Toko 44
Nandeha Tany Jerosalema i Jesoa
Nisy olona sasany nilaza tamin’ny mpisorona sy ny Fariseo fa i Jesoa dia nanangana an’i Lazarosy tamin’ny maty. Nieritreritra ireo Fariseo fa ny olon-drehetra dia nino an’i Jesoa. Natahotra izy ireo sao tsy hisy olona hihaino azy ireo intsony.
Nanao drafitra hamonoana an’i Jesoa ireo Fariseo. Niandry Azy mba ho tonga any Jerosalema izy ireo mandritra ny andro firavoravoana amin’ny Paska.
Nandeha tany Jerosalema i Jesoa. Maro ireo olona nandre fa ho avy Izy ary dia nandeha mba hahita Azy izy ireo. Nitaingina ampondra kely i Jesoa niditra ny tanàna. Nisy mpaminany iray nanoratra fa ny Zanak’Andriamanitra dia hanao izany. Maro ireo olona nino fa i Jesoa no Zanak’Andriamanitra. Napetrak’izy ireo tamin’ny tany mba handehanany ny sampan-drofia sy ny sasany tamin’ny akanjon’izy ireo. Nihiaka hoe hosana izy ireo ary nilaza fa i Jesoa no mpanjakan’izy ireo.
Tonga nijery ny zava-nitranga ny vahoaka tao Jerosalema. Nanontany izy ireo hoe iza marina moa i Jesoa. Nisy olona teo anivon’ilay vahoaka marobe nilaza tamin’izy ireo fa Izy ilay mpaminany avy any Nazareta.
Tezitra ireo Fariseo. Tsy tian’izy ireo ny olona hino fa i Jesoa no Mpamonjy. Fantatr’i Jesoa fa te-hamono Azy ireo Fariseo.
Nilaza tamin’ireo mpianany i Jesoa fa ho faty tsy ho ela Izy. Hijaly noho ny fahotan’ny olon-drehetra Izy ary ho faty eny amin’ny hazo fijaliana. Izy no Mpamonjy an’izao tontolo izao. Izay no antony nahatongavany tety an-tany.