Pasiuna sa 2 Mga Taga-Tesalonica
Ngano nga Kinahanglang Tun-an Kini nga Basahon?
Sa iyang Ikaduhang Epistola ngadto sa mga taga-Tesalonica, misulat si Pablo og mga pulong sa pag-awhag ug klaripikasyon ngadto sa mga miyembro nga nasayop pagsabut sa piho nga mga aspeto sa Ikaduhang Pag-anhi ni Jesukristo. Ang pagtuon sa iyang mga pagtulun-an makatabang kanimo nga masabtan ang kahimtang sa apostasiya nga nahitabo ug unsaon nga tukmang makaandam alang sa pagbalik sa Ginoo.
Kinsa ang Nagsulat Niini nga Basahon?
Si Apostol Pablo mao ang misulat sa 2 Mga Taga-Tesalonica (tan-awa sa 2 Mga Taga-Tesalonica 1:1; tan-awa usab sa 2 Mga Taga-Tesalonica 2:5; 3:17). Ang sinugdanan sa sulat naglangkob usab og pangumusta gikan kang Silas ug Timoteo (2 Mga Taga-Tesalonica 1:1).
Kanus-a ug Diin Kini Gisulat?
“Gisulat ni Pablo ang mga epistola ngadto sa mga taga-Tesalonica gikan sa Corinto atol sa iyang ikaduhang misyonaryo nga biyahe,” mga A.D. 50–51 (Giya ngadto sa mga Kasulatan, “Mga Epistola ni Pablo,” scriptures.lds.org).
Para kang Kinsa Kini Gisulat ug Ngano?
Gisulat ni Pablo ang 2 Mga Taga-Tesalonica ngadto sa mga miyembro sa Simbahan sa Tesalonica. Ang mga tema sa 1 Mga Taga-Tesalonica ug 2 Mga Taga-Tesalonica susama ra, nga nagpasabut nga iyang gisulat ang 2 Mga Taga-Tesalonica aron sa pagklaro ug dugangan pa ang impormasyon sa unang sulat. Makita nga ang mga taga-Tesalonica nakadawat og tinumo-tumo nga sulat nga nangangkon nga gikan kang Pablo, nga maoy hinungdan nga ang pipila mituo nga ang Ikaduhang Pag-anhi nahitabo na (tan-awa sa 2 Mga Taga-Tesalonica 2:2).
“Sa mubo nga panahon tali sa duha ka mga sulat ang Simbahan nag-antus sa pagpanggukod [tan-awa sa 2 Mga Taga-Tesalonica 1:4]; ang posibilidad sa dinaliang pagbalik sa Ginoo nakaingon sa dili maayong pagbati sa kahinam [tan-awa sa 2 Mga Taga-Tesalonica 2:2]” (Bible Dictionary, “Pauline Epistles”). Gisulat ni Pablo ang 2 Mga Taga-Tesalonica aron mapalig-on ang pagtuo niining mga miyembro ug sa pagkorihir sa sayop nga pagsabut sa doktrina.
Unsa ang Pipila ka mga Butang nga Nakalahi Niini nga Basahon?
Ang Ikaduhang Sulat ni Pablo ngadto sa mga taga-Tesalonica naghatag og importanting mga detalye mahitungod sa Ikaduhang Pag-anhi ni Jesukristo. Ang pipila ka mga ehemplo naglakip sa mga ideya nga ang Ginoo mobalik diha sa “nagdilaab nga kalayo” ug nga ang dautan “mahiaguman ra nila ang silot sa pagkalaglag nga walay katapusan ug ang pagkahininginlan gikan sa atubangan sa Ginoo” (2 Mga Taga-Tesalonica 1:8–9).
Niini nga sulat atong mabasa nga si Pablo nanagna mahitungod sa Dakong Apostasiya, nagtudlo nga mahiaguman sa Simbahan ang “pagpahilayo” gikan sa ebanghelyo sa dili pa ang Ikaduhang Pag-anhi sa Ginoo (tan-awa sa 2 Mga Taga-Tesalonica 2:2–12). Ang mga pagtulun-an ni Pablo mahitungod sa Apostasiya makapahinumdom sa modernong mga miyembro sa Simbahan nganong ang Pagpahiuli sa ebanghelyo sa ulahing mga adlaw gikinahanglan.
Outline
2 Mga Taga-Tesalonica 1. Gipangumusta ug gidayeg ni Pablo ang mga Santos nga taga-Tesalonica. Nagtudlo siya nga ang dili diosnon makasinati sa panimalus sa Ginoo atol sa Ikaduhang Pag-anhi.
2 Mga Taga-Tesalonica 2. Gikorihian ni Pablo ang sayop nga ideya nga ang Ikaduhang Pag-anhi nahitabo na ug nanagna nga usa ka apostasiya ang mahitabo sa dili pa ang pagbalik sa Ginoo. Iyang giawhag ang mga Santos nga taga-Tesalonica nga magpabiling matinud-anon.
2 Mga Taga-Tesalonica 3. Gitambagan ni Pablo ang mga miyembro sa Simbahan nga motrabaho aron masustiniran ang ilang temporal nga mga panginahanglan ug dili maluya sa pagbuhat og maayo.