Nge nang gubin e pi nam, nge pi mfen, nge pi thin, nge pi gidiiʼ, nra yibi taw e re muruwel ney ngoraed: Ni gamaed, u dakean fare murnguy rokʼ Got ni Chitamngiy, nge Somoel rodaed i Yesus Kristus, e kug guyed fapi yungi plate ni bay e re chep ney riy, ni ba chep ni morngaʼagen e pi gidiiʼ rokʼ Nephi, nge ku fapi Lamanites, ni walagraed, nge ku fapi gidiiʼ rokʼ Jared, nra baed ko fare wulyang niʼir faram e kan weliy morngaʼagen. Ma kag maed manang ni kan pilyeg e thin riy u dakean fare tawaʼath nge gelngin Got, ya ire ke yoeg ngomaed; ere arfan, ni gamaed manang nib michaenʼ maed ngay nib riyulʼ e re muruwel ney. Ma kag maed be micheg ni kug guyed fapi yol ni kan ker nga dakean fapi yungi plate; ma kan dag ngomaed u dakean fare gelngin rokʼ Got, ma gathi gelngin e gidiiʼ. Ma gamaed be yoeg u fithikʼ e tamilang ni nge nange yoʼor, ni ba angel rokʼ Got e yib nga butʼ u tharmiy, me fek nge yibi tay nga peʼowchmaed ni gu sap gaed mug guyed fapi yungi plate, nge fapi yol ni kan ker nga dakean; ma gamaed manang nu dakean fare murnguy rokʼ Got ni Chitamngiy, nge Somoel rodaed i Yesus Kristus, e kug guyed riy ma gamaed yoloey babyoren ni pinnʼey e ba riyulʼ. Ma rib maʼangʼang u peʼowchmaed. Machane, fare lam rokʼ Somoel e motochiyel nag ngomaed ni thingar gu yoloeyed babyoren; ere, ngar ni fol ko pi motochiyel rokʼ Got, arfan ni gamaed be micheg e pinnʼey. Ma gamaed manang ni faʼan gamaed ra yulʼyulʼ u dakean Kristus, ma bay ni chuweg rachaʼen e gidiiʼ ko mad romaed, min pirʼeg maed ni kug pired ni dariy thibngimaed u tagilʼ e pufthin rokʼ Kristus, ma bay gu pired rokʼ ni dariy nʼumngin i napʼan u tharmiy. Ma falʼngin e ra yaen ko faʼen Chitamngiy, nge fare Fak, nge fare Kan ni Thothup, ni yaed taʼab Got. Amen.