Mateo 13: 1–23

Pasiuna

Samtang ang Manluluwas diha sa Galilea, usa ka dakong pundok sa katawhan miduol Kaniya. Gitudloan Niya ang katawhan gamit ang mga sambingay, nagsugod sa sambingay sa magpupugas.

Mateo 13:1–17

Ang Manluluwas nagtudlo sa sambingay sa magpupugas

Paghunahuna mahitungod sa usa ka tanaman o tanom diha sa kaang. Unsa ang pipila ka mga kinaiya sa tambok nga yuta? Unsa ang pipila ka mga kinaiya sa yuta nga dili tambok?

Diha sa Mateo 13:1–23, atong mabasa nga gikumparar sa Manluluwas ang nagkalain-laing matang sa yuta ngadto sa mga kasingkasing sa katawhan. Samtang imong tun-an kini nga mga bersikulo karon, ikonsiderar kon hain nga matang sa yuta ang labing sama sa kahimtang sa imong kasingkasing karon.

Basaha ang Mateo 13:1-3, nga mangita kon giunsa pagtudlo ni Jesus ang pundok sa katawhan sa Galilea.

Giunsa pagtudlo ni Jesus ang pundok sa katawhan?

Unsa ang sambingay? (Tan-awa sa Giya ngadto sa mga Kasulatan, “Sambingay.”)

Ang sambingay maoy usa ka “ yano nga sugilanon nga gigamit aron sa paghulagway ug pagtudlo og usa ka espirituhanong kamatuoran o baruganan. Ang usa ka sambingay gipasikad diha sa pagtandi og ordinaryo nga butang o hitabo ngadto sa usa ka kamatuoran” (Giya ngadto sa mga Kasulatan, “Sambingay,” scriptures.lds.org).

Sumala sa Mateo 13:3, mahitungod sa unsa ang sambingay sa Manluluwas?

Ang pagpugas nagpasabut sa pagsabwag o pagtanom og liso. Basaha ang Mateo 13:4–9, nga mangita sa upat ka matang sa yuta nga ang mga liso sa magpupugas nahulog.

langgam nga nagtuka sa liso, binhi diha sa mga kabatoan, tanom taliwala sa kasampinitan, tanom

Unsa nga mga matang sa yuta nahulog ang mga liso sa magpupugas?

Diha sa imong scripture study journal, pagdrawing og mga hulagway nga nagrepresentar sa upat ka matang sa yuta. Samtang ikaw nagkat-on mahitungod sa interpretasyon sa sambingay, dungagi og mga ngalan ang imong mga drawing.

Ang daplin sa dalan maoy agianan duol sa mga uma, ug kini mahimong gahi samtang ang mga tawo naglakaw diha niini. Ang kagahi sa daplin sa dalan nagpugong sa mga liso nga mogamut sa yuta.
Ang mga kabatoan mao ang batoon nga mga dapit nga natabunan og nipis nga yuta. Bisan tuod og ang mga liso makatubo og mabaw nga mga gamut, ang bato nga anaa ubos lang gyud sa ibabaw nagpugong sa mga gamut nga moadto og mas lawom.
Ang yuta nga may mga sampinit maoy tambok nga yuta, apan ang mga sampinit mosugpo sa mga tanom pinaagi sa paghikaw og kahayag, tubig, ug sa gikinahanglan nga mga pagpatambok.
Ang maayong yuta maoy tambok nga yuta nga may igong giladmon alang sa himsog nga mga gamut.

Ang Mateo 13:10–11 nagrekord nga ang mga disipulo sa Manluluwas nangutana Kaniya nganong Siya nagtudlo pinaagi sa mga sambingay. Mipasabut Siya nga ang mga sambingay mipadayag sa mga misteryo o mga kamatuoran sa gingharian sa langit ngadto niadtong kinsa andam sa pagdawat niini, samtang nagtago sa kahulugan gikan niadtong kinsa dili andam sa espirituhanong paagi (tan-awa sa New Testament Student Manual [Manwal sa Church Educational System, 2014], 45).

Basaha ang Mateo 13:14–15, nga mangita sa unsay nagpugong sa katawhan gikan sa pagsabut sa mga kamatuoran nga gitudlo sa Manluluwas.

Unsa ang gisulti ni Jesus nga mipugong sa katawhan sa pagkakita, pagkadungog, ug pagsabut sa mga kamatuoran nga Iyang gitudlo?

Si Propeta Joseph Smith miingon, “Ang silot nga gihatag sa panon nga wala modawat sa Iyang gipanulti, tungod kadto kay sila dili andam nga motan-aw uban sa ilang mga mata, ug mamati uban sa ilang mga dalunggan; dili tungod kay sila dili makahimo, ug walay kahigayunan nga motan-aw ug mamati, apan tungod kay ang ilang mga kasingkasing puno sa kadautan ug pagkasalawayon.” Siya usab mitudlo, “Ang mismong rason nganong ang mga panon, o ang kalibutan, ingon sa pag-ila kanila sa Manluluwas, wala modawat sa pagpasabut sa Iyang mga sambingay, tungod sa ilang ka walay pagtuo.” (Mga Pagtulun-an sa mga Presidente sa Simbahan: Joseph Smith [2007], 358, 361).

Ang mga pulong nga “nahabol ang kasingkasing niining mga tawhana” diha sa bersikulo 15 nagpasabut nga ang mga kasingkasing sa katawhan nahimong tig-a ug dili mobati. Sumala sa bersikulo 15, unsa nga mga panalangin ang mawala nato kon kita magpatig-a sa atong mga kasingkasing?

Gikan niini nga mga bersikulo atong makat-unan nga kon kita magpatig-a sa atong mga kasingkasing, niana kita dili makasabut sa pulong sa Dios o makabig ngadto sa Manluluwas ug mamaayo. Isulat kini nga baruganan duol sa imong drowing sa daplin sa dalan nga yuta diha sa imong scripture study journal.

Ikonsiderar unsa ang gipasabut nga makabig ngadto sa Manluluwas ug mamaayo.

Kon ikaw makabig ikaw mausab ug maputli pinaagi sa Iyang Pag-ula aron ang imong mga tinuohan, kasingkasing, ug kinabuhi nahiuyon sa kabubut-on sa Langitnong Amahan ug ikaw maluwas gikan sa palas-anon sa sala.

Sa Mateo 13:16–17, gisultihan ni Jesus ang Iyang mga disipulo nga sila napanalanginan tungod kay aduna silay mata sa pagtan-aw ug mga dalunggan sa pagpamati.

Mateo 13:18–23

Ang Manluluwas naghatag sa interpretasyon sa sambingay sa magpupugas

Tan-awa pag-usab ang imong drowing sa daplin sa dalan nga yuta. Basaha ang Mateo 13:18–19, nga mangita sa unsay gikumparar sa Manluluwas ngadto sa liso, sa daplin sa dalan, ug sa mga langgam nga gihisgutan diha sa Mateo 13:4. Dayon butangi og ngalan ang imong drowing sumala sa interpretasyon sa Manluluwas. Diha sa bersikulo 19, ang mga pulong nga “dili siya mosabut niini” mahimong nagpasabut og resulta sa usa ka tig-a nga kasingkasing; ug “ang dautan” makarepresentar ni Satanas ug sa iyang mga sulugoon.

Pamalandungi kon sa unsang paagi ang mga pagtulun-an sa Manluluwas mahitungod sa daplin sa dalan mahimong makatabang kanimo sa pagsabut og maayo sa baruganan nga kon kita magpatig-a sa atong mga kasingkasing, niana kita dili makasabut sa pulong sa Dios o makabig ngadto sa Manluluwas ug mamaayo.

Tan-awa ang imong drowing sa batoong yuta diha sa imong scripture study journal. Basaha ang Mateo 13:20–21 ug Lucas 8:13, nga mangita sa interpretasyon sa Manluluwas kabahin sa batoong mga dapit. Ang pulong nga anon diha sa bersikulo 20 nagpasabut og diha-diha o dili madugay.

Niini nga mga bersikulo gitudlo ni Jesus nga ang mga tanom nga mitubo diha sa kabatoan nga mga dapit nagrepresentar niadtong kinsa adunay pagpamatuod nga wala mogamot og lawom. Butangi og ngalan ang imong drowing sa mga tanom diha sa kabatoan nga mga dapit Pagpamatuod nga wala mogamot og lawom.

Sumala sa Mateo 13:20–21 ug sa Lucas 8:13, unsa ang girepresentar sa init sa adlaw? Sa ibabaw sa imong drowing sa mga tanom nga may mabaw nga mga gamot isulat unsay girepresentar sa init sa adlaw.

Isulat ang mosunod nga baruganan sunod sa imong drowing sa kabatoan nga yuta: Gawas kon kita maninguha sa pagpalawom sa atong mga pagpamatuod, kita magkulang sa kalig-on nga gikinahanglan sa paglahutay og mga kasakit, mga pagpanggukod, ug mga tintasyon.

Tan-awa ang imong drowing sa sampiniton nga yuta. Basaha ang Mateo 13:22, nga mangita sa unsay girepresentar sa mga sampinit. Butangi og ngalan ang imong drowing sa unsay girepresentar sa mga sampinit.

Unsa ang pipila ka mga ehemplo sa mga kabalaka sa kalibutan nga “magalumos sa pulong”?

Pagkakalibutanon, kahakog, ug temporal nga mga kalinga maoy pipila ka mga ehemplo sa mga kabalaka nga “magalumos sa pulong” ug modala kanato palayo gikan sa Dios. Sunod sa imong drowing sa sampiniton nga yuta, isulat ang mosunod nga baruganan: Ang mga kabalaka sa kalibutan makalumos sa atong hugot nga pagtuo ug pagpamatuod sa pulong sa Dios.

Tan-awa ang imong drowing sa maayong yuta. Basaha ang Mateo 13:23 .

Tan-awa ang Hubad ni Joseph Smith nagtabang kanato sa pagsabut nga ang mga tanom diha sa maayong yuta milahutay. Timan-i usab nga ang mga tanom diha sa maayong yuta nabuwad sa samang kainit sa adlaw (nagrepresentar sa mga kasakit, mga panggukod, ug mga tintasyon) sama sa nalaya nga mga tanom diha sa kabatoan nga yuta. Ikonsiderar kon unsaon nimo sa pagsummarize unsay girepresentar sa maayong yuta, ug butangi og ngalan ang imong drowing.

Pinasikad sa unsay imong nakat-unan diha sa Mateo 13:15, unsa ang girepresentar sa prutas nga gihisgutan diha sa bersikulo 23?

Gikan sa mga pagtulun-an sa Manluluwas mahitungod sa maayong yuta, atong nakat-unan ang baruganan nga samtang kita nagdawat sa pulong sa Dios, nagsabut niini, ug naglahutay sa mga kasakit, mga pagpanggukod, ug mga tintasyon, kita mahimong makabig ngadto sa Manluluwas. Isulat kini nga baruganan sunod sa imong drowing sa maayong yuta.

Basaha ang mosunod nga sitwasyon: Pagdrowing og linya gikan sa kada matang sa yuta ngadto sa sitwasyon nga labing maayong nagpakita sa baruganan nga gitudlo ug girepresentar niana nga yuta diha sa sambingay sa magpupugas.

Daplin sa dalan	Usa ka batan-ong babaye kanhiay gustong mosimba kada Dominggo. Apan, samtang nagtubo siya ang pipila sa iyang mga higala misugod sa pagbiay-biay kaniya tungod sa iyang mga sumbanan. Misugod siya sa paglapas sa pipila ka mga sugo. Wala na siya mobati og kaharuhay diha sa simbahan ug nawad-an sa tinguha sa pagsimba.
Kabatoan nga yuta	Usa ka batan-ong babaye nagsimba ug sa hilum nag-ampo nga siya makadawat sa mga pag-aghat sa Espiritu Santo. Kon siya makadawat og mga pag-aghat lihokon niya kini. Gibati niya ang kasuod ngadto sa Ginoo ug mapasalamaton alang sa mga paagi nga siya gidasig sa pagbuntog og tintasyon.
Sampiniton nga yuta	Usa ka batan-ong lalaki kanunay nga nagsimba, apan tagsa rang moapil ug dili moabli sa iyang kasingkasing ngadto sa impluwensya sa Espiritu Santo. Kanunay siyang nagbasa og mga impormasyon diha sa mga website nga naghagit sa importanting mga doktrina sa Simbahan, ug nagduda kon siya nagtuo ba gihapon sa katinuod sa ebanghelyo.
Maayong yuta	Usa ka batan-ong lalaki naggahin kadaghanan sa iyang panahon sa pagtuon aron siya madawat ngadto sa usa ka bantugan nga unibersidad. Kon wala siya magtuon, nagkapuliki siya og trabaho. Nagsulti siya sa iyang kaugalingon nga siya walay panahon sa pagbasa sa mga kasulatan, pag-ampo ug pagsimba.

Importante kining mahinumduman nga ang mga kasingkasing, sama sa yuta mausab ug mapanindot.

Tubaga ang mosunod nga mga pangutana diha sa imong scripture study journal:
1. Unsa ang himoon sa pagbuhat o pag-amuma sa kada matang sa yuta nga usa ka dapit sa pagpatubo og himsog, mabungahong mga tanom?
2. Unsaon nato pagpahisama ang pag-usbaw sa kada yuta ngadto sa unsay atong mabuhat sa pag-usab sa atong mga kasingkasing nga mahimong mas andam modawat sa pulong sa Dios?
3. Sa unsa nga paagi nga ang pagpaninguha sa pagdawat ug pagsabut sa pulong sa Dios mitabang kanimo nga mahimong mas makabig og maayo ngadto sa Manluluwas?

Pamalandungi kon hain sa yuta ang labing maayo nga nagrepresentar sa kahimtang sa imong kasingkasing karon.

Diha sa imong scripture study journal, pagsulat og usa ka tumong kalabut sa unsay imong buhaton nga mas makadawat og makasabut sa pulong sa Dios ug makalahutay sa mga kasakit, pagpanggukod, ug mga tintasyon.
Isulat ang mosunod diha ubos sa mga assignment karong adlawa sa imong scripture study journal:

Akong natun-an ang Mateo 13:1–23 ug nakompleto kini nga leksyon sa (petsa).

Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: