Unit 26: Day 2

1 Mga Taga-Tesalonica

Pasiuna

Misulat si Apostol Pablo ngadto sa mga Santos sa Tesalonica human mahibalo nga nagmatinud-anon sila sa ebanghelyo bisan pa man sa pagpanggukod. Gidayeg niya sila tungod sa ilang pagkamatinud-anon ug pagkaandam nga motudlo sa ebanghelyo. Gitudloan usab sila ni Pablo bahin sa Pagkabanhaw sa patay atol sa Ikaduhang Pag-anhi ni Jesukristo, ug gitudloan niya sila kon unsaon sa pagpangandam alang sa Ikaduhang Pag-anhi.

1 Mga Taga-Tesalonica 1

Gidayeg ni Pablo ang mga Santos nga taga-Tesalonica tungod sa ilang pagkamatinud-anon diha sa kalisdanan

Tan-awa ang Tesalonica diha sa Mga Mapa sa Biblia, nu. 13, “Ang Misyonaryo nga mga Panaw ni Apostol Pablo,” nga makita diha sa Ang Giya ngadto sa mga Kasulatan. Ang mga Santos sa Tesalonica mao ang pipila sa labing unang mga kinabig ngadto sa Simbahan sa Europe. Sila si Pablo, Silas ug Timoteo unang nagsangyaw didto atol sa ikaduhang misyonaryo nga panaw ni Pablo apan gipugos og papahawa sa siyudad sa pipila ka mga lider nga Judeo (tan-awa sa Mga Buhat 17:5–15). Ang mga Santos nga taga-Tesalonica padayon nga gigukod bisan pa man nakabiya na si Pablo ug ang iyang mga kauban. Sa wala madugay gisulat ni Pablo kini nga epistola ngadto sa mga Santos aron sa pagdasig kanila samtang nag-atubang sila og pagpanggukod.

1. Nakasulay ka ba sukad sa pagpakigbahin sa ebanghelyo ngadto sa usa ka tawo? Diha sa imong scripture study journal, pagsulat bahin sa imong kasinatian. Ikonsiderar ang mosunod nga mga pangutana: Giunsa man pagdawat ang imong mensahe? Sa unsang mga paagi nga napanalanginan ka tungod sa imong mga paningkamot nga ipakigbahin ang ebanghelyo? Unsa ang pipila ka mga hagit nga posible natong masinati samtang mosulay kita sa pagpakigbahin sa ebanghelyo ngadto sa uban?

Samtang magtuon ka sa 1 Mga Taga-Tesalonica 1–2, pangitaa ang mga kamatuoran nga makatabang nimo samtang mopakigbahin ka sa ebanghelyo ngadto sa uban.

Basaha ang 1 Mga Taga-Tesalonica 1:5–6, nga mangita kon giunsa sa pagapakigbahin ni Apostol Pablo ang ebanghelyo ngadto sa mga taga-Tesalonica sa dihang didto pa siya kauban nila. Mahimo nimong markahan ang mga pulong nga pulong ug gahum diha sa bersikulo 5.

Pagmarka ug Pag-annotate sa mga Kasulatan

Usa sa labing makatabang nga mga paagi sa pagkat-on ug sa paghinumdom sa mga butang nga atong makat-unan mao ang pagmarka ug pag-annotate sa mga kasulatan. Diha sa naprinta nga bersyon sa mga kasulatan, mahimo kini pinaagi sa pagbadlis, pag-shade, o pag-outline sa mahinungdanong mga pulong diha sa mga kasulatan. Agig dugang, makasulat kita sa mga depinisyon, mga baruganan, komentaryo nga gihimo sa mga propeta, o personal nga mga hunahuna ug mga impresyon diha sa mga margin sa mga kasulatan. Ang nagkadaiyang mga matang sa pagmarka ug pagsulat mahimo usab diha sa elektronik nga mga bersyon sa mga kasulatan, sama sa anaa sa Gospel Library mobile app.

Si Elder Bruce R. McConkie sa Korum sa Napulog Duha ka mga Apostoles mipasabut sa kalainan tali sa “pulong” ug sa “gahum” sa ebanghelyo.

“Ang tinuod nga ebanghelyo naglangkob og duha ka mga butang: Ang Pulong, ug Ang Gahum. Bisan kinsa makabaton sa pulong; ang mga basahon diin kini nahisulat magamit sa tanan. Apan ang gahum kinahanglan gayud nga magagikan sa Dios; ug kini mao ug kinahanglan gayud nga itugyan sumala sa iyang hunahuna ug sa iyang kabubut-on ngadto niadtong nagatuman sa balaod nga maghatag kanila og katungod nga makadawat niini.

“Ang pulong sa ebanghelyo mao ang gipamulong o gisulat nga istorya kon unsay kinahanglang buhaton sa mga tawo aron maluwas. …

“Apan ang aktwal nga kaluwasan moabut lamang kon ang gahum sa Dios gidawat ug gigamit; ug kini nga gahum mao ang gahum sa priesthood ug ang gahum sa Espiritu Santo” (Doctrinal New Testament Commentary, 3 vols. [1965–73], 3:42–43).

Ikonsiderar ang pagmarka diha sa 1 Mga Taga-Tesalonica 1:6 kon unsay gibuhat sa mga taga-Tesalonica human sila natudloan sa ebanghelyo pinaagi sa pulong ug sa gahum sa Dios.

Gikan sa 1 Mga Taga-Tesalonica 1:5–6 atong makat-unan ang mosunod nga baruganan: Samtang nagtudlo kita sa ebanghelyo ni Jesukristo pinaagi sa pulong ug gahum sa Dios, makatabang kita sa uban nga mahimong mga sumusunod sa Ginoo ug sa Iyang mga sulugoon.

Basaha ang 1 Mga Taga-Tesalonica 1:7–9, nga mangita kon sa unsang paagi nga ang ehemplo sa mga Santos nga taga-Tesalonica nakaapekto sa ubang mga tumutuo nga naglibut kanila.

Gikan sa ehemplo sa mga Santos nga taga-Tesalonica, atong makat-unan ang mosunod nga kamatuoran: Mapakigbahin nato ang ebanghelyo pinaagi sa atong ehemplo.

Sa mosunod nga pamahayag, badlisi ang gisulti ni Presidente Dieter F. Uchtdorf sa Unang Kapangulohan nga mao ang pinakaepektibong paagi sa pagpakigbahin sa ebanghelyo: “Ang pinakaepektibong paagi sa pagsangyaw sa ebanghelyo mao ang pinaagi sa ehemplo. Kon kita magkinabuhi pinasubay sa atong mga pagtuo, ang katawhan makamatikod. Kon ang panagway ni Jesukristo mosidlak sa atong kinabuhi [tan-awa sa Alma 5:14], kon kita malipayon ug may kalinaw sa kalibutan, ang mga tawo gustong mahibalo ngano. Usa sa pinakamahinungdanong wali nga nalitok kabahin sa misyonaryo nga buhat mao kining yanong hunahuna nga napahinungod kang St. Francis of Assisi: ‘Isangyaw ang ebanghelyo sa tanang panahon ug kon gikinahanglan, gamiti og mga pulong’ [sa William Fay ug Linda Evans Shepherd, Share Jesus without Fear (1999), 22]” (“Naghulat diha sa Dalan sa Damasco,” Ensign o Liahona, Mayo 2011, 77).

Hunahunaa sa dihang ang ehemplo sa usa ka tawo nakatabang nimo nga modawat sa ebanghelyo o mas hingpit nga mosunod sa ebanghelyo.

Diha sa 1 Mga Taga-Tesalonica 2:1–13, misulat si Pablo bahin sa iyang mas sayo nga pagpangalagad didto sa Tesalonica. Namulong siya bahin sa pipila ka mga kritiko sa Tesalonica nga nagduda sa iyang kasinsero ug mga tinguha atol sa iyang pagpangalagad. Gipanalipdan ni Pablo ang iyang kaugalingon pinaagi sa paghulagway sa sinsero ug kinasingkasing nga pamaagi diin siya ug ang iyang mga kauban mitudlo ug miserbisyo sa mga Santos. Ang iyang mga pulong makapahinumdom niadtong makita diha sa Doktrina ug mga Pakigsaad 12:8: “Ug walay bisan usa nga makatabang niini nga buhat gawas kon siya magpaubos ug puno sa gugma, adunay hugot nga pagtuo, paglaum, ug gugma nga putli.”

Wala pa makabalik si Pablo sa Tesalonica human siya gipugos sa pagpapahawa atol sa iyang ikaduhang misyonaryo nga panaw (tan-awa sa Mga Buhat 17:10). Miingon siya nga wala siya makabalik tungod kay “gisalanta [gibabagan]” ni Satanas sa pagbuhat sa ingon (1 Mga Taga-Tesalonica 2:18). Wala mohatag si Pablo og dugang nga mga detalye kon giunsa ni Satanas sa pagbabag niya sa pagbalik ngadto sa Tesalonica, apan klaro nga ang pagpanggukod gikan sa mga Judeo nakapugos ni Pablo nga mohimo og daghang pagtipas sa iyang panaw (tan-awa sa Mga Buhat 17:14–15).

1 Mga Taga-Tesalonica 3–5

Nagtudlo si Pablo sa mga Santos nga taga-Tesalonica bahin sa Ikaduhang Pag-anhi

Markahi kon sa imong hunahuna ang mosunod nga mga pamahayag bahin sa Ikaduhang Pag-anhi ni Jesukristo tinuod (T) o sayop (S):

• ____ 1. Ang matinud-anong mga Santos nga namatay sa wala pa ang Ikaduhang Pag-anhi dili mabanhaw hangtud sa katapusan sa Milenyum.

• ____ 2. Ang matinud-anong mga Santos nga buhi atol sa Ikaduhang Pag-anhi pagasakgawon sa pagsugat ni Kristo inig-anhi Niya.

• ____ 3. Ang Ikaduhang Pag-anhi mosurprisa sa tanan sama sa usa ka kawatan sa kagabhion.

Samtang magtuon ka sa 1 Mga Taga-Tesalonica 3–5, pangitaa ang mga kamatuoran bahin sa Ikaduhang Pag-anhi ni Jesukristo nga makatabang nga mahibaloan nimo ang hustong mga tubag sa eksamin nga tinuod–sayop (ang mga tubag giapil usab diha sa katapusang bahin sa leksyon).

Diha sa 1 Mga Taga-Tesalonica 3:1–7 atong makat-unan nga gireport ni Timoteo ngadto ni Pablo nga ang mga Santos nagpabiling matinud-anon bisan pa kon nakasinati og pagpanggukod.

Basaha ang 1 Mga Taga-Tesalonica 3:11–13, nga mangita sa gilauman ni Pablo nga buhaton sa Ginoo alang sa mga Santos sa pag-andam kanila alang sa Ikaduhang Pag-anhi. Ikonsiderar ang pagmarka o pagsulat diha sa imong mga kasulatan sa unsay imong makit-an.

Diha sa 1 Mga Taga-Tesalonica 4:1–12 atong makat-unan nga giawhag ni Pablo ang mga Santos nga mahimong balaan, o mahimong limpyo ug putli, pinaagi sa pagkamasulundon ngadto sa mga sugo sa Dios, nga gitudlo kanila ni Pablo ug sa uban.

Ang mga Santos nga taga-Tesalonica nasayop sa pagsabut sa ubang mga aspeto sa Ikaduhang Pag-anhi ni Jesukristo. Nabalaka sila nga ang mga miyembro sa Simbahan didto sa Tesalonica nga namatay nga dili makasinati sa mga panalangin sa Ikaduhang Pag-anhi.

Basaha ang 1 Mga Taga-Tesalonica 4:13–14, 16, nga mangita sa gitudlo ni Pablo bahin sa matinud-anong mga Santos nga namatay sa wala pa ang Ikaduhang Pag-anhi.

Gikan niini nga mga bersikulo atong makat-unan ang mosunod nga kamatuoran: Ang matinud-anong mga Santos nga namatay sa wala pa ang Ikaduhang Pag-anhi ni Jesukristo pagabanhawon inig-anhi Niya pag-usab.

Ang mga pulong nga “sila nga mga nangamatay pagadad-on ra unya sa Dios pinaagi kang Jesus uban kaniya” diha sa 1 Mga Taga-Tesalonica 4:14 nagpasabut nga ang matinud-anong mga Santos nga mabanhaw atol sa Ikaduhang Pag-anhi pagasakgawon sa pagsugat sa Manluluwas ug manaug uban Kaniya diha sa himaya (tan-awa sa D&P 88:97–98).

Basaha ang 1 Mga Taga-Tesalonica 4:15, 17, nga mangita sa gitudlo ni Pablo bahin sa matinud-anong mga Santos nga buhi inig-anhi pag-usab ni Kristo. Basaha usab ang Hubad ni Joseph Smith sa 1 Mga Taga-Tesalonica 4:15, (diha sa Ang Giya ngadto sa mga Kasulatan, scriptures.lds.org). 

Gikan niini nga mga bersikulo atong makat-unan ang mosunod nga kamatuoran: Ang matinud-anong mga Santos nga buhi atol sa Ikaduhang Pag-anhi ni Jesukristo pagasakgawon sa pagsugat Kaniya inig-anhi Niya.

Basaha ang 1 Mga Taga-Tesalonica 4:18, nga mangita sa gilauman ni Pablo nga buhaton sa mga Santos human masayud niining mga kamatuoran bahin sa Ikaduhang Pag-anhi.

2. Tubaga ang mosunod nga pangutana diha sa imong scripture study journal: Unsa man ang kahupayan nga imong nakit-an niining mga doktrina bahin sa Ikaduhang Pag-anhi ni Jesukristo?

Basaha ang 1 Mga Taga-Tesalonica 5:1–3, nga mangita sa duha ka mga analohiya nga gigamit ni Pablo sa paghulagway sa tayming sa Ikaduhang Pag-anhi.

Sa imong hunahuna unsa may matudlo kanato sa analohiya ni Pablo sa usa ka kawatan sa kagabhion bahin sa Ikaduhang Pag-anhi?

Si Elder Bruce R. McConkie mipasabut: “[Ang Ginoo] moabut sama sa usa ka kawatan sa kagabhion, wala damha ug walay pasidaan, ngadto sa kalibutan, ngadto niadtong anaa sa espirituhanong kangitngit, ngadto niadtong wala malamdagi sa gahum sa Espiritu” (Doctrinal New Testament Commentary, 3:54; tan-awa usab sa Mateo 24:42–43).

Gitudlo usab ni Elder McConkie ang mosunod kalabut sa analohiya sa usa ka babaye nga nagbati: “Wala siya masayud sa oras o minuto sa pag-abut sa bata, apan nasayud siya sa gibana-bana nga oras” (Doctrinal New Testament Commentary, 3:54).

Base niini nga analohiya, mahimo usab natong ikonsiderar kon sa unsang paagi nga ang mga pagsulay sa wala pa ang Ikaduhang Pag-anhi susama sa kasakit sa pagbati. Apan ingon nga ang pag-abut sa bata nindot, mao usab ang Ikaduhang Pag-anhi nga mahimong nindot ngadto sa mga matarung.

Basaha ang 1 Mga Taga-Tesalonica 5:4–6, nga mangita kon nganong ang matinud-anong mga Santos dili masurprisa sa Ikaduhang Pag-anhi. Mahimo nimong markahan o sulatan ang imong makit-an.

Ang mga pulong nga “mga anak sa kahayag” diha sa bersikulo 5 nagpasabut sa matinud-anong mga miyembro sa Simbahan nga “isalikway ang mga buhat sa kangitngit” (Mga Taga-Roma 13:12) ug makabaton sa pagpakig-uban sa Espiritu Santo ug, sa ingon, maandam alang sa Ikaduhang Pag-anhi (tan-awa sa D&P 106:4–5).

Atong makat-unan ang mosunod nga baruganan gikan sa 1 Mga Taga-Tesalonica 5:4–6: Kon kita matinud-anon ug magbantay sa mga timailhan sa wala pa ang Ikaduhang Pag-anhi ni Jesukristo, nan maandam kita inig-anhi Niya pag-usab.

Gitudlo ni Presidente Joseph Fielding Smith nga ang mga paagi aron makaandam kita alang sa Ikaduhang Pag-anhi mao ang “pagpatalinghug sa mga pulong ni Kristo, sa iyang mga apostoles ug magbantay” (Doctrines of Salvation, comp. Bruce R. McConkie, 3 vols. [1954–56], 3:53).

Ribyuha ang imong mga tubag sa eksamin nga tinuod–sayop diha sa sinugdanan niini nga leksyon. Base sa mga kamatuoran nga imong nakat-unan, duna ka bay usbon sa imong mga tubag?

Diha sa 1 Mga Taga-Tesalonica 5:7–22 si Apostol Pablo mitambag sa mga Santos kon unsaon sa pagpangandam alang sa Ikaduhang Pag-anhi ni Jesukristo.

Basaha ang 1 Mga Taga-Tesalonica 5:12–22, nga mangita sa gitambag ni Pablo nga buhaton sa mga Santos aron maandam ang ilang kaugalingon ug ang uban sa pagsugat sa Manluluwas atol sa Iyang Ikaduhang Pag-anhi.

3. Tubaga ang mosunod nga mga pangutana diha sa imong scripture study journal:

   1. Unsa ang usa ka tambag gikan sa 1 Mga Taga-Tesalonica 5:14–22 nga dali nimong nabantayan?

   2. Sa unsang paagi nga ang pagsunod niini nga tambag makatabang nimo ug sa uban aron maandam alang sa Ikaduhang Pag-anhi?

Basaha ang 1 Mga Taga-Tesalonica 5:23–24, nga mangita sa gisulti ni Pablo nga buhaton sa Dios alang sa Iyang matinud-anong mga Santos samtang nangandam sila alang sa Ikaduhang Pag-anhi.

Base sa unsay imong nakat-unan karon, tinoa kon unsay imong buhaton aron mas makaandam sa imong kaugalingon alang sa Ikaduhang Pag-anhi ni Jesukristo. Isulat ang imong mga tumong ug mga plano diha sa usa ka piraso nga papel, ug ibutang ang papel sa dapit kon asa makatabang kini sa pagpahinumdom nimo niadtong mga tumong ug mga plano.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Mga Taga-Tesalonica ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo:

Mga tubag sa eksamin nga tinuod–sayop: (1) Sayop, (2) Tinuod, (3) Sayop.