အယ်လမာ ၅၆

အခန်းကြီး ၅၆

ဟေလမန်သည် လာမန်အမျိုးသားတို့နှင့်စစ်တိုက်ခြင်း၏အခြေအနေကို ပြန်လည်ပြောပြလျက်၊ မော်ရော်နိုင်းထံသို့ အမှာစာတစ်စောင်ကို ပို့၏—အန္တိပုနှင့် ဟေလမန်တို့သည် လာမန်အမျိုးသားတို့အပေါ်၌ ကြီးစွာသောအောင်နိုင်ခြင်းကို ရရှိကြ၏—ဟေလမန်၏ သားလုလင်ပျိုနှစ်ထောင်တို့သည် အလွန်တရာအံ့ဩဖွယ်ကောင်းသော အင်အားဖြင့်တိုက်ခိုက်လျက်၊ သူတို့အထဲမှ တစ်ဦးမျှ ကွပ်မျက်မခံရ။ အခန်းငယ် ၁၊ ဘီစီ ၆၂ ခန့်။ အခန်းငယ် ၂–၁၉၊ ဘီစီ ၆၆ ခန့်နှင့်၊ အခန်းငယ် ၂၀–၅၇၊ ဘီစီ ၆၅–၆၄ ခန့်။

၁ ယခုမူကား၊ အချိန်တန်လာသောအခါ၊ တရားသူကြီးများအုပ်စိုးခြင်း သုံးဆယ်နှစ်မြောက်အစ၊ ပထမဦးဆုံးလ ဒုတိယနေ့တွင်၊ မော်ရော်နိုင်းသည် ဟေလမန်ထံမှ ပြည်၏ထိုအရပ်ရှိ လူတို့၏အမှုအမျိုးမျိုးကို ဖော်ပြလျက်ရှိသည့် အမှာစာတစ်စောင်ကို လက်ခံရရှိ၏။

၂ ဤအရာတို့သည်ကား၊ သူရေးသည့် စကားများဖြစ်၏၊ ဆိုလေသည်ကား၊ ငါတို့၏စစ်မှုထမ်းခြင်း အတိဒုက္ခများမှာကဲ့သို့ ကိုယ်တော်ရှင်၌လည်း ငါ၏အလွန်ချစ်လှစွာသော ညီအစ်ကိုဖြစ်သူမော်ရော်နိုင်း၊ ရှုလော့၊ ငါ၏အလွန်ချစ်လှစွာသောညီအစ်ကို၊ ပြည်၏ထိုအရပ်ရှိ ငါတို့၏စစ်မှုအကြောင်း သင့်ကို ပြောပြစရာ ငါ့မှာအတော်အသင့်ရှိ၏။

၃ ရှုလော့၊ နီဖိုင်းပြည်မှ အမ္မုန်ဆောင်ယူခဲ့သည့် လူတို့၏သား နှစ်ထောင်တို့သည်ကား—ယခုတွင်၊ ထိုသူတို့သည် ငါတို့အဘလေဟိ၏ အကြီးဆုံးသားဖြစ်သူ လာမန်၏ အမျိုးအနွယ်တို့ဖြစ်လေကြောင်းကို သင်သိ၍၊

၄ ယခုတွင်၊ သူတို့၏နည်းဥပဒေသများ သို့မဟုတ်၊ သူတို့၏မယုံကြည်မှုများအကြောင်းကို သင့်ကို ငါပြောပြစရာမလို။ အကြောင်းမူကား၊ ဤအရာခပ်သိမ်းတို့အကြောင်းကို သင်သိပေ၏—

၅ ထို့ကြောင့်၊ ဤလူပျိုနှစ်ထောင်တို့သည် သူတို့၏စစ်တိုက်ရာလက်နက်များကို ယူ၍၊ ငါ့ကို သူတို့၏အကြီးအကဲဖြစ်စေလိုကြောင်း၊ သင့်ကို ပြောပြရန် ငါ့အတွက် လုံလောက်၏။ ငါတို့သည်လည်း ငါတို့တိုင်းပြည်ကို ကာကွယ်ရန် ထွက်လာကြ၏။

၆ ယခုမူကား၊ သူတို့၏အဘတို့က သူတို့ညီအစ်ကိုများကို ဆန့်ကျင်၍ အသွေးသွန်းလောင်းရန် သူတို့၏စစ်တိုက်ရာလက်နက်များကို စွဲကိုင်လိမ့်မည်မဟုတ်ဟူသော သူတို့ပြုခဲ့သည့် ပဋိညာဉ်အကြောင်းကိုလည်း သင်သိပေ၏။

၇ သို့ရာတွင်၊ နှစ်ဆယ်ခြောက်နှစ်မြောက်၌၊ သူတို့အတွက် ငါတို့၏ဒုက္ခဆင်းရဲခြင်းများနှင့် အတိဒုက္ခများကို သူတို့မြင်ကြလေလျှင်၊ သူတို့ပြုခဲ့လေသည့် ပဋိညာဉ်ကို ချိုးဖောက်တော့မည်ပြုလျက်၊ ငါတို့ကို ကာကွယ်ခြင်းငှာ သူတို့၏လက်နက်များကို စွဲကိုင်ကြ၏။

၈ သို့ရာတွင်၊ သူတို့ပြုလေသည့် ကျိန်ဆိုခြင်းကို ပြီးပြည့်စေခြင်းကြောင့်၊ ငါတို့ထပ်၍ ဒုက္ခဝေဒနာ မခံစားရစေသည်အထိ၊ ဘုရားသခင်သည် ငါတို့ကို ခွန်အားဖြည့်ပေးတော်မူလိမ့်မည့်အကြောင်းကို ငါစဉ်းစားလျက်၊ သူတို့ပြုခဲ့သည့် ဤပဋိညာဉ်ကို ချိုးဖောက်စေရန် သူတို့ကို ငါအခွင့်မပေးလို။

၉ သို့ရာတွင်၊ ရှုလော့၊ ဤတွင်၊ ငါတို့ ကြီးစွာသောဝမ်းမြောက်ခြင်းရှိနိုင်သောအမှုတစ်ခု ရှိ၏။ အကြောင်းမူကား၊ ရှုလော့၊ နှစ်ဆယ်ခြောက်နှစ်မြောက်တွင်၊ ပြည်၏ထိုအရပ်ရှိလူတို့၌ အကြီးအကဲအဖြစ် သင်ခန့်အပ်ထားသည့် အန္တိပုကို ကူညီခြင်းငှာ ငါဟေလမန်သည် ဤလူပျိုနှစ်ထောင်တို့၏တပ်ဦးမှ နေ၍ယုဒမြို့သို့ ချီတက်၏။

၁၀ ငါ၏သားနှစ်ထောင်တို့ကို (သူတို့သည် သားများဟု ခေါ်ထိုက်သဖြင့်) အန္တိပု၏တပ်သို့ ငါပူးပေါင်းစေ၍၊ ထိုအင်အား၌ အန္တိပုလွန်စွာရွှင်လန်းဝမ်းမြောက်၏။ အကြောင်းမူကား၊ လာမန်အမျိုးသားတို့၏ အင်အားစုများက အရေအတွက်အလွန်များစွာသော ငါတို့၏လူများကို ကွပ်မျက်သဖြင့်၊ သူ၏တပ်သည် သူတို့အားဖြင့် လျော့နည်းစေခဲ့လေပြီ။ ထိုအကြောင်းရင်းအတွက်၊ ငါတို့ငိုကြွေးမြည်တမ်းရကြပြီ။

၁၁ သို့သော်လည်း၊ သူတို့တိုင်းပြည်နှင့် သူတို့ဘုရားသခင်၏အမှု၌ သူတို့သေ၍၊ ဤအချက်၌ ငါတို့ကိုယ်ငါတို့ သက်သာစေနိုင်လျက်၊ ထိုမှတစ်ပါး၊ သူတို့လည်း ပျော်ရွှင်ကြ၏။

၁၂ လာမန်အမျိုးသားတို့သည်လည်း များစွာသော စစ်အကျဉ်းသားတို့ကို ထိန်းသိမ်းထား၏၊ ထိုသူတို့အားလုံးသည် ဗိုလ်ချုပ်မင်းများဖြစ်၏။ အကြောင်းမူကား၊ အခြားအဘယ်သူ့ကိုမျှ သူတို့အသက်ချမ်းသာမပေးခဲ့။ ယခု၊ ဤအချိန်တွင် နီဖိုင်းပြည်၌ သူတို့ ရှိသည်ဟု ငါတို့ထင်မှတ်၏။ သူတို့သည် ကွပ်မျက်မခံရလျှင်၊ ထိုပြည်၌ ရှိပေမည်။

၁၃ ယခုမူကား၊ ငါတို့၏ အလွန်များစွာသော သူရဲတို့၏အသွေးကို သွန်းလောင်းခြင်းအားဖြင့်၊ လာမန်အမျိုးသားတို့ သိမ်းယူခဲ့သည့် မြို့များသည်ကား၊

၁၄ မန်တိပြည်၊ သို့မဟုတ် မန်တိမြို့၊ ဇေဇရုမ်မြို့၊ ကူမေနိမြို့နှင့် အန္တိဖာရမြို့များ ဖြစ်၏။

၁၅ ထို့အတူ၊ ဤအရာတို့သည်ကား၊ ယုဒမြို့သို့ ငါရောက်သောအခါ၌ သူတို့ပိုင်ဆိုင်သည့် မြို့များပင်တည်း။ ငါသည် အန္တိပုနှင့် သူ၏လူတို့ မြို့ကို အင်အားခိုင်မာစေခြင်းငှာ၊ သူတို့၏အစွမ်းသတ္တိရှိသမျှနှင့် အလုပ်ကြိုးစား၍လုပ်နေသည်ကိုလည်း တွေ့ရ၏။

၁၆ ထိုမှတစ်ပါး၊ သူတို့သည် ကိုယ်ခန္ဓာနှင့် စိတ်ဝိညာဉ်၌လည်း မောပန်းနွမ်းနယ်လေ၏။ အကြောင်းမူကား၊ သူတို့သည် နေ့အချိန်၌ ရဲရင့်စွာတိုက်ခိုက်၍၊ ညဉ့်အချိန်၌ သူတို့၏မြို့များကို ထိန်းသိမ်းခြင်းငှာ၊ အလုပ်လုပ်ကြလေပြီ။ ထိုကဲ့သို့အားဖြင့်၊ သူတို့သည် ကြီးစွာသော ဆင်းရဲဒုက္ခအမျိုးမျိုးကို ခံစားရလေ၏။

၁၇ ယခုမူကား၊ သူတို့သည် ဤအရပ်၌ အနိုင်ရလျှင်ရ၊ သို့မဟုတ် သေရန် သန္နိဌာန်ချကြလေပြီ။ ထို့ကြောင့်၊ ငါနှင့်အတူ ခေါ်ဆောင်ခဲ့သည့် ဤအနည်းငယ်သော တပ်ဖွဲ့၊ အထူးသဖြင့်၊ ငါ၏သားတို့က သူတို့အား ကြီးစွာသောမျှော်လင့်ခြင်းနှင့် များစွာသောဝမ်းမြောက်ခြင်းတို့ ပေးခဲ့ကြောင်းကို သင်ကောင်းစွာမှတ်ယူနိုင်ပေ၏။

၁၈ ယခုမူကား၊ အချိန်တန်လာသောအခါ၊ လာမန်အမျိုးသားတို့သည် အန္တိပု၌ သူ၏တပ်သို့ ပို၍ကြီးစွာသောအင်အား ရရှိကြောင်းကို မြင်ကြလျှင်၊ ယုဒမြို့ကို သို့မဟုတ် ငါတို့ကို လာ၍ မတိုက်ခိုက်စေခြင်းငှာ၊ အမ်မော်ရုန်၏အမိန့်များအားဖြင့်၊ အနိုင်အထက်စီရင်ခံရကြ၏။

၁၉ ထိုကဲ့သို့အားဖြင့်၊ ငါတို့သည် ကိုယ်တော်ရှင်၏နှစ်သက်တော်မူခြင်းကို ခံရ၏။ အကြောင်းမူကား၊ ဤကဲ့သို့ ငါတို့၏အားနည်းချိန်၌၊ သူတို့လာ၍ တိုက်ခိုက်လျှင်၊ ငါတို့၏ သေးငယ်သောတပ်ကို သူတို့ဖျက်ဆီးနိုင်ခဲ့ပေမည်။ သို့ရာတွင်၊ ထိုကဲ့သို့အားဖြင့် ကာကွယ်စောင့်မတော်မူခြင်းကို ငါတို့ခံရ၏။

၂၀ သူတို့သည် သိမ်းယူခဲ့သည့် ထိုမြို့များကို ထိန်းသိမ်းရန်၊ အမ်မော်ရုန်အားဖြင့် အမိန့်ပေးခံရ၏။ ထိုကဲ့သို့အားဖြင့်၊ နှစ်ဆယ်ခြောက်နှစ်မြောက်ပြီးဆုံး၏။ နှစ်ဆယ်ခုနစ်နှစ်မြောက်၏အစတွင်လည်း ငါတို့သည် ကာကွယ်ခြင်းအတွက်၊ ငါတို့မြို့နှင့် ငါတို့ကိုယ်ကို ပြင်ဆင်ကြ၏။

၂၁ ယခုတွင်၊ ငါတို့သည် လာမန်အမျိုးသားတို့ကို ငါတို့ကို လာ၍ တိုက်ခိုက်စေရန် အလိုရှိ၏။ အကြောင်းမူကား၊ ငါတို့သည် သူတို့၏အခိုင်အမာစခန်းများထဲ၌၊ သူတို့အား တိုက်ခိုက်ခြင်းကို ပြုရန် အလိုမရှိကြ။

၂၂ ဤသို့အားဖြင့်အချိန်တန်လာသောအခါ၊ ငါတို့သည် မြောက်ဘက်လားရာအရပ်၌ရှိသော ငါတို့၏အခြားမြို့များကို လာမန်အမျိုးသားတို့ တိုက်ခိုက်ခြင်းပြုရန် ညဉ့်အချိန် သို့မဟုတ်၊ နေ့အချိန်၌ ငါတို့ထံသို့ မလာနိုင်ကြစေခြင်းငှာ၊ သူတို့၏လှုပ်ရှားမှုများကို စောင့်ကြည့်စေရန် ပတ်ဝန်းကျင်ဒေသတစ်ဝိုက်တွင် သူလျှိုများကို ချထား၏။

၂၃ အကြောင်းမူကား၊ ထိုမြို့များ၌၊ သူတို့နှင့် တိုက်ရန် လုံလုံလောက်လောက်အင်အားမရှိကြောင်းကို ငါသိ၏။ ထို့ကြောင့်၊ ငါတို့သည် သူတို့က ငါတို့ကို ဖြတ်ကျော်သွားလျှင်၊ သူတို့၏နောက်ဘက်ပိုင်းကို တိုက်ခိုက်၍၊ ထိုကဲ့သို့အားဖြင့်၊ ရှေ့ဘက်ပိုင်း၌ သူတို့တိုက်သည့် တစ်ချိန်တည်းတွင်၊ နောက်ဘက်ပိုင်း၌ သူတို့ကို ရင်ဆိုင်ရန် အလိုရှိ၏။ ငါတို့သည် သူတို့ကို အနိုင်ရနိုင်မည်ဟု ထင်မှတ်ကြ၏။ သို့ရာတွင်၊ ရှုလော့၊ ငါတို့သည် ငါတို့၏ဤအလိုဆန္ဒ၌ စိတ်ပျက်ကြ၏။

၂၄ သူတို့သည် သူတို့၏တပ်တစ်ခုလုံးနှင့် ငါတို့ကို ဖြတ်ကျော်မသွားဝံ့ကြ၊ လုံလုံလောက်လောက် အင်အားမရှိမည်ကိုလည်းကောင်း၊ ကျရှုံးမည်ကိုလည်းကောင်း စိုးရိမ်၍ တစ်စိတ်တစ်ပိုင်းနှင့်လည်း မလာဝံ့ကြ။

၂၅ ဇရဟင်မလမြို့သို့လည်း ချီတက်၍ဆင်းမလာဝံ့ကြ။ ဇိဒုန်မြစ်ဖျားကိုဖြတ်၍လည်း နီဖိုင်းဟမြို့သို့ မလာဝံ့ကြ။

၂၆ ထိုကဲ့သို့အားဖြင့်၊ သူတို့သည် သူတို့သိမ်းယူခဲ့သည့် ထိုမြို့များကို သူတို့၏ အင်အားစုများဖြင့် ထိန်းသိမ်းရန် သန္နိဌာန်ချကြ၏။

၂၇ ယခုမူကား၊ အချိန်တန်လာသောအခါ၊ ဤနှစ်၏ဒုတိယလတွင်၊ ငါ၏သားနှစ်ထောင်တို့၏အဘတို့ထံမှ ငါတို့ထံသို့ ဆောင်ယူခဲ့သည့် များစွာသောရိက္ခာများ ရှိလေ၏။

၂၈ ဇရဟင်မလပြည်မှ ငါတို့ထံသို့ ပို့လိုက်သော တပ်သားနှစ်ထောင်လည်း ရှိ၏။ ထိုကဲ့သို့အားဖြင့်၊ ငါတို့သည် တပ်သားတစ်သောင်းနှင့်၊ သူတို့အတွက်၊ ထို့အတူ သူတို့၏ဇနီးများနှင့် သားသမီးများအတွက် ရိက္ခာများဖြင့်၊ ပြင်ဆင်ထား၏။

၂၉ လာမန်အမျိုးသားတို့သည်လည်း ငါတို့၏ အင်အားစုများ ထိုကဲ့သို့ နေ့စဉ်တိုးပွား၍၊ ငါတို့၏အထောက်အမအတွက် ရိက္ခာများ ရောက်လာသည်ကို မြင်ကြလျှင်၊ ကြောက်လန့်စပြု၍၊ ဖြစ်နိုင်လျှင်၊ ငါတို့၏ ရိက္ခာများနှင့် အင်အားများ ရရှိခြင်းကို အဆုံးသတ်စေရန် ရုတ်တရက်ထိုးဖောက်တိုက်ခိုက်စပြုကြ၏။

၃၀ ယခုတွင်၊ ငါတို့သည် လာမန်အမျိုးသားတို့ ဤသို့အားဖြင့် စိတ်မချနိုင်ဖြစ်စပြုသည်ကို သိမြင်ကြလျှင်၊ သူတို့အပေါ်သက်ရောက်မည့် ဥပါယ်တံမျဉ်ကို ပြုလိုကြ၏။ ထို့ကြောင့်၊ ငါတို့၏ရိက္ခာများကို အနီးအနား၌ရှိသောမြို့သို့ ငါတို့သယ်ယူလျက်ရှိလေသကဲ့သို့၊ အနီးအနား၌ရှိသောမြို့သို့ ငါ၏သားငယ်တို့နှင့်အတူ ငါချီတက်ရမည့်အကြောင်း အန္တိပုက အမိန့်ပေး၏။

၃၁ ငါတို့သည်လည်း၊ ပင်လယ်ကမ်းနားအနီး၊ နယ်နိမိတ်တို့၌ အန္တိဖာရမြို့အနီးသို့၊ မြို့ကိုကျော်လွန်၍ သွားလေသကဲ့သို့ ချီတက်ကြ၏။

၃၂ ဤသို့အားဖြင့်အချိန်တန်လာသောအခါ၊ ငါတို့သည် ငါတို့၏ရိက္ခာများနှင့် ထိုမြို့သို့ သွားလေသကဲ့သို့ ချီတက်ကြ၏။

၃၃ ဤသို့အားဖြင့်အချိန်တန်လာသောအခါ၊ အန္တိပုသည် ကျန်ကြွင်းသောသူတို့အား မြို့ကို ထိန်းသိမ်းစေရန် ချန်ထားလျက်၊ သူ့တပ်၏တစ်စိတ်တစ်ပိုင်းဖြင့် ချီတက်၏။ သို့ရာတွင်၊ သူသည် ငါ၏တပ်ငယ်နှင့် ငါထွက်သွား၍၊ အန္တိဖာရမြို့အနီးသို့ ရောက်မလာမီ၊ ချီတက်မသွားပေ။

၃၄ ယခုမူကား၊ အန္တိဖာရမြို့၌၊ လာမန်အမျိုးသားတို့၏ အားအကြီးဆုံးတပ်ကို ချထား၏။ အထူးသဖြင့်၊ အမြောက်မြားဆုံးဖြစ်၏။

၃၅ ဤသို့အားဖြင့်အချိန်တန်လာသောအခါ၊ သူတို့သည် သူတို့၏သူလျှိုများအားဖြင့် သတင်းရရှိကြလျှင်၊ သူတို့၏တပ်နှင့် ထွက်လာ၍ ငါတို့ဆီသို့ ချီတက်ကြ၏။

၃၆ ဤသို့အားဖြင့်အချိန်တန်လာသောအခါ၊ ငါတို့သည် သူတို့ရှေ့မှနေ၍ မြောက်ဘက်လားရာသို့ ထွက်ပြေးကြ၏။ ထိုကဲ့သို့အားဖြင့်၊ ငါတို့သည် လာမန်အမျိုးသားတို့၏ အားအကြီးဆုံးတပ်ကို ခေါ်ဆောင်သွားကြ၏။

၃၇ အမှန်စင်စစ်၊ အတော်အတန်အကွာအဝေးသို့ရောက်၍၊ သူတို့သည် အန္တိပု၏တပ်က အစွမ်းသတ္တိရှိသမျှနှင့် သူတို့ကို လိုက်လာလျက်ရှိသည်ကို မြင်ကြလျှင်၊ လက်ယာဘက်၊ လက်ဝဲဘက်သို့ မလွှဲ၊ ငါတို့၏နောက်က တည့်တည့်ချီတက်၍သာလိုက်၏။ ထို့အတူ၊ ငါတို့ထင်မှတ်သည့်အတိုင်းပင်၊ သူတို့၏ရည်ရွယ်ချက်မှာ၊ သူတို့ကို အန္တိပု မမီခင် ငါတို့ကို ကွပ်မျက်ခြင်းငှာ ဖြစ်၏၊ ဤသို့အားဖြင့်၊ ငါတို့၏လူတို့အားဖြင့် ဝိုင်းထားခြင်းကို သူတို့မခံရနိုင်စေကြောင်းပင်တည်း။

၃၈ ယခုမူကား၊ အန္တိပုသည် ငါတို့၏ဘေးအန္တရာယ်ကို မြင်၍၊ သူ့တပ်၏ချီတက်ခြင်းကို လျင်မြန်စေ၏။ သို့ရာတွင်၊ ရှုလော့၊ ညဉ့်အချိန်ဖြစ်လေ၏။ ထို့ကြောင့်၊ ငါတို့ကို သူတို့မမီကြ။ အန္တိပုသည်လည်း သူတို့ကို မမီ။ ထို့ကြောင့်၊ ငါတို့သည် ညဉ့်အချိန်၌ တပ်စခန်းချကြ၏။

၃၉ ဤသို့အားဖြင့်အချိန်တန်လာသောအခါ၊ နံနက်အာရုဏ်မတက်မီတွင်၊ ရှုလော့၊ လာမန်အမျိုးသားတို့သည် ငါတို့ကို လိုက်နေကြ၏။ ယခုတွင်၊ ငါတို့မှာ သူတို့နှင့် တိုက်ခိုက်ရန် လုံလုံလောက်လောက် အင်အားမရှိကြ။ ထိုမှတစ်ပါး၊ ငါသည် ငါ၏သားငယ်တို့ကို သူတို့လက်ထဲသို့ ကျရောက်စေရန် အခွင့်မပေးလို။ ထို့ကြောင့်၊ ငါတို့သည် ချီတက်ခြင်းကို ဆက်၍ပြုလျက်၊ တောရိုင်းထဲသို့ ချီတက်ကြ၏။

၄၀ ယခုတွင်၊ သူတို့သည် ဝိုင်းထားခံရမည်ကို စိုးရိမ်သဖြင့်၊ လက်ယာဘက်၊ လက်ဝဲဘက်သို့ မလွှဲဝံ့ကြ။ ငါသည်လည်း သူတို့ ငါ့ကို မီလာလျှင်၊ ငါတို့သည် သူတို့ကို မခုခံနိုင်၊ ကွပ်မျက်ခံခြင်းသာခံရပြီး၊ သူတို့လွတ်မြောက်သွားမည့်အရေးကိုလည်း စိုးရိမ်သဖြင့် လက်ယာဘက်၊ လက်ဝဲဘက်သို့ မလွှဲလိုပေ။ ထိုကဲ့သို့အားဖြင့်၊ ငါတို့သည် မှောင်လာသည်အထိပင် တောရိုင်းထဲသို့ တစ်နေ့လုံး ထွက်ပြေးကြ၏။

၄၁ ဤသို့အားဖြင့်တစ်ဖန်အချိန်တန်လာသောအခါ၊ နံနက်အလင်းရောင် ရောက်လာသောအခါ၊ ငါတို့သည် လာမန်အမျိုးသားတို့ ငါတို့အနီးသို့ ချဉ်းကပ်လာသည်ကို မြင်လျှင်၊ သူတို့ရှေ့မှ တစ်ဖန်ထွက်ပြေးကြ၏။

၄၂ သို့ရာတွင်၊ အချိန်တန်လာသောအခါ၊ သူတို့သည် ငါတို့ကို ထပ်၍ မလိုက်တော့ဘဲ ရပ်တန့်ကြ၏။ ထိုအချိန်သည်ကား၊ ခုနစ်လမြောက်၊ သုံးရက်မြောက်သောနေ့၏ နံနက်ဖြစ်၏။

၄၃ ယခုမူကား၊ သူတို့ကို အန္တိပု မီမမီ ငါတို့သိခြင်းမရှိ။ သို့ရာတွင်၊ ငါ၏လူတို့ကို ငါဆိုလေသည်မှာ၊ ရှုလော့၊ ငါတို့သိခြင်း မရှိသော်လည်း၊ သူတို့သည် ငါတို့လာ၍တိုက်ခိုက်စေခြင်းငှာဟူသော အကြံအစည်အတွက်၊ ငါတို့ကို သူတို့၏ထောင်ချောက်ထဲ၌ ဖမ်းနိုင်ခြင်းငှာ၊ ရပ်တန့်ကြလေပြီ။

၄၄ ထို့ကြောင့်၊ ငါ့သားတို့၊ သင်တို့ အဘယ်သို့ထင်သနည်း၊ သူတို့ကိုဆန့်ကျင်၍ စစ်တိုက်ကြမည်လော။

၄၅ ယခုမူကား၊ ငါ၏ချစ်လှစွာသောညီအစ်ကို မော်ရော်နိုင်း၊ သင့်ကို ငါဆိုသည်ကား၊ ထိုကဲ့သို့ကြီးစွာသော ရဲရင့်ခြင်းကို ငါမမြင်ခဲ့စဖူး။ မဟုတ်ပေ။ ခပ်သိမ်းသောနီဖိုင်းအမျိုးသားတို့၌ပင် မရှိ။

၄၆ အကြောင်းမူကား၊ ငါသည် သူတို့ကို ငါ့သားများဟု (သူတို့အားလုံးသည် အလွန်ငယ်ရွယ်နုပျိုကြသဖြင့်) အစဉ်ခေါ်ခဲ့သည့်အတိုင်း၊ ထိုကဲ့သို့ပင် သူတို့က ငါ့ကို ဆိုလေသည်ကား၊ အဘ၊ ရှုလော့၊ အကျွန်ုပ်တို့၏ဘုရားသခင်သည် အကျွန်ုပ်တို့နှင့်အတူရှိတော်မူ၍၊ အကျွန်ုပ်တို့ကို ကျဆုံးစေရန် အခွင့်ပေးတော်မူမည်မဟုတ်။ ထို့ကြောင့်၊ အကျွန်ုပ်တို့ကို သွား၍စစ်တိုက်ခွင့် ပေးပါလော့။ အကျွန်ုပ်တို့ညီအစ်ကိုများက အကျွန်ုပ်တို့ကို မနှောင့်ယှက်လျှင်၊ အကျွန်ုပ်တို့သည် သူတို့ကို ကွပ်မျက်မည်မဟုတ်။ ထို့ကြောင့်၊ အန္တိပု၏တပ်များကို သူတို့အနိုင်မရစေရန် အကျွန်ုပ်တို့ကို သွားခွင့်ပေးပါလော့။

၄၇ ယခုတွင်၊ သူတို့သည် အဘယ်သောအခါကမျှ မတိုက်ခိုက်စဖူး။ သို့သော်လည်း၊ သေခြင်းကိုမကြောက်ရွံ့ကြ။ သူတို့၏အသက်ထက်၊ သူတို့အဘတို့၏ လွတ်လပ်ခြင်းကို ပို၍ဂရုပြုကြ၏။ ထိုမှတစ်ပါး၊ သူတို့ယုံမှားသံသယမဖြစ်ကြလျှင်၊ ဘုရားသခင် ကယ်လွှတ်တော်မူလိမ့်မည်ဟူသော သူတို့မိခင်များ၏ သွန်သင်ခြင်းကို ခံထားကြလေပြီ။

၄၈ သူတို့မိခင်များ၏စကားများကိုလည်း ငါ့ကို ပြန်လည်၍ပြောပြလျက်၊ ထိုအမှုကို အကျွန်ုပ်တို့၏မိခင်များ သိကြောင်း အကျွန်ုပ်တို့ယုံမှားသံသယမဖြစ်ဟု ဆိုကြ၏။

၄၉ ဤသို့အားဖြင့်အချိန်တန်လာသောအခါ၊ ငါသည် ငါ၏နှစ်ထောင်တို့နှင့်အတူ ပြန်လာပြီး၊ ငါတို့ကို လိုက်သည့် ဤလာမန်အမျိုးသားတို့ကို တိုက်ခိုက်၏။ ယခုမူကား၊ ရှုလော့၊ သူတို့ကို အန္တိပု၏တပ်များမီလာ၍ ကြောက်မက်ဖွယ်သောတိုက်ပွဲ စတင်လေ၏။

၅၀ အန္တိပု၏တပ်သည် အလွန်တိုတောင်းသော အချိန်ကာလအပိုင်းအခြားအတွင်း၌၊ ဝေးစွာသောချီတက်ခြင်းကြောင့် မောပန်း၍၊ လာမန်အမျိုးသားတို့၏လက်ထဲသို့ ကျရောက်တော့မည်ကဲ့သို့ ရှိလေ၏။ အကယ်၍၊ ငါ၏နှစ်ထောင်နှင့် ငါပြန်၍လှည့်မလာခဲ့လျှင်၊ သူတို့၏အကြံအစည် ပြီးမြောက်ခဲ့ပေလိမ့်မည်။

၅၁ အန္တိပုသည် ဓားဘေးအားဖြင့်၊ သူ၏များစွာသောအကြီးအကဲတို့သည်လည်း သူတို့ချီတက်ခြင်း၏ လျင်မြန်ခြင်းကဖြစ်စေသည့် မောပန်းခြင်းကြောင့် ကျဆုံးလေသဖြင့်—ထို့ကြောင့်၊ အန္တိပု၏လူတို့သည် သူတို့၏အကြီးအကဲများ ကျဆုံးခြင်းကြောင့်၊ စိတ်ရှုပ်ထွေး၍ လာမန်အမျိုးသားတို့၏ ရှေ့မှ ဆုတ်ခွာစပြုကြ၏။

၅၂ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့သည် ရဲရင့်လာ၍၊ သူတို့ကိုလိုက်စပြုကြ၏။ ထိုကဲ့သို့အားဖြင့်၊ လာမန်အမျိုးသားတို့သည် သူတို့ကို ကြီးစွာသောအင်အားဖြင့် လိုက်လျက်ရှိစဉ်၊ ဟေလမန်က သူတို့၏နောက်ပိုင်းကို သူ၏နှစ်ထောင်တို့နှင့်အတူ၊ လာ၍တိုက်ခိုက်၍၊ လွန်စွာကွပ်မျက်စပြုသောအခါ၊ လာမန်အမျိုးသားတို့၏တပ်တစ်ခုလုံး ရပ်တန့်၍ ဟေလမန်ဘက်သို့ လှည့်ကြ၏။

၅၃ ယခုတွင်၊ လာမန်အမျိုးသားတို့ တစ်ဖက်သို့လှည့်သွားသည်ကို အန္တိပု၏လူတို့ မြင်လျှင်၊ လူတို့ကို အတူတကွစုဝေး၍၊ လာမန်အမျိုးသားတို့၏နောက်ပိုင်းကို တစ်ဖန်ပြန်လာ၍တိုက်ကြ၏။

၅၄ ယခုမူကား၊ အချိန်တန်လာသောအခါ၊ ငါတို့၊ နီဖိုင်းလူမျိုး၊ အန္တိပုလူမျိုး၊ ငါနှင့် ငါ၏နှစ်ထောင်တို့သည် လာမန်အမျိုးသားတို့ကို ဝိုင်း၍ ကွပ်မျက်ကြ၏။ ထိုမှတစ်ပါး၊ သူတို့သည်လည်း သူတို့၏စစ်တိုက်ရာလက်နက်များကို ပေးအပ်စေရန်နှင့် သူတို့ကိုယ်သူတို့စစ်အကျဉ်းသားများအဖြစ် ပေးအပ်စေရန် အနိုင်အထက်စီရင်ခံရကြ၏။

၅၅ ယခုမူကား၊ အချိန်တန်လာသောအခါ၊ သူတို့သည် ငါတို့ထံသို့ သူတို့ကိုယ်သူတို့ ရှင်းရှင်းအညံ့ခံကြလျှင်၊ ရှုလော့၊ ငါသည်လည်း အတူတိုက်ခိုက်သည့် ထိုလူပျိုတို့မှ များစွာသောသူတို့ ကွပ်မျက်ခံရလေပြီလောဟု စိုးရိမ်လျက် သူတို့ကို ရေတွက်၏။

၅၆ သို့ရာတွင်၊ ရှုလော့၊ ငါသည် ကြီးစွာဝမ်းမြောက်၏။ သူတို့အထဲမှ၊ တစ်ဦးမျှ၊ မြေကြီးသို့ မလဲကျ။ ထိုမှတစ်ပါး၊ သူတို့သည် ဘုရားသခင်၏ခွန်အားဖြင့်ကဲ့သို့ပင်တိုက်ခိုက်ကြ၏။ ထိုမှတစ်ပါး၊ ဤကဲ့သို့သော အလွန်တရာအံ့ဩဖွယ်ကောင်းသည့် ခွန်အားဖြင့် တိုက်ခိုက်တတ်လေသူများကို အဘယ်သောအခါကမျှ မသိစဖူး။ ဤကဲ့သို့ ကြီးစွာသောအင်အားဖြင့်၊ သူတို့သည် လာမန်အမျိုးသားတို့ကို တိုက်ခိုက်သဖြင့်၊ ကြောက်လန့်စေ၏။ ဤအကြောင်းရင်းကြောင့်၊ လာမန်အမျိုးသားတို့သည် သူတို့ကိုယ်သူတို့ စစ်အကျဉ်းသားများအဖြစ် အပ်နှံကြ၏။

၅၇ ငါတို့သည်လည်း ငါတို့၏စစ်အကျဉ်းသားများအတွက် နေရာမရှိသဖြင့်၊ လာမန်အမျိုးသားတို့တပ်များ၏ရန်မှ ကာကွယ်ရန် စောင့်ကြည့်ခြင်းငှာ သူတို့ကို ဇရဟင်မလပြည်သို့ စေလွှတ်၏။ အန္တိပုထံမှ ကွပ်မျက်မခံရသည့် အချို့သောလူများကိုလည်း၊ သူတို့နှင့်အတူ စေလွှတ်၏။ ကျန်ကြွင်းသောသူတို့ကို ငါခေါ်ယူ၍၊ ငါ၏အမ္မုန်ပြည်သားလုလင်ပျိုတို့နှင့် ပူးပေါင်းလျက်၊ ယုဒမြို့သို့ ပြန်၍ချီတက်၏။