Mësimi 28: Mateu 25:1–13

Mësimi 28

Mateu 25:1–13

Hyrje

Kur Jezu Krishti i mësoi veçmas dishepujt e Tij në Malin e Ullinjve për Ardhjen e Tij të Dytë, Ai dha mësim shëmbëlltyrën e dhjetë virgjëreshave.

Sugjerime për Mësimdhënien

Mateu 25:1–13

Jezu Krishti jep mësim shëmbëlltyrën e dhjetë virgjëreshave

Ftojeni një student ta lexojë me zë të lartë rrëfimin vijues të treguar nga Plaku Xhefri R. Holland, i Kuorumit të Dymbëdhjetë Apostujve, për një misionar të ri të kthyer nga misioni që tregoi një përvojë vetjake në një mbledhje dëshmish. Ftojini studentët të përfytyrojnë se si do të ndiheshin ata nëse do të ishin në vend të të riut në këtë histori.

“Ai … tregoi për kthimin në shtëpi nga një takim me një vajzë pak pasi ishte shuguruar plak, në moshën 18-vjeçare. Diçka kishte ndodhur në këtë takim, për të cilën nuk krenohej. Ai nuk hyri në hollësi, as nuk duhej ta kishte bërë në një ambient publik. Sot e kësaj dite nuk e di se çfarë ndodhi, por ishte mjaftueshëm domethënëse për të sa që i kishte prekur shpirtin dhe vetëvlerësimin e tij.

Ndërsa u ul në makinën e tij për pak kohë në rrugicën para shtëpisë së vet, duke menduar gjërat që kaluan dhe duke ndier hidhërim të vërtetë për çfarëdo që kishte ndodhur, e ëma e tij joanëtare erdhi duke vrapuar e shqetësuar nga shtëpia drejt makinës së tij. Në çast, ajo njoftoi se vëllai më i vogël i këtij djali ishte rrëzuar në shtëpi, kishte goditur kokën keqas dhe po kalonte një krizë apo spazmë. I ati joanëtar kishte telefonuar menjëherë për një ambulancë, por do t’i nevojitej ndihmë derisa ambulanca të vinte.

‘Eja dhe bëj diçka’, thërriste ajo në lot. ‘A nuk ka diçka që bëni ju në Kishën tuaj në kohë si këto? Ti ke priftërinë e tyre. Eja dhe bëj diçka.’ …

… Në këtë mbrëmje kur dikush që ai e donte kaq shumë kishte nevojë për besimin e tij dhe forcën e tij, ky i ri nuk mund t’i vinte në ndihmë. Duke pasur parasysh ndjenjat me të cilat po ndeshej dhe shkeljen që ndiente se sapo kishte bërë – çfarëdo qoftë ajo – ai nuk mundej të shkonte para Zotit dhe t’i kërkonte bekimin që nevojitej” (“Siguria e Denjësisë”, Liahona, prill 2014, f. 58–59).

Çfarë do të mendonit nëse do të ishit ju i riu në këtë situatë? Përse është kaq e rëndësishme që të jemi përherë të përgatitur?

Paraqitni figurën Shëmbëlltyra e Dhjetë Virgjëreshave (Libri i Figurave Artistike të Ungjillit [2008], nr. 53; shih edhe LDS.org). Kujtojuni studentëve se kur Jezu Krishti ishte në Malin e Ullinjve me dishepujt e Tij, Ai i mësoi ata për Ardhjen e Tij të Dytë (shih Mateu 24). Ai më pas dha shëmbëlltyrën e dhjetë virgjëreshave për të ilustruar se si të jemi të përgatitur për Ardhjen e Tij të Dytë.

Ftojeni një student ta lexojë me zë të lartë Mateun 25:1–4. Vëreni klasën ta ndjekë, duke kërkuar elementet kryesore të shëmbëlltyrës. Ftojini ata të raportojnë atë që gjejnë. Shkruajini frazat vijuese në tabelë:

Dhëndri

Virgjëresha të mençura dhe budallaçka

Llamba dhe vaj

Shpjegoni që sipas zakoneve judease të dasmës, burri ose dhëndri, i shoqëruar nga miqtë e tij të ngushtë, do të shkonte në mbrëmje te shtëpia e nuses për ceremoninë e dasmës. Pas ceremonisë, dasmorët do të vijonin për te shtëpia e dhëndrit për një gosti. Nga të ftuarit në dasmë, që i bashkoheshin varganit, pritej që të mbanin llambat ose pishtarët e tyre vetjak për të treguar që ata ishin pjesë e dasmorëve dhe për t’i shtuar shkëlqim dhe bukuri ngjarjes.

