အယ်လမာ ၅၇

အခန်းကြီး ၅၇

ဟေလမန်သည် အန္တိဖာရကို သိမ်းယူခြင်း၊ ကူမေနိမြို့ကို အညံ့ခံခြင်းနှင့် နောက်ပိုင်း၌ ကာကွယ်ခြင်းတို့အကြောင်းကို ပြန်လည်ပြောပြ၏—သူ၏အမ္မုန်ပြည်သားလုလင်တို့သည် ရဲရင့်စွာ တိုက်ခိုက်ကြ၏။ ခပ်သိမ်းသောသူတို့ ဒဏ်ရာရကြ၏၊ သို့ရာတွင် တစ်ဦးမျှ ကွပ်မျက်မခံရ—ဂိဒသည် လာမန်အမျိုးသားစစ်အကျဉ်းသားတို့ကို ကွပ်မျက်ခြင်းနှင့် ထွက်ပြေးခြင်းအကြောင်းတို့ကို သတင်းပြောကြား၏။ ဘီစီ ၆၃ ခန့်။

၁ ယခုမူကား၊ အချိန်တန်လာသောအခါ ငါတို့ဖမ်းယူခဲ့သော ထိုစစ်အကျဉ်းသားများကို ငါပေးအပ်လျှင်၊ အန္တိဖာရမြို့ကို ငါတို့ထံသို့ ပေးအပ်မည်ဟု ဖော်ပြလျက်ရှိသော အမှာစာကို အမ်မော်ရုန်မင်းကြီးထံမှ ငါရရှိ၏။

၂ သို့ရာတွင်၊ အမှာစာတစ်စောင်ကို မင်းကြီးထံသို့ ငါပို့သည်ကား၊ ငါတို့အင်အားစုများဖြင့် အန္တိဖာရမြို့ကိုသိမ်းယူရန်၊ ငါတို့၏တပ်ဖွဲ့များ လုံလောက်စွာရှိသည်မှာ သေချာ၏။ ထိုမြို့အတွက် စစ်အကျဉ်းသားများကို ပေးအပ်ခြင်းဖြင့် ငါတို့ကိုယ်ငါတို့ ဉာဏ်ပညာမရှိဟု မှတ်ယူရာရောက်ကြောင်း၊ ထို့အတူ ငါတို့၏စစ်အကျဉ်းသားများကို လဲလှယ်ခြင်းအားဖြင့်သာလျှင်၊ ငါတို့ပေးအပ်မည့်အကြောင်းပေတည်း။

၃ အမ်မော်ရုန်ကလည်း ငါ၏အမှာစာကို ငြင်းပယ်၏။ အကြောင်းမူကား၊ သူသည် စစ်အကျဉ်းသားတို့ကို လဲလှယ်လိုခြင်းမရှိ။ ထို့ကြောင့်၊ ငါတို့သည် အန္တိဖာရမြို့ကို သွား၍တိုက်ခြင်းငှာ၊ ပြင်ဆင်ခြင်းများပြုရန် အစပြုကြ၏။

၄ သို့ရာတွင်၊ အန္တိဖာရမှ လူတို့သည် မြို့ကိုစွန့်ခွာကြ၏၊ သူတို့သိမ်းပိုက်ထားသည့် အခြားမြို့များကို အင်အားခိုင်မာအောင်ပြုခြင်းငှာ ထိုမြို့များသို့ ထွက်ပြေးကြ၏။ ထိုကဲ့သို့အားဖြင့်၊ အန္တိဖာရမြို့သည် ငါတို့လက်ထဲသို့ ကျရောက်၏။

၅ ထိုကဲ့သို့အားဖြင့်၊ တရားသူကြီးများအုပ်စိုးခြင်းနှစ်ဆယ်ရှစ်နှစ်မြောက် ပြီးဆုံး၏။

၆ ဤသို့အားဖြင့်အချိန်တန်လာသောအခါ၊ နှစ်ဆယ်ကိုးနှစ်မြောက်၏အစ၌၊ ငါတို့သည် ရိက္ခာအထောက်အပံ့များ၊ ထို့အတူ သူတို့ညီအစ်ကိုများ၊ ငါ၏အယောက်နှစ်ထောင်ရှိသော တပ်ဖွဲ့ငယ်သို့ ပူးပေါင်းရန်လာလေသူ အမ္မုန်ပြည်သားတို့၏သား အယောက်ခြောက်ဆယ်တို့အပြင်၊ လူခြောက်ထောင်အရေအတွက်အထိ ဇရဟင်မလပြည်မှလည်းကောင်း၊ ပတ်ဝန်းကျင်အရပ်ဒေသတို့မှလည်းကောင်း၊ ငါတို့၏တပ်သို့ ထပ်ပေါင်းခြင်းကို လက်ခံရရှိကြ၏။ ယခုမူကား၊ ရှုလော့၊ ငါတို့သည် အားကြီးလေပြီ။ ထိုမှတစ်ပါး၊ ငါတို့ထံသို့ ဆောင်ယူခဲ့သည့် များစွာသောရိက္ခာတို့လည်း ငါတို့မှာရှိလေပြီ။

၇ ဤသို့အားဖြင့်အချိန်တန်လာသောအခါ၊ ကူမေနိမြို့ကို ကာကွယ်ခြင်းငှာ ချထားလေသည့်တပ်နှင့် စစ်တိုက်ရန်မှာ ငါတို့၏အလိုဆန္ဒဖြစ်၏။

၈ ယခုမူကား၊ ရှုလော့၊ ငါတို့သည် မကြာမြင့်မီ၊ ငါတို့အလိုဆန္ဒများ၊ ပြီးပြည့်စုံတော့မည်ဖြစ်ကြောင်းကို သင့်ကို ငါပြမည်။ ထိုမှတစ်ပါး၊ သူတို့ရိက္ခာအထောက်အပံ့များ မရရှိမီအချိန်အနည်းငယ်တွင်၊ ညဉ့်အချိန်၌၊ ကူမေနိမြို့ကို ငါတို့၏အားကြီးသောတပ်ဖွဲ့၊ သို့မဟုတ်၊ ငါတို့၏အားကြီးသောတပ်ဖွဲ့၏ တစ်စိတ်တစ်ပိုင်းဖြင့် ငါတို့ဝိုင်း၏။

၉ ဤသို့အားဖြင့်အချိန်တန်လာသောအခါ၊ ငါတို့သည် မြို့၏ပတ်လည်၌ ညများစွာကြာအောင် တပ်စခန်းချ၏။ သို့ရာတွင်၊ ငါတို့၏ဓားများပေါ်၌ အိပ်၍၊ ညဉ့်အချိန်၌ လာမန်အမျိုးသားတို့ လာ၍ငါတို့ကို မတိုက်ခိုက်၊ မကွပ်မျက်နိုင်စေခြင်းငှာ အစောင့်များချထားကြ၏။ သူတို့သည် တိုက်ခိုက်ကွပ်မျက်ရန် အကြိမ်များစွာကြိုးစားအားထုတ်ကြ၏။ ဤကဲ့သို့ ကြိုးစားအားထုတ်သမျှသောအကြိမ်များ၌လည်း သူတို့၏အသွေးကိုသာ သွန်းလောင်းကြ၏။

၁၀ ခဏကြာလျှင်၊ သူတို့၏ရိက္ခာများ ရောက်လာ၍၊ သူတို့သည် ညဉ့်အချိန်၌ မြို့တွင်းသို့ ဝင်တော့မည်ပြုကြ၏။ ငါတို့သည်ကား၊ လာမန်အမျိုးသားတို့အစား၊ နီဖိုင်းအမျိုသားများဖြစ်လေပြီ။ ထို့ကြောင့်၊ ငါတို့သည် သူတို့နှင့် သူတို့၏ရိက္ခာများကို သိမ်းယူကြ၏။

၁၁ လာမန်အမျိုးသားတို့သည် ဤကဲ့သို့အားဖြင့် သူတို့၏အထောက်အပံ့မှ ဖြတ်တောက်ထားခြင်းကို ခံရသော်ငြားလည်း၊ မြို့ကို ထိန်းသိမ်းရန် သန္နိဌာန်ချလျက်ရှိသေး၏။ ထို့ကြောင့်၊ ငါတို့သည် ထိုရိက္ခာများကိုယူ၍၊ ယုဒမြို့သို့လည်းကောင်း၊ ငါတို့၏စစ်အကျဉ်းသားများကို ဇရဟင်မလပြည်သို့လည်းကောင်း ပို့ရန် လိုအပ်လာ၏။

၁၂ ဤသို့အားဖြင့်အချိန်တန်လာသောအခါ၊ များစွာသောနေ့များ မကုန်လွန်မီတွင်၊ လာမန်အမျိုးသားတို့သည် အကူအညီအတွက် မျှော်လင့်ချက်အားလုံး ကုန်ဆုံးစပြု၏။ ထို့ကြောင့်၊ သူတို့သည် ငါတို့၏လက်သို့ မြို့ကို ပေးအပ်ကြ၏။ ထိုကဲ့သို့အားဖြင့်၊ ငါတို့သည် ကူမေနိမြို့ကို ရရှိရာ၌ ငါတို့၏အကြံအစည်ကို ပြီးပြည့်စုံစေ၏။

၁၃ သို့ရာတွင်၊ အချိန်တန်လာသောအခါ၊ ငါတို့၏စစ်အကျဉ်းသားတို့ အလွန်အမြောက်အမြားရှိ၍၊ ငါတို့၏အရေအတွက်မှာ များပြားသော်ငြားလည်း၊ ငါတို့သည် သူတို့ကိုစောင့်ကြည့်ရန် သို့မဟုတ် အသေသတ်ရန် ငါတို့၏ တပ်ဖွဲ့ရှိသမျှကို အသုံးပြုရလေ၏။

၁၄ အကြောင်းမူကား၊ ရှုလော့၊ သူတို့သည် များစွာသောအရေအတွက်အားဖြင့် ဖောက်ထွက်လိုကြ၊ ကျောက်ခဲများ၊ တင်းပုတ်များ သို့မဟုတ်၊ သူတို့လက်ထဲသို့ ရနိုင်သမျှသောအရာတို့နှင့် တိုက်ခိုက်လိုကြသဖြင့်၊ စစ်အကျဉ်းသားများအဖြစ် သူတို့ကိုယ်သူတို့ အညံ့ခံကြပြီးမှ၊ သူတို့ထဲမှအယောက်နှစ်ထောင်ကျော်ကို ငါတို့ကွပ်မျက်ကြ၏။

၁၅ ထို့ကြောင့်၊ သူတို့အသက်ကို အဆုံးစီရင်ရန်၊ သို့မဟုတ် လက်ထဲ၌ ဓားကိုကိုင်၍၊ သူတို့ကို စောင့်ကြည့်လျက်၊ ဇရဟင်မလပြည်သို့ ဆင်းသွားရန် ငါတို့အတွက်လိုအပ်လာ၏။ လာမန်အမျိုးသားတို့ထံမှ သိမ်းယူခဲ့သော်ငြားလည်း ငါတို့၏ရိက္ခာများမှာ ငါတို့လူများအတွက်လုံလောက်သည်ထက် တစ်စုံတစ်ခုမျှပို၍မရှိလေတော့။

၁၆ ယခုမူကား၊ ထိုကဲ့သို့သော အကျပ်အတည်းအခြေအနေမျိုးတွင်၊ ဤစစ်အကျဉ်းသားများနှင့်စပ်လျဉ်း၍ ဆုံးဖြတ်ရန်မှာ အလွန်အရေးကြီးသောအမှု ဖြစ်လာ၏။ အဘယ်သို့ပင်ဖြစ်စေ၊ ငါတို့သည် သူတို့ကို ဇရဟင်မလပြည်သို့ပို့ရန် ဆုံးဖြတ်ကြ၏။ ထို့ကြောင့်၊ ငါတို့၏လူအချို့ကို ရွေးချယ်၍၊ ငါတို့၏စစ်အကျဉ်းသားများကို အုပ်ချုပ်လျက်၊ ဇရဟင်မလပြည်သို့ဆင်းသွားရန် တာဝန်ပေး၏။

၁၇ သို့ရာတွင်၊ အချိန်တန်လာသောအခါ၊ နက်ဖြန်နေ့တွင် သူတို့ပြန်လာကြ၏။ ယခုမူကား၊ ရှုလော့၊ ငါတို့သည် သူတို့အား စစ်အကျဉ်းသားများအကြောင်းကို မမေး။ အကြောင်းမူကား၊ ရှုလော့၊ လာမန်အမျိုးသားတို့သည် ငါတို့ကို တိုက်ခိုက်ကြလေပြီ၊ သူတို့လက်ထဲသို့ ကျရောက်ခြင်းမှ ကယ်တင်ခြင်းငှာ၊ အချိန်မီပြန်လာကြခြင်းဖြစ်၏။ အကြောင်းမူကား၊ ရှုလော့၊ အမ်မော်ရုန်သည် အထောက်အမအတွက်၊ ရိက္ခာအထောက်အပံ့အသစ်များနှင့် တပ်သားအမြောက်အမြားကိုလည်း ပို့၏။

၁၈ ဤသို့အားဖြင့်အချိန်တန်လာသောအခါ၊ စစ်အကျဉ်းသားများနှင့်အတူ ငါတို့စေလွှတ်ခဲ့သောသူတို့သည် ထိုသူတို့ ငါတို့အပေါ် အနိုင်ရခါနီးအချိန်တွင်၊ ဟန့်တားရန် အချိန်မီရောက်လာ၏။

၁၉ သို့ရာတွင်၊ ရှုလော့၊ ငါ၏နှစ်ထောင်နှင့်ခြောက်ဆယ်တို့၏တပ်ဖွဲ့ငယ်သည် အပြင်းထန်ဆုံး တိုက်ခိုက်ကြ၏။ ထိုမှတစ်ပါး၊ သူတို့သည် လာမန်အမျိုးသားတို့၏ရှေ့ ၌ ခိုင်မာကြ၏၊ သူတို့ကို ဆန့်ကျင်သူမှန်သမျှကို အဆုံးစီရင်ကြ၏။

၂၀ ငါတို့တပ်မှ ကျန်ကြွင်းသောသူတို့သည်လည်း လာမန်အမျိုးသားတို့၏ရှေ့မှ ဆုတ်ခွာတော့မည်ပြုစဉ်တွင်၊ ရှုလော့၊ ထိုနှစ်ထောင်နှင့်ခြောက်ဆယ်တို့သည် ခိုင်မာလျက် စိတ်ပျက်အားလျော့ခြင်းမရှိကြ။

၂၁ ထိုမှတစ်ပါး၊ သူတို့သည် နာခံလျက်၊ အမိန့်စကားတိုင်းကို တိကျစွာဆောင်ရွက်ခြင်းငှာ၊ အားထုတ်၏။ ထိုမှတစ်ပါး၊ သူတို့၏ယုံကြည်ခြင်းအတိုင်းပင်၊ သူတို့ထံ ဖြစ်လေပြီ။ သူတို့၏မိခင်များ သူတို့ကို သွန်သင်သည်ဟူသော ငါ့ကို သူတို့ပြောသည့်စကားများကိုလည်း ငါသတိရ၏။

၂၂ ယခုမူကား၊ ရှုလော့၊ ငါ၏ဤသားတို့သည်ကား၊ စစ်အကျဉ်းသားတို့ကို ပို့ဆောင်ရန် ရွေးချယ်ခံရသော ထိုလူများ၊ ဤကြီးစွာသောအောင်နိုင်ခြင်းအတွက် ငါတို့ဆပ်စရာရှိသောသူများပေတည်း။ အကြောင်းမူကား၊ သူတို့သည် လာမန်အမျိုးသားတို့ကို နှိမ်နှင်းအောင်မြင်သောသူများဖြစ်၏။ ထို့ကြောင့်၊ သူတို့သည်လည်း မန်တိမြို့သို့ ပြန်၍နှင်ထုတ်ခံရကြလေ၏။

၂၃ ငါတို့သည်လည်း ငါတို့၏ကူမေနိမြို့ကို ထိန်းသိမ်းထားကြ၏၊ ဓားဘေးအားဖြင့် အားလုံးမပျက်စီးကြ။ သို့သော်လည်း၊ ငါတို့သည် ကြီးစွာသောဆုံးရှုံးခြင်းကို ခံစားခဲ့ရ၏။

၂၄ ဤသို့အားဖြင့်အချိန်တန်လာသောအခါ၊ ငါသည် လာမန်အမျိုးသားတို့ထွက်ပြေးကြပြီးနောက်တွင်၊ ဒဏ်ရာရလေသော ငါ၏လူတို့ကို အသေကောင်များကြားမှ ဖယ်ရှားစေရန်နှင့် သူတို့၏ဒဏ်ရာများကို စည်းနှောင်စေရန် ချက်ချင်း အမိန့်ပေး၏။

၂၅ ဤသို့အားဖြင့်အချိန်တန်လာသောအခါ၊ ငါ၏နှစ်ထောင့်ခြောက်ဆယ်တို့တွင် သွေးလွန်ခြင်းကြောင့် မိန်းမောသူ အယောက်နှစ်ရာရှိ၏။ သို့သော်လည်း၊ ဘုရားသခင်၏ကောင်းမြတ်ခြင်းအတိုင်း၊ ငါတို့ ကြီးစွာအံ့ဩ၍၊ ထို့အတူ၊ ငါတို့တပ်တစ်ခုလုံး ဝမ်းမြောက်ရသည်ကား၊ သူတို့အထဲမှ ပျက်စီးသူ တစ်ယောက်မျှမရှိ။ ထိုမှတစ်ပါး၊ များစွာသောဒဏ်ရာမရရှိသူလည်း သူတို့၌ တစ်ယောက်မျှမရှိ။

၂၆ ယခုမူကား၊ သူတို့ကာကွယ်စောင့်မခံရခြင်း၊ အထူးသဖြင့်၊ ကွပ်မျက်ခံရလေသည့် ငါတို့၏ညီအစ်ကို တစ်ထောင်ရှိစဉ် သူတို့ချမ်းသာရခြင်းက ငါတို့၏တပ်တစ်ခုလုံးကို အံ့ဩစေလျက်ရှိ၏။ ငါတို့သည်လည်း တရားမျှတတော်မူသော ဘုရားသခင်ရှိတော်မူကြောင်းနှင့်၊ ယုံမှားသံသယမဖြစ်သူမှန်သမျှ သူ၏အံ့ဩဖွယ်ရာတန်ခိုးတော်အားဖြင့် ကာကွယ်စောင့်မတော်မူခြင်းခံရမည့်အကြောင်း—ယုံကြည်စေရန် သူတို့သွန်သင်ခံရလေသည့်သူကို သူတို့၏ ကြီးစွာသောယုံကြည်ခြင်းကြောင့်၊ ထိုအမှုအတွက် ဘုရားသခင်၏ အလွန်တရာအံ့ဩဖွယ်ကောင်းသောတန်ခိုးတော်ကို မှန်ကန်စွာချီးမွမ်းကြ၏။

၂၇ ယခုတွင်၊ ဤအရာသည်ကား၊ ငါပြောလေသူတို့၏ ယုံကြည်ခြင်းပေတည်း။ သူတို့သည် အသက်ငယ်၏၊ သူတို့၏စိတ်မှာ ခိုင်မာ၏၊ ဘုရားသခင်ကိုလည်း အစဉ်မပြတ် ကိုးစားကြ၏။

၂၈ ယုခုမူကား၊ အချိန်တန်လာသောအခါ၊ ငါတို့သည် ဒဏ်ရာရသောငါတို့လူများကို ထိုကဲ့သို့အားဖြင့်ဂရုစိုက်၍၊ များစွာရှိလေသော ငါတို့၏အသေကောင်များနှင့် လာမန်အမျိုးသားတို့၏အသေကောင်များကိုလည်း သင်္ဂြိုဟ်ပြီးလျှင်၊ ရှုလော့၊ ဇရဟင်မလပြည်သို့ သူတို့နှင့်အတူ ဆင်းသွားရန် စတင်သည့် စစ်အကျဉ်းသားများအကြောင်း ဂိဒကို မေးမြန်းကြ၏။

၂၉ ယခုတွင်၊ ဂိဒသည်ကား၊ ထိုပြည်သို့ဆင်းသွားရာ၌ သူတို့ကိုစောင့်ထိန်းရန် ခန့်အပ်ခံရသူ၊ အဖွဲ့၏ဗိုလ်ချုပ်မင်းဖြစ်၏။

၃၀ ယခုမူကား၊ ဂိဒ ငါ့ကို ဆိုလေသည့် ဤစကားများမှာ၊ ရှုလော့၊ ငါတို့သည် ငါတို့၏စစ်အကျဉ်းသားများနှင့်အတူ ဇရဟင်မလပြည်သို့ ဆင်းသွားရန် စတင်ကြ၏။ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့၏တပ်စခန်းများကို စောင့်ကြည့်စေခြင်းငှာ စေလွှတ်ခံရသော ငါတို့တပ်များမှ သူလျှိုတို့ကို တွေ့ကြ၏။

၃၁ သူတို့ကလည်း ငါတို့ကို အော်ဟစ်သည်ကား—ရှုလော့၊ လာမန်အမျိုးသားတပ်များသည် ကူမေနိမြို့သို့ ချီတက်လာနေကြပြီ။ ရှုဦးလော့၊ သူတို့တိုက်ခိုက်လိမ့်မည်၊ ထိုမှတစ်ပါး ငါတို့လူများကို ဖျက်ဆီးလိမ့်မည်ဟု ဆိုကြ၏။

၃၂ ဤသို့အားဖြင့်အချိန်တန်လာသောအခါ၊ ငါတို့၏စစ်အကျဉ်းသားတို့သည် ထိုသူတို့၏အော်သံကိုကြားကြ၏၊ ထိုအသံများက သူတို့ကို ရဲရင့်စေ၏။ သူတို့သည်လည်း ငါတို့ကို ဆန့်ကျင်၍ ပုန်ကန်ထကြွခြင်းကို စတင်ကြ၏။

၃၃ ဤသို့အားဖြင့်အချိန်တန်လာသောအခါ၊ သူတို့၏ပုန်ကန်ခြင်းကြောင့်၊ ငါတို့သည် ငါတို့၏ဓားများကို သူတို့အပေါ်သို့ ရောက်စေကြ၏။ ဤသို့အားဖြင့်အချိန်တန်လာသောအခါ၊ သူတို့သည် ငါတို့၏ဓားများဆီသို့ အစုလိုက်တိုးဝင်သဖြင့်၊ သူတို့ထဲမှ ပို၍များစွာသောသူတို့သည် ကွပ်မျက် ခံရကြ၏။ သူတို့ထဲမှ ကျန်ကြွင်းသောသူတို့သည်လည်း ငါတို့ထံမှ ထိုးဖောက်၍ ထွက်ပြေးကြ၏။

၃၄ ရှုဦးလော့၊ သူတို့ ထွက်ပြေးကြသောအခါ၊ ငါတို့သည် အနိုင်မရနိုင်ကြ၊ ကူမေနိမြို့သို့ လျင်မြန်စွာ ချီတက်ကြ၏။ ရှုဦးလော့၊ ငါတို့သည် ငါတို့၏ညီအစ်ကိုတို့အား မြို့ကို ကာကွယ်စောင့်မရာ၌ကူညီရန် အချိန်မီ၊ ရောက်လာကြ၏။

၃၅ ရှုဦးလော့၊ ငါတို့သည် ငါတို့ရန်သူများ၏လက်မှ ကယ်လွှတ်ခြင်းကို တစ်ဖန်ခံရပြန်လေပြီ။ ငါတို့ဘုရားသခင်၏နာမတော်သည် မင်္ဂလာရှိပါ၏။ အကြောင်းမူကား၊ ရှုလော့၊ သူသည်ကား၊ ငါတို့ကို ကယ်လွှတ်တော်မူသောသူဖြစ်၏။ ထိုမှတစ်ပါး၊ ငါတို့အတွက် ဤကြီးစွာသောအမှုကို ပြုတော်မူလေသောသူပေတည်း။

၃၆ ယခုတွင်၊ အချိန်တန်လာသောအခါ၊ ငါ၊ ဟေလမန်သည် ဂိဒ၏ဤစကားများကို ကြားရလျှင်၊ ငါတို့အားလုံး မပျက်စီးနိုင်စေခြင်းငှာ၊ ငါတို့ကို ကာကွယ်စောင့်မတော်မူရာ၌ ဘုရားသခင်၏ကောင်းမြတ်ခြင်းကြောင့်၊ ငါသည် ကြီးစွာသောဝမ်းမြောက်ခြင်းနှင့်ပြည့်၏။ ထိုမှတစ်ပါး၊ ငါသည် ကွပ်မျက်ခံရလေသောသူတို့၏ဝိညာဉ်များ သူတို့ဘုရားသခင်၏ချမ်းသာထဲသို့ ဝင်လေပြီဖြစ်ကြောင်းကိုလည်း ယုံကြည်စိတ်ချ၏။