Unit 21: Day 4

1 Mga Taga-Corinto 3–6

Pasiuna

Si Apostol Pablo mipasabut sa mga Santos sa Corinto sa tahas sa mga misyonaryo sa pagtukod sa gingharian sa Dios. Siya mitudlo nga ang ilang mga kongregasyon maoy mga dapit diin ang Espiritu mahimong mopuyo ug miawhag kanila nga dili maghunahuna nga ang ubang mga tawo mas maayo kay sa uban. Dugang pa, si Pablo mipahimangno kanila batok sa pagtugot sa dautang mga tawo nga moimpluwensya kanila. Mipasidaan usab siya kanila sa paglikay sa imoral nga mga pilosopiya ug binuhatan nga kanunay makita didto sa Corinto.

1 Mga Taga-Corinto 3

Si Pablo nagpasabut sa tahas sa mga misyonaryo ug mga miyembro sa Simbahan sa pagtukod sa gingharian sa Dios

Hunahunaa nga ang usa ka higala nagpalista aron mokuha og klase sa advanced math, sama sa calculus, apan wala makakuha sa pang-andam nga mga kurso, sama sa basic algebra.

Ikonsiderar kon unsa kaha ka malampuson ang imong higala sa klase nga advanced math. Nganong gikinahanglan man nga makasabut sa sukaranan nga mga ideya sa usa ka hilisgutan sa dili pa mahimong hanas sa mas lisud nga mga konsepto?

Basaha ang 1 Mga Taga-Corinto 3:1–3, nga mangita sa pasumbingay nga gigamit ni Apostol Pablo aron ipasabut sa mga Santos sa Corinto nga sila dili pa andam alang sa dugang nga mga kamatuoran sa ebanghelyo. Mahimo nimong markahan ang mga pulong nga gatas ug magahi nga kalan-on sa 1 Mga Taga-Corinto 3:2.

Unsa ang gisugyot sa mga pulong nga “mga masusu pa diha kang Kristo” diha sa 1 Mga Taga-Corinto 3:1 mahitungod sa espirituhanong kahingkod sa mga Santos sa Corinto?

Hinumdumi nga ang mga Santos sa Corinto wala magkahiusa ug ang pipila kanila naglakip sa pagano (dili makadiosnon) nga mga tinuohan ug mga binuhatan sa ilang pagsunod sa ebanghelyo. Sila usab misugod sa pagkabahin-bahin ngadto sa mga grupo basi sa managlahi nga mga interpretasyon sa doktrina sa Simbahan, ug ilang gisuportahan ang ilang managlahi nga panglantaw pinaagi sa pagkutlo sa inilang mga lider sa Simbahan (tan-awa sa 1 Mga Taga-Corinto 1:10–16; 3:4).

Basaha ang 1 Mga Taga-Corinto 3:5–8, nga mangita sa pasumbingay nga gigamit ni Pablo sa pagtabang sa mga Santos nga makasabut sa mga tahas sa mga misyonaryo kinsa midala sa ebanghelyo ngadto sa Corinto.

1. Diha sa imong scripture study journal, pagdrowing og hulagway sa pasumbingay ni Pablo ug isulat kon unsay imong hunahuna nga gipaningkamutan ni Pablo nga itudlo ngadto sa mga Santos sa Corinto pinaagi niini nga pasumbingay.

Timan-i diha sa 1 Mga Taga-Corinto 3:6–7 kon kinsa ang makapahimo og mga kausaban diha sa mga kasingkasing sa katawhan nga mopadulong ngadto sa pagkakabig. Atong makat-unan gikan niini nga mga bersikulo nga samtang kita makatabang sa uban nga makakat-on mahitungod sa ebanghelyo ni Jesukristo, pinaagi sa gahum sa Espiritu Santo ang mga tawo makabig.

Pamalandungi nganong importante alang kanato nga makasabut nga ang gahum sa Dios, dili atoa, ang makakabig.

Diha sa 1 Mga Taga-Corinto 3:9–23 atong makat-unan nga miawhag si Pablo sa mga Santos sa Corinto sa pagtukod sa pundasyon sa ilang hugot nga pagtuo diha kang Jesukristo ug sa pagtugot sa Espiritu nga mopuyo diha sa Simbahan. Si Pablo mitambag usab sa mga Santos nga dili mosalig sa kalibutanong kaalam tungod kay kini “binoang” (1 Mga Taga-Corinto 3:19) kon itandi sa kaalam sa Dios.

1 Mga Taga-Corinto 4

Si Pablo nagsulti sa mga Santos sa Corinto nga dili maghunahuna nga ang ubang mga tawo mas maayo kay sa uban

Basi sa tambag ni Pablo nga narekord diha sa 1 Mga Taga-Corinto 4:1–3, makita nga ang pipila ka mga miyembro sa Simbahan sa Corinto wala kauyon sa binuhatan ni Pablo isip usa ka misyonaryo ug lider sa Simbahan. Tingali nakapangutana sila sa iyang paghukom o naghunahuna nga mas maayo pa og mabuhat ang laing tawo.

Sama sa narekord diha sa 1 Mga Taga-Corinto 4:3–5, si Pablo mitudlo nga ang Ginoo maoy iyang maghuhukom ug maoy “magapadayag sa mga butang nga karon natago” ug “magapadayag sa mga katuyoan sa kasingkasing” (1 Mga Taga-Corinto 4:5). Gikan niini atong makat-unan nga bisan pa sa mga paghukom sa uban kanato, ang Ginoo makiangayong mohukom kanato tungod kay Siya nasayud sa tanang mga butang, lakip sa mga hunahuna ug mga katuyoan sa atong mga kasingkasing.

Diha sa 1 Mga Taga-Corinto 4:6–21 atong makat-unan nga si Pablo misulti sa mga Santos sa Corinto nga dili magpasigarbo sa usa sa ilang mga lider sa Simbahan nga makadaut sa uban. Siya usab misulti kanila nga ang mga Apostoles ni Jesukristo gitawag aron mag-antus tungod sa pagkadautan sa kalibutan. Ang kalibutan naghukom sa mga Apostoles ug ubang mga lider sa Simbahan isip mga “boang” (1 Mga Taga-Corinto 4:10) tungod sa pagtinguha sa pagsunod ni Kristo. Si Pablo dayon mitudlo nga ang gingharian sa Dios gidumala pinaagi sa gahum sa Dios pinaagi niadtong naghupot sa mga yawe sa priesthood.

1 Mga Taga-Corinto 5

Si Pablo mipasidaan sa mga Santos batok sa pagpakigdait niadtong tuyo gayud nga mopili sa pagpakasala

Hunahunaa nga duna kay usa ka panaksan nga preskong prutas nga dunay nasagul nga usa ka dunot nga pirasong prutas.

Unsay mahitabo kon imong pasagdan ang dunot nga prutas nga magpabilin diha sa panaksan uban sa ubang prutas?

Unsa kaha ang girepresentaran sa dunot nga prutas diha sa atong kinabuhi?

Samtang magtuon ka sa 1 Mga Taga-Corinto 5, pangitaa ang mga kamatuoran nga makatabang kanimo nga mas makasukol sa makadaut nga mga impluwensya sa imong kinabuhi.

Basaha ang 1 Mga Taga-Corinto 5:1–2, nga mangita sa usa ka sala nga ang mga Santos sa Corinto walay gibuhat aron sa pagdisiplina.

Ang pakighilawas nagpasabut sa bisan unsang sekswal nga pakigrelasyon sa gawas sa kaminyoon. Masabut nga usa sa mga miyembro sa Simbahan sa Corinto nagbuhat og sekswal nga sala uban sa iyang ina-ina.

Ang mga pulong nga “makuha gikan sa inyong taliwala” diha sa 1 Mga Taga-Corinto 5:2 nagpasabut nga ang makasasala kinahanglang ipahimulag gikan sa Simbahan. Ang mga lider sa Simbahan mokonsiderar og maayo sa daghang mga butang una pa mahitabo ang pagpahimulag o bisan unsang disiplina sa Simbahan. Agig dugang sa pagkonsiderar kon unsa kabug-at ang kalapasan, ang mga lider sa Simbahan mokonsiderar sa lain-laing mga katuyoan sa pagdisiplina diha sa Simbahan: sa pagtabang sa usa ka tawo nga maghinulsol, sa pagpanalipod niadtong maapektuhan sa bati nga mga binuhatan o tinuohan sa usa ka tawo, ug aron sa pagpanalipod sa integridad sa mga pagtulun-an sa Simbahan (tan-awa sa “Church Discipline [Pagdisiplina diha sa Simbahan],” mormonnewsroom.org/article/church-discipline).

Basaha ang 1 Mga Taga-Corinto 5:6–7, nga mangita sa pasumbingay nga gigamit ni Apostol Pablo sa pagpasabut nganong gikinahanglan nga mawad-an kini nga indibidwal sa iyang pagkamiyembro sa Simbahan.

Ang igpapatubo, o libadura, mopatubo sa pan. Kini usab ang hinungdan nga mahimong madaut ang pan. Ang minasa nga harina nagrepresentar sa Ang Simbahan ni Jesukristo. Unsaon nimo pag-summarize sa gipasabut niini nga pasumbingay?

Gikan niini nga pasumbingay ni Pablo atong makat-unan ang mosunod nga kamatuoran: Kon kita mopili nga makigsuod niadtong mohangup sa sala, kita maimpluwensyahan sa ilang pagkadautan.

Basaha ang 1 Mga Taga-Corinto 5:9–11, nga mangita sa tambag nga gihatag ni Pablo ngadto sa mga Santos sa Corinto sa pagtabang kanila nga magamit ang baruganan nga gitudlo sa bersikulo 6.

Ikonsiderar kon sa unsang paagi ang pagtulun-an ni Pablo may kalabutan ngadto sa panaksan sa prutas nga dunay nasagul nga usa ka dunot nga prutas.

Aron mas masabtan ang tambag ni Pablo nga dili makig-uban sa mga tigpakighilawas o sa uban nga nagdumili sa paghinulsol sa sala, basaha ang mosunod nga pamahayag ni Elder Neal A. Maxwell sa Korum sa Napulog Duha ka mga Apostoles: “Ayaw pagpakig-uban sa mga tigpakighilawas—dili tungod kay ikaw sobra ra ka maayo alang kanila apan, sama sa gisulat ni [C. S.] Lewis, tungod kay mahimo kang matakdan bisan unsa ka pa kamaayo. Hinumdumi nga ang dili maayo nga mga sitwasyon sa kadugayan makadaut sa maayong mga tawo” (“The Stern but Sweet Seventh Commandment,” New Era, Hunyo 1979, 42).

2. Tubaga ang mosunod nga pangutana diha sa imong scripture study journal: Unsa ang pipila ka mga ehemplo sa dili maayo nga mga sitwasyon nga sa kadugayan makadaut sa maayong mga tawo nga ila nang ikompromiso ang ilang mga sumbanan ug modawat sa makasasala nga kinaiya?

Kinahanglan nga magtinguha kita sa pagtabang ug pagdasig sa mga tawo kinsa nanlimbasug sa sala apan dili ikompromiso ang atong kaugalingong mga sumbanan. Ikonsiderar sa mainampoong paagi kon unsay imong mahimo aron makaimpluwensya sa uban sa positibo nga paagi apan dili ikompromiso ang imong mga sumbanan.

Diha sa 1 Mga Taga-Corinto 5:12–13 atong makat-unan nga ang mga lider sa Simbahan adunay responsibilidad sa paghukom ug, kon gikinahanglan, pagpahimulag niadtong nakahimo og seryoso nga mga kalapasan.

1 Mga Taga-Corinto 6

Si Pablo nagtudlo sa mga Santos kabahin sa panaghiusa ug balaod sa kaputli

Ang karaang Corinto naila sa pagka-imoral, ug daghang mga taga-Corinto nagpasiugda sa ideya nga ang atong mga lawas gihimo alang sa kalipay. Sa 1 Mga Taga-Corinto 6:13–17, ang Apostol Pablo mitudlo sa mga Santos sa Corinto nga ang atong mga lawas gilalang aron sa pagtuman sa mga katuyoan sa Ginoo, dili aron moapil sa sekswal nga sala o bisan lamang aron motagamtam sa pisikal nga mga kalipay, sama sa pagkaon. Kadtong nagpamiyembro sa Simbahan mahiusa uban ni Kristo isip espirituhanong “mga bahin” sa Iyang lawas. Ang sekswal nga imoralidad dili haum sa usa ka espiritwal nga relasyon uban ni Jesukristo.

Basaha ang 1 Mga Taga-Corinto 6:18–20, nga mangita kon unsay gitudlo ni Pablo kabahin sa atong mga lawas. (Ang 1 Mga Taga-Corinto 6:19–20 usa ka scripture mastery passage. Mahimo nimo kining markahan sa lahi nga paagi aron sa pagtabang kanimo nga makit-an kini sa umaabut.)

3. Kompletuha ang mosunod nga mga assignment diha sa imong scripture study journal:

   1. I-summarize ang kamatuoran nga gitudlo ni Pablo diha sa 1 Mga Taga-Corinto 6:19.

   2. Ipasabut kon sa unsang paagi ang pagsabut nga ang atong mga lawas mga templo sa Dios kinahanglang moimpluwensya kon unsaon nato pagtratar ang atong mga lawas ug ang mga lawas sa uban.

   3. I-summarize ang kamatuoran nga gitudlo ni Pablo diha sa 1 Mga Taga-Corinto 6:20.

Si Apostol Pablo mitudlo nga ang atong mga lawas mga templo sa Dios.

Pamalandungi ang mga Doktrina ug mga Baruganan

Ang pagpamalandong naglakip sa paghunahuna, paghinuktok, pagpangutana, ug pagtimbang-timbang sa unsay imong nahibaloan ug unsay gipaningkamutan nimong masabtan. Ang pagpamalandong sa kasagaran motabang kanato nga makasabut kon unsay gikinahanglan natong buhaton aron magamit ang mga baruganan sa ebanghelyo. Sa 1 Mga Taga-Corinto 6, samtang imong pamalandungan ang mga pagtulun-an ni Apostol Pablo kabahin sa balaod sa kaputli ug sa unsang paagi nga ang imong lawas sama sa usa ka templo, ikonsiderar ang paggahin og panahon sa paghunahuna kabahin niini nga mga kamatuoran ug nganong importante nga sundon kini.

Pamalandungi kon sa unsang paagi ang pagsabut niini nga mga kamatuoran kabahin sa atong mga lawas makatabang kanimo nga magpabiling putli kon alirongan ka sa pagkadautan.

Scripture Mastery—1 Mga Taga-Corinto 6:19–20

4. Aron sa pagtabang kanimo sa pagsag-ulo niini nga scripture mastery passage, balika ang mga linya sa ubos, tabunan ang pipila niini gamit ang usa ka papel samtang nagkapamilyar ka sa mga pulong. Padayon sa pagbalik-balik sa tudling hangtud nga makasag-ulo ka na niini. Dayon i-recite ang tudling ngadto sa usa ka sakop sa pamilya o higala ug hangyoa sila sa pagpirma sa imong scripture study journal.

   [19] Unsa?

   wala ba kamo masayud nga ang inyong lawas templo

   sa Espiritu Santo nga nagapuyo sa sulod ninyo,

   ug nga kini inyong nabatunan gikan sa Dios?

   Kamo dili na inyo sa inyong kaugalingon.

   [20] Kay gipalit na kamo sa usa ka bili:

   Busa himayaa ninyo ang Dios diha sa inyong lawas,

   ug sa inyong espiritu,

   nga Iya sa Dios.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Mga Taga-Corinto 3–6 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: