1 Mga Taga-Corinto 12–14

Pasiuna

Si Apostol Pablo misulat kabahin sa daghang mga gasa sa Espiritu. Iyang gitandi ang Simbahan ngadto sa usa ka pisikal nga lawas ug mipasabut nga sama nga ang lawas nagkinahanglan sa matag bahin aron makalihok sa tukmang paagi, ang Simbahan nagkinahanglan sa matag miyembro sa Simbahan sa paggamit sa iyang kaugalingon nga mga gasa sa Espiritu aron motampo ug molig-on niini. Si Pablo mitambag sa mga Santos sa pagtinguha sa gugmang putli ug sa espirituhanong gasa sa pagpanagna.

1 Mga Taga-Corinto 12

Si Pablo nagtudlo kabahin sa espirituhanong mga gasa

Basaha ang mosunod nga mga pamahayag, ug lingini ang usa nga sa imong hunahuna mas tukma:

Ang pagpamatuod maangkon.
Ang pagpamatuod usa ka gasa.

Ipasabut ang imong tubag:

Samtang magtuon ka sa 1 Mga Taga-Corinto 12, pangita og usa ka baruganan nga makatabang kanimo nga masayud unsaon sa pagkaangkon og lig-on nga personal nga pagpamatuod kabahin ni Jesukristo ug sa Iyang ebanghelyo.

Sa 1 Mga Taga-Corinto 12:1–2 atong mabasa nga si Apostol Pablo gustong motudlo sa mga miyembro sa Simbahan sa Corinto kabahin sa espirituhanong mga gasa.

Basaha ang 1 Mga Taga-Corinto 12:3, nga mangita unsaon nato pagkahibalo sa atong kaugalingon nga si Jesus mao ang Ginoo ug Manluluwas. Si Propeta Joseph Smith mitudlo nga ang pulong nga makaingon diha sa 1 Mga Taga-Corinto 12:3 kinahanglang sabton isip nasayud (tan-awa sa History of the Church, 4:602–3).

Gamit ang unsay imong nakat-unan gikan sa 1 Mga Taga-Corinto 12:3, kompletuha ang mosunod nga kamatuoran: Pinaagi lamang sa nga kita makaangkon og personal nga pagpamatuod nga si Jesukristo ang atong Manluluwas.

Si Presidente Dieter F. Uchtdorf sa Unang Kapangulohan mitudlo kabahin sa atong panginahanglan nga makadawat og personal nga pagpamatuod:

“Ang pagpamatuod usa ka labing bililhon nga kabtangan kay wala kini maangkon pinaagi sa pangatarungan o rason lamang, dili kini mapalit sa yutan-ong mga kabtangan, ug kini dili ikahatag isip gasa o mapanunod gikan sa atong mga katigulangan. Dili kita magsalig sa mga pagpamatuod sa ubang mga tawo. Kinahanglan kitang masayud sa atong mga kaugalingon. Si Presidente Gordon B. Hinckley miingon, ‘Ang matag Santos sa Ulahing mga Adlaw adunay responsibilidad nga masayud sa iyang kaugalingon uban sa usa ka kasigurohan nga walay bisan unsang pagduha-duha nga si Jesus mao ang nabanhaw, buhi nga Anak sa buhi nga Dios’ (‘Fear Not to Do Good,’ Ensign, Mayo 1983, 80). …

“Atong madawat kini nga pagpamatuod kon ang Espiritu Santo mamulong ngadto sa espiritu nga anaa kanato. Makadawat kita og usa ka malinawon ug dili mapaling-paling nga kasiguroan nga maoy mahimong tinubdan sa atong pagpamatuod ug lig-on nga pagtuo” (“Ang Gahum sa Personal nga Pagpamatuod,” Ensign o Liahona, Nob. 2006, 38).

Tubaga ang mosunod nga mga pangutana diha sa imong scripture study journal:
1. Nganong importante man nga masabtan nga ang pagpamatuod kabahin ni Jesukristo moabut lamang pinaagi sa Espiritu Santo?
2. Unsay atong mabuhat aron madapit ang Espiritu Santo sa atong kinabuhi ug madawat kana nga pagpamatuod?

Sama sa narekord diha sa 1 Mga Taga-Corinto 12:4–31, si Pablo mitudlo sa mga Santos sa Corinto nga daghang espirituhanon nga mga gasa ang gihatag alang sa kaayohan sa tanang anak sa Langitnong Amahan ug sa pagtabang sa mga miyembro sa pagserbisyo sa usag usa. Ang mga gasa sa Espiritu mao ang mga panalangin, o abilidad nga gihatag pinaagi sa Espiritu Santo, ug ang Dios naghatag og dili moubos usa ka gasa sa matag miyembro sa Simbahan (tan-awa sa D&P 46:11). Si Pablo mitandi sa Simbahan ngadto sa usa ka pisikal nga lawas. Sama nga ang matag bahin sa lawas gikinahanglan aron ang lawas molihok sa saktong paagi, ang matag miyembro sa Simbahan makagamit sa iyang espirituhanong mga gasa aron makatampo ug makalig-on sa Simbahan. Alang niini nga katuyoan, si Pablo mitambag sa mga Santos nga “tinguhaa hinoon ninyo pag-ayo ang labi pa ka dagkung mga hiyas” (1 Mga Taga-Corinto 12:31).

1 Mga Taga-Corinto 13

Si Pablo nagtudlo mahitungod sa kaimportante sa pagbaton og gugmang putli

Basaha ang mosunod nga mga sitwasyon, ug ikonsiderar unsa nga makadaut nga mga epekto ang mahimong moresulta gikan niini nga mga kinaiya ug pamatasan.

Kanunay ka nga mapungot ug maglagot sa kinaiya sa usa ka igsoon.
Usa ka klasmeyt nagsinalbahis nimo, mao nga mibati ka nga angay lang nga magsinalbahis ka kaniya.
Nasuya ka sa mga talento ug mga kalampusan sa usa ka higala.
Usahay sayon ra nimo nga manglibak ug mosulti og dili maayo sa uban diha sa imong korum sa priesthood o klase sa Young Women.

Samtang magtuon ka sa 1 Mga Taga-Corinto 13, pangita og mga kamatuoran nga makatabang kanimo sa paglikay sa mga kinaiya ug pamatasan nga makaguba sa imong kaugalingong kalipay ug positibong pakigrelasyon sa uban.

Basaha ang 1 Mga Taga-Corinto 13:1–3, nga mangita alang sa usa ka kinaiya ug gasa sa Espiritu nga gidayeg pag-ayo ni Pablo.

Ang gugma nga putli mao “ang kinatas-an, labing dungganan, labing lig-on nga matang sa gugma, dili lamang pagbati” (Giya ngadto sa mga Kasulatan, “Gugma nga Putli”).

Timan-i kini nga mga bersikulo kon giunsa paghulagway ni Apostol Pablo kadtong dunay lain pang espirituhanong mga gasa apan walay gugma nga putli (tan-awa usab sa D&P 88:125).

Ang mga pulong nga “masaba nga agong” ug “piyangpiyang nga nagatagingting” diha sa bersikulo 1 nagpasabut sa mga instrumento nga makahimo og kusog nga mga tingog. Sa kinatibuk-ang kahulugan sa 1 Mga Taga-Corinto 13:1, kini nga mga pulong nagpasabut sa pagsulti og mga pulong nga walay unod o walay kahulugan kon ang mamumulong wala gidasig sa gugma nga putli.

Si Pablo mihulagway og mga kalidad ug mga kinaiya sa gugmang putli aron sa pagtabang sa mga Santos nga taga-Corinto nga mas makasabut niini nga gasa. Basaha ang 1 Mga Taga-Corinto 13:4–8, nga mangita sa mga paghulagway ni Pablo sa gugmang putli. Mahimo nimong ikonsiderar ang pagmarka sa unsay imong makit-an.

Ikonsiderar ang mosunod nga mga pagpasabut sa mga pulong nga mahimong lisud sabton: Ang pulong nga “mapailubon” (bersikulo 4) naghulagway sa tawo nga mapailubon nga naglahutay sa mga pagsulay. Ang “dili masinahon” (bersikulo 4) naghulagway sa tawo nga dili masina sa uban. Ang “dili tigpagawal” (bersikulo 4) naghulagway sa tawo nga dili manghambog. Ang “dili tigpaburot” (bersikulo 5) naghulagway sa kalidad sa pagkamapainubsanon. Ang “dili bastos” (bersikulo 5) naghulagway sa tawo nga dili salbahis o walay paghunahuna sa uban. Ang “dili maakop-akopon” (bersikulo 5) naghulagway sa kalidad sa pag-una sa Dios ug sa uban kay sa kaugalingon. Ang “dili masuk-anon” (bersikulo 5) naghulagway sa tawo nga dili dali masuko. Ang “motuo sa tanang mga butang” (bersikulo 7) naghulagway sa tawo nga modawat sa tanang kamatuoran.

Kang kinsang kinabuhi ang usa ka ehemplo sa tanan niini nga mga hiyas sa gugma nga putli nga gihulagway ni Pablo?

Diha sa Moroni 7:47 atong mabasa nga si propeta Mormon mitudlo nga ang “gugma nga putli mao ang tiunay nga gugma ni Kristo.” Mahimo nimong ikonsiderar ang pagsulat niini nga kahulugan ug pakisayran tapad sa 1 Mga Taga-Corinto 13:4–8.

Pagpili og duha o tulo ka deskripsyon sa gugmang putli gikan sa 1 Mga Taga-Corinto 13:4–8. Sa imong scripture study journal, ipasabut kon sa unsang paagi kini naghulagway kang Jesukristo, ug paghatag og usa ka ehemplo gikan sa Iyang kinabuhi alang sa kada deskripsyon nga imong gipili.

Usa ka kamatuoran nga atong makat-unan gikan sa 1 Mga Taga-Corinto 13:4–8 mao nga samtang kita nagtinguha nga makaangkon sa espirituhanong gasa sa gugmang putli, kita mahimong mas mahisama sa atong Manluluwas, si Jesukristo.

Unsa kaha ang gipasabut diha sa bersikulo 8 nga ang “gugma wala gayuy pagkatapos”?

Si Elder Jeffrey R. Holland sa Korum sa Napulog Duha ka mga Apostoles mihulagway og usa ka paagi nga ang gugmang putli dili mapakyas [matapos]: “Ang kinabuhi puno sa mga kahadlok ug mga kapakyasan. Usahay mapakyas ang mga butang. Usahay ang mga tawo mopakyas kanato, o ang ekonomiya o negosyo o ang gobyerno mopakyas kanato. Apan usa ka butang sa karon o sa kahangturan ang dili mopakyas kanato—ang tiunay nga gugma ni Kristo” (Christ and the New Covenant [1997], 337).

Sa 1 Mga Taga-Corinto 13:9–12 atong mabasa kon unsay gitudlo ni Pablo kon nganong ang espirituhanong mga gasa sa kahibalo ug sa pagpanagna sa katapusan mawala. Si Pablo nakaobserbar nga ang kahibalo nga anaa niini nga kinabuhi dili kompleto ug nga kita makabaton og hingpit nga kahibalo diha sa kahangturan.

Basaha ang 1 Mga Taga-Corinto 13:13, nga mangita sa tulo ka mga gasa sa Espiritu nga gitudlo ni Pablo nga magapabilin, buot ipasabut nga molahutay o magpabilin nga makanunayon.

Basi sa 1 Mga Taga-Corinto 13:13, kompletuha ang mosunod nga kamatuoran: ____________________ mao ang labing daku [mahinungdanon] nga gasa sa Espiritu.

Ngano kaha nga ang gugmang putli mao ang labing mahinungdanon nga gasa sa Espiritu?

Sama sa narekord diha sa 1 Mga Taga-Corinto 14:1, si Pablo mitambag sa mga Santos nga “himoa ang gugmang putli ingon nga maoy imong kalab-uton.” Basaha ang Moroni 7:48, nga mangita kon unsay gitudlo ni Mormon nga buhaton sa iyang mga katawhan aron makaangkon sa gasa sa gugmang putli.

Sa unsang paagi kita makaangkon niini ug sa ubang espirituhanong mga gasa? Sumala ni Mormon, ngadto kang kinsa itugyan sa Langitnong Amahan ang gasa sa gugmang putli?

Tubaga ang mosunod nga mga pangutana diha sa imong scripture study journal:
1. Sa unsang paagi ang pagbaton og gugmang putli makapalambo sa atong mga relasyon sa pamilya, mga higala, ug mga kaedad?
2. Kanus-a ka nakasaksi sa gugmang putli sa paagi sa pagtagad kanimo sa usa ka tawo o sa uban?
3. Asa sa mga hiyas sa gugmang putli nga gilista diha sa 1 Mga Taga-Corinto 13:4–7 ang imong gibati nga maoy labing lisud alang kanimo nga maangkon? Ngano man? Pagsulat og usa ka tumong kalabut sa unsay imong buhaton sa pagtinguha ug pag-angkon sa gasa sa gugmang putli.

1 Mga Taga-Corinto 14

Si Pablo nagtudlo nga ang gasa sa propesiya [panagna] labaw pa kay sa gasa sa mga dila [pinulongan]

Sa 1 Mga Taga-Corinto 14:1–3 si Pablo mitambag sa mga Santos nga magtinguha sa gasa sa pagpanagna. Siya miingon nga ang gasa sa pagpanagna naglig-on, o nagtudlo, sa uban labaw pa kay sa gasa sa pinulongan.

“Ang usa ka panagna naglangkob og balaanon nga dinasig nga mga pulong o mga sinulat, diin ang usa ka tawo modawat pinaagi sa pagpadayag gikan sa Espiritu Santo. Ang pagpamatuod ni Jesus mao ang espiritu sa profesiya [panagna] (Pin. 19:10). … Kon ang usa ka tawo managna, siya mamulong o magsulat niana diin ang Dios buot kaniya nga masayud, alang sa iyang kaayohan o kaayohan sa uban” (Giya ngadto sa mga Kasulatan, “Pagpanagna, Panagna,” scriptures.lds.org).

Gikan sa 1 Mga Taga-Corinto 14:1–3 atong makat-unan nga samtang kita motudlo ug mopamatuod pinaagi sa inspirasyon, kita makatabang sa paglig-on ug paghupay sa uban. Ang usa ka paagi nga makaawhag kita sa uban (tan-awa sa bersikulo 3) mao ang pagdasig kanila.

Ikonsiderar sa dihang ang pagtudlo o pagpamatuod sa usa ka tawo mitudlo, miawhag, o mihupay kanimo.

Sa 1 Mga Taga-Corinto 14:4–40, si Pablo mipasidaan sa mga Santos nga taga-Corinto kabahin sa gasa sa pagsulti og mga pinulongan. Mipasidaan siya nga kon gamiton sa dili tukma nga paagi, ang gasa sa mga pinulongan mapakyas sa paglig-on sa Simbahan ug makabalda sa mga miyembro sa pagtinguha sa mas maayo pa nga espirituhanong mga gasa. Si Pablo usab mitudlo nga ang “Dios dili Dios sa kasamok” (1 Mga Taga-Corinto 14:33) ug nga ang tanang mga butang diha sa Simbahan kinahanglan nga buhaton sa tukma nga pagkahan-ay.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Mga Taga-Corinto 12–14 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: