Unit 30: Day 1

2 Pedro

Pasiuna

Giawhag ni Apostol Pedro ang mga Santos nga palamboon ang ilang kahibalo mahitungod ni Jesukristo pinaagi sa pagtinguha nga mahimong sama Kaniya. Mipasidaan usab si Pedro nga ang mini nga mga propeta ug mga magtutudlo modala sa mga tawo sa sayop nga dalan. Iyang gipanagna nga sa katapusang mga adlaw, ang mga dautan mobiay-biay sa mga matarung gumikan sa pagtuo nga si Jesukristo mobalik. Giawhag ni Pedro ang mga Santos sa pag-andam nga makugihon alang sa Ikaduhang Pag-anhi sa Manluluwas.

2 Pedro 1:1–11

Gitudlo ni Pedro kon unsaon sa pag-ambit ang diosnong kinaiyahan ni Jesukristo

Hunahunaa ang mga kinaiya o mga kalidad nga imong nagustohan sa usa ka sakop sa pamilya o higala. Mituo ka ba nga ikaw makapalambo og ingon niana nga maayong mga hiyas o kalidad? Kon ikaw usa ka batan-ong babaye, hunahunaa ang tema sa Young Women, nga nag-ingon nga: “Kita mga anak nga babaye sa atong Langitnong Amahan, kinsa nahigugma kanato, ug kita nahigugma Kaniya.” Ikonsiderar ang mga hiyas nga anaa niini nga tema, labaw na ang diosnong kinaiya.

Bisan batan-on ka man nga babaye o batan-ong lalaki, unsay ipasabut sa “diosnong kinaiya” diha kanimo?

Gihimo ni Apostol Pedro kini nga sulat para sa mga miyembro sa Simbahan kinsa nakabaton og pagtuo kang Jesukristo. Sigun sa narekord sa 2 Pedro 1:1–4, iya silang gitudloan nga sila mamahimong “mag-aambit sa diosnong kinaiya” (bersikulo 4). Ang mga pulong nga “diosnong kinaiya” nag-refer sa mga kinaiya sa Langitnong Amahan ug ni Jesukristo.

Basaha ang 2 Pedro 1:5–7, nga mangita og pipila ka mga hiyas ug diosnong kinaiya sa Amahan ug sa Anak. Sa tsart diha sa ubos, ilista ang mga hiyas nga imong makit-an diha sa tudling. Dayon, sa sukod nga 1 ngadto sa 10, timbang-timbanga sa imong hunahuna kon unsa ka kakugihan sa imong pagkab-ot niining diosnong mga kinaiya sa imong kinabuhi (1 = Wala maningkamot nga makab-ot; 10 = Kugihan nga naningkamot sa pagkab-ot). Ang unang diosnong kinaiya nakalista na. Ang pulong nga pagpugong sa kaugalingon nga naa sa bersikulo 6 nagpasabut nga pagkontrolar sa kaugalingon.

Diosnong mga Hiyas
Hugot nga Pagtuo	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10
	1 2 3 4 5 6 7 8 9 10

Basaha ang 2 Pedro 1:8–11, nga mangita kon unsa nga mga panalangin ang moabut ngadto sa mga kugihang nagpalambo og diosnong mga hiyas sa Langitnong Amahan ug ni Jesukristo. Ang mga pulong nga “masiguro ang inyong pagkatinawag ug pagkapinili” diha sa bersikulo 10 nagpasabut nga samtang nia ka sa mortalidad madawat nimo ang kasiguroan o saad sa Dios nga madawat nimo ang kinabuhing dayon; gi-refer kini ni Pablo isip “nahimatud-an ang pulong sa propesiya” (2 Pedro 1:19).

Gitudlo ni Propeta Joseph Smith nga ang pagkatinawag ug pagkapinili masiguro human ang tawo mapamatud-ang nagmatinud-anon sa Ginoo: “Human ang usa ka tawo may hugot na nga pagtuo kang Kristo, maghinulsol sa iyang mga sala, ug mabunyagan alang sa kapasayloan sa iyang mga sala ug makadawat sa Espiritu Santo, (pinaagi sa pagpatong sa mga kamot), nga mao ang unang Maghuhupay, dayon magpadayon sa kamapainubsanon sa kaugalingon atubangan sa Dios, sa kagutom ug kauhaw alang sa pagkamatarung, ug nagsunod sa matag pulong sa Dios, ug ang Ginoo sa dili madugay moingon ngadto kaniya, Anak, ikaw pagahimayaon. Kon siya napamatud-an na gayud sa Ginoo, ug nakita nga ang tawo determinado gayud sa pagserbisyo Kaniya bisan unsay mahitabo, dayon ang tawo makakaplag nga masiguro ang iyang tawag ug ang iyang pagkapili” (sa History of the Church, 3:380).

2 Pedro 1:12–21

Gipaambit ni Pedro ang iyang pagsaksi kang Jesukristo ug gitudlo ang mahitungod sa kasulatan

Ngano kaha nga i-kwestyon man sa ubang tawo ang edad sa pipila ka mga propeta ug mga apostoles? Unsaon man nimo sa pagtubag ang usa ka tawo kinsa moingon nga ang mga propeta ug mga apostoles tigulang ra kaayo nga mahimong epektibong mga lider? Samtang padayon nimong tun-an ang 2 Pedro 1, pangitaa ang kamaturoan mahitungod sa mga propeta ug mga apostoles nga mas importante kay sa ilang pangidaron.

Sigun sa narekord sa 2 Pedro 1:12–19, si Apostol Pedro nahibalo nga hapit na ang iyang kamatayon, ug mao nga iyang gipaambit ang iyang pagkasaksi ni Jesukristo. Sa iyang pagpamatuod gihisgutan niya ang “labi pa gayud diay nga nahimatud-an ang pulong sa propesiya” (2 Pedro 1:19). Kini nga “labi pa gayud diay nga nahimatud-an ang pulong sa propesiya” mas klaro nga gipasabut diha sa Doktrina ug mga Pakigsaad 131:5 nga mao ang kahibalo nga madawat sa tawo niining kinabuhia pinaagi sa pagpadayag nga siya “nabugkos ngadto sa kinabuhi nga dayon.” Nagpasabut usab kini ngadto sa “[paghimo] nga masiguro ang inyong pagkatinawag ug pagkapinili” (2 Pedro 1:10), nga imong gitun-an diha sa unang bahin sa 2 Pedro 1.

Basaha ang 2 Pedro 1:20–21, nga mangita kon unsay gitudlo ni Pedro mahitungod sa tahas sa mga balaang tawo sa Dios,” o mga propeta. Hinumdumi nga sa Joseph Smith Translation sa, 2 Pedro 1:20 mabasa nga, “Kinahanglan inyong mahibaloan kini, una sa tanan, nga walay propesiya diha sa mga kasulatan ang ihatag sa kaugalingong pagbuot sa tawo.”

Base sa gitudlo ni Pedro, atong maila ang mosunod nga kamatuoran nga: Ang mga propeta makadawat og kasulatan pinaagi sa Espiritu Santo. (Mahimo nimong isulat kini o butangan og timaan diha sa imong mga kasulatan.) Ang mga kasulatan mao ang “mga pulong, gisulat ug gipamulong” (Giya ngadto sa mga Kasulatan, “Kasulatan, Mga,” scriptures.lds.org; tan-awa usab sa D&P 68:2–4).

Ang ubang kasulatan gilakip na [canonized] sa sumbanan nga mga kasulatan. Ang kanon [canon] mao ang “usa nga giila, awtorisado nga koleksyon sa sagradong mga basahon. Diha sa Ang Simbahan ni Jesukristo sa mga Santos sa Ulahing mga Adlaw, ang kanonikal nga mga basahon gitawag og sumbanan nga mga kasulatan ug naglakip sa Daan ug Bag-ong Tugon, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon” (Giya ngadto sa mga Kasulatan, “Kanon,” scriptures.lds.org).

Samtang basahon nimo ang mosunod nga pagpamatuod ni Elder Dallin H. Oaks sa Korum sa Napulog Duha ka mga Apostoles pangitaa ang iyang pagsaksi nga ang propeta padayon nga makadawat og mga kasulatan: “Ang linya sa priesthood mao ang agianan diin ang Dios nakigsulti sa Iyang mga anak pinaagi sa mga kasulatan sa nanglabay nga mga panahon. Ug niini nga linya Siya karon nakigsulti pinaagi sa mga pagtulun-an ug tambag sa buhi nga mga propeta ug mga apostoles ug ubang dinasig nga mga lider” (“Duha ka Linya sa Komunikasyon,” Ensign o Liahona, Nob. 2010, 84).

Ikonsiderar ang kaimportante sa pagkahibalo nga ang Dios migamit ug gani hangtud karon migamit pa gihapon og mga propeta aron mahatag ang kasulatan ngadto sa Iyang mga anak.

1. Tubaga ang mosunod nga mga pangutana diha sa imong scripture study journal:

   1. Unsa ang pipila ka mga tudling sa kasulatan, nga gikan sa mga propeta sa karaan o gikan sa mga propeta karon, nga nakaimpluwensya sa imong kinabuhi?

   2. Sa unsa nga paagi ikaw napanalanginan pinaagi niana nga mga kasulatan?

Pamalandungi pag-usab ang pagpamatuod ni Elder Oaks ug bantayi ang oportunidad sa umaabut nga mga adlaw sa pagpamatuod ngadto sa uban, sumala sa isugo sa Espiritu, mahitungod sa reyalidad sa mga propeta ug sa kaimportante sa pagdawat ug pagtuon sa kasulatan.

2 Pedro 2

Mipasidaan si Pedro mahitungod sa pagkalingla sa mini nga mga magtutudlo

Ngano kaha nga pilion man sa mga tawo ang pagpakasala bisan og nahibalo sila nga sayop ang ilang gibuhat?

Sa 2 Pedro 2 atong mabasa nga si Apostol Pedro mipasidaan sa mga Santos mahitungod sa mga tawo nga nagtinguha sa paglingla kanila. Samtang imong tun-an ang 2 Pedro 2, pangita og mga kamatuoran nga makatabang nimo sa pag-ila ug paglikay sa mga pagpanglingla nga mosangput sa pagpakasala.

Basaha ang 2 Pedro 2:1–3, nga mangita sa mga gipasidaan ni Pedro mahitungod niadtong mosulay sa paglingla sa mga Santos. “Makapadaut nga mga herejia [tumo-tumo]” (2 Pedro 2:1) mga sayop ug makalaglag nga mga pagtulun-an.

Usa ka kamatuoran nga atong makat-unan gikan niini nga mga bersikulo mao nga ang mini nga mga magtutudlo magtinguha sa paglingla kanato.

Basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles, nga mangita kon unsay gitudlo karon sa mini nga mga magtutudlo aron sa paglingla kanato:

“Ang mini nga mga propeta ug mini nga mga magtutudlo mao kadtong mamahayag nga si Propeta Joseph Smith usa ka bakakon ug tiglingla; kwestyunon nila ang Unang Panan-awon isip tinuod nga kasinatian. Ipamahayag nila nga ang Basahon ni Mormon ug ubang kanonikal [sumbanang kasulatan] dili karaang mga rekord sa kasulatan. Ila usab nga sulayan sa paghatag og laing depinisyon ang kinaiyahan sa Dios nga Kapangulohan, ug ilang ilimud nga ang Dios mihatag og padayong pagpadayag karon ngadto sa Iyang gi-orden ug gipaluyohan nga mga propeta.

“Ang mini nga mga propeta ug mini nga mga magtutudlo mao kadtong mga mapahitas-on nga moimbento og bag-ong mga interpretasyon sa mga kasulatan aron ipakita nga kining sagrado nga pulong dili mabasa isip mga pulong sa Dios ngadto sa Iyang mga anak apan mga sulti lamang gikan sa dili dinasig nga mga tawo, mag-agad lamang sa kaugalingon nilang paghukom ug pagpabor sa ilang kultura. Dayon, makiglantugi sila, nga ang mga kasulatan nagkinahanglan og bag-ong interpretasyon ug nga sila lahi sa ilang pagkakwalipikado nga motanyag og interpretasyon.

“Tingali ang labawng makadaut, gilimud nila ang Pagkabanhaw ni Kristo ug Pag-ula, makiglantugi nga walay Dios nga makaluwas kanato. Isalikway nila ang panginahanglan sa usa ka Manluluwas. Sa ato pa, kini sila nga tigbutang-butang mosulay sa paghubad sa mga doktrina sa Simbahan aron mohaum sa kaugalingon nilang mga hunahuna, ug sa ngadto-ngadto ilimud si Kristo ug ang Iyang mesiyanikanhong tahas.

“Ang mini nga mga propeta ug mini nga mga magtutudlo mao usab kadtong mosulay sa pag-usab sa hinatag sa Dios nga mga doktrina nga gibase sa kasulatan nga nanalipud sa kabalaan sa kaminyoon, sa balaang kinaiyahan sa pamilya, ug sa mahinungdanong doktrina sa personal nga moralidad. Suportahan nila ang pag-usab sa kahulugan sa moralidad aron mahatagan og kaangayan ang pakighilawas, pagpanapaw, ug homosexual nga mga relasyon. Ang uban dayag kaayong mosuporta sa paghimong legal sa gitawag og kaminyoon sa managsama og sekso” (“Beware of False Prophets and False Teachers,” Ensign, Nob. 1999, 63–64).

Hunahunaa ang mga higayon dihang nakasugat ka og mga pagtulun-an o mga mensahe gikan sa mini nga mga magtutudlo. Nganong makatabang man nga makabantay ka sa mga mensahe ug mga pagtulun-an sa mini nga mga magtutudlo?

Sa 2 Pedro 2:4–17 mabasa nato ang pipila ka mga ehemplo kon unsay nahitabo sa mga tawo nga misunod sa mini nga mga magtutudlo kaniadto, lakip niadtong misunod ni Satanas sa premortal nga kinabuhi, sa mga tawo nga nabuhi sa panahon ni Noe, ug sa mga tawo sa Sodom ug Gomorrah. Si Pedro mihatag usab og mga ehemplo sa mga tawo nga wala naimpluwensyahan sa mini nga mga magtutudlo, sama ni Noe ug ni Lot. Gihulagway dayon ni Pedro ang dautang mga kinaiya sa mini nga mga magtutudlo.

Unsaon sa mangingisda sa pagkakuha og isda?

Ang pamaagi sa mangingisda sa pagkuha og isda sama ra niadtong mini nga magtutudlo. Basaha ang 2 Pedro 2:18–19, nga mangita kon sa unsang paagi ang mini nga mga magtutudlo moagni sa mga Santos sa pagsunod sa ilang mga pagtulun-an.

Sa unsang paagi ang mga pagtulun-an sa mini nga mga propeta ug mga magtutudlo susama sa pangkubit sa isda o paon sa pasol?

Sa 2 Pedro 2:19 atong makat-unan nga ang mini nga mga magtutudlo mosaad og kagawasan. Sa laing pagkasulti, nagtudlo sila nga ang pagpakasala, kay sa pagsunod sa mga sugo, maghatag og mas dako nga kagawasan.

Makat-unan nato gikan niini nga mga bersikulo nga ang mini nga mga magtutudlo nagtinguha sa paglingla kanato sa pagpatuo nga ang pagpakasala maghatag og mas dakong kagawasan.

Basaha ang bersikulo 19 pag-usab, nga mangita kon unsay nahitabo sa mga tawo nga nabuntog sa sayop nga mga pagtulun-an ug sa sala.

2. Sa imong scripture study journal, pagsulat og duha o tulo ka mga example sa sayop nga mga pagtulun-an nga daw nagpasiugda og kagawasan apan sa pagkatinuod mosangput sa pagkabihag.

Basaha ang 2 Pedro 2:20–22, nga mangita kon unsay gitudlo ni Pedro mahitungod niadtong mobalik sa pagpakasala human makaikyas gikan niini.

3. Tubaga ang mosunod nga mga pangutana diha sa imong scripture study journal:

   1. Ngano kaha nga kadtong mga “makaikyas gikan sa mga kahugawan sa kalibutan pinaagi sa ilang kahibalo sa atong Ginoo ug Manluluwas nga si Jesukristo” (2 Peter 2:20) matintal man nga mobalik sa masalaypon nilang mga paagi?

   2. Unsa nga tambag ang imong ihatag aron makatabang og tawo nga magpabiling matinud-anon kang Jesukristo ug sa Iyang ebanghelyo kay sa mobalik sa kanhi niyang mga sala?

2 Pedro 3

Nagpamatuod si Pedro sa Ikaduhang Pag-anhi ni Jesukristo

Dihang gitapos ni Apostol Pedro kini nga sulat, tingali katapusan niyang sinulat nga mga pagpamatuod, gipahinumduman niya ang mga Santos bahin sa Ikaduhang Pag-anhi ni Jesukristo ug gitudloan sila unsaon sa pagpangandam alang niini. Sigun sa narekord sa 2 Peter 3:1–9, gitudlo niya nga sa katapusang mga adlaw ang ubang mga tawo motamay ug mobiay-biay niadtong motuo sa Ikaduhang Pag-anhi.

Basaha ang 2 Pedro 3:10–14, nga mangita kon unsay gitudlo ni Pedro mahitungod sa Ikaduhang Pag-anhi. Ang pulong nga magkinabuhi sa bersikulo 11 nagpasabut sa binuhatan o kinaiya, ug ang “magpadali sa” diha sa bersikulo 12 nagpasabut nga magtinguha gayud sa usa ka butang.

Unsa nga tambag ang gihatag ni Pedro sa mga Santos aron maandam sa Ikaduhang Pag-anhi?

Ang mga pulong nga “wala untay buling o hugaw” sa bersikulo 14 nagpasabut sa pagkalimpyo gikan sa pagpakasala. Kadtong nalimpyuhan sa sala nakig-uli na sa Dios, o napahiuli ang panag-uyon ug paghiusa uban Kaniya, ug makaplagan nga malinawon uban sa Manluluwas sa Iyang pag-anhi. Gikan sa mga pagtulun-an ni Pedro atong makat-unan nga maandam kita sa Ikaduhang Pag-anhi sa Manluluwas pinaagi sa pagpakabuhi nga diosnon ug matinguhaong maghulat sa Iyang Pag-anhi. Ikonsiderar ang pagsulat o pagtimaan niini nga baruganan diha sa imong mga kasulatan tupad sa 2 Pedro 3:11–14.

Unsa ang ubang mga butang nga atong mahimo sa pagpakabuhi nga diosnon samtang matinguhaon kitang maghulat sa Ikaduhang Pag-anhi?

Sa 2 Pedro 3:15–18 atong mabasa nga giila ni Pedro nga ang uban sa mga pagtulun-an ni Pablo lisud sabton. Mipasidaan usab siya mahitungod sa pagkahulog ngadto sa pagkadautan. Gidapit niya ang mga Santos nga “managtubo hinoon kamo sa grasya ug sa kahibalo sa atong Ginoo” (2 Pedro 3:18).

4. Isulat ang mosunod sa ubos sa mga assignment karong adlawa diha sa imong scripture study journall:

   Akong natun-an ang 2 Pedro ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: