Unit 23: Day 4

2 Mga Taga-Corinto 4–7

Pasiuna

Si Apostol Pablo mitudlo nga ang mga pagsulay ug mga kasakit niini nga kinabuhi temporaryo ug gamay kon itandi sa mga panalangin sa kahangturan. Siya usab mitudlo sa mga Santos sa Corinto mahitungod sa Paghukom ug mipamatuod nga si Jesukristo naghimong posible nga kita mapahiuli ngadto sa Dios. Samtang nagpadayon si Pablo sa pagpanalipod sa iyang binuhatan isip usa ka ministro sa Dios, siya mitambag sa mga Santos nga mopalayo gikan sa tanan nga dili matarung ug nalipay nga sila nakasinati og diosnong kasubo ug naghinulsol.

2 Mga Taga-Corinto 4

Si Pablo nagpamatuod nga bisan tuod siya adunay mga kasakit, wala siya mahadlok o mabalaka

Unsa ang daw gipakita niini nga hulagway? Unsa kaha ang gihunahuna sa tawo nga giduso kabahin sa tawo nga nagduso kaniya?

Ang gipalapdan nga bersyon niini nga hulagway nagpakita nga ang tawo sa tinuoray miduso sa tawo palayo sa dalan sa nagsingabut nga sakyanan.

Sa unsang paagi ang pagtan-aw sa sitwasyon sa mas dako nga kahulugan, o panglantaw, nakausab sa imong paghukom kabahin sa gipakita sa unang hulagway?

Sama sa narekord sa 2 Mga Taga-Corinto 4, si Apostol Pablo misulat ngadto sa mga Santos sa Corinto sa pagtabang nila nga makakita sa dakong kahulugan sa ilang mga kalisdanan. Samtang magtuon ka niini nga kapitulo, ikonsiderar kon unsaon nimo paggamit ang gitudlo ni Pablo sa mga Santos kabahin sa ilang mga kalisdanan.

Sa 2 Mga Taga-Corinto 4:1–7 atong mabasa kon giunsa ni Pablo pagsiguro sa mga Santos nga tinuod niyang gisangyaw ang ebanghelyo ngadto kanila. Siya mitudlo nga si Satanas, “[ang] dios niining kalibutana” (2 Mga Taga-Corinto 4:4), naningkamot sa pagpugong sa katawhan sa pagdawat sa ebanghelyo. Gitandi ni Pablo ang iyang kaugalingon ug ang iyang kaubang mga ministro ngadto sa mga kolon nga gisudlan og “bahandi” sa “kahayag sa kahibalo sa himaya sa Dios” (2 Mga Taga-Corinto 4:6–7).

Basaha ang 2 Mga Taga-Corinto 4:8–9, nga mangita kon giunsa paghulagway ni Pablo ang mga hagit sa iyang misyonaryo nga mga paningkamot.

Ngano kaha nga si Pablo adunay positibo nga kinaiya samtang nakasinati siya niini nga mga hagit?

Sama sa narekord diha sa 2 Mga Taga-Corinto 4:11–14, si Pablo mitudlo nga bisan tuod ang pipila ka mga tawo magpakamatay alang sa ebanghelyo ni Jesukristo, ang ilang kamatayon temporaryo lang.

Basaha ang 2 Mga Taga-Corinto 4:14–16, nga mangita kon unsay nahibaloan ni Pablo nga nakatabang kaniya sa pagsagubang sa mga pagsulay ug pagpanggukod.

Ang mga pulong nga “bisan tuod nagakahugo ang among pagkatawo nga makita sa gawas, ang among pagkatawo sa kinasuloran ginabag-o sa adlaw-adlaw” (2 Mga Taga-Corinto 4:16) nagpasabut nga bisan tuod si Pablo ug ang iyang mga kauban mamatay sa pisikal nga paagi, ang ilang mga espiritu ginalig-on matag adlaw.

Basaha ang 2 Mga Taga-Corinto 4:17–18, nga mangita sa mga kamatuoran nga gitudlo ni Pablo sa mga Santos kabahin sa mga pagsulay ug mga kasakit.

Usa ka kamatuoran nga atong makat-unan gikan niini nga mga bersikulo mao nga ang atong mga pagsulay ug mga kasakit niining kinabuhia gamay ra kon itandi ngadto sa walay katapusan nga mga panalangin ug pag-uswag nga moabut samtang kita matinud-anong naglahutay niini.

1. Tubaga ang mosunod nga mga pangutana diha sa imong scripture study journal:

   1. Nganong importante man nga makita ang atong mga kasakit diha sa mas dako nga konteksto sa plano sa Langitnong Amahan?

   2. Kanus-a ka nakakita og tawo nga nagpabiling lig-on panahon sa mga pagsulay tungod kay siya nakakita sa mga kasakit sa mas dako nga konteksto sa plano sa Langitnong Amahan?

2 Mga Taga-Corinto 5

Si Pablo nagtudlo sa mga Santos kabahin sa Paghukom ug sa Pag-ula ni Jesukristo

Pil-a sa tunga ang usa ka piraso nga papel. Ablihi ang papel. Isulat ang imong pangalan sa katunga sa papel, ug isulat ang Langitnong Amahan sa pikas tunga. Sa dihang mianhi kita sa yuta, mibiya kita sa presensya sa Langitnong Amahan. Gisia ang papel sa tunga, ug bulaga ang duha ka tunga. Ikonsiderar kon sa unsang paagi ang gisi nga papel makarepresentar sa nahitabo sa dihang mibiya kita sa presensya sa Langitnong Amahan ug mianhi sa yuta aron mosinati sa pagkamortal. Sa 2 Mga Taga-Corinto 5 atong mabasa ang mahitungod sa pipila ka mga kamatuoran nga gipakigbahin ni Pablo nga makatabang kanato nga makasabut unsa ang angay natong buhaton aron makabalik ngadto sa presensya sa Langitnong Amahan.

Basaha ang 2 Mga Taga-Corinto 5:6–10, nga mangita og mga kamatuoran nga makatabang kanato nga makita ang atong relasyon sa Langitnong Amahan sa hustong panan-aw. Mahimo nimong markahan o timan-an diha sa imong mga kasulatan ang unsay imong makit-an.

Ang mosunod mao ang duha ka mga kamatuoran nga atong makat-unan gikan niini nga mga bersikulo: Tungod kay nahimulag kita gikan sa Dios dinhi sa pagkamortal, magpakabuhi kita pinaagi sa pagtuo ug dili pinaagi sa makita. Ang matag usa kanato pagahukman ni Jesukristo sumala sa unsay atong nahimo dinhi sa pagkamortal.

Hunahunaa kon unsay ipasabut sa “nagakinabuhi man pinaagi sa pagtuo, [ug] dili pinaagi sa atong makita” (2 Mga Taga-Corinto 5:7). Kinsa ang usa ka tawo nga imong nailhan nga nagpakabuhi pinaagi sa pagtuo ug dili pinaagi sa makita?

Ikonsiderar ang mahimo nimong buhaton sa imong kinabuhi aron maningkamot sa “pagpahimuot [sa Ginoo]” (2 Mga Taga-Corinto 5:9).

Basaha ang 2 Mga Taga-Corinto 5:15–16, nga mangita kon unsay buhaton sa mga sumusunod ni Jesukristo tungod sa Pag-ula. Basaha usab ang Hubad ni Joseph Smith, 2 Mga Taga-Corinto 5:16 (sa Giya ngadto sa mga Kasulatan, scriptures.lds.org). Ang mga pulong nga “kita dili na magpuyo subay sa unod” nagpasabut nga atong isalikway ang kalibutanong kinabuhi.

Sa katunga sa papel nga naa ang imong ngalan, isulat ang unsay imong nakat-unan kon sa unsang paagi magpuyo ang mga sumusunod ni Jesukristo.

Basaha ang 2 Mga Taga-Corinto 5:17–19, nga mangita kon sa unsang paagi ang Pag-ula ni Jesukristo makatabang kanato nga makabalik ngadto sa presensya sa Langitnong Amahan. Mahimo nimong markahan o timan-an diha sa imong mga kasulatan ang unsay imong makit-an.

Isulat ang mosunod nga kamatuoran diha sa katunga sa papel nga nasulat ang “Langitnong Amahan”: Pinaagi sa Pag-ula ni Jesukristo, kita mamahimong bag-o nga mga binuhat ug mapahiuli ngadto sa Dios.

Unsa kaha ang gipasabut nga mahimong “bag-o nang binuhat” (2 Mga Taga-Corinto 5:17)?

Itupad og balik ang duha ka mga tunga sa papel. Ang mapahiuli ngadto sa Dios nagpasabut nga pinaagi sa Pag-ula ni Jesukristo kita mahimo nga mausab ug malimpyohan, nagpasabut nga kita nahimong bag-o nga mga binuhat, aron kita makabalik sa pagpuyo diha sa presensya sa Langitnong Amahan.

Sa 2 Mga Taga-Corinto 5:20–21 atong mabasa nga si Pablo mipasabut sa iyang kaugalingon ug niadtong nanagtudlo uban kaniya isip “mga tinugyanan nga pinadala ni Kristo”, ug siya miawhag sa mga Santos nga makig-uli sa Dios.

2 Mga Taga-Corinto 6

Si Pablo naghulagway sa mga kinaiya sa mga ministro sa Dios ug nagtambag sa mga Santos sa paggula gikan sa mga dautan

Nakasulay ka na ba nga gibugal-bugalan o gisaway sa dihang naningkamot ka sa pagserbisyo o pagtabang sa laing tawo? Sa 2 Mga Taga-Corinto 6:1–13 atong mabasa kon giunsa pag-awhag ni Pablo ang mga Santos nga mahimong mga ministro sa Dios ug magmapailubon ug mag-amping nga dili makapasakit, bisan kon dili maayo ang pagtratar kanila.

Sa 2 Mga Taga-Corinto 6:14–18 atong makat-unan nga si Pablo mitudlo sa mga Santos kabahin sa mga panalangin sa pagpalayo sa ilang mga kaugalingon gikan sa pagkadili matarung.

Kompletuha ang mosunod nga tsart pinaagi sa pagbasa sa 2 Mga Taga-Corinto 6:14–18 ug paglista sa tambag ni Paul ug sa kauban nga mga saad:

Tambag ngadto sa mga Santos	Mga saad gikan sa Ginoo

Sa 2 Mga Taga-Corinto 6:15 ang pulong nga pakig-uyonan nagpasabut sa pakigbagay, ang pulong nga belial nagpasabut sa pagkadautan (tan-awa sa Bible Dictionary, “Belial”), ug ang dili magtutuo nagpasabut sa usa ka tawo nga wala motuo o usa ka tawo nga mituo sa mga dios-dios. Alang sa unang mga Kristiyano, kadtong dili mga Kristiyano mga dili magtutuo.

Ang mga pulong nga “magpalain kamo gikan kanila” ug “ayaw na kamo paghikap og mahugaw” (bersikulo 17) maoy mga pasidaan sa paglikay sa mga tigsimba sa dios-dios ug sa ilang sayop nga mga buhat ug magamit usab nato sa atong panahon karon. “Gikumparar ni Pablo ang mga Santos nga taga-Corinto nga ‘mao ang templo sa Dios nga buhi’ (2 Mga Taga-Corinto 6:16). Siya dayon mitambag kanila nga dili makigrelasyon sa mga tigsimba og mga dios-dios o moapil sa ilang ‘mahugaw’ nga mga binuhatan (tan-awa sa Isaias 52:11). Uban niini nga mga pagtulun-an, gisubli ni Pablo ang saad nga gihimo ngadto sa mga tawo sa Dios sa karaang panahon—nga kon sila ‘[m]anggula … gikan’ sa mga dautan, ang Dios mopuyo uban kanila ug mahimong ilang Dios (2 Mga Taga-Corinto 6:17; tan-awa usab sa … Jeremias 32: 38; ug Ezequiel 11:19–20)” (New Testament Student Manual [manwal sa Church Educational System, 2014], 402). Si Pablo piho nga mipasidaan sa mga miyembro sa paglikay sa tanang sayop nga pagsimba, mga tigsimba sa mga dios-dios, ug sayop nga mga binuhatan, sama nga ang Daang Tugon nagtudlo sa mga tawo sa pagsimba sa Dios ug mahimong Iyang pinili nga katawhan, nagsalikway sa tanan nga mga dios-dios.

Usa ka baruganan nga atong makat-unan gikan sa 2 Mga Taga-Corinto 6:14–18 mao nga samtang kita mopahimulag sa atong mga kaugalingon gikan sa sayop nga mga binuhatan ug mahugaw nga mga butang, ang Ginoo mohangup kanato. (Kini nga baruganan wala magpasabut nga atong bastuson kadtong anaa sa laing mga tinuohan o mobalibad sa pagpakig-uban kanila.)

2. Tubaga ang mosunod nga mga pangutana diha sa imong scripture study journal:

   1. Sa atong panahon, unsay ipasabut alang kanato nga ipahimulag ang atong mga kaugalingon gikan sa sayop nga mga binuhatan ug mahugaw nga mga butang? (Tan-awa sa D&P 1:15–16.)

   2. Kanus-a ka mibati nga napanalanginan tungod kay imong gipahimulag ang imong kaugalingon gikan sa usa ka sitwasyon nga mopalayo kanimo gikan sa Ginoo?

2 Mga Taga-Corinto 7

Si Pablo naglipay diha sa tinuod nga paghinulsol sa mga Santos

Sa 2 Mga Taga-Corinto 7 si Apostol Pablo mipasabut nga samtang siya ug ang iyang kaubang mga misyonaryo nanlimbasug sa grabeng kalisdanan sa Macedonia, si Tito miabut nga dunay gibalita nga nakalipay ug nakahupay ni Pablo. Si Pablo aduna nay gipadala nga sulat ngadto sa Corinto nga nanawagan sa mga Santos sa paghinulsol, ug si Tito nagsulti kaniya sa reaksyon sa mga miyembro sa Simbahan.

Basaha ang 2 Mga Taga-Corinto 7:8–10, nga mangita kon unsay reaksyon sa mga Santos sa Corinto sa sulat ni Pablo.

Nganong nalipay man si Pablo nga ang mga Santos mibati og kaguol tungod sa iyang sulat?

Timbang-timbanga ang Imong Kinabuhi

Kon mogahin kita og panahon sa tinuoray nga pagtimbang-timbang kon unsa kita ka maayo nga nagsunod sa usa ka piho nga baruganan sa ebanghelyo, atong gihatagan ang Espiritu Santo og oportunidad sa pagtabang kanato nga makaamgo kon unsay maayo natong gibuhat ug sa unsang paagi kita mouswag. Kon imong timbang-timbangon ang imong kaugalingon, paningkamuti ang pagtinguha sa giya sa Espiritu Santo ug pagmatinuoron sa hingpit.

Ikonsiderar kon ang kasubo nga imong gibati alang sa imong mga sala mao ba ang diosnon nga kasubo, nga “mosangput sa paghinulsol nga magaagak ngadto sa kaluwasan,” o “kasubo nga kalibutanon” (2 Mga Taga-Corinto 7:10), nga nagpasabut nga nagbasol ka nga nasakpan o nga mag-atubang sa mga sangputanan sa imong sayop nga binuhatan.

Basaha 2 Mga Taga-Corinto 7:11, nga mangita sa mga matang sa kausaban nga gihimo sa mga Santos sa ilang mga kinabuhi tungod kay ang ilang diosnong kasubo nakatabang kanila nga maghinulsol.

3. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 2 Mga Taga-Corinto 4–7 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: