Sukaranang mga Doktrina

Ang Sukaranang mga Doktrina kinahanglang i-highlight sa mga klase sa seminary ug institute. Ang mga magtutudlo kinahanglang motabang sa mga estudyante sa pag-ila, pagsabut, pagtuo, pagpasabut, ug paggamit niining sukaranang mga doktrina sa ebanghelyo. Ang pagbuhat sa ingon makatabang sa mga estudyante sa paglig-on sa ilang pagpamatuod ug pagdugang sa ilang pagpasalamat sa gipahiuli nga ebanghelyo ni Jesukristo. Ang pagtuon niini nga mga doktrina makatabang usab sa mga estudyante nga mas makaandam sa pagtudlo niining importante nga mga kamatuoran ngadto sa uban.

Kadaghanan sa 100 ka mga scripture mastery passage sa Seminaries and Institutes of Religion gipili aron sa pagsuporta sa mga estudyante sa pagsabut sa Sukaranang mga Doktrina. Ang kadaghanan sa mga scripture reference nga gilista niini nga dokumento nagpasabut sa mga tudling sa scripture mastery. Giapil kini aron sa pagpakita kon sa unsang paagi kini dunay kalabutan sa Sukaranang mga Doktrina.

1. Dios nga Kapangulohan

Adunay tulo ka lahi nga mga personahe sa Dios nga Kapangulohan: Dios, ang Mahangturong Amahan; Iyang Anak, si Jesukristo; ug ang Espiritu Santo (tan-awa sa Joseph Smith—Kasaysayan 1:15–20). Ang Amahan ug ang Anak adunay mahikap nga mga lawas nga unod ug bukog, ug ang Espiritu Santo usa ka personahe sa espiritu (tan-awa sa D&P 130:22–23). Usa ra ang ilang katuyoan ug doktrina. Hingpit silang nagkahiusa sa pagpahinabo sa balaan nga plano sa kaluwasan sa Langitnong Amahan.

Dios nga Amahan

Ang Dios nga Amahan mao ang Labing Taas nga Tigmando sa uniberso. Siya ang Amahan sa atong mga espiritu (tan-awa sa Mga Hebreohanon 12:9). Siya hingpit, aduna sa tanang gahum, ug nakahibalo sa tanang mga butang. Siya usab Dios sa hingpit nga kalooy, mabination, ug gugma nga putli.

Jesukristo

Si Jesukristo mao ang Unang Natawo sa Amahan sa espiritu ug ang Bugtong Anak sa Amahan diha sa unod. Siya ang Jehova sa Daang Tugon ug ang Mesiyas sa Bag-ong Tugon.

Si Jesukristo nagpakabuhi nga walay sala ug nakahimo og hingpit nga Pag-ula alang sa mga sala sa tanang mga tawo (tan-awa sa Alma 7:11–13). Ang Iyang kinabuhi mao ang hingpit nga ehemplo kon sa unsang paagi magpuyo ang katawhan (tan-awa sa Juan 14:6; 3 Nephi 12:48). Siya ang unang tawo niini nga yuta nga nabanhaw (tan-awa sa 1 Mga Taga-Corinto 15:20–22). Mobalik Siya pag-usab sa gahum ug himaya ug mohari sa yuta panahon sa Milenyum.

Ang tanang mga pag-ampo, mga panalangin, ug mga ordinansa sa priesthood kinahanglang pagahimoon pinaagi sa pangalan ni Jesukristo (tan-awa sa 3 Nephi 18:15, 20–21).

May kalabutan nga mga pakisayran: Helaman 5:12; D&P 19:23; D&P 76:22–24

Ang Espiritu Santo

Ang Espiritu Santo mao ang ikatulo nga sakop sa Dios nga Kapangulohan. Siya usa ka personahe sa espiritu nga walay lawas nga unod ug mga bukog. Siya ang kasagarang gipasabut nga ang Espiritu, ang Espiritu Santo, ang Espiritu sa Dios, ang Espiritu sa Ginoo, ug ang Maghuhupay.

Ang Espiritu Santo nagsaksi sa Amahan ug sa Anak, nagpadayag sa kamatuoran sa tanang mga butang, ug nagbalaan niadtong maghinulsol ug magpabunyag (tan-awa sa Moroni 10:4–5).

May kalabutan nga mga pakisayran: Mga Taga-Galacia 5:22–23; D&P 8:2–3

2. Plano sa Kaluwasan

Sa kinabuhi nga wala pa dinhi sa yuta, ang Langitnong Amahan mipaila sa plano aron kita mahimong sama Kaniya ug makaangkon og pagka-imortal ug kinabuhing dayon (tan-awa sa Moises 1:39). Ang mga kasulatan nagpasabut niini nga plano nga ang plano sa kaluwasan, ang importante nga plano sa kalipay, ang plano sa katubsanan, ug ang plano sa kalooy.

Ang plano sa kaluwasan naglakip sa Paglalang, sa Pagkapukan, sa Pag-ula ni Jesukristo, ug sa tanang mga balaod, mga ordinansa, ug mga doktrina sa ebanghelyo. Moral nga kabubut-on—ang abilidad sa pagpili ug paglihok alang sa atong mga kaugalingon—importante usab sa plano sa Langitnong Amahan (tan-awa sa 2 Nephi 2:27). Tungod niini nga plano, mahingpit kita pinaagi sa Pag-ula, makadawat sa hingpit nga kalipay, ug magpuyo sa kahangturan sa presensya sa Dios (tan-awa sa 3 Nephi 12:48). Ang atong mga relasyon sa pamilya molungtad hangtud sa kahangturan.

May kalabutan nga mga pakisayran: Juan 17:3; D&P 58:27

Kinabuhi nga Wala pa dinhi sa Yuta

Sa wala pa kita matawo dinhi sa yuta, nagpuyo kita sa presensya sa atong Langitnong Amahan isip usa sa Iyang espiritu nga mga anak (tan-awa sa Abraham 3:22–23). Niini nga kinabuhi nga wala pa dinhi sa yuta miapil kita sa usa ka konseho uban sa laing espiritu nga mga anak sa Langitnong Amahan. Niana nga konseho, ang Langitnong Amahan mipresentar sa Iyang plano ug ang premortal nga si Jesukristo nakigsaad nga mahimong Manluluwas.

Gigamit nato ang atong kabubut-on sa pagsunod sa plano sa Langitnong Amahan. Nangandam kita sa pag-anhi sa yuta, diin kita makapadayon sa pag-uswag.

Kadtong misunod sa Langitnong Amahan ug ni Jesukristo gitugutan nga moanhi sa yuta aron makasinati sa pagkamortal ug mouswag ngadto sa kinabuhing dayon. Si Lucifer, laing anak nga espiritu sa Dios, mirebelde batok sa plano. Nahimo siyang Satanas, ug siya ug ang iyang mga sumusunod gisalikway gikan sa langit ug wala hatagi sa pribelihiyo nga makadawat og pisikal nga lawas ug makasinati sa pagkamortal.

May kalabutan nga mga kasulatan: Jeremias 1:4–5

Ang Paglalang

Si Jesukristo milalang sa langit ug yuta ubos sa direksyon sa Amahan. Ang yuta wala malalang gikan sa wala; gi-organisar kini gikan sa mga butang nga diha na. Si Jesukristo milalang og mga kalibutan nga dili maihap (tan-awa sa D&P 76:22–24).

Ang paglalang sa yuta importante sa plano sa Dios. Nakahatag kini og dapit diin kita makaangkon og pisikal nga lawas, masulayan, ug makapalambo og balaan nga mga hiyas.

Kinahanglan nga atong gamiton ang mga kapanguhaan sa yuta uban sa kaalam, paghukom, ug pagpasalamat (tan-awa sa D&P 78:19).

Si Adan mao ang unang tawo nga gilalang dinhi sa yuta. Ang Dios milalang nato sa kaugalingon Niyang panagway. Ang tanan nga mga tawo—lalaki ug babaye—gilalang diha sa hitsura sa Dios (tan-awa sa Genesis 1:26–27).

Ang Pagkapukan

Didto sa Tanaman sa Eden, ang Dios misugo kang Adan ug Eva nga dili mokaon sa bunga sa kahoy sa kahibalo sa maayo ug dautan; ang sangputanan sa pagbuhat sa ingon mao ang espirituhanon ug pisikal nga kamatayon. Ang espirituhanong kamatayon mao ang pagkabulag gikan sa Dios. Ang pisikal nga kamatayon mao ang pagkabulag sa espiritu gikan sa mortal nga lawas. Tungod kay si Adan ug si Eva milapas sa sugo sa Dios, sila gipapahawa gikan sa Iyang presensya ug nahimo nga mortal. Ang kalapasan nila ni Adan ug Eva ug ang misangpot nga mga kausaban, naglakip sa espirituhanon ug pisikal nga kamatayon, gitawag og ang Pagkapukan.

Isip resulta sa Pagkapukan, sila si Adan ug Eva ug ang ilang kaliwat makasinati og kalipay ug kasubo, makahibalo sa maayo ug dautan, ug makabaton og mga anak (tan-awa sa 2 Nephi 2:25). Isip mga kaliwatan ni Adan ug ni Eva, atong napanunod ang napukan nga kahimtang sa panahon sa pagkamortal. Kita gisalikway gikan sa presensya sa Ginoo ug ubos na sa pisikal nga kamatayon. Gisulayan usab kita pinaagi sa mga kalisdanan sa kinabuhi ug sa mga tintasyon sa kaaway. (Tan-awa sa Mosiah 3:19.)

Ang Pagkapukan usa ka mahinungdanon nga bahin sa plano sa kaluwasan sa Langitnong Amahan. Kini adunay duha ka bahin nga direksyon—pagkapukan gikan sa mas taas nga kahimtang apan sinugdanan sa pagpadayon sa pag-uswag sa tawo. Agi og dugang sa pagpaila sa pisikal ug espiritwal nga kamatayon, naghatag usab kanato kini og kahigayunan nga matawo dinhi sa yuta ug sa pagkat-on ug paglambo.

Mortal nga Kinabuhi

Ang mortal nga kinabuhi mao ang panahon sa pagkat-on diin kita makaandam alang sa kinabuhing dayon ug momatuod sa atong mga kaugalingon nga kita mogamit sa atong kabubut-on sa pagbuhat sa tanan nga gisugo sa Ginoo kanato. Sa panahon niining mortal nga kinabuhi, kinahanglan nga kita mohigugma ug moserbisyo sa uban (tan-awa sa Mosiah 2:17; Moroni 7:45, 47–48).

Dinhi sa pagka-mortal, ang atong espiritu gihiusa sa atong pisikal nga mga lawas, naghatag nato og mga oportunidad sa pagtubo ug paglambo sa mga paagi nga dili mahitabo sa atong kinabuhi nga wala pa dinhi sa yuta. Ang atong mga lawas importante nga bahin sa plano sa kaluwasan ug kinahanglang tahuron isip gasa gikan sa atong Langitnong Amahan (tan-awa sa 1 Mga Taga-Corinto 6:19–20).

May kalabutan nga mga pakisayran: Josue 24:15; Mateo 22:36–39; 2 Nephi 28:7–9; Alma 41:10; D&P 58:27

Kinabuhi human sa Kamatayon

Inig kamatay nato, ang atong mga espiritu mosulod sa kalibutan sa espiritu ug maghulat sa Pagkabanhaw. Ang mga espiritu sa mga matarung pagadawaton ngadto sa kahimtang sa kalipay, diin gitawag og paraiso. Daghan sa matinud-anon magpadayon sa pagsangyaw sa ebanghelyo niadtong anaa sa bilanggoan sa espiritu.

Ang bilanggoan sa espiritu usa ka temporaryong dapit human sa kinabuhi dinhi sa kalibutan alang niadtong namatay nga wala makahibalo sa kamatuoran o niadtong kinsa dili masulundon dinhi sa pagkamortal. Dinhi, ang mga espiritu tudloan sa ebanghelyo ug adunay oportunidad sa paghinulsol ug pagdawat sa mga ordinansa sa kaluwasan nga gipahigayon alang kanila diha sa mga templo (tan-awa sa 1 Pedro 4:6). Kadtong modawat sa ebanghelyo magpuyo sa paraiso hangtud sa Pagkabanhaw.

Ang pagkabanhaw mao ang paghiusa sa atong espiritu uban sa nahingpit nga pisikal nga lawas sa unod ug mga bukog (tan-awa sa (tan-awa sa Lucas 24:36–39). Human sa pagkabanhaw, ang espiritu ug ang lawas dili na gayud magbulag ug kita mahimong imortal. Ang tanang tawo dinhi sa yuta mabanhaw tungod kay si Jesukristo mibuntog sa kamatayon (tan-awa sa 1 Mga Taga-Corinto 15:20–22). Ang matarung mabanhaw og una kay sa dautan ug mobangon sa Unang Pagkabanhaw.

Ang Katapusang Paghukom mahitabo human sa Pagkabanhaw. Si Jesukristo mohukom sa matag tawo aron sa pagtino sa mahangturon nga himaya nga iyang madawat. Kini nga paghukom ibase sa pagkamasulundon sa matag tawo ngadto sa mga sugo sa Dios (tan-awa sa Pinadayag 20:12; Mosiah 4:30).

Adunay tulo ka mga gingharian sa himaya (tan-awa sa 1 Mga Taga-Corinto 15:40–42). Ang pinakataas niini mao ang celestial nga gingharian. Kadtong maisugon sa pagpamatuod ni Jesus ug masulundon sa mga baruganan sa ebanghelyo makapuyo sa celestial nga gingharian diha sa presensya sa Dios ang Amahan ug sa Iyang Anak, nga si Jesukristo (tan-awa sa D&P 131:1–4).

Ang ikaduha sa tulo ka gingharian sa himaya mao ang terrestrial nga gingharian. Kadtong ania niini nga gingharian mao ang dungganan nga mga tawo sa yuta kinsa dili maisugon sa ilang pagpamatuod ni Jesus.

Ang telestial nga gingharian mao ang pinakaubos sa tulo ka mga gingharian sa himaya. Kadtong makapanunod niini nga gingharian mipili sa pagkadautan kay sa pagkamatarung panahon sa ilang mortal nga mga kinabuhi. Kini nga mga indibidwal makadawat sa ilang himaya human sila matubos gikan sa bilanggoan sa espiritu.

May kalabutan nga pakisayran: Juan 17:3

3. Ang Pag-ula ni Jesukristo

Sa pag-ula mao ang pag-antus sa silot alang sa sala, sa ingon nagkuha sa mga epekto sa sala gikan sa mahinulsulon nga makasasala ug pagtugot kaniya sa pagpakig-uli sa Dios. Si Jesukristo mao ang bugtong makahimo sa hingpit nga Pag-ula alang sa tanang katawhan. Ang Iyang Pag-ula naglakip sa Iyang pag-antus alang sa mga sala sa katawhan didto sa Tanaman sa Getsemani, sa pagpaagas sa Iyang dugo, sa Iyang pag-antus ug kamatayon diha sa krus, ug sa Iyang Pagkabanhaw gikan sa lubnganan (tan-awa sa Lucas 24:36–39; D&P 19:16–19). Ang Manluluwas nakahimo sa Pag-ula tungod kay Iyang gipalingkawas ang Iyang kaugalingon gikan sa sala ug adunay gahum ibabaw sa kamatayon. Gikan sa Iyang mortal nga inahan, Siya nakapanunod sa abilidad nga mamatay. Gikan sa imortal nga Amahan, Iyang napanunod ang gahum sa pagkuha pag-usab sa Iyang kinabuhi.

Pinaagi sa grasya, nga nahimo tungod sa maulaong sakripisyo sa Manluluwas, ang tanang mga tawo mabanhaw ug makadawat og pagkaimortal. Ang Pag-ula ni Jesukristo nakapaposible usab nato nga makadawat og kinabuhing dayon (tan-awa sa Moroni 7:41). Aron makadawat niini nga gasa, kinahanglan nga kita mosunod sa ebanghelyo ni Jesukristo, nga naglakip sa pagbaton og hugot nga pagtuo Kaniya, sa paghinulsol sa atong mga sala, pagpabunyag, pagdawat sa gasa sa Espiritu Santo, ug paglahutay sa matinud-anon nga paagi hangtud sa katapusan (tan-awa sa Juan 3:5).

Isip kabahin sa Iyang Pag-ula, si Jesukristo wala lamang mag-antus sa atong mga sala apan miangkon sa Iyang kaugalingon sa mga sakit, mga balatian, ug mga kahuyang sa tanang mga tawo (tan-awa sa Alma 7:11–13). Nakasabut Siya sa atong pag-antus tungod kay nakasinati Siya niini. Ang Iyang grasya, o ang gahum, makapalig-on nato sa pagsagubang sa mga kalisud ug makahimo sa mga buluhaton nga dili nato mahimo sa atong kaugalingon (tan-awa sa Mateo 11:28–30; Mga Taga-Filipos 4:13; Ether 12:27).

May kalabutan nga mga pakisayran: Juan 3:5; Mga Buhat 3:19–21

Hugot nga Pagtuo diha kang Jesukristo

Ang hugot nga pagtuo usa ka “paglaum sa mga butang diin dili makita, diin mga tinuod” (Alma 32:21; tan-awa usab sa Ether 12:6). Usa kini ka gasa gikan sa Dios.

Ang hugot nga pagtuo kinahanglang masentro kang Jesukristo aron kini makagiya sa usa ka tawo ngadto sa kaluwasan. Ang pagbaton og hugot nga pagtuo kang Jesukristo nagpasabut og hingpit nga pag-agad Kaniya ug pagsalig sa Iyang walay kinutuban nga Pag-ula, gahum, ug gugma. Naglakip kini sa pagtuo sa Iyang mga pagtulun-an ug pagtuo nga bisan og kita wala makasabut sa tanang mga butang, Siya nakasabut sa tanan (tan-awa sa Mga Proverbio 3:5–6; D&P 6:36).

Mas labaw pa kay sa uyon-uyon lang nga pagtuo, ang hugot nga pagtuo makita sa paagi sa atong pagpuyo (tan-awa sa Santiago 2:17–18). Ang hugot nga pagtuo madugangan samtang kita mag-ampo, magtuon sa mga kasulatan, ug magsunod sa mga sugo sa Dios.

Ang mga Santos sa Ulahing mga adlaw adunay hugot nga pagtuo sa Dios ang Amahan, sa Espiritu Santo, ug sa gahum sa priesthood ingon man usab ang ubang importante nga mga aspeto sa gipahiuli nga ebanghelyo. Ang hugot nga pagtuo makatabang nato nga makadawat og espirituhanon ug pisikal nga pagkaayo ug kusog sa pagpadayon, pag-atubang sa mga kalisud, ug pagbuntog sa tintasyon (tan-awa sa 2 Nephi 31:19–20). Ang Ginoo mohimo og gamhanan nga mga milagro sa atong kinabuhi sumala sa atong hugot nga pagtuo.

Pinaagi sa hugot nga pagtuo kang Jesukristo, ang usa ka tawo makaangkon og kapasayloan sa mga sala ug sa katapusan makahimo sa pagpuyo diha sa presensya sa Dios.

May kalabutan nga pakisayran: Mateo 11:28–30

Paghinulsol

Ang paghinulsol mao ang kausaban sa hunahuna ug kasingkasing nga makahatag nato og bag-ong panglantaw mahitungod sa Dios, mahitungod sa atong mga kaugalingon, ug mahitungod sa kalibutan. Naglakip kini sa pagpalayo sa sala ug pagpaduol ngadto sa Dios alang sa kapasayloan. Nadasig kini sa gugma alang sa Dios ug sa kinasingkasing nga tinguha sa pagsunod sa Iyang mga sugo.

Ang atong mga sala makahimo nato nga dili limpyo—dili takus nga mobalik ug mopuyo sa presensya sa atong Langitnong Amahan. Pinaagi sa Pag-ula ni Jesukristo, ang atong Amahan sa Langit nakahatag sa bugtong paagi alang nato nga mapasaylo sa atong mga sala (tan-awa sa Isaias 1:18).

Ang paghinulsol naglakip usab sa pagbati og kasubo tungod sa pagbuhat og sala, pagkumpisal ngadto sa Langitnong Amahan ug ngadto sa uban kon gikinahanglan, pagbiya sa mga sala, pagpaningkamot sa pagpahiuli kutob sa mahimo sa tanan nga nadaot tungod sa sala, ug pagpuyo og kinabuhi sa pagsunod sa mga sugo sa Dios (tan-awa sa DP 58:42–43).

May kalabutan nga mga pakisayran: Isaias 53:3–5; Juan 14:6; 2 Nephi 25:23, 26; D&P 18:10–11; D&P 19:23; D&P 76:40–41

4. Dispensasyon, Apostasiya, ug Pagpahiuli

Dispensasyon

Ang dispensasyon mao ang tagal sa panahon sa dihang ang Ginoo mipadayag sa Iyang mga doktrina, mga ordinansa, ug sa priesthood. Usa kini ka panahon diin ang Ginoo adunay labing minos usa ka tinugutan nga sulugoon sa ibabaw sa yuta kinsa naghupot sa balaan nga priesthood ug kinsa adunay balaan nga sugo sa pagsangyaw sa ebanghelyo ug sa pagpangalagad sa mga ordinansa niini. Karon nagpuyo kita sa katapusan nga dispensasyon—ang dispensasyon sa kahingpitan sa mga panahon, nga nagsugod sa pagpadayag sa ebanghelyo ngadto ni Joseph Smith.

Ang nangagi nga mga dispensasyon nailhan uban nila ni Adan, Enoch, Noe, Abraham, Moises, ug Jesukristo. Agig dugang, dihay laing mga dispensasyon, lakip sa mga Nephite ug sa mga Jaredite. Ang plano sa kaluwasan ug ang ebanghelyo ni Jesukristo gipadayag ug gitudlo sa kada dispensasyon.

Apostasiya

Kon ang katawhan mobiya gikan sa mga baruganan sa ebanghelyo ug walay mga yawe sa priesthood, sila anaa sa kahimtang sa apostasiya.

Mga panahon sa kinatibuk-ang apostasiya nahitabo sa tibuok kasaysayan sa kalibutan. Usa ka ehemplo mao ang Dakong Apostasiya, nga nahitabo human ang Manluluwas mitukod sa Iyang Simbahan (tan-awa sa 2 Mga Taga-Tesalonicca 2:1–3). Human sa kamatayon sa mga Apostoles sa Manluluwas, ang mga baruganan sa ebanghelyo nausab ug ang wala tuguti nga mga kausaban gihimo diha sa organisasyon sa Simbahan ug sa mga ordinansa sa priesthood. Tungod niining hilabihan nga pagkadautan, ang Ginoo mibawi sa katungod ug mga yawe sa priesthood gikan sa yuta.

Atol sa Dakong Apostasiya, ang mga tawo walay balaanong direksyon gikan sa buhing mga propeta. Daghang mga simbahan ang gitukod, apan sila walay awtoridad sa pagtugyan sa gasa sa Espiritu Santo o sa pagpahigayon sa mga ordinansa sa priesthood. Adunay bahin sa balaan nga mga kasulatan nga natuis o nawala, ug ang mga tawo wala nay tinuod nga kahibalo sa Dios.

Kini nga apostasiya milungtad hangtud ang Langitnong Amahan ug ang Iyang Pinalanggang Anak nagpakita kang Joseph Smith ug mipasiugda sa Pagpahiuli sa kahingpitan sa ebanghelyo.

Pagpahiuli

Ang Pagpahiuli mao ang pag-establisar sa Dios pag-usab sa mga kamatuoran ug mga ordinansa sa Iyang ebanghelyo diha sa Iyang mga anak sa yuta (tan-awa sa Mga Buhat 3:19–21).

Sa pagpangandam alang sa Pagpahiuli, ang Ginoo mipasanay og halangdon nga mga tawo panahon sa unsay gitawag nga Reformation. Misulay sila sa pagpabalik sa relihiyoso nga doktrina, mga praktis, ug organisasyon subay sa paagi nga gi-establisar sa Manluluwas. Bisan pa niana, sila, walay priesthood ni kahingpitan sa ebanghelyo.

Ang Pagpahiuli nagsugod niadtong 1820 sa dihang ang Dios nga Amahan ug Iyang Anak, nga si Jesukristo, nagpakita ngadto ni Joseph Smith agig tubag sa iyang pag-ampo (tan-awa sa Joseph Smith—Kasaysayan 1:15–20). Ang pipila sa importante nga mga hitabo sa Pagpahiuli mao ang paghubad sa Basahon ni Mormon, ang pagpahiuli sa Aaronic ug Melchizedek Priesthood, ug ang organisasyon sa Simbahan niadtong Abril 6, 1830.

Ang Aaronic Priesthood gipahiuli ngadto ni Joseph Smith ug ni Oliver Cowdery pinaagi ni Juan Bautista niadtong Mayo 15, 1829. Ang Melchizedek Priesthood ug ang mga yawe sa gingharian gipahiuli niadtong 1829, sa dihang ang mga Apostoles nga sila si Pedro, Santiago, ug Juan mitugyan niini ngadto ni Joseph Smith ug Oliver Cowdery.

Ang kahingpitan sa ebanghelyo gipahiuli, ug Ang Simbahan ni Jesukristo sa mga Santos sa Ulahing mga Adlaw mao “lamang ang tinuod ug buhi nga simbahan diha sa ibabaw sa tibuok yuta” (D&P 1:30). Ang Simbahan sa katapusan mopuno sa tibuok yuta ug magbarug sa kahangturan.

May kalabutan nga mga pakisayran: Isaias 29:13–14; Ezequiel 37:15–17; Mga Taga-Efeso 4:11–14; Santiago 1:5–6

5. Mga Propeta ug Pagpadayag

Ang usa ka propeta mao ang tawo kinsa gitawag sa Dios aron mamulong alang Kaniya (tan-awa sa Amos 3:7). Ang mga propeta nagpamatuod ni Jesukristo ug nagtudlo sa Iyang ebanghelyo. Ilang ipahibalo ang kabubut-on ug tinuod nga kinaiya sa Dios. Ilang ipanghimaraut ang sala ug mopasidaan sa mga sangputanan niini. Usahay, nanagna sila sa umaabut nga mga hitabo (tan-awa sa D&P 1:37–38). Daghang mga pagtulun-an sa mga propeta makita diha sa mga kasulatan. Samtang magtuon kita sa mga pulong sa mga propeta, makat-on kita sa kamatuoran ug makadawat og giya (tan-awa sa 2 Nephi 32:3).

Kita mopaluyo sa Presidente sa Simbahan isip propeta, manalagna, ug tigpadayag ug ang bugtong tawo sa yuta kinsa nakadawat og pagpadayag sa paggiya sa tibuok Simbahan. Kita mopaluyo usab sa mga magtatambag sa Unang Kapangulohan ug mga sakop sa Korum sa Napulog Duha ka mga Apostoles isip mga propeta, mga manalagna, ug mga tigpadayag.

Ang pagpadayag usa ka komunikasyon gikan sa Dios ngadto sa Iyang mga anak. Ang Ginoo mopadayag sa Iyang kabubut-on ngadto sa Simbahan, namulong Siya pinaagi sa Iyang propeta. Ang mga kasulatan—ang Biblia, Basahon ni Mormon, Doktrina ug mga Pakigsaad, ug Perlas nga Labing Bililhon—naglakip sa mga pagpadayag nga gihatag pinaagi sa karaan ug ulahing adlaw nga mga propeta. Ang Presidente sa Ang Simbahan ni Jesukristo sa mga Santos sa Ulahing mga Adlaw mao ang propeta sa Dios sa yuta karon.

Ang mga indibidwal makadawat og pagpadayag aron sa pagtabang nila sa ilang mga panginahanglan, mga responsibilidad, ug mga pangutana ug sa pagtabang sa paglig-on sa ilang mga pagpamatuod. Kadaghanan sa mga pagpadayag ngadto sa mga lider ug sa mga miyembro sa Simbahan moabut pinaagi sa mga impresyon ug mga hunahuna gikan sa Espiritu Santo. Ang Espiritu Santo mosulti sa atong mga hunahuna ug mga kasingkasing pinaagi sa hinagawhaw, hinay nga tingog (tan-awa sa D&P 8:2–3). Ang pagpadayag moabut usab pinaagi sa mga panan-awon, mga damgo, ug mga pagbisita sa mga anghel.

May kalabutan nga mga pakisayran: Salmo 119:105; Mga Taga-Efeso 4:11–14; 2 Timoteo 3:15–17; Santiago 1:5–6; Moroni 10:4–5

6. Ang Priesthood ug ang mga Yawe sa Priesthood

Ang priesthood mao ang mahangturong gahum ug awtoridad sa Dios. Pinaagi sa priesthood, gimugna sa Dios ug gidumala ang mga langit ug yuta. Pinaagi niini nga gahum Siya mitubos ug mihimaya sa Iyang mga Anak, sa pagpahinabo sa “pagka-imortal ug sa kinabuhi nga dayon sa tawo” (Moises 1:39).

Ang Dios naghatag sa awtoridad sa priesthood ngadto sa takus nga lalaki nga mga miyembro sa Simbahan aron sila makalihok alang sa Iyang pangalan alang sa kaluwasan sa Iyang mga anak. Ang mga yawe sa priesthood mao ang mga katungod ngadto sa kapangulohan, o ang gahum nga gihatag sa Dios ngadto sa tawo aron sa pagdumala ug sa paggiya sa gingharian sa Dios dinhi sa yuta (tan-awa sa Mateo 16:15–19). Pinaagi niini nga mga yawe, ang mga tighupot sa priesthood adunay awtoridad sa pagsangyaw sa ebanghelyo ug sa pagdumala sa mga ordinansa sa kaluwasan. Ang tanang nagserbisyo sa Simbahan gitawag ubos sa pagdumala sa usa ka tawo kinsa naghupot sa mga yawe sa priesthood. Sa ingon, aduna silay katungod sa gahum nga gikinahanglan sa pagserbisyo ug sa pagtuman sa mga responsibilidad sa ilang mga calling.

May kalabutan nga pakisayran: D&P 121:36, 41–42

Aaronic Priesthood

Ang Aaronic Priesthood sa kasagaran gitawag og priesthood alang sa pagpangandam. Ang mga katungdanan sa Aaronic Priesthood mao ang deacon, teacher, priest, ug bishop. Sa Simbahan karon, ang takus nga mga miyembro nga lalaki mahimong makadawat sa Aaronic Priesthood sugod sa edad nga 12 anyos.

Ang Aaronic Priesthood “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag” (D&P 13:1).

Melchizedek Priesthood

Ang Melchizedek Priesthood mao ang mas taas o mas labaw, nga priesthood ug nangalagad sa espirituhanong mga butang (tan-awa sa D&P 107:8). Kining mas labaw nga priesthood gihatag ngadto ni Adan ug diha sa yuta sa higayon nga ang Ginoo mopadayag sa Iyang ebanghelyo.

Gitawag kini og “Balaan nga Priesthood, sunod sa Kapunongan sa Anak sa Dios” (D&P 107:3). Sa wala madugay kini nailhan nga Melchizedek Priesthood, ginganlan sunod sa usa ka bantugang halangdon nga pari kinsa nagpuyo sa panahon ni propeta Abraham.

Diha sa Melchizedek Priesthood, ang mga katungdanan mao ang elder, high priest, patriarch, Seventy, ug Apostol. Ang Presidente sa Melchizedek Priesthood mao ang Presidente sa Simbahan.

May kalabutan nga pakisayran: Mga Taga-Efeso 4:11–14

7. Mga Ordinansa ug mga Pakigsaad

Mga Ordinansa

Sa Ang Simbahan ni Jesukristo sa mga Santos sa Ulahing mga Adlaw, ang ordinansa usa ka sagrado, pormal nga buhat nga adunay espirituhanong kahulugan. Ang kada ordinansa gihimo sa Dios aron sa pagtudlo og espirituhanong mga kamatuoran. Ang mga ordinansa sa kaluwasan gipahigayon pinaagi sa awtoridad sa priesthood ug ubos sa direksyon niadtong kinsa naghupot sa mga yawe sa priesthood. Ang ubang mga ordinansa importante sa kahimayaan ug gitawag og makaluwas nga mga ordinansa.

Ang unang makaluwas nga ordinansa sa ebanghelyo mao ang bunyag pinaagi sa pagpaunlod diha sa tubig nga dumalaon sa tawo nga adunay katungod. Ang bunyag gikinahanglan alang sa indibidwal nga mahimong miyembro sa Simbahan ug sa pagsulod sa celestial nga gingharian (tan-awa sa Juan 3:5).

Ang pulong bunyag nagagikan sa pulong nga Griyego nga nagpasabut pagtuslob o pagpaunlod. Ang pagpaunlod simbolo sa kamatayon sa makasasala nga kinabuhi sa usa ka tawo ug ang pagkatawo pag-usab ngadto sa espirituhanong kinabuhi, gipahinungod sa pagserbisyo sa Dios ug sa Iyang mga anak. Nagsimbolo usab kini sa pagkamatay ug pagkabanhaw.

Human mabunyagi ang usa ka tawo, usa o daghang mga tighupot sa Melchizedek Priesthood mopandong sa ilang mga kamot diha sa ulo sa tawo ug mokumpirma kaniya nga miyembro sa Simbahan. Isip kabahin niini nga ordinansa, nga gitawag ug kumpirmasyon, ang tawo hatagan sa gasa sa Espritu Santo.

Ang gasa sa Espiritu Santo lahi sa impluwensya sa Espiritu Santo. Sa dili pa ang bunyag, ang tawo mahimong mobati sa impluwensya sa Espiritu Santo matag karon ug unya ug pinaagi niana nga impluwensya makadawat og pagpamatuod sa kamatuoran (tan-awa sa Moroni 10:4–5). Human makadawat sa gasa sa Espiritu Santo, ang usa ka tawo adunay katungod sa Iyang kanunay nga pagpakig-uban kon siya magsunod sa mga sugo.

Ang ubang makaluwas nga mga ordinansa naglakip sa ordinasyon ngadto sa Melchizedek Priesthood (alang sa mga lalaki), ug temple endowment, ug pagbugkos sa kaminyoon. (tan-awa sa D&P 131:1–4). Tanang makaluwas nga mga ordinansa sa priesthood giubanan og mga pakigsaad. Sa templo, kining makaluwas nga mga ordinansa mapahigayon usab alang sa mga patay sa pagpuli (vicarious) nga paagi. Ang pagpuli (vicarious) nga mga ordinansa mahimong epektibo lamang kon ang namatay nga mga tawo modawat niini didto sa kalibutan sa espiritu ug motahud sa may kalabutan nga mga pakigsaad.

Ubang mga ordinansa, sama sa pagpangalagad ngadto sa masakiton ug sa paghatag og ngalan ug panalangin sa mga bata, importante usab sa atong espirituhanong kalamboan.

May kalabutan nga pakisayran: Mga Buhat 2:36–38

Mga Pakigsaad

Ang pakigsaad mao ang usa ka sagrado nga kasabutan tali sa Dios ug sa tawo. Ang Dios mohatag sa mga kondisyon alang sa pakigsaad, ug kita uyon sa pagbuhat unsay Iyang gisugo nato nga buhaton; dayon ang Dios misaad nato og piho nga mga panalangin alang sa atong pagkamasulundon (tan-awa sa D&P 82:10).

Ang tanang makaluwas nga mga ordinansa sa priesthood giubanan og mga pakigsaad. Nakigsaad kita sa Ginoo atol sa bunyag ug bag-ohon kadto nga mga pakigsaad pinaagi sa pag-ambit sa sakrament. Ang mga kaigsoonan nga modawat sa Melchizedek Priesthood mosulod ngadto sa panumpa ug pakigsaad sa priesthood. Mohimo kita og dugang nga mga pakigsaad didto sa templo.

May kalabutan nga mga pakisayran: Exodo 19:5–6; Salmo 24:3–4; 2 Nephi 31:19–20; D&P 25:13

8. Kaminyoon ug Pamilya

Ang kaminyoon tali sa lalaki ug sa babaye gi-orden sa Dios, ug ang pamilya mahinungdanon sa Iyang plano sa kaluwasan ug sa atong kalipay. Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.

Ang sagrado nga mga gahum sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa. Ang mga ginikanan gisugo sa pagdaghan ug pagpuno sa yuta, sa pag-amuma sa ilang mga anak sa paghigugma ug pagkamatarung, ug sa pagsangkap alang sa ilang pisikal ug espirituhanon nga mga panginahanglan sa ilang mga anak.

Ang bana ug asawa adunay ligdong nga kapangakohan sa paghigugma ug pag-amuma alang sa usag usa. Ang mga amahan mao ang mangulo sa ilang mga pamilya diha sa gugma ug sa pagkamatarung ug sa pagsangkap sa mga kinahanglanon sa kinabuhi. Ang unang mga kapangakohan sa mga inahan mao ang pag-atiman sa ilang mga anak. Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban.

Ang balaan nga plano sa kalipay makahimo sa mga relasyon sa pamilya nga magpadayon human sa kamatayon. Ang yuta gilalang ug ang ebanghelyo gipadayag aron ang mga pamilya matukod, mabugkos, ug mahimaya sa kahangturan. (Gikutlo gikan sa “Ang Pamilya: Usa ka Pamahayag ngadto sa Kalibutan,” Ensign, Nob. 2010, 129; tan-awa usab sa LDS.org/topics/family-proclamation.)

May kalabutan nga mga pakisayran: Genesis 2:24; Salmo 127:3; Malaquias 4:5–6; D&P 131:1–4

9. Mga Kasugoan

Ang mga sugo mao ang mga balaod ug mga kinahanglanon nga gihatag sa Dios ngadto sa katawhan. Atong ipakita ang atong gugma alang Kaniya pinaagi sa pagsunod sa Iyang mga sugo (tan-awa sa Juan 14:15). Ang pagsunod sa mga sugo makahatag og mga panalangin gikan sa Ginoo (tan-awa sa D&P 82:10).

Ang duha ka labing sukaranan nga mga sugo mao ang “higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. … Ug … higugmaa ang imong silingan sama sa imong kaugalingon” (Mateo 22:36–39).

Ang Napulo ka mga Sugo importante nga bahin sa ebanghelyo ug mahangturong mga baruganan nga gikinahanglan alang sa atong kahimayaan (tan-awa sa Exodo 20:3–17). Ang Ginoo mipadayag niini ngadto ni Moises sa karaang mga panahon ug Siya mipahayag niini pag-usab diha sa mga pagpadayag sa ulahing mga adlaw.

Ang ubang mga sugo naglakip sa pag-ampo kada adlaw (tan-awa sa 2 Nephi 32:8–9), pagtudlo sa ebanghelyo ngadto sa uban (tan-awa sa Mateo 28:19–20), pagtuman sa balaod sa kaputli (tan-awa sa D&P 46:33), pagbayad sa hingpit nga ikapulo (tan-awa sa Malaquias 3:8–10), pagpuasa (tan-awa sa Isaiah 58:6–7), pagpasaylo sa uban (tan-awa sa D&P 64:9–11), pagbaton og espiritu sa pasalamat (tan-awa sa D&P 78:19), ug pagsunod sa Pulong sa Kaalam (tan-awa sa D&P 89:18–21).

May kalabutan nga mga pakisayran: Genesis 39:9; Isaias 58:13–14; 1 Nephi 3:7; Mosiah 4:30; Alma 37:35; Alma 39:9; D&P 18:15–16; D&P 88:124

Alang sa dugang nga impormasyon niini nga mga hilisgutan, adto sa LDS.org, Teachings, Gospel Topics; o tan-awa sa Matinud-anon sa Tinuohan: Usa ka Pakisayran sa Ebanghelyo (2004).