Unit 9: Day 2

Lucas 1

Pasiuna

Ang anghel nga si Gabriel mipakita ngadto ni Zacarias ug mipahibalo nga si Zacarias ug ang iyang asawa, si Elisabet, makabaton og usa ka anak nga lalaki, kinsa ilang hinganlan og Juan. Paghuman sa unom ka bulan, ang samang anghel mipakita ngadto ni Maria ug mipahibalo nga siya mamahimong inahan sa Anak sa Dios. Si Maria mibisita ni Elisabet, ug sila nagmaya sa pag-abut sa Manluluwas. Human sa tulo ka bulan, si Elisabet nanganak ni Juan, kinsa ilhon isip si Juan Bautista.

Lucas 1:1–4

Si Lucas nagpasabut sa mga rason sa pagsulat sa iyang Ebanghelyo

Inyo bang mailhan ang panghitabo nga gihulagway sa mosunod nga mga litrato? Sa ubos sa matag litrato, isulat ang paghulagway sa panghitabo.

Si Kristo didto sa Templo, ni Heinrich Hofmann; sa maayong kabubut-on sa C. Harrison Conroy Co., Inc.

Kini nagpakita sa pipila ka mga panghitabo ug mga pagtulun-an gikan sa mortal nga pagpangalagad sa Manluluwas nga narekord ni Lucas apan wala sa Ebanghelyo ni Mateo, Marcos, ug Juan.

Si Lucas misugod sa iyang Ebanghelyo pinaagi sa pagpamulong ngadto sa usa ka tawo nga gihinganlan og Teofilo (tan-awa sa Lucas 1:3) ug mipasabut sa iyang mga rason sa pagsulat. Ang Teofilo nagpasabut nga “higala sa Dios” (Bible Dictionary, “Theophilus”).

Basaha ang Lucas 1:1–4, nga mangita sa rason ni Lucas sa pagsulat niini nga Ebanghelyo.

Base sa Lucas 1:4, unsay mahimo sa pagtuon sa Ebanghelyo ni Lucas alang kanimo?

Samtang ikaw magtuon sa Ebanghelyo ni Lucas, imong maangkon ang “ maila ang pagkatinuod ” (Lucas 1:4) sa mga kamatuoran nga gitudlo diha kanimo mahitungod ni Jesukristo.

Lucas 1:5–25

Ang anghel Gabriel nagpahibalo sa pagkatawo ni Juan ngadto ni Zacarias, ug si Elisabet nagsabak

Unsa kaha kadugay nga imong mapugngan ang imong ginhawa? I-set ang timer sulod sa 10 ngadto sa 30 segundos, ug i-start kini kon imo nang sugdan sa pagpugong ang imong ginhawa, o mahimo nimong tan-awon ang segundo nga kamot sa orasan. Kon mahimo, pugngi ang imong ginhawa hangtod motingog ang timer o matapos ang oras.

Unsa ang imong gihunahuna sulod sa katapusang pipila ka mga segundo sa wala pa motingog ang orasan ug nakompleto ang oras? Unsa kaha kaparehas ang pagpugong sa imong ginhawa ngadto sa pagbati samtang nagpaabut nga matuman ang mga pulong sa Dios?

Palandonga ang usa ka panalangin o tubag gikan sa Dios nga ikaw naghulat o naglaum. Samtang ikaw nagtuon sa Lucas 1, nga mangita sa mga kamatuoran nga makatabang kanimo kon ikaw naghulat sa mga pulong sa Dios nga matuman diha sa imong kinabuhi.

Basaha ang Lucas 1:5–7, nga mangita sa panalangin nga dugayng gipaabut ni Zacarias ug Elisabet sa gidugayon sa ilang mga kinabuhi.

Unsa ang atong makat-unan mahitungod ni Zacarias ug Elisabet gikan niini nga mga bersikulo?

Si Zacharias ug Elisabeth mga kaliwat ni Aaron, diin mao ang gigikanan sa tanang mga pinili nga halangdong pari sa Israel. Nagpasabut kini nga si Juan usa ka natural nga sumusunod sa Aaronic Priesthood ug sa pagpangulo niini. Ang Propeta nga si Joseph Smith miingon, “Si Zacarias usa ka sacerdote sa Dios, ug nagdumala diha sa Templo, ug si Juan usa ka sacerdote nga misunod sa iyang amahan, ug naghupot sa mga yawe sa Aaronic Priesthood” (sa History of the Church, 5:257).

Ang Lucas 1:8–10 nagrekord nga si Zacarias natudlo sa paghalad sa insenso diha sa templo sa Jerusalem. Kini usa ka dungog nga miabut ngadto sa usa ka sacerdote makausa lamang sa iyang kinabuhi.

Basaha ang Lucas 1:11–13, nga mangita kon unsay nahitabo samtang si Zacarias diha sa Templo.

Hinumdumi sa bersikulo 13 nga ang anghel miingon, “Ang imong pangamuyo nadungog.” Si Zacarias ug si Elisabet ingon og nangamuyo sulod sa daghang katuigan aron makabaton og usa ka anak. Mahimo nimong markahan kining mga pulong diha sa imong mga kasulatan.

Unsa kaha ang gibati ni Zacarias sa iyang pagkadungog nga siya ug si Elisabet makabaton og usa ka anak nga lalaki bisan og sila “tag-as na kaayog panuigon” (Lucas 1:7)?

Ang Lucas 1:14–17 nagrekord nga ang anghel Gabriel misulti nga “mabatunan ang kalipay ug pagmaya” ni Zacarias ug ni Elisabet (Lucas 1:14) ug nga ang ilang anak nga lalaki moandam og daghang katawhan alang sa Ginoo.

Basaha ang Lucas 1:18–20, nga mangita kon giunsa pagtubag ni Zacarias ang mensahe ni Gabriel. Ang propeta Joseph Smith mitudlo nga si Gabriel mao si Noe ug “nagbarug sunod ni Adan sa awtoridad diha sa Priesthood” (Mga Pagtulun-an sa mga Presidente sa Simbahan: Joseph Smith [2007], 122).

Hinumdumi unsay nahitabo ngadto ni Zacarias tungod kay siya nagduhaduha sa mga pulong sa anghel. Ikonsiderar ang pagmarka sa bersikulo 20 unsa ang gisulti sa anghel mahitungod sa mga pulong—ang mensahe—nga iyang gipamulong ngadto ni Zacarias.

Usa ka kamatuoran nga atong makat-unan gikan ni anghel Gabriel mao nga ang mga pulong sa Ginoo nga gipamulong pinaagi sa Iyang mga sulugoon matuman sa ilang panahon. “Sa ilang panahon” nagpasabut nga sumala sa gitakdang panahon sa Ginoo.

1. Tubaga ang mosunod nga mga pangutana diha sa imong scripture study journal:

   1. Sa unsang paagi nga ang pagkahibalo sa mga pulong sa Ginoo matuman sumala sa Iyang gitakda nga panahon makaapekto kon giunsa nato sa pagtubag ang mga saad sa Ginoo?

   2. Sa unsa nga paagi nga kining kamatuoran makatabang sa usa ka tawo kinsa nagpaabut alang sa usa ka balaanong saad nga matuman?

Sa Lucas 1:21–24 atong makat-unan nga sa dihang si Zacarias mibiya sa templo, siya dili makasulti. Sa wala madugay si Elisabet nanamkon, sumala sa gisaad sa anghel.

Basaha ang mga pulong ni Elisabet sa Lucas 1:25, ug ikonsiderar kon unsa kaha ang gibati ni Elisabet samtang siya nangandam nga makaangkon og usa ka anak. Ang iyang pamahayag nga ang Ginoo “[n]agwagtang sa [iyang] pagkatinamay taliwala sa mga tawo” nagpasabut sa iyang nasinati nga kaulawan isip babaye nga dili kaanak. Nianing panahona ug niini nga kultura, ang pagpanganak gidayeg og maayo, ug ang pagkadili makaanak magdala og walay pagrespetar ug ubos nga pagbati.

Lucas 1:26–38

Ang anghel Gabriel nagpahibalo sa nagsingabut nga pagkatawo ni Jesus ngadto kang Maria

Sa Lucas 1:26–27 atong makat-unan nga sa misunod nga unom ka bulan sa pagmabdos ni Elisabet, ang anghel Gabriel gipadala ngadto ni Maria, usa ka birhen sa Nazaret.

Basaha ang Lucas 1:28–33, nga mangita sa mga pulong nga mahimong nakatabang ni Maria nga masabtan ang kaimportante sa tahas nga gihatag sa Ginoo kaniya. Ikonsiderar ang pagmarka unsay imong nakit-an. Si Jesus mao “ang Griyego nga pangalan sa Josue o Jesua, ‘ang Dios mao ang tabang’ o ‘manluluwas’” (Bible Dictionary, “Jesus”).

Hinumdumi nga ang titulo nga “Anak sa Labing Halangdon” (Lucas 1:32) nagpasabut ngadto sa doktrina nga si Jesus mao ang Anak sa Dios nga Amahan.

Basaha ang Lucas 1:34, nga mangita sa pangutana ni Maria. Sa iyang pamahayag “wala man akoy bana” nagpasabut nga siya usa ka birhen.

Basaha ang Lucas 1:35–37, nga mangita sa tubag sa anghel ngadto sa pangutana ni Maria.

Wala kita mahibalo, gawas sa mga istorya diha sa mga kasulatan, kon sa unsang paagi nahitabo ang pagpanamkon kang Jesukristo; gisultihan lamang kita nga milagroso kadto ug nga ang bata kinsa matawo mao ang Anak sa Dios.

Hinumdumi nga sa Lucas 1:37 ang kamatuoran nga gipahayag sa anghel nagpasabut niining milagroso nga panghitabo. Mahimo nimong markahan kini sa imong mga kasulatan.

Palandonga ang pipila ka mga kahimtang diin tingali kini lisud o gani imposible sa pagsunod sa piho nga mga kasugoan. Paglista og tulo o upat ka mga ehemplo diha sa blangko:

2. Ikonsiderar ang kamatuoran nga sa Dios, walay imposible. Tubaga ang mosunod nga pangutana diha sa imong scripture study journal: Unsa kaha ang isulti ni Maria o Elisabet aron sa pagdasig kanato kon mobati kita nga ang unsay gipabuhat sa Ginoo kanato lisud o imposible? Dayon pagsulat mahitungod sa usa ka kasinatian nga nakapalig-on sa imong pagtuo nga walay imposible sa Dios.

Basaha ang Lucas 1:38, nga mangita kon sa unsang paagi mitubag si Maria ngadto sa anghel.

Unsa nga ebidensya nga imong makita dinhi niining bersikulo nga si Maria mituo sa mga pulong sa anghel?

Ikonsiderar kon sa unsa nga paagi nga ang pagdawat ni Maria sa mga pulong sa anghel lahi gikan sa tubag ni Zacarias ngadto sa pagpahibalo sa anghel sulod sa templo. Palandonga kon sa unsa nga paagi nga makasunod ka sa mga ehemplo ni Maria ug ni Elisabet pinaagi sa pagtuo nga diha sa imong kaugalingon nga kinabuhi, walay gipangayo ang Ginoo kanimo nga imposible uban sa Iyang tabang.

Lucas 1:39–56

Si Maria mibisita ni Elisabet, ug sila nagpamatuod sa Manluluwas

Sila ni Elisabet ug Maria mituman sa importante nga mga tahas nga nagtabang sa pag-usab sa kalibutan. Basaha ang Lucas 1:41–45, nga mangita sa pagpamatuod ni Elisabet samtang siya “napuno sa Espiritu Santo” (Lucas 1:41).

Tungod sa pagsaksi nga nadawat ni Elisabet gikan sa Espiritu Santo, unsa ang iyang nasabtan na mahitungod ni Maria?

Basaha ang Lucas 1:46–49, nga mangita kon sa unsang paagi si Maria midayeg sa Ginoo.

Hinumdumi sa bersikulo 49 nga si Maria miingon nga ang Ginoo “nagbuhat ug dagkong mga butang” alang kaniya. Basaha pag-usab ang Lucas 1:34, 38, 45–46, nga mangita kon unsay gibuhat ni Maria nga nagtugot sa Ginoo sa pagbuhat og “talagsaong mga butang” alang kaniya.

Ingon man nga si Zacarias, Elisabet, ug Maria ang matag usa adunay kaugalingong mga tahas nga buhaton diha sa balaanong plano, kita usab adunay importante nga mga tahas nga gihatag sa Ginoo. Atong makat-unan gikan niini nga istorya nga kon matinud-anon kita nga maningkamot sa pagtuman sa mga tahas nga ang Ginoo aduna alang kanato, Siya makahimo og talagsaong mga butang sa atong mga kinabuhi.

3. Palandonga ang mga tahas nga gusto sa Ginoo nga imong tumanon diha sa Iyang plano, ug tubaga ang mosunod nga pangutana diha sa imong scripture study journal: Unsa kaha ang mahitabo sa imong kinabuhi kon ikaw motubag ngadto sa Ginoo sama sa gibuhat ni Maria?

Si Presidente Ezra Taft Benson mipamatuod sa mga panalangin sa paghatag sa atong mga kinabuhi ngadto sa Dios ug matinud-anon nga maningkamot sa pagsunod sa Iyang kabubut-on: “Ang mga lalaki ug mga babaye kinsa mitugyan sa ilang mga kinabuhi ngadto sa Dios makadiskubre nga Siya makahimo og mas daghan pa diha sa ilang mga kinabuhi kay sa sila makahimo. Iyang paladman ang ilang mga kalipay, lugwayan ang ilang panan-awon, pasabton og dali ang ilang mga hunahuna, palig-unon ang ilang mga kaugatan, bayawon ang ilang mga espiritu, pilo-piloon ang ilang mga panalangin, dugangan ang ilang mga kahigayunan, hupayon ang ilang mga kalag, hatagan og mga higala ug, bu-buan og kalinaw. Bisan kinsa nga magawagtang sa iyang kinabuhi tungod kanako, magapatunhay niini” (“Jesus Christ—Gifts and Expectations,” Ensign, Dec. 1988, 4).

Lucas 1:57–80

Si Juan Bautista Natawo

Ang Lucas 1:57–80 gipasabut nga pagkahuman nga nanganak si Elisabeth, si Zacharias namahayag agig kasulatan nga ang bata hinganlan og Juan. Ang pangalan nga Juan nagpasabut nga “si Jehova manggihatagon.” Nianang tungora siya sa kalit nakasulti pag-usab, ug siya nanagna mahitungod sa mga misyon ni Jesukristo ug ni Juan. Samtang matinud-anon kita nga motuman sa atong balaanong hinatag nga mga tahas sama sa nahimo nila ni Zacarias, Elisabet, ug Maria, ang Ginoo makahimo usab og talagsaong mga butang alang kanato ug pinaagi kanato. Ikonsiderar kon unsaon nimo sa pagtuman ang imong kaugalingong mga tahas diha sa plano sa Ginoo.

4. Isulat ang mosunod diha sa ubos sa mga assignment karon sa imong scripture study journal:

   Akong natun-an ang Lucas 1 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: