Juan 11

Pasiuna

Si Maria ug si Marta mipadala og mensahe kang Jesus nga ang ilang igsoong si Lazaro nasakit. Si Jesus milangay sa Iyang pag-adto, miabut upat na ka adlaw human namatay si Lazaro. Uban sa gugma ug kalooy, gibuhi ni Jesus si Lazaro gikan sa mga patay. Kining mahinuklugong pagpakita sa balaan nga gahum nagklaro nga si Jesus mao ang Mesiyas ug adunay gahum batok sa kamatayon. Human makahibalo niini nga milagro, ang mga sacerdote nga punoan ug ang mga Pariseo nagkunsabo sa pagpatay kang Jesus ug ni Lazaro.

Juan 11:1–46

Si Jesus nagbuhi ni Lazaro gikan sa mga patay

Paghunahuna og usa ka pagsulay o hagit nga nasinati o kasamtangan nga gisinati nimo (o sa tawo nga imong kaila). Dayon tubaga ang mosunod nga mga pangutana diha sa imong scripture study journal:
1. Unsa ang pipila ka mga paagi nga ang hugot nga pagtuo sa mga tawo ngadto sa Dios mahimong maapektuhan samtang sila nagsinati og mga pagsulay ug mga hagit sa kinabuhi?
2. Nganong ang ubang mga tawo mopili man sa pag-undang sa ilang pagtuo sa Dios tungod sa mga pagsulay o mga hagit nga ilang giatubang?

Samtang magtuon ka sa Juan 11, pangita og mga kamatuoran nga makatabang kanimo sa pagpalambo sa imong hugot nga pagtuo sa Dios samtang nagsinati ka sa mga pagsulay ug mga hagit sa imong kinabuhi.

Basaha ang Juan 11:1–3, nga mangita sa usa ka pagsulay nga gisinati sa pipila ka mga higala ni Jesus.

Ngano kaha nga ang mga igsoong babaye ni Lazaro mipadala man og mensahe kabahin sa iyang sakit ngadto ni Jesus?

Si Jesus anaa didto sa Betabara, sa Perea (tan-awa sa Juan 1:28; 10:40), nga gibanabana nga mga usa ka adlaw nga pagbiyahe padulong sa silangan gikan sa Betania. Busa, moabut og labing minos usa ka adlaw aron madala sa usa ka tawo kini nga mensahe ngadto ni Jesus ug laing usa ka adlaw alang sa pagbiyahe ni Jesus paingon sa Betania.

Basaha ang Juan 11:4–7, nga mangita sa paagi nga mitubag si Jesus human makadungog nga nasakit si Lazaro.

Nasayud nga si Jesus nahigugma kang Marta, Maria, ug Lazaro, ang mga disipulo tingali nagdahum nga si Jesus mobiyahe dayon ngadto sa Betania ug moayo ni Lazaro. O tingali si Jesus mamulong ug moayo ni Lazaro gikan sa layo, sama sa Iyang gibuhat ngadto sa anak sa usa ka opisyal (tan-awa sa Juan 4:46–53). Hinoon, si Jesus nagpabilin sa Perea og dugang duha pa ka mga adlaw.

Sumala sa Juan 11:4, unsay gisulti ni Jesus nga makab-ot pinaagi sa sakit ni Lazaro?

Sa Juan 11:8–10 atong nakat-unan nga pipila sa mga disipulo mitambag ni Jesus nga dili mobalik ngadto sa Judea, diin nahimutang ang Betania, tungod kay ang mga lider nga Judeo niana nga rehiyon nagtinguha sa pagpatay Kaniya.

Si Elder Bruce R. McConkie sa Korum sa Napulog Duha ka mga Apostoles mihatag sa mosunod nga pagpasabut kabahin sa tubag sa Manluluwas nga narekord diha sa Juan 11:9–10: “Sigurado gayud nga si Jesus moadto sa Judea bisan pa sa mga hulga sa kamatayon nga nag-atubang kaniya didto. [Niini nga mga bersikulo si Jesus mitudlo:] ‘Bisan og kini ikanapulo ug usa na nga takna sa akong kinabuhi, apan adunay napulog duha ka oras sa adlaw, ug sulod nianang gitakda nga panahon, akong himoon ang buhat nga gisangon kanako nga walay pagkapakyas o pagpanuko. Kini ang panahon nga gihatag kanako sa paghimo sa akong buhat. Dili na ko makahulat sa gabii nga basin mominos ang oposisyon. Siya nga molikay sa iyang mga responsibilidad ug molangay sa iyang buluhaton hangtud sa kagabhion mapandol diha sa kangitngit ug mapakyas sa iyang buhat’” (Doctrinal New Testament Commentary, 3 vols. [1965–73], 1:531).

Basaha ang Juan 11:11–15, nga mangita kon unsay gisulat ni Jesus kabahin sa kahimtang ni Lazaro.

Ikonsiderar ang pagmarka sa pamahayag sa Manluluwas kon ngano nga nalipay Siya nga wala Siya didto aron moayo ni Lazaro sa iyang sakit—“aron managpanuo kamo” (Juan 11:15). Siya mipasabut nga ang Iyang buhaton sa Betania motabang sa Iyang mga disipulo sa pagpalambo sa ilang hugot nga pagtuo diha Kaniya.

Sa Juan 11:16, si Apostol Tomas miawhag sa iyang isigka mga disipulo nga mokuyog kaniya sa pag-uban ni Jesus ngadto sa Judea bisan kon kini nagpasabut nga mamatay uban Kaniya.

Basaha ang Juan 11:17, nga mangita kon unsa na ka dugay nga namatay si Lazaro sa dihang si Jesus miabut sa Betania.

Si Elder McConkie mipasabut sa importansya nga si Lazaro patay na sulod sa upat ka adlaw: “Ang pagkadugta nagsugod na; ang kamatayon dugay na nga naestablisar isip hingpit nga kasigurohan. … Ngadto sa mga Judeo ang termino nga upat ka adlaw adunay espesyal nga kahulugan; nabantog nila nga tinuohan nga sa ikaupat nga adlaw ang espiritu sa katapusan ug dili mausab nga paagi mobiya na sa nahimutangan sa patay nga lawas” (Doctrinal New Testament Commentary, 1:533).

Kon kamo pa si Marta o Maria, unsa kaha ang inyong mahunahuna o bation nga si Jesus wala moabut hangtud nga si Lazaro patay na sulod sa upat ka adlaw?

Basaha ang Juan 11:18–27 aron mahibaloan kon unsay reaksyon ni Marta sa panahon niini nga pagsulay. Ikonsiderar ang pagmarka sa mga pamahayag nga nagpakita sa pagpili ni Marta nga mogamit sa hugot nga pagtuo diha ni Jesukristo panahon niini nga pagsulay. Hunahunaa ang matag usa sa mga pamahayag nga imong nailhan ug unsay labing nakapadayeg kanimo kabahin nila.

Gikan sa ehemplo ni Marta atong nakat-unan nga makapili kita nga mogamit sa hugot nga pagtuo diha ni Jesukristo sa panahon sa atong mga pagsulay.

Sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, pangitaa ang unsay gikinahanglan kanato samtang kita mogamit sa hugot nga pagtuo diha ni Jesukristo:

“Ang unang baruganan sa ebanghelyo mao ang hugot nga pagtuo diha ni Ginoong Jesukristo. Ang hugot nga pagtuo nagpasabut sa pagsalig—pagsalig sa kabubut-on sa Dios, pagsalig sa Iyang paagi sa pagbuhat sa mga butang, ug pagsalig sa Iyang panahon. Dili nato kinahanglang ipamugos ang atong panahon diha sa Iyaha. …

“Sa pagkatinuod, dili kita makaangkon og tinuod nga hugot nga pagtuo sa Ginoo kon dili usab hingpit nga mosalig sa kabubut-on sa Ginoo ug sa panahon sa Ginoo” (“Timing,” Ensign, Okt. 2003, 12).

Tubaga ang mosunod nga mga pangutana diha sa imong scripture study journal:
1. Ngano kaha nga importante alang kanato nga mogamit sa hugot nga pagtuo diha sa kabubut-on sa Ginoo ug sa Iyang panahon samtang kita nagsinati og mga pagsulay?
2. Sa unsang paagi nga imong gipili ang paggamit sa hugot nga pagtuo diha sa imong kasamtangan mga pagsulay? (O unsaon nimo pagpili sa paggamit sa hugot nga pagtuo kon ang mga pagsulay moabut sa imong kinabuhi?)

Ribyuha ang Juan 11:25–26, nga mangita sa mga kamatuoran nga atong makat-unan gikan sa unsay gitudlo sa Manluluwas kang Marta. Makatabang nga masayran nga ang mga pulong nga “dili na gayud mamatay” diha sa bersikulo 26 nagpasabut nga dili na gayud mosinati sa ikaduha nga kamatayon, o papahawaon gikan sa gingharian ug atubangan sa Dios.

Ang mosunod mao ang duha ka mga kamatuoran nga atong makat-unan gikan sa mga pulong sa Manluluwas: Si Jesukristo mao ang pagkabanhaw ug ang kinabuhi. Kon kita motuo ni Jesukristo, kita makaangkon sa kinabuhing dayon.

Basaha ang Juan 11:28–37, nga mangita kon unsay gisulti ni Maria kang Jesus ug giunsa Niya pagtubag. Timan-i nga ang pulong nga miluom, sama nga gigamit sa mga bersikulo 33 ug 38, nagpasabut nga nasubo o naguol.

