Toko 46
Ny Fiaviana Fanindroany
Teo an-tendrombohitra Oliva i Jesoa. Te-hametraka fanontaniana maromaro an’i Jesoa ireo mpianany. Nanontany ny fotoana handringanana ny olon-dratsy izy ireo. Tian’izy ireo ho fantatra ihany koa ny fiavian’i Jesoa indray.
Nilaza tamin’izy ireo i Jesoa fa mialoha ny Fiaviany Fanindroany, dia hisy mpaminany sandoka hilaza ny tenany ho Kristy. Maro ny olona izay hanaraka azy ireo. Kanefa raha mankatò ny teniny ireo mpanara-dia azy, dia tsy ho voasarik’ireo mpaminany sandoka ireo. Ho voavonjy izy ireo.
Nilaza koa i Jesoa fa alohan’ny fiaviany indray, dia hisy ady, mosary, areti-mandringana, ary horohoron-tany maro. Maro ny olona hijanona tsy hanampy intsony ny hafa ary ho lasa ratsy fanahy.
Hotoriana manerana izao tontolo izao ny filazantsara, nefa marobe ireo olona izay tsy hihaino.
Ho maizina ny masoandro, tsy hazava ny volana, ary hiraraka avy any an-danitra ireo kintana.
Rehefa tonga indray i Jesoa Kristy, dia ho hitan’ny olona izy hidina amim-boninahitra lehibe sy amin-kery avy eny amin’ny rahon’ny lanitra. Handefa ireo anjeliny Izy hanangona ireo olo-marina.
Afaka miomana amin’ny Fiaviana Fanindroany isika amin’ny fanaovana ny tsara. Rehefa hitantsika ireo famantarana nampanantenain’i Jesoa, dia ho fantatsika fa efa akaiky ny fiavian’i Kristy. Tsy misy na iray aza mahafantatra ny fiavian’i Jesoa indray. Raha miomana isika dia afaka hiaraka Aminy.