည်။

၂၂ ယခုတွင်၊ ဤအရာမှာ သူတို့ပြုခဲ့သည့် ပဋိညာဉ်ဖြစ်လေ၏၊ သူတို့အဝတ်တန်ဆာများကို မော်ရော်နိုင်း၏ခြေရင်းသို့ ပစ်၍ ဆိုကြလေသည်ကား၊ ငါတို့သည် လွန်ကျူးခြင်းထဲသို့ လဲကျလျှင်၊ မြောက်ဘက်လားရာပြည်၌ ရှိသည့် ငါတို့ညီအစ်ကိုများကဲ့သို့ပင် ဖျက်ဆီး ခံရမည့််အကြောင်း၊ ငါတို့ဘုရားသခင်နှင့် ပဋိညာဉ်ပြုကြ၏။ ထိုမှတစ်ပါး၊ ငါတို့သည် လွန်ကျူးခြင်းထဲသို့ လဲကျလျှင်၊ ခြေဖြင့်နင်းချေခံရရန် သင်၏ခြေရင်း၌ ငါတို့၏အဝတ်တန်ဆာများကို ငါတို့ ပစ်လေသကဲ့သို့ပင်၊ ငါတို့ကို ငါတို့ရန်သူများ၏ခြေရင်းသို့ သူပစ်တော်မူပါစေသတည်း။

၂၃ မော်ရော်နိုင်းက သူတို့ကို ဆိုလေသည်ကား၊ ရှုလော့၊ ငါတို့သည် ယာကုပ်အမျိုးအနွယ်၏ ကျန်ကြွင်းသောသူများဖြစ်၏။ ထိုမှတစ်ပါး၊ ငါတို့သည် ညီအစ်ကိုတို့အားဖြင့် အင်္ကျီကို အစိတ်စိတ်အမွှာမွှာဆွဲဆုတ်ခံရသူ ယောသပ်အမျိုးအနွယ်၏ ကျန်ကြွင်းသောသူများဖြစ်၏။ ထိုမှတစ်ပါး၊ ယခုမူကား၊ ရှုလော့၊ ငါတို့သည် ဘုရားသခင်၏ပညတ်တော်များကို စောင့်ထိန်းရန် သတိရကြကုန်အံ့။ သို့မဟုတ်လျှင်၊ ငါတို့၏အဝတ်တန်ဆာများသည်လည်း ငါတို့၏ညီအစ်ကိုတို့အားဖြင့် ဆွဲဆုတ်ခံရ၊ ငါတို့သည်လည်း ထောင်ထဲ၌လှောင်ထားခံရ၊ သို့မဟုတ်၊ အရောင်းခံရ၊ သို့မဟုတ်၊ ကွပ်မျက်ခံရလိမ့်မည်။

၂၄ ထိုမှတစ်ပါး၊ ငါတို့သည် ယောသပ်၏ကျန်ကြွင်းသောသူများအဖြစ်၊ ငါတို့၏လွတ်လပ်ခြင်းကို ထိန်းသိမ်းစောင့်ရှောက်ကြကုန်အံ့။ ထိုမှတစ်ပါး၊ ငါတို့သည် ယာကုပ်မသေမီကပြောခဲ့သည့် စကားများကို သတိရကြကုန်အံ့။ အကြောင်းမူကား၊ ရှုလော့၊ ယောသပ်၏အင်္ကျီမှ ကျန်ကြွင်းသည့်အစတစ်စကို ထိန်းသိမ်းစောင့်ရှောက်ထား၍၊ မဆွေးမြေ့လေသည်ကို သူမြင်၏။ သူဆိုလေသည်ကား—ငါ့သား၏အဝတ်တန်ဆာမှ ဤအကျန်အကြွင်းကို ထိန်းသိန်းစောင့်ရှောက်ထားလေသကဲ့သို့ပင်၊ ထိုနည်းတူစွာ၊ ငါ့သားအမျိုးအနွယ်၏ ကျန်ကြွင်းသောသူတို့သည်လည်း ဘုရားသခင်၏လက်တော်အားဖြင့် ကာကွယ်စောင့်မခံရလျက်၊ သူ့ထံသို့ ဆောင်ယူခံရလိမ့်မည်။ အခြားတစ်ဖက်၌၊ ယောသပ်အမျိုးအနွယ်၏ အကျန်အကြွင်းတို့သည် သူ့အဝတ်တန်ဆာမှ အကျန်အကြွင်းကဲ့သို့ပင် ပျက်စီးလိမ့်မည်။

၂၅ ယခုတွင်၊ ရှုလော့၊ ဤအမှုက ငါ၏စိတ်ဝိညာဉ်ကို ဝမ်းနည်းစေ၏။ သို့သော်လည်း၊ ဘုရားသခင်ထံသို့ ဆောင်ယူခံရမည့် သူ့အမျိုးအနွယ်အချို့ကြောင့်၊ ငါ၏စိတ်ဝိညာဉ်သည် ငါ့သား၌ ဝမ်းမြောက်၏။

၂၆ ယခုတွင်၊ ရှုလော့၊ ဤအရာသည်ကား၊ ယာကုပ်၏ဘာသာစကားဖြစ်လေ၏။

၂၇ ယခုမူကား၊ ယောသပ်၏အဝတ်တန်ဆာကဲ့သို့ ပျက်စီးမည့် သူ့အမျိုးအနွယ်တို့မှ ကျန်ကြွင်းသောသူတို့သည်ကား၊ ငါတို့ထံမှ ခွဲထွက်လေသူများဖြစ်ကောင်းဖြစ်မည်ကို အဘယ်သူသိသနည်း။ ထိုမှတစ်ပါး၊ ငါတို့သည် ခရစ်တော်ကိုယုံကြည်ခြင်း၌ မြဲမြံစွာမတည်ကြလျှင်၊ ထိုသူတို့သည်ကား၊ ငါတို့ကိုယ်တိုင်ပင် ဖြစ်ပေလိမ့်မည်။

၂၈ ယခုမူကား၊ အချိန်တန်လာသောအခါ၊ မော်ရော်နိုင်းသည် ဤစကားများကို ပြောပြီးလေလျှင်၊ ထွက်သွား၍၊ ငြင်းခုံခြင်းများရှိသည့် ထိုပြည်၏ခပ်သိမ်းသောဒေသများသို့ သတင်းကိုလည်းထုတ်ပြန်၍၊ အာမလိခိယနှင့် အာမလိခိယအမျိုးသားများဟု ခေါ်လေသူ ခွဲထွက်သွားလေသူများကို ဆန့်ကျင်ခြင်းငှာ၊ မိမိတို့လွတ်လပ်ခြင်းအား ထိန်းသိမ်းကြသူခပ်သိမ်းတို့ကို အတူတကွ စုဝေး၏။

၂၉ ဤသို့အားဖြင့်အချိန်တန်လာသောအခါ၊ မော်ရော်နိုင်း၏လူတို့မှာ၊ အာမလိခိယအမျိုးသားတို့ထက် ပို၍အမြောက်အမြားရှိလေသည်ကို အာမလိခိယမြင်လျှင်—သူ၏လူတို့သည် သူတို့ဆောင်ရွက်လေသည့် အမှု၏တရားမျှတခြင်းနှင့်စပ်လျဉ်း၍ ယုံမှားသံသယဖြစ်လေသည်ကိုလည်း သူသိမြင်၏—ထို့ကြောင့်၊ သူသည် အကြံမထမြောက်မည်ကို စိုးရိမ်လျက်၊ သူ၏လူများထဲမှ လိုက်လိုသူတို့ကိုခေါ်၍ နီဖိုင်းပြည်ထဲသို့ ထွက်ခွာသွား၏။

၃၀ ယခုတွင်၊ မော်ရော်နိုင်းသည် လာမန်အမျိုးသားတို့၌ နောက်ထပ်၍ ခွန်အားရှိစေရန် မသင့်လျော်ကြောင်းကို ဆင်ခြင်၏။ ထို့ကြောင့်၊ သူသည် အာမလိခိယ၏လူများကို ဟန့်တားရန်၊ သို့မဟုတ် သူတို့ကိုခေါ်၍ ပြန်လည်ဆောင်ယူပြီး၊ အာမလိခိယကို အသေသတ်ရန် ဆင်ခြင်၏။ ထိုမှတစ်ပါး၊ အကြောင်းမူကား၊ သူသည် လာမန်အမျိုးသားတို့အား မိမိတို့ကိုဆန့်ကျင်၍ အမျက်ထွက်စေကြောင်း နှိုးဆော်၍၊ မိမိတို့အား စစ်တိုက်စေမည်ကို သိ၏။ အာမလိခိယသည် သူ့အကြံအစည်များကို ပြီးပြည့်စေခြင်းငှာ၊ ဤသို့ပြုမည်ကိုလည်း သူသိ၏။

၃၁ ထို့ကြောင့်၊ မော်ရော်နိုင်းသည် သူတို့ကိုယ်သူတို့ အတူတကွစုဝေးလေသည့်၊ သူတို့ကိုယ်တိုင်လက်နက်စွဲကိုင်၍၊ ငြိမ်းချမ်းခြင်းကို ထိန်းသိမ်းခြင်းငှာ ပဋိညာဉ်ပြုသည့် သူ၏တပ်များကို ခေါ်ရမည်မှာ၊ သင့်လျော်ပေ၏ဟု ဆင်ခြင်၏—ဤသို့အားဖြင့်အချိန်တန်လာသောအခါ၊ တောရိုင်းထဲရှိ အာမလိခိယ၏လမ်းကြောင်းကို ဟန့်တားခြင်းငှာ မိမိတပ်ကိုခေါ်၍ မိမိတဲများနှင့် တောရိုင်းထဲသို့ ချီတက်၏။

၃၂ ဤသို့အားဖြင့်အချိန်တန်လာသောအခါ၊ သူ၏အလိုဆန္ဒအတိုင်း ပြု၏၊ တောရိုင်းထဲသို့လည်း ချီတက်၍ အာမလိခိယ၏တပ်များကို ဟန့်တား၏။

၃၃ ဤသို့အားဖြင့်အချိန်တန်လာသောအခါ၊ အာမလိခိယသည် အရေအတွက် အနည်းငယ်သော သူ၏ လူတို့နှင့် ထွက်ပြေး၍၊ ကျန်ကြွင်းသောသူတို့မှာ မော်ရော်နိုင်း၏ လက်ထဲသို့ လွှဲပေးခံရ၊ ဇရဟင်မလပြည်ထဲသို့ ပြန်၍ ခေါ်ယူခံရ၏။

၃၄ ယခုတွင်၊ မော်ရော်နိုင်းသည် တရားသူကြီးချုပ်နှင့် လူတို့၏မဲဆန္ဒအားဖြင့် ခန့်အပ်ခံရသောသူဖြစ်လေရကား၊ ထို့ကြောင့်၊ သူသည် နီဖိုင်းအမျိုးသားတို့၏ တပ်များနှင့်စပ်လျဉ်း၍ သူ့အလိုအတိုင်း စီရင်ရန်နှင့် သူတို့အပေါ် အခွင့်အာဏာကိုကျင့်သုံးရန် အာဏာရှိ၏။

၃၅ ဤသို့အားဖြင့်အချိန်တန်လာသောအခါ၊ လွတ်လပ်သောအစိုးရကို သူတို့ကာကွယ်နိုင်မည့်အကြောင်း၊ လွတ်လပ်ခွင့်အမှုကို ထောက်မရန် အာမလိခိယအမျိုးသားတို့အထဲမှ ပဋိညာဉ်မပြုလိုသူမှန်သမျှကို အသေသတ်ခံရစေ၏။ လွတ်လပ်ခွင့်ပဋိညာဉ်ကို ငြင်းဆိုသူမှာ အနည်းငယ်သာရှိ၏။

၃၆ ဤသို့အားဖြင့်အချိန်တန်လာသောအခါ၊ သူသည် လွတ်လပ်ခြင်းကမ္ပည်းစာကို နီဖိုင်းအမျိုးသားတို့ပိုင်သည့် ထိုပြည်တစ်ခုလုံးရှိ လင့်စင်တိုင်း၌ လွှင့်ထူ၏။ ထိုကဲ့သို့အားဖြင့်၊ မော်ရော်နိုင်းသည် နီဖိုင်းအမျိုးသားတို့၌ လွတ်လပ်ခြင်းအလံကို တည်ထောင်၏။

၃၇ သူတို့သည် ထိုပြည်၌ တစ်ဖန်ငြိမ်းချမ်းခြင်း ရှိစပြု၏။ ထိုကဲ့သို့အားဖြင့်၊ သူတို့သည် တရားသူကြီးများအုပ်စိုးခြင်းတစ်ဆယ်ကိုးနှစ်မြောက် ပြီးဆုံးလုနီးပါးအထိ ထိုပြည်၌ ငြိမ်းချမ်းခြင်းကို ထိန်းသိမ်းကြ၏။

၃၈ ဟေလမန်နှင့် ယဇ်ပုရောဟိတ်မင်းတို့သည်လည်း အသင်းတော်၌ ညီညွတ်မှုကို ထိန်းသိမ်းကြ၏။ ထိုမှတစ်ပါး၊ လေးနှစ်ကြာအောင်ပင်၊ အသင်းတော်၌၊ များစွာသော ငြိမ်းချမ်းခြင်းနှင့် ရွှင်လန်းဝမ်းမြောက်ခြင်းရှိ၏။

၃၉ ဤသို့အားဖြင့်အချိန်တန်လာသောအခါ၊ သူတို့၏စိတ်ဝိညာဉ်ကို ကိုယ်တော်ရှင်ယေရှုခရစ်တော်အားဖြင့် ရွေးနှုတ်ခြင်း ခံရလေကြောင်းခိုင်မြဲစွာယုံကြည်လျက် သေသူများစွာရှိလေ၏။ ထိုကဲ့သို့အားဖြင့်၊ သူတို့သည် ရွှင်လန်းဝမ်းမြောက်လျက်၊ လောကထဲမှ ထွက်သွားကြ၏။

၄၀ ထိုပြည်၌ နှစ်ကာလ၏ အချို့သောရာသီများတွင် အကြိမ်ကြိမ်ဖြစ်လေသည့် အဖျားရောဂါဖြင့် သေသူအချို့လည်း ရှိလေ၏—သို့ရာတွင်၊ ရာသီဥတု၏ ပကတိသဘောကြောင့် လူသားတို့၌ ဖြစ်ရသောရောဂါများကို ပယ်ရှားခြင်းငှာ ဘုရားသခင်ပြင်ဆင်ထားတော်မူသည့် အလွန်ကောင်းမွန်သော အပင်များနှင့် အမြစ်များကြောင့် အဖျားရောဂါနှင့် သေသူမှာ အလွန်မများလှပေ—

၄၁ သို့ရာတွင်၊ အသက်ကြီး၍ သေသောသူများစွာရှိလေ၏။ ငါတို့ ယုံကြည်ရမည် ဖြစ်သကဲ့သို့ပင် ခရစ်တော်ကို ယုံကြည်လျက်သေသူတို့သည် သူ့ ၌ ပျော်ရွှင်ကြ၏။