Ftojini disa studentë që me radhë të lexojnë me zë të lartë nga Mateu 25:5–13. Vëreni klasën që t’i ndjekë, duke kërkuar atë që bënë pesë virgjëreshat e mençura dhe atë që bënë pesë virgjëreshat budallaçka.

Në vend që t’i vini studentët ta lexojnë me zë të lartë Mateun 25:5–13, ju mund t’u shfaqni studentëve një pjesë të videos “They That Are Wise” [“Ata Që Janë të Mençur”] (kodi kohor 0:00–5:46), që paraqet shëmbëlltyrën e dhjetë virgjëreshave. Kjo video është mundësuar te Doctrine and Covenants and Church History Visual Resource DVDs dhe te LDS.org. Përpara se ta filloni videon, ftojini studentët të kërkojnë atë që bënë pesë virgjëreshat e mençura dhe atë që bënë pesë virgjëreshat budallaçka.

Çfarë bënë pesë virgjëreshat e mençura? Çfarë bënë pesë virgjëreshat budallaçka?

Drejtojuni elementeve të shëmbëlltyrës të shkruara në tabelë. Kërkojini klasës të sugjerojë atë që ata mendojnë se mund të përfaqësojë secili element.

Shkruani Jezu Krishti pranë fjalës Dhëndri në tabelë. Shpjegoni që frazat “tani, duke qenë se dhëndri po vononte” (vargu 5) dhe “nga mesnata u dëgjua një britmë” (vargu 6) i referohen Ardhjes së Dytë të Jezu Krishtit.

Çfarë mund të mësojmë për Ardhjen e Dytë të Jezu Krishtit nga këto fraza?

Shpjegoni që si virgjëreshat e mençura edhe budallaçkat, që ishin ftuar në festë, përfaqësojnë anëtarët e Kishës (shih Dallin H. Oaks, “Preparation for the Second Coming”, Ensign ose Liahona, maj 2004, f. 8). Shkruani Anëtarët e Kishës pranë Virgjëresha të mençura dhe budallaçka në tabelë.

Ftojini studentët ta përsëritin Mateun 25:8–9 dhe të përsiatin arsyen përse virgjëreshat e mençura nuk ua dhanë vajin e tyre virgjëreshave budallaçka. Ftojeni një student ta lexojë me zë të lartë thënien vijuese nga Presidenti Spenser W. Kimball. Ftojeni klasën të mbajë vesh për atë që mund të përfaqësojë vaji dhe për arsyen përse nuk mund të ndahej me të tjerët.

“Kjo nuk ishte egoizëm apo mosmirësi. Lloji i vajit që nevojitet për ta ndriçuar udhën dhe për t’i bërë dritë errësirës, nuk është i ndashëm. Si mund të ndajë dikush bindje ndaj parimit të së dhjetës; një mendje në paqe nga të jetuarit e drejtë; një grumbullim të diturisë? Si mund të ndajë dikush besim ose dëshmi? Si mund të ndajë dikush sjellje ose dëlirësi, apo përvojën e një misioni? Si mund t’i ndajë dikush privilegjet e tempullit? Secili duhet ta fitojë atë lloj vaji për veten e tij. …

Në shëmbëlltyrë, vaji mund të blihet në treg. Në jetën tonë, vaji i përgatitjes grumbullohet pikë pas pike nëpërmjet të jetuarit të drejtë. … Çdo vepër përkushtimi dhe bindjeje është një pikë e shtuar në rezervën tonë” (Faith Precedes the Miracle [1972], f. 255–256).

Çfarë përfaqëson vaji në shëmbëlltyrë? (Shkruajini përgjigjet e studentëve, të tilla si përgatitje shpirtërore, dëshmi, besim, kthim në besim dhe përvojë pranë Llamba dhe vaji në tabelë. Për të dhënë këndvështrim shtesë për simbolikën e vajit, ju mund të doni të sugjeroni që studentët të lexojnë Doktrinën e Besëlidhjet 45:56–57 dhe ta lidhin atë si referencë kryq me Mateun 25:8.)
Çfarë të vërtete mund të mësojmë nga shëmbëlltyra dhe nga komentet e Presidentit Kimball për marrjen hua të përgatitjes shpirtërore? (Pasi studentët të përgjigjen, shkruajeni të vërtetën vijuese në tabelë: Ne nuk mund ta marrim hua përgatitjen shpirtërore prej të tjerëve.)
Çfarë të vërtete mësojmë nga shëmbëlltyra rreth mënyrës se si të përgatitemi për Ardhjen e Dytë? (Studentët mund të përdorin fjalë të ndryshme, por sigurohuni që ata të përcaktojnë të vërtetën vijuese: Ne përgatitemi për Ardhjen e Dytë duke rritur dëshminë dhe kthimin tonë në besim nëpërmjet drejtësisë së përditshme. Shkruajeni këtë të vërtetë në tabelë.)

Jepuni studentëve kopje të fletushkës shoqëruese. Ftojini ata të renditin në fletushkë mënyra se si ata mund ta marrin “vajin” e përgatitjes shpirtërore.

fletushkë, Përgatitja për Ardhjen e Dytë të Zotit

Pas një kohe të mjaftueshme, kërkojuni disa studentëve që t’ia tregojnë disa nga idetë e tyre klasës.

Për t’i ndihmuar studentët të kuptojnë mënyra të tjera në të cilat mund të mbledhin vaj pikë pas pike nëpërmjet të jetuarit të drejtë, merrni parasysh të shfaqni pjesën tjetër të videos “They That Are Wise” [“Ata Që Janë Të Mençur”] (kodi kohor 5:46–8:44). Ftojini studentët t’u shtojnë ide listave të tyre ndërsa shohin videon.

Kërkojini një studenti ta lexojë me zë të lartë Mateun 25:10–12. Ftojeni klasën ta ndjekë, duke kërkuar atë që u tha dhëndri virgjëreshave budallaçka. Kërkojuni studentëve të raportojnë atë që gjejnë.

Shpjegoni se Përkthimi prej Joseph Smith-it, Mateu 25:11, sqaron që dhëndri tha: “Ju nuk më njihni mua”.

Çfarë na tregon thënia “ju nuk më njihni mua” për pesë virgjëreshat budallaçka? Si është të njohurit e Zotit ndryshe nga thjesht të diturit për Të?
Çfarë mund të mësojmë nga ky varg rreth asaj që duhet të bëjmë për të qenë gati për ardhjen e Zotit? (Ndihmojini studentët të përcaktojnë parimin vijues: Për të qenë gati për ardhjen e Zotit dhe për të qenë të denjë për të qëndruar në praninë e Tij, ne duhet të arrijmë ta njohim Atë.)
Në çfarë mënyrash keni arritur kohët e fundit ta njihni më mirë Shpëtimtarin?

Kujtojuni studentëve historinë e fillimit të mësimit për mbajtësin e ri të priftërisë që ishte i papërgatitur në një çast nevoje. Shpjegoni se i riu nxitoi për te shtëpia e një burri më në moshë në lagjen e tij, i cili jetonte teposhtë rrugës. Burri më në moshë i dha vëllait më të vogël një bekim që e bëri të qëndrueshme gjendjen e tij derisa arritën ndihmësmjekët. Ftojeni një student ta lexojë me zë të lartë dëshminë e të riut të treguar nga Plaku Holland:

“‘Asnjë njeri që nuk është përballur me atë që u përballa unë atë natë, nuk do ta njohë ndonjëherë turpin që ndjeva dhe hidhërimin që mbajta si barrë, nga të ndierit i padenjë për ta përdorur priftërinë që mbaja. Është një kujtim edhe më i dhembshëm për mua pasi ishte vetë vëllai im i vogël që kishte nevojë për mua dhe prindërit e mi të dashur joanëtarë që ishin kaq të trembur dhe që kishin të drejtë të prisnin më shumë prej meje. Por ndërsa qëndroj para jush sot, mund t’ju premtoj këtë’, tha ai, ‘Unë nuk jam i përsosur por, që nga ajo natë e tutje, nuk kam bërë asnjëherë ndonjë gjë që do të më ndalonte të shkoja para Zotit me siguri dhe të kërkoja ndihmën e Tij kur nevojitej. Denjësia vetjake është një betejë në këtë botë në të cilën jetojmë’, pranoi ai, ‘por është një betejë që unë po e fitoj. E kam ndier gishtin e dënimit të drejtohet nga unë një herë në jetën time dhe nuk kam ndërmend ta ndiej kurrë më atë nëse mund të bëj çdo gjë për këtë. Dhe, sigurisht’, përfundoi ai, ‘mund të bëj gjithçka për këtë’” (“Siguria e Denjësisë”, f. 59).

Kërkojuni studentëve të marrin parasysh atë që duhet të bëjnë për të qenë të përgatitur shpirtërisht për ardhjen e Zotit dhe për të qenë të denjë për të qëndruar në praninë e Tij. Ju mund t’i nxitni ata të rrethojnë një ose dy prej veprimeve që renditën te fletushka dhe të vënë një qëllim për të vepruar në mënyra që do të rritin përgatitjen e tyre shpirtërore. Ftojini ata t’i marrin fletushkat e tyre në shtëpi si kujtues të qëllimeve të tyre.

Komente dhe Informacion për Rrethanat

Mateu 25:1–4. Virgjëresha të mençura dhe budallaçka

Plaku Dallin H. Ouks, i Kuorumit të Dymbëdhjetë Apostujve, dha mësim për atë se kë përfaqësojnë dhjetë virgjëreshat:

“Dhjetë virgjëreshat në mënyrë të qartë përfaqësojnë anëtarët e Kishës së Krishtit, sepse të gjithë u ftuan në gostinë e dasmës dhe të gjithë e dinin se çfarë kërkohej për t’u pranuar kur të vinte dhëndri. Por vetëm gjysma ishin gati kur ai erdhi” (“Preparation for the Second Coming”, Ensign ose Liahona, maj 2004, f. 8).

Mateu 25:1–13. Shëmbëlltyra e dhjetë virgjëreshave dhe dëshmitë tona

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Tani dëshiroj të përdor një nga shumë interpretimet e mundshme të shëmbëlltyrës së dhjetë virgjëreshave për të theksuar marrëdhënien mes dëshmisë dhe kthimit në besim. Dhjetë virgjëreshat, pesë prej të cilave ishin të mençura dhe pesë budallaçka, i morën llambat e tyre dhe i dolën para dhëndrit. Ju lutem të mendoni për llambat e përdorura nga virgjëreshat si llamba e dëshmisë. Budallaçkat, i morën llambat e tyre të dëshmisë, por nuk morën me vete vajin. Vajin konsiderojeni si vaji i kthimit në besim. …

A qenë pesë virgjëreshat egoiste dhe jo të gatshme për të ndarë [vajin], apo po vinin ato në dukje me të drejtë se vaji i kthimit në besim nuk mund të merret hua? A mund t’i jepet një njeriu tjetër forca shpirtërore që vjen si pasojë e bindjes së vazhdueshme ndaj urdhërimeve? A mund t’i kalohet dikujt që ka nevojë, njohuria e fituar nëpërmjet studimit të zellshëm dhe meditimit mbi shkrimet e shenjta? A mund t’i përçohet një individi që po përjeton fatkeqësi ose sfidë të madhe, paqja që i sjell ungjilli një shenjtori besnik të ditëve të mëvonshme? Përgjigjja e qartë për secilën prej këtyre pyetjeve është jo.

Sikurse e përforcuan siç duhej virgjëreshat e mençura, secili prej nesh duhet ‘të shko[jë të] ble[jë]’. Këto gra të frymëzuara nuk po përshkruanin një transaksion biznesi; përkundrazi, ato po theksonin përgjegjësinë tonë individuale për ta mbajtur ndezur llambën tonë të dëshmisë dhe për të marrë një furnizim të mjaftueshëm për vajin e kthimit në besim. Vaji i çmuar fitohet pikë pas pike – ‘rresht pas rreshti [dhe] parim pas parimi’ (2 Nefi 28:30), me durim dhe këmbëngulje. Nuk ka asnjë rrugë më të lehtë; nuk është e mundur një përgatitje e beftë në minutën e fundit.

‘Si rrjedhim, jini besnikë, gjithmonë duke u lutur, duke i patur llampat tuaja të rregulluara e të ndezura dhe vaj me vete, që të mund të jeni gati për ardhjen e Dhëndrit’ (DeB 33:17)” (“Të Kthyer në Besim te Zoti”, Ensign ose Liahona, nëntor 2012, f. 109).

Plaku Brus R. Mek-Konki, i Kuorumit të Dymbëdhjetë Apostujve, përshkroi dhjetë virgjëreshat:

“Pesë janë të zellshme dhe të përkushtuara, ndërsa pesë janë joaktive dhe të vakëta; dhjetë kanë dëshmi për Jezusin, por vetëm pesë janë të guximshme në të” (Doctrinal New Testament Commentary, 3 vëll. [1965–1973], 1:685).

Mateu 25:6. Domethënia e ardhjes së dhëndrit në mesnatë

Jezu Krishti do të vijë kur ne nuk e presim. Presidenti Spenser W. Kimball shpjegoi:

“Virgjëreshat budallaçka nuk ishin kundër blerjes së vajit. Ato e dinin se duhej të kishin vaj. Ato thjesht e shtynë, duke mos e ditur se kur do të vinte dhëndri. …

Mesnata është tepër vonë për ata që kanë shtyrë” (Faith Precedes the Miracle [1972], f. 256).

Mateu 25:7. Virgjëreshat “u zgjuan dhe përgatitën llampat e tyre”

Fraza “përgatitën llampat e tyre” (Mateu 25:7) do të thotë që virgjëreshat i prenë fitilat e llambave të tyre në një mënyrë që do të lejonte një flakë të shndritshme.