Toko 49
Ilay Fanasan’ny Tompo Voalohany
Nitady toerana mba hihinanana ny sakafon’ny Paska i Jesoa sy ireo Apôstôly roa ambin’ny folo. Naniraka an’i Petera sy i Jaona mba hitady efitrano ny Mpamonjy sy hijery raha efa vonona ny zavatra rehetra mikasika ilay fisakafoanana.
Nahita efitrano izy ireo ary nanomana ny sakafo.
Nandeha tany avokoa i Jesoa sy ny Apôstôly rehetra. Niara-nihinana ny sakafon’ny Paska izy ireo.
Nanolotra ny fanasan’ny Tompo voalohany tamin’ireo Apôstôliny i Jesoa. Nandray ny mofo tamin’ny tanany Izy, dia nohamasininy ary novakivakiany avy eo. Nilaza tamin’ireo Apôstôly Izy mba hihinana ny mofo.
Nilaza tamin’izy ireo i Jesoa mba hieritreritra ny vatany eo am-pihinanana izany. Nangataka azy ireo Izy hahatsiaro fa ho faty ho azy ireo Izy.
Nandraraka divay tao anaty kapaoka Izy. Nohamasininy ilay divay ary nasainy nosotroin’ny Apôstôly izany.
Nilaza tamin’izy ireo i Jesoa mba hieritreritra ny rany rehefa misotro ny divay izy ireo. Nangataka azy ireo Izy hahatsiaro fa halatsa-dra sy hijaly Izy noho ny fahotan’ny olona rehetra.
Nilaza tamin’ny Apôstôly koa i Jesoa fa hisy olona ratsy fanahy hamono Azy tsy ho ela. Nalahelo mafy ny iraika ambin’ny folo tamin’ireo Apôstôly. Tian’izy ireo ny Mpamonjy ary tsy tiany ho faty. Fantatr’i Jesoa fa ny iray amin’ireo Apôstôly dia hanampy ireo olona ratsy fanahy. Ny anarany dia i Jodasy Iskariota.