Toko 35
Ilay Samaritana Tsara Fanahy
Nitantara tantara maro na fanoharana i Jesoa, mba hanampiana ny olona hianatra ny fahamarinana.
Indray andro dia nisy mpitarika ny Jiosy nanontany an’i Jesoa izay tokony hataony mba hahazoana ny fiainana mandrakizay. Nanontanian’ny Mpamonjy azy izay voalazan’ny soratra masina. Nilaza ilay mpitarika fa tokony ho tia an’Andriamanitra sy ho tia ny namany ny olona iray. Nilaza i Jesoa fa marina izany. Dia nanontany ilay mpitarika hoe: “Iza ary no namako?”
Namaly ilay lehilahy tamin’ny alalan’ny tantara iray i Jesoa. Indray andro nisy lehilahy Jiosy iray nandeha tamin’ny lalana nankany amin’ny tanànan’i Jeriko. Norobain’ny jiolahy sy novonoin’izy ireo izy. Navelan’izy ireo teo amin’ny lalana teo ilay lehilahy rehefa saiky maty.
Fotoana fohy taorian’izay dia nisy mpisorona nandalo ka nahita an’ilay lehilahy. Nandeha teny ampitan’ny lalana ilay mpisorona. Tsy nanampy ilay lehilahy izy.
Nisy lehilahy Jiosy iray hafa miasa ao amin’ny tempoly nandalo. Nahita ilay lehilahy naratra izy. Kanefa dia tsy nanampy ilay lehilahy koa ary dia nandeha teny ampitan’ny lalana.
Avy eo dia nisy Samaritana nandalo. Tsy mba nifankahazo ny Jiosy sy ny Samaritana. Kanefa rehefa nahita ity lehilahy ilay Samaritana, dia nalahelo azy. Nokarakarainy ny ratran’ilay lehilahy ary nampitafiany izy.
Lioka 10:33–34; Jaona 4:9; Torolalana ho an’ny Soratra Masina, “Samaritana,” 218
Nentin’ilay Samaritana tany amin’ny tranom-bahiny ilay lehilahy ary nokarakarainy mandra-pahatongan’ny ampitson’iny. Rehefa tsy maintsy nandeha ilay Samaritana, dia nanome vola an’ilay tompon’ny tranom-bahiny izy ary nangataka azy mba hikarakara ilay lehilahy.
Taorian’ny fitantaran’i Jesoa izany tantara izany, dia nanontany an’ilay mpitarika Jiosy Izy hoe iza amin’ireo lehilahy telo ireo no naman’ilay lehilahy naratra.
Nilaza ilay mpitarika fa ilay Samaritana satria izy no nanampy ilay lehilahy. Nilaza tamin’ilay mpitarika Jiosy i Jesoa mba hanao tahaka ilay Samaritana koa.