1 Mga Taga-Corinto 1–2.

Pasiuna

Human makat-on mahitungod sa pipila ka mga problema nga nasinati sa mga miyembro sa Simbahan sa Corinto, si Pablo misulat ngadto kanila ug miawhag kanila sa pagwagtang sa panagbingkil ug magkahiusa. Mipasabut usab siya nga ang Dios nagtawag sa mga huyang ug mapaubsanon sa pagsangyaw sa Iyang ebanghelyo ug nga ang mga butang sa Dios mahimo lamang nga masayran ug masabtan pinaagi sa Espiritu.

1 Mga Taga-Corinto 1:1–16

Si Pablo nagsulat ngadto sa mga Santos sa Corinto ug miawhag kanila sa pagwagtang sa panagbingkil ug magkahiusa

Paghunahuna og usa ka pamilya, usa ka sports team, ug usa ka grupo sa mga higala.

family sitting on beach, soccer team, friends hiking

Unsa kaha ang makamugna og pagkabahin-bahin ug panagbingkil sa matag usa niini nga mga grupo?

Sa unsa nga paagi ang ingon nga mga pagkabahin-bahin ug mga panagbingkil makaapekto sa usa ka pamilya, team, o grupo sa mga higala?

Hunahunaa kon sa unsang paagi ang pagkabahin-bahin ug mga panagbingkil tali sa mga miyembro niini makaapekto sa Simbahan.

Samtang magtuon ka sa 1 Mga Taga-Corinto 1, pangita og kamatuoran nga gitudlo ni Pablo sa mga Santos sa Corinto mahitungod sa mga pagkabahin-bahin ug panagbingkil.

Pangitaa ang Corinto sa mosunod nga mapa:

Panahon sa iyang ikaduhang misyonaryo nga panaw, si Pablo mibiyahe ngadto sa dakbayan sa Corinto sa Gresya, diin siya misangyaw sa ebanghelyo. Daghang tawo ang nabunyagan nianang panahona (tan-awa sa Mga Buhat 18:1–18). Sa wala madugay, samtang nagsangyaw si Pablo didto sa Efeso, iyang nahibaloan nga dunay mitumaw nga mga problema tali sa mga miyembro sa Simbahan sa Corinto tungod kay pipila sa mga kinabig mibalik ngadto sa ilang nangagi nga mga gituohan ug binuhatan sa pagsimba sa mga dios-dios. Si Pablo misulat ngadto sa mga miyembro sa Simbahan sa Corinto sa paglig-on kanila ug pagpahinumdom kanila sa ilang pasalig sa pagserbisyo sa Ginoo.

Atong mabasa diha sa 1 Mga Taga-Corinto 1:1–9 nga si Pablo misulti sa mga Santos sa Corinto nga nagpasalamat siya sa Dios alang kanila tungod sa grasya nga ilang nadawat pinaagi kang Jesukristo, nga mipanalangin kanila sa tanang paagi.

Basaha ang 1 Mga Taga-Corinto 1:10–11, nga mangita kon unsa ang giawhag ni Pablo nga buhaton sa mga Santos sa Corinto.

Aron sa pag-ila og kamatuoran nga narekord niini nga mga bersikulo, gamita ang mosunod nga mga pulong aron isulat sa mga blangko sa mosunod nga pamahayag: magkahiusa, naglaum, panagbingkil, wagtangon.

Ang Ginoo ____________________ kanato isip mga Santos nga ____________________ “ug nga ____________________ ang mga pagkabahin-bahin ug ____________________.

Tubaga ang mosunod nga mga pangutana diha sa imong scripture study journal:
1. Unsa nga mga panalangin ang atong madawat isip mga miyembro sa Simbahan kon kita maningkamot nga magkahiusa ug mawagtang ang mga pagkabahin-bahin ug panagbingkil?
2. Kanus-a kamo napanalanginan isip resulta sa pagkahiusa sa inyong pamilya, klase, korum, o sa ward o branch?
3. Unsay atong mabuhat aron mawagtang ang mga pagkabahin-bahin ug panagbingkil diha sa Simbahan?

Sumala sa 1 Mga Taga-Corinto 1:12–16, ang mga miyembro sa Simbahan sa Corinto nabahin ngadto sa mga grupo base sa managlahi nga mga interpretasyon sa doktrina sa Simbahan, ug ilang gisuportahan ang ilang panabut pinaagi sa pagkutlo sa inila nga mga lider sa Simbahan.

1 Mga Taga-Corinto 1:17–31

Si Pablo nagtudlo sa mga Santos nga ang Dios nagtawag sa mga mahuyang aron sa pagsangyaw sa Iyang ebanghelyo

Sa panahon ni Pablo, ang Gresya anaa ubos sa Romano nga pamunoan, ug daghan nga mga Gresyanhon nagpuyo didto sa Corinto. Ang mga Gresyanhon naghatag og dakong bili sa pilosopikanhon nga mga ideya ug sa kaalam sa kalibutan.

Ikonsiderar kon ngano nga ang usa ka tawo kinsa naghatag og dakong bili sa kalibutanon nga mga pilosopiya tingali maglisud sa pagdawat o pagsunod sa ebanghelyo.

Samtang magtuon ka sa 1 Mga Taga-Corinto 1:17–31, pangita og kamatuoran nga makatabang kanimo nga makasabut sa kawalay hinungdan nga mosalig sa kaalam sa kalibutan.

Basaha ang 1 Mga Taga-Corinto 1:17–22, nga mangita kon unsay gitudlo ni Apostol Pablo kabahin sa kaalam sa kalibutan itandi sa kaalam sa Dios. Ang mga pulong nga “kaalam sa mga manggialamon” (1 Mga Taga-Corinto 1:19) ug “kaalam nga iya sa kalibutan” (1 Mga Taga-Corinto 1:20) nagpasabut sa sayop nga pilosopikanhong mga tradisyon sa panahon. Tingali makatabang usab nga masayran nga si Pablo migamit sa mga pulong nga “ang krus” (1 Mga Taga-Corinto 1:17–18) nga nagpasabut sa kinabuhi, misyon, ug Pag-ula ni Jesukristo.

Ngano kaha nga ang mga dili tumutuo mikonsiderar man sa mensahe sa Pag-ula ni Jesukristo nga binuang?

Basaha ang 1 Mga Taga-Corinto 1:25, nga mangita kon unsay gitudlo ni Pablo kabahin sa kaalam sa tawo kon itandi sa kaalam sa Dios. Ang Dios dili magbinuang, ni Siya adunay mga kahuyang. Si Pablo migamit sa mga pulong nga “ang binuang sa Dios labi pang maalam kay sa mga tawo” ug “ang kahuyang sa Dios labi pang kusgan kay sa mga tawo” sa paghatag sa ideya nga ang tawhanong kaalam ug gahum wala ra kon itandi sa kaalam ug gahum sa Dios.

Lingini ang kamatuoran nga labing naghulagway sa unsay gitudlo ni Pablo sa mga taga-Corinto kabahin sa kaalam sa Dios:

Ang kaalam sa Dios mas labaw pa kay sa kaalam sa tawo.
Ang usa ka tawo gamhanan kon siya maalamon.
Ang mga timailhan gikan sa langit mas labaw pa kay sa kaalam sa mga Gresyanhon.

Tubaga ang mosunod nga pangutana diha sa imong scripture study journal: Sa unsang paagi ang pagsabut nga ang kaalam sa Dios labaw pa kay sa tawhanong kaalam mahimong makaapekto unsaon sa usa ka tawo pagpangita og mga solusyon sa iyang mga problema?

Basaha ang 1 Mga Taga-Corinto 1:26–27, nga mangita kon kinsay gipili sa Dios nga mosangyaw sa Iyang ebanghelyo.

Pamalandongi nganong ang Dios mipili niadtong gikonsiderar sa kalibutan nga buangon ug huyang sa pagtudlo sa Iyang ebanghelyo.

Atong makat-unan diha sa 1 Mga Taga-Corinto 1:28–31 nga si Pablo mitudlo nga si Jesukristo mao ang hingpit nga ehemplo sa “kaalam, pagkamatarung, ug pagkabinalaan, ug pagkatinubos” (1 Mga Taga-Corinto 1:30) ug kita kinahanglang maghimaya, o maglipay, diha Kaniya.

1 Mga Taga-Corinto 2

Si Pablo nagpasabut kon sa unsang paagi kita makakat-on sa mga butang sa Dios

Basaha ang mosunod nga istorya ni Presidente Boyd K. Packer sa Korum sa Napulog Duha ka mga Apostoles kabahin sa usa ka kasinatian nga nahitabo sa wala pa siya gitawag nga mahimong usa ka General Authority:

“Naglingkod ako sulod sa eroplano tupad sa usa ka tawo nga miangkon nga siya usa ka atiyesta kinsa nangusog gayud sa iyang dili pagtuo sa Dios mao nga mipadayag ko sa akong pagpamatuod ngadto kaniya. ‘Sayop ka,’ miingon ko, ‘adunay Dios. Ako nasayud nga Siya buhi!’

“Mitubag siya, ‘Wala ka masayud. Walay usa nga nasayud niana! Dili nimo masayran kana!’ Sa dihang dili gayud ko moundang, ang atiyesta, kinsa usa ka abogado, nangutana sa tingali pinakalisud nga pangutana kabahin sa pagpamatuod. ‘“Sige kuno,’” siya miingon sa bugal-bugalon, matamayon nga paagi, ‘“ingon nimo nga nasayud ka. Sultihi kuno ko kon giunsa nimo pagkasayud.”’

“Sa dihang misulay ko sa pagtubag, bisan tuod nga duna koy mga advanced academic degree, maglisud ko sa pagpasabut. …

“Sa dihang akong gigamit ang mga pulong nga Espiritu ug saksi, ang atiyesta mitubag, “‘Wala ko kasabot nianang imong gipangsulti.”’ Ang mga pulong nga pag-ampo, pag-ila [discernment], ug hugot nga pagtuo puro walay kahulugan diha kaniya. ‘Tan-awa ra,’ miingon siya, ‘wala gyud ka masayud. Kay kon nasayud ka pa, makasulti unta ka nako kon giunsa nimo pagkasayud.”’

“Gibati nako, tingali, nga dili maalamon ang akong paghatag sa akong pagpamatuod ngadto niya ug wala makahibalo unsay buhaton” (“The Candle of the Lord,” Ensign, Ene. 1983, 51).

Kon ikaw ang anaa niini nga sitwasyon, unsa kahay imong masulti niining tawhana kinsa dili motuo sa Dios?

Samtang magtuon ka sa 1 Mga Taga-Corinto 2, pangita og usa ka kamatuoran nga makatabang kanimo nga makasabut nganong kining tawhana dili makasabut sa mga pulong ni Presidente Packer ug nganong mahimo ka nga magmasaligon sa imong kahibalo sa espirituhanon nga mga butang.

Atong mabasa diha sa 1 Mga Taga-Corinto 2:1–8 nga si Pablo misulti sa mga Santos sa Corinto nga wala siya mogamit sa kaalam sa kalibutan aron sa paghaylo kanila sa kamatuoran sa ebanghelyo. Siya mipasabut nga siya mitudlo kanila pinaagi sa gahum sa Espiritu aron sila adunay hugot nga pagtuo sa Dios. Si Pablo usab misugo kanila nga ang mga dili tumutuo dili makasabut sa mga misteryo sa Dios.

Basaha ang 1 Mga Taga-Corinto 2:9–16, nga mangita kon nganong miingon si Pablo nga ang ubang mga tawo makahibalo ug makasabut sa “mga kinahiladman sa Dios” (1 Mga Taga-Corinto 2:10–11), samtang ang uban dili.

Tubaga ang mosunod nga mga pangutana diha sa imong scripture study journal:
1. Sumala sa 1 Mga Taga-Corinto 2:9–10, nganong si Pablo ug ang ubang matinud-anong mga tawo makasabut man sa mga butang sa Dios?
2. Sumala sa 1 Mga Taga-Corinto 2:14, nganong ang ubang mga tawo dili man makasabut sa mga butang sa Dios?

Gikan niini nga mga bersikulo atong nakat-unan ang mosunod nga mga kamatuoran: Kita mahibalo ug makasabut lamang sa mga butang sa Dios pinaagi sa Iyang Espiritu. Ikonsiderar ang pagmarka sa mga pulong diha sa 1 Mga Taga-Corinto 2:10–14 nga nagtudlo niini nga kamatuoran.

Si Presidente Packer mitapos sa iyang istorya pinaagi sa pagpasabut nga siya nadasig sa pagpangutana sa tawo nga naglingkod tapad kaniya sa eroplano kon siya nasayud ba unsay lami sa asin.

“‘Siyempre nasayud ko,’ maoy iyang tubag.

“‘Kanus-a man ka katapusang nakatilaw og asin?’

“‘Mao pay pagpanihapon nako diri sa eroplano.’

“‘Nagtuo ra ka nga nasayud ka unsay lami sa asin,’ miingon ko.

“Mi-insister siya, ‘Nasayud ko unsay lami sa asin sama nga nasayud ko sa bisan unsang butang.’ …

““‘Nan,’” miingon ko, “‘pananglitan wala pa gayud ako makatilaw og asin, ipasabut kuno nako unsay lami niini.”’ …

“Human sa pipila ka mga pagsulay, siyempre, dili siya makahimo niini. Dili siya makahulagway, pinaagi sa mga pulong lamang, sa ordinaryo kaayo nga kasinatian sama sa pagtilaw sa asin. Sa makausa pa mipamatuod ako kaniya ug miingon, “‘Ako nasayud nga adunay Dios. Imong gibugal-bugalan kana nga pagpamatuod ug miingon nga kon nasayud pa gyud ko, makasulti unta ko nimo sa sakto kon giunsa nako pagkasayud. Akong higala, sa espirituhanong pagkasulti, nakatilaw na ako og asin. Dili pud ko makahulagway kanimo pinaagi sa mga pulong kon sa unsang paagi kini nga kahibalo miabot sama nga ikaw makasulti kanako kon unsa ang lami sa asin. Apan sultihan ko ikaw pag-usab, adunay Dios! Buhi gayud Siya! Ug tungod lang kay wala ka masayud, ayaw ko’g sultihi nga ako wala masayud, kay ako nasayud gayud!”’

“Sa among pagbulag, nadungog nako siya nga nagyawyaw, “‘Wala ko magkinahanglan sa imong relihiyon nga mahimong suporta nako! Wala ko magkinahanglan niana.”’

“Sukad niana nga kasinatian, wala na gayud ako maulawi o naulaw nga dili ako makapasabut pinaagi sa mga pulong lamang sa tanan nakong nasayran sa espirituhanong paagi” (“The Candle of the Lord,” 52).

Kompletuha ang mosunod diha sa imong scripture study journal:
1. Ilista ang pipila sa mga butang sa Dios nga mahimo lamang nga masayran ug masabtan pinaagi sa Iyang Espiritu.
2. Nganong importante man nga motuo kita nga mahimo lamang kitang masayud ug makasabut sa mga butang sa Dios pinaagi sa Iyang Espiritu?

Paghunahuna og usa ka higayon sa diha nga imong nasayran ug nasabtan pinaagi sa Espiritu ang usa sa mga butang sa Dios nga imong gilista diha sa imong scripture study journal. Hunahunaa unsay imong mahimo karon sa pagtinguha sa tabang sa Espiritu samtang maningkamot ka nga makaila ug makasabut sa mga butang sa Dios.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Mga Taga-Corinto 1–2 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: