Toko 18

Nifidy ireo Apôstôliny i Jesoa

Indray andro dia nampianatra avy teo amin’ny sambo teo amoron’ny Ranomasin’i Galilia i Jesoa. Ilay sambo dia an’ny lehilahy iray antsoina hoe Petera.

Lioka 5:1–3

Nanjono nandritra ny alina i Petera sy ny namany saingy tsy nahazo na dia trondro iray aza. Rehefa vita ny fampianaran’i Jesoa, dia nilaza tamin’i Petera Izy mba hampandroso ilay sambo eny amin’ny lalina. Ary dia nilaza tamin’i Petera sy ny namany Izy mba handatsaka ny haraton’izy ireo ao anaty rano.

Lioka 5:4–5

Nahazo trondro maro izy ireo ary nanomboka triatra ny haraton’izy ireo.

Lioka 5:6

Niantso ireo namany tamin’ny sambo hafa i Petera mba hanampy. Feno trondro avokoa ireo sambo roa ka nanomboka nilentika izany.

Lioka 5:7

Talanjona i Petera sy ireo namany. Fantatr’izy ireo fa i Jesoa Kristy no nanao izay nitrangan’izany.

Lioka 5:8–9

Nandohalika teo an-tongotry ny Mpamonjy i Petera. Nilaza izy fa tsy mendrika ny ho eo akaikin’i Jesoa. Nilaza tamin’i Petera i Jesoa mba tsy hatahotra.

Lioka 5:8–10

I Jakoba sy i Jaona izay roa tamin’ireo naman’i Petera, dia mpirahalahy. Nilaza tamin’i Petera, i Jakoba, ary i Jaona i Jesoa mba hanaraka Azy ary ho tonga “mpanarato olona.” Nandao ny zava-drehetra nananany ireto lehilahy ireto ary niaraka tamin’i Jesoa. Nangataka lehilahy hafa ihany koa i Jesoa mba hanaraka Azy.

Matio 4:18–22; 9:9; Lioka 5:10–11; Jaona 1:35–51

Nifidy Apôstôly roa ambin’ny folo i Jesoa hitarika ny Fiangonany. Nivavaka nandritra ny alina iray manontolo Izy mba hisafidianany ireo lehilahy tena izy marina. Ny ampitso maraina dia nifidy sy nanendry ireo lehilahy roa ambin’ny folo Izy, ary nanome azy ireo ny fisoronana sy ny fahefana ho Apôstôly.

Marka 3:14; Lioka 6:12–16; Jaona 15:16

Nandeha tany amin’ny tanàna maro ireo Apôstôly. Nampianatra ny filazantsara ary nanasitrana olona izy ireo. Niverina nilaza tamin’i Jesoa ny zavatra nataony izy ireo.

Marka 6:30; Lioka 9:1–6, 10