Sa unsang paagi ang pamahayag ni Maria sa bersikulo 32 nagpakita sa iyang hugot nga pagtuo sa Manluluwas?

Pamalandungi ang Juan 11:35. Ngano kaha nga mihilak man si Jesus?

Basaha ang Juan 11:38–46, nga mangita kon unsay gibuhat sa Manluluwas human Siya mihilak uban ni Maria ug Marta.

Hinumdumi nga si Lazaro wala mabanhaw gikan sa mga patay ngadto sa imortal nga kahimtang. Ang iyang espirituhanong lawas giuli ngadto sa iyang pisikal nga lawas, apan ang iyang pisikal nga lawas mortal gihapon ug ubos nausab sa kamatayon.

Si Elder McConkie mitudlo mahitungod sa importanting katuyoan nga nabuhat sa Manluluwas pinaagi sa pagbuhi kang Lazaro gikan sa mga patay: “Iyang giandam, aron ikapakita sa mahinuklugong paagi, ang usa sa iyang labing mahinungdanon nga mga pagtulun-an: Nga siya mao ang pagkabanhaw ug ang kinabuhi, nga ang imortalidad ug kinabuhing dayon miabut pinaagi kaniya, ug nga kadtong mituo ug misunod sa iyang mga pulong dili gayud mamatay sa espirituhanong paagi” (Doctrinal New Testament Commentary, 1:531).

Sa unsang paagi kini nga milagro naghulagwayng daan sa Pagkabanhaw sa Manluluwas ug nagpakita sa Iyang gahum batok sa kamatayon? Sa unsang paagi kita mapanalanginan pinaagi sa pagsabut sa gahum sa Manluluwas sa paghatag og imortalidad ug kinabuhing dayon?

Timan-i sa Juan 11:40 nga si Jesus mipahinumdom ni Marta nga kon siya motuo, siya makakita sa himaya sa Dios. Hunahunaa kon sa unsang paagi si Marta ug Maria mipakita sa ilang hugot nga pagtuo diha ni Jesukristo sa panahon niini nga pagsulay. Hinumdumi nga sila sa sinugdanan mipakita og hugot nga pagtuo kang Jesukristo pinaagi sa paghangyo nga moadto Siya sa dihang nasakit si Lazaro, ug sila mipadayon sa pagtuo ug pagsalig Kaniya bisan human sa pagkamatay ni Lazaro.

Gikan sa Juan 11 atong nakat-unan nga kon kita mopili sa paggamit sa hugot nga pagtuo diha ni Jesukristo sa panahon sa atong mga pagsulay, niana ang atong hugot nga pagtuo diha Kaniya mapanghimatud-an ug molawom. Importante nga hinumduman nga, sama sa kasinatian ni Marta ug Maria, ang ingon nga kumpirmasyon sa atong hugot nga pagtuo moabut sumala sa kaalam ug panahon sa Ginoo.

Sa unsang paagi kaha ang pagbuhi og balik kang Lazaro human nga patay na siya sulod sa upat ka adlaw nagkumpirma ug naglig-on dili lamang sa hugot nga pagtuo ni Marta ug Maria diha sa Manluluwas apan usab sa hugot nga pagtuo sa Iyang mga disipulo?

Tubaga ang usa o duha ka mga pangutana diha sa imong scripture study journal:
1. Kanus-a ka mipili nga mogamit og hugot nga pagtuo diha ni Jesukristo panahon sa usa ka pagsulay ug ang imong hugot nga pagtuo gikumpirmar o nalig-on isip resulta?
2. Unsay imong buhaton aron sa pagtabang kanimo nga mopili sa paggamit sa hugot nga pagtuo diha ni Jesukristo panahon sa mga pagsulay nga imong gisinati o nga imo pang masinati?

Juan 11:47–57

Ang mga sacerdote nga punoan ug ang mga Pariseo nagsabut sa pagpatay kang Jesus

Ang pagbuhi kang Lazaro gikan sa kamatayon ebidensya nga si Jesus adunay gahum batok sa kamatayon. Basaha ang Juan 11:47–48, nga mangita kon unsay reaksyon sa mga sacerdote nga punoan ug mga Pariseo sa mga report nga si Jesus nagbuhi ni Lazaro gikan sa mga patay.

Sumala sa narekord sa Juan 11:49–57, si Caifas, ang labawng sacerdote, misuporta nga ipapatay si Jesus aron kapugngan ang mga taga-Roma nga laglagon ang ilang “dapit ug … nasud” (Juan 11:48). “Tungod sa panapi sa mga pari ug mga kadautan” (2 Nephi 10:5), ang mga lider nga Judeo dili gusto nga mawad-an sa ilang impluwensyado nga mga posisyon sa ilang nasud. Sila determinado nga ipapatay si Jesus, ug sila misugo nga kadtong nasayud sa Iyang nahimutangan mopahibalo kanila aron Siya ipadakop.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Juan 11 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: