Unit 17: Day 1

Mga Buhat 1:1–8

Pasiuna

Si Jesukristo nangalagad ngadto sa Iyang mga Apostoles sulod sa 40 ka adlaw human sa Iyang Pagkabanhaw. Giandam Niya sila nga mahimong mga saksi Kaniya sa tibuok yuta.

Mga Buhat 1:1–8

Si Jesus nangalagad ngadto sa Iyang mga disipulo sulod sa 40 ka adlaw

Hunahunaa nga usa ka higala sa laing tinuohan miduol kanimo uban sa tinguha nga makahibalo pa og dugang mahitungod sa imong Simbahan ug nangutana, “Kinsa ang nangulo sa inyong Simbahan?” Unsaon nimo sa pagtubag?

Samtang magtuon kasa Mga Buhat 1:1–8, pangitaa ang mga kamatuoran nga makatabang nimo sa pagtubag niana nga pangutana ug makasabut nga ang mga Apostoles kinsa migiya sa Simbahan sa karaan mao ang mga saksi ni Jesukristo ug adunay katungdanan sa pagpakigbahin niana nga saksi sa tibuok kalibutan. Ang mga Apostoles kinsa naggiya karon sa Simbahan adunay pareha nga mga panalangin ug responsibilidad.

Paklia ngadto sa basahon sa Mga Buhat sa imong mga kasulatan, ug ilha ang tibuok ulohan niini nga basahon.

Ang basahon sa Mga Buhat usa ka importante nga transisyon sa Bag-ong Tugon. Ang mga Ebanghelyo ni Mateo, Marcos, Lucas, ug Juan nag-istorya sa mortal nga pangalagad ug Pag-ula sa Manluluwas. Sa pagtandi, ang basahon sa Mga Buhat naghisgot sa pangalagad sa mga Apostoles human sa Pagkayab sa Manluluwas ngadto sa langit.

Basaha ang Mga Buhat 1:1–2, nga mangita kon kinsa ang gisulatan niini nga basahon.

Si Lucas mao ang tagsulat sa basahon sa Mga Buhat, ug ang “nahauna nga basahon” nga gihisgutan sa bersikulo 1 mao ang Ebanghelyo ni Lucas, nga gisulat usab ngadto sa wala mailhi nga indibidwal nga ginganlan og Teofilo. Ang tuyo ni Lucas sa pagsulat mao ang pagtabang kang Teofilo nga makaangkon sa iyang kaugalingong pagpamatuod ni Jesukristo (tan-awa sa Lucas 1:1–4).

Basaha ang Mga Buhat 1:2, nga mangita kon giunsa ni Jesukristo pagpadayon sa paggiya sa Iyang Simbahan human sa Iyang Pagkabanhaw.

Sumala sa bersikulo 2, giunsa ni Jesukristo paggiya ang Iyang Simbahan sukad Siya mibiya sa pagka-mortal?

Makat-unan nato sa Mga Buhat 1:2 nga si Jesukristo naggiya sa Iyang Simbahan pinaagi sa pagpadayag sa Iyang kabubut-on ngadto sa Iyang mga Apostoles pinaagi sa Espiritu Santo.

Si Elder Jeffrey R. Holland sa Korum sa Napulog Duha ka mga Apostoles mitudlo nga si Jesukristo nagpadayon sa paggiya sa Iyang Simbahan human sa Iyang Pagkabanhaw:

“Gikan sa unang bersikulo sa basahon sa Mga Buhat … ang deklarasyon mao nga ang Simbahan magpadayong balaan nga giyahan, dili mortal ang maggiya. … Sa pagkatinuod, ang mas kompleto nga ulohan sa basahon sa Mga Buhat sa tukma mahimong sama niini ‘Ang Mga Buhat sa Nabanhaw nga Kristo Naglihok pinaagi sa Balaan nga Espiritu diha sa mga Kinabuhi ug mga Pangalagad sa Iyang Gi-orden nga mga Apostoles.’ …

“Ang direksyon sa Simbahan mao gihapon. Ang nahimutangan sa Manluluwas nausab, apan ang direksyon ug pagpangulo sa Simbahan pareha ra gihapon” (“Teaching, Preaching, Healing,” Ensign, Ene. 2003, 37).

Hunahunaa ngano nga importante nga masayud nga si Jesukristo nagpadayon sa paggiya a Iyang Simbahan pinaagi sa pagpadayag karon.

1. Palandunga ang mga kasinatian nga nakapalig-on sa imong pagpamatuod nga si Jesukristo naggiya sa Iyang Simbahan karon pinaagi sa pagpadayag. Isulat ang imong mga kasinatian sa imong scripture study journal. Kon wala nimo batia nga ikaw aduna sa maong kasinatian, pangutana og usa ka matinud-anong miyembro sa Simbahan sa pagpakigbahin kanimo kon giunsa niya pagkahibalo nga ang Ginoo naggiya sa Iyang Simbahan pinaagi sa pagpadayag. Sa imong scripture study journal, isulat unsay imong nakat-unan gikan sa imong panag-istoryahanay.

Si Jesus migahin og 40 ka adlaw nga naghatag og personal nga instruksyon ngadto sa mga Apostoles sa wala pa ang Iyang Pagkayab ngadto sa langit ug ang mga Apostoles nagsugod sa paggiya sa Simbahan dinhi sa yuta pinaagi sa Espiritu Santo. Basaha ang Mga Buhat 1:3, nga mangita kon unsay nasinati ug nakat-unan sa mga Apostoles atol niadtong 40 ka mga adlaw.

Sa bersikulo 3, ang pulong pag-antus nagpasabut sa maulaong sakripisyo sa Manluluwas ug sa Iyang mga pag-antus (tan-awa sa Hubad ni Joseph Smith, Mga Buhat 1:3). Ang mga pulong nga “daghang pagpamatuod” nagpasabut sa dili ikalimud nga ebidensya nga gihatag ni Jesus nga Siya nabanhaw.

Basaha ang Mga Buhat 1:4–5, mangita kon unsay gisugo ni Jesus nga buhaton sa mga Apostoles. Mahimo nimong markahan unsay imong makit-an.

Gisugo ni Jesus ang mga Apostoles nga magpabilin sa Jerusalem hangtud sila mabunyagan uban sa Espiritu Santo. Kini nagpasabut sa ilang pagdawat sa kanunay nga pakig-uban sa Espiritu Santo, nga wala kinahanglana sa mga Apostoles samtang uban pa nila ang Ginoo sa pisikal.

Basaha ang Mga Buhat 1:8, nga mangita kon unsay gisulti nga buhaton sa mga Apostoles human nila madawat ang Espiritu Santo.

Gikan sa unsay gitudlo sa Manluluwas sa bersikulo 8, makat-unan nato nga ang mga Apostoles mao ang mga saksi ni Jesukristo ug nagpamatuod Kaniya sa tibuok yuta.

Si Presidente Gordon B. Hinckley mitudlo mahitungod sa responsibilidad sa mga Apostoles karon nga mahimong mga saksi ni Jesukristo: “Sa atong panahon ang Ginoo mitawag og 15 ka espesyal nga mga saksi aron sa pagpamatuod sa Iyang pagkabalaan sa tibuok kalibutan. Ang ilang calling talagsaon; sila mga Apostoles ni Ginoong Jesukristo, napili ug sinugo Kaniya. Gisugo sila nga mosaksi sa katinuod sa Iyang pagkabuhi pinaagi sa gahum ug awtoridad sa balaang pagkaapostol nga gihatag diha kanila” (sa “Special Witnesses of Christ,” Ensign, Abr. 2001, 4).

Basaha ang dokumento nga “Ang Buhi nga Kristo: Ang Pagpamatuod sa mga Apostoles,” nga uban niini nga leksyon. Markahi ang mga bahin sa pagpamatuod sa mga Apostoles nga labing importante nganha kanimo.

Mga video sa mga sakop sa Unang Kapangulohan ug sa Korum sa Napulog Duha ka mga Apostoles kada usa naghatag sa ilang personal nga pagpamatuod ni Jesukristo anaa sa “Special Witnesses of Christ” sa LDS.org. Mahimo kamong mopili sa pagtan-aw og duha o tulo niini nga mga video.

2. Tubaga ang mosunod nga pangutana diha sa imong scripture study journal: Sa unsang paagi nga ang saksi sa moderno nga mga Apostoles makaimpluwensya sa imong personal nga pagpamatuod kang Jesukristo?

Bisan og ang Mga Buhat 1:8 nagpasabut gayud sa tahas sa mga Apostoles isip espesyal nga mga saksi sa Manluluwas, nagtudlo usab kini nato mahitungod sa unsay atong ikatabang nga mahimong mga saksi ni Jesukristo sa tibuok kalibutan.

Base sa saad sa Ginoo ngadto sa mga Apostoles diha sa Mga Buhat 1:8, atong makat-unan nga pinaagi sa gahum sa Espiritu Santo, mahimo kitang mga saksi ni Jeuskristo.

Sa unsang mga paagi nga ang gahum sa Espiritu Santo makatabang nato nga mahimong mga saksi sa Manluluwas?

3. Tubaga ang mosunod nga mga pangutana diha sa imong scripture study journal:

   1. Kanus-a nimo gibati ang Espiritu Santo sa dihang ang uban mipakigbahin sa ilang pagpamatuod kang Jesukristo?

   2. Kanus-a nimo gibati ang Espiritu Santo nga nagtabang nimo sa pagpamatuod ni Jesukristo ngadto sa uban?

Pangita og mga oportunidad sa pagpakigbahin sa imong pagpamatuod ni Jesukristo ngadto sa uban, ug salig nga ang Espiritu Santo mokumpirmar sa kamatuoran sa unsay imong gisaksihan ngadto kanila.

Mga Buhat–Pagpadayag: Ang Kinatibuk-ang Pagpasabut sa Ikaduhang Katunga sa Bag-ong Tugon

Mga Buhat 1:8 wala lamang magtudlo sa mga kamatuoran mahitungod sa responsibilidad sa mga Apostoles, apan naghatag usab kini og overview sa ikaduhang katunga sa Bag-ong Tugon. Sumala sa Mga Buhat 1:8, asa dapita ang gitagna sa Manluluwas nga ang Iyang mga tinun-an mosaksi mahitungod Kaniya?

Gamita ang mga mapa nga makita sa appendices sa Biblia o sa Giya ngadto sa mga Kasulatan sa pagpangita og mga dapit nga gihisgutan diha sa mga kasulatan aron pagtabang kanimo sa pagtan-aw sa mga panaw sa mga Apostoles ug sa katumanan sa panagna sa Manluluwas.

Gamita ang Mga Tabang sa Pagtuon sa Kasulatan [Scripture Study Aids]

Ang Simbahan nag-andam og daghang tabang sa pagtuon sa kasulatan. Makita kini sa LDS editions sa mga kasulatan ug sa Giya ngadto sa mga Kasulatan. Kini naglakip sama sa mga footnote uban sa mga cross-reference ug mga word helps, mga sinulat gikan sa Hubad ni Joseph Smith, mga topical indexes, sa Bible Dictionary, mga mapa, ug mga litrato. Kini ang pipila ka bililhong mga kapanguhaan nga imong magamit samtang magtuon ka sa mga kasulatan. Mapanalanginan kamo pinaagi sa paggamit sa mga tabang sa pagtuon sa imong personal nga pagtuon sa kasulatan.

Mga Buhat 1–5 nagdokumento sa pangalagad sa mga Apostoles sa Jerusalem, Mga Buhat 6–9 nagdokumento sa pangalagad sa mga Apostoles sa tibuok Judea ug Samaria, ug ang Mga Buhat 10–28 nagdokumento sa pangalagad sa mga Apostoles sa tibuok Gingharian sa Roma, o “sa kinatumyang bahin bahin sa yuta” (Ma Buhat 1:8). Mahimo nimong isulat kini nga outline sa basahon sa Mga Buhat sa kilid sa imong mga kasulatan duol sa Mga Buhat 1:8.

Paklia ang talaan sa mga sulod sa imong Biblia. Tan-awa ang mga basahon sa Bag-ong Tugon nga nagsunod sa basahon sa Mga Buhat. Ang mga basahon sa 1 Mga Taga-Corinto hangtud sa Mga Hebreohanon mao ang mga epistola (mga sulat) nga gisulat ni Apostol Pablo. Makat-on ka mahitungod sa pagkakabig ug pangalagad ni Pablo samtang magtuon ka sa Mga Buhat 9, 13–28.

Tan-awa ang mapa sa “Kinatibuk-ang Pagpasabut sa Mga Buhat sa mga Apostoles”, nga nagpakita sa mga siyudad o mga dapit nga nagtukma sa daghang mga epistola ni Pablo. Daghan sa mga epistola sa Bag-ong Tugon gisulat alang ngadto sa mga kongregasyon sa Simbahan sa lain-laing mga siyudad sa pagtubag sa ilang piho nga mga panginahanglan. Sama pananglit, ang Mga Taga-Tesalonica mao ang mga tawo nga nagpuyo sa siyudad sa Tesalonica, ug ang basahon sa 1 Mga Taga-Tesalonica gituohan nga mao ang labing unang epistola nga gisulat ni Pablo. Agig dugang sa pagsulat ngadto sa mga kongregasyon sa mga Santos, si Pablo misulat ngadto sa mga indibidwal sama nila ni Timoteo, Tito, ug Felimon.

Tan-awa ang talaan sa mga sulod kon unsa nga mga epistola ang nagsunod sa Mga Hebreohanon. Agig dugang ni Pablo, ubang mga Apostoles ug mga lider sa Simbahan misulat ngadto sa mga miyembro sa Simbahan. Ang uban niini nga mga epistola mao ang mga basahon ni Santiago, Pedro, Juan, ug Judas. Ang basahon sa Pinadayag nagrekord sa usa ka panan-awon nga gihatag ngadto ni Apostol Juan.

Samtang magpadayon ka sa pagtuon sa ikaduhang katunga sa Bag-ong Tugon, pagmainampoon aron ang Espiritu Santo makadan-ag kanimo ug makatabang kanimo nga makaangkon og mas dako nga panabut gikan sa mga pagtulun-an sa mga Apostoles sa Bag-ong Tugon.

4. Isulat ang mosunod sa ubos sa imong mga assignment karong adlawa diha sa imong scripture study journal:

   Akong natun-an ang Mga Buhat 1:1–8 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: