Unit 28: Day 2

Mga Hebreohanon 7–10

Pasiuna

Gitudlo ni Apostol Pablo nga si Jesukristo mao ang Tigpataliwala sa “bag-ong pakigsaad uban sa kaliwatan ni Israel” (Mga Hebreohanon 8:8). Gipasabut niya nga ang sakripisyo sa Manluluwas mas labaw kay sa mga sakripisyo nga gipanghimo sa mga high priest o halangdon nga mga pari ubos sa balaod ni Moises. Gipasabut sab niya nga ang mga ordinansa ni Moises naghatag og tumong sa mga tawo ngadto sa Manluluwas ug sa Iyang Pag-ula.

Mga Hebreohanon 7–8

Gitudlo ni Pablo nga si Jesukristo ang Tigpataliwala sa bag-ong pakigsaad

Diha sa mga luna nga gihatag, ilha ang mga butang nga nagmugna sa matag anino.

Nganong nailhan man nimo kon unsang butanga ang gibasihan niini nga anino?

Ang Daang Tugon naghisgot bahin sa daghang mga seremonya ug mga ordinansa nga nagsimbolo ug naglarawan sa Manluluwas ug sa Iyang Pag-ula. Tungod kay si Pablo nahibalo nga ang Kristiyanong mga Judeo, o mga Hebreohanon, pamilyar niini nga mga seremonya ug mga ordinansa, iyang gi-refer kini sa iyang sulat dihang gitudloan niya ang mga Santos mahitungod ni Jesukristo.

Mga Simbolo sa Kasulatan

Ang Giya ngadto sa mga Kasulatan nag-ingon nga: “Ang mga kasulatan daghan kaayong simbolo ug pagpahayag gamit ang paghulagway. Ang mga seremonya ug mga ordinansa nagsimbolo sa ilang gibuhat, ug ang tanan nagpamatuod kang Jesukristo. … Ang tabernakulo nagsimbolo sa mahangturong mga butang (Heb. 8–10), sama sa tibuok balaod ni Moises, naglangkob sa mga matang ug mga larawan ni Kristo” (“Simbolo”). Ang pagsabut niini nga matang ug larawan makapalawom sa atong panabut ug gugma sa ebanghelyo ni Jesukristo.

Ang tanang kasulatan naglakip sa mga matang, larawan, simbolo, ug pagkasama kang Jesukristo. Ang mga matang, larawan, simbolo, ug pagkasama mga butang nga nagrepresentar sa mas dagkong mga reyalidad. Kadaghanan niini nga paghulagway gihimo pinaagi sa mga tawo, mga butang, panghitabo, ug mga sitwasyon.

Ang balaod ni Moises gihimo nga mahimong usa ka matang ug larawan ni Jesukristo, o simbolo nga naghimo sa mga Israelite nga magtumong ngadto kang Kristo ug sa Iyang maulaon nga sakripisyo (tan-awa sa 2 Nephi 11:4; Jacob 4:4–5). Gipasabut ni Apostol Pablo kon sa unsang paagi kini gihimo sa ubang mga bahin sa balaod. Gusto siyang motabang sa mga Santos nga mga Judeo nga magpabiling matinud-anon kang Jesukristo imbis mobalik sa pagsunod sa balaod ni Moises, sama sa gipangbuhat sa uban.

Imong nabasa sa Mga Hebreohanon 2:17 nga gi-refer ni Pablo si Jesukristo nga mao ang “maloluy-on ug kasaligang high priest o halangdon nga pari.” Sugod sa kapanahunan ni Moises hangtud sa panahon ni Jesukristo, ang high priest mao ang tigdumalang opisyal sa Aaronic Priesthood nga usahay tawagon nga Levitical Priesthood, nagpasabut sa awtoridad sa Aaronic Priesthood nga gihuptan sa mga sakop sa tribo ni Levi (tan-awa sa Giya ngadto sa mga Kasulatan, “Aaronic Priesthood”).

Gi-orden ni Moises si Aaron nga high priest o halangdon nga pari sa Aaronic Priesthood.

Basaha ang Mga Hebreohanon 7:1–4, nga mangita kon unsay gitudlo ni Pablo mahitungod ni Melchizedek. Basaha usab ang Hubad ni Joseph Smith, Mga Hebreohanon 7:3 (sa Giya ngadto sa mga Kasulatan), nga mangita sa katin-awan mahitungod sa gitudlo ni Pablo diha sa bersikulo 3.

Si Melchizedek mao ang “bantugan nga propeta ug lider nga nagpuyo sa tuig mga 2000 B.C. gitawag siya nga hari sa Salem (Jerusalem), hari sa kalinaw, ug ‘sacerdote [priest] sa labing Halangdon nga Dios’ [Mga Hebreohanon 7:1]” (Giya ngadto sa mga Kasulatan, “Melchizedek”; tan-awa usab sa Hubad ni Joseph Smith, Genesis 14:25–40 [sa Giya ngadto sa mga Kasulatan]). Nasabtan ni Pablo ang katalagsaon ni Melchizedek ug gigamit siya isip usa ka matang ug larawan ni Jesukristo.

Sa Mga Hebreohanon 7:15–17 nag-refer si Pablo ngadto sa panagna nga naa sa Daang Tugon mahitungod sa pag-abut sa usa ka pari “sumala sa laray ni Melquisedec” (Hebrews 7:17; tan-awa usab sa Salmo 110:4). Gitudlo ni Pablo nga gituman ni Jesukristo kini nga panagna.

“Usa sa mga katuyoan diha sa Mga Hebreohanon 7 mao ang pagpakita sa pagkalabaw sa Melchizedek Priesthood kay sa Levitical o Aaronic Priesthood ug sa nag-uban nga mga ordinansa niini. Kon ang pagkahingpit ug pagkahimaya makab-ot pinaagi sa Levitical Priesthood, nganong gikinahanglan man nga may pag-usab ngadto sa mas taas nga priesthood? Gitudlo ni Pablo nga ang pagkahingpit, o ‘ingon nga nahisama sa Anak sa Dios’ (Hebreohanon 7:3), wala moabut pinaagi sa Levitical Priesthood apan pinaagi ni Jesukristo ug sa Iyang han-ay sa Iyang priesthood. Si Jesukristo ‘natawo gikan kang Juda,’ dili kang Levi, mao nga gitudlo ni Pablo nga ang Iyang katungod sa priesthood dili magbase sa kaliwatan apan ‘sa gahum sa kinabuhi nga walay pagkalaglag’ (tan-awa sa Mga Hebreohanon 7:14–16). Isip mao ang premortal nga Jehovah, gilalang Niya ang kalibutan ug gidumala ang mga panghitabo sa Daang Tugon gamit ang sama nga gahum sa priesthood nga Iyang huptan atol sa Iyang mortal nga pangalagad” (New Testament Student Manual [manwal sa Church Educational System, 2014], 480).

Basaha ang Mga Hebreohanon 7:23–28, nga mangita sa mga kalainan tali ni Jesukristo ug sa Levitical nga mga high priest o halangdon nga pari kinsa nangalagad sa mga ordinansa sa Aaronic Priesthood ngadto sa katawhan. Ang mga pulong nga “nagatudlog mga tawo nga may kaluyahon ingon nga mga labawng sacerdote o halangdon nga pari” diha sa bersikulo 28 nagpasabut nga sila may mga kahuyang. Basaha usab ang Hubad ni Joseph Smith, Mga Hebreohanon 7:25–26 (sa Ang Giya ngadto sa mga Kasulatan).

Sa Mga Hebreohanon 7:25 ang mga pulong nga “sanglit buhi man siya sa kanunay aron sa pagpangamuyo alang kanila” nagpasabut nga ang misyon ni Jesus mao ang pagpangamuyo alang kanato aron matabangan kitang makabalik sa presensya sa Dios.

Unsaon man nimo sa pagpasabut ang mga kalainan tali ni Jesukristo ug sa Levitical nga halangdon nga mga pari?

Basaha ang Mga Hebreohanon 8:1–4, nga mangita sa gasa, o sakripisyo, nga gihalad ni Jesukristo. Timan-i nga ang Hubad ni Joseph Smith sa Mga Hebreohanon 8:4 mabasa nga, “Busa samtang dinhi Siya sa kalibutan, mihalad Siya nga isakripisyo ang kaugalingon niyang kinabuhi alang sa mga sala sa katawhan. Karon ang matag pari ubos sa balaod, kinahanglang mohalad og mga gasa, o mga sakripisyo, sumala sa balaod” (Hubad ni Joseph Smith, Mga Hebreohanon 8:4 [sa Mga Hebreohanon 8:4]).

Unsa nga kamatuoran ang atong makat-unan gikan sa Hubad ni Joseph Smith sa Mga Hebreohanon 8:4 mahitungod sa gibuhat ni Jesukristo kanato?

1. Pamalandungi kon unsay buot ipasabut sa maulaon nga sakripisyo ni Jesukristo diha nimo sa personal, ug kompletuha ang mosunod nga mga pamahayag diha sa imong scripture study journal. Ikonsiderar ang pagpangita og tukma nga panahon nga ikapakigbahin unsay imong gisulat ngadto sa usa ka sakop sa pamilya o higala.

   1. Mapasalamaton ko sa akong Manluluwas tungod kay …

   2. Nasayud ko nga ang akong Manluluwas nahigugma nako tungod kay …

   3. Napanalanginan ko pinaagi sa maulaon nga sakripisyo ni Jesukristo tungod kay …

Ang usa ka tigpataliwala mao ang moresolba sa mga kalainan tali sa mga tawo o grupo. Ang Pag-ula ni Jesukristo mopasig-uli sa tawhanong binuhat (tanan sila makasasala) sa Dios nga Amahan. Tungod sa Iyang sakripisyo, “ginapataliwad-an labi pa man ka maayo” ni Jesukristo (Mga Hebreohanon 8:6), ang pakigsaad nga gipamahayag sa Ginoo nga “igabutang ko ang [Iyang] mga sugo sulod sa ilang mga salabutan, ug igasulat ko kini diha sa ilang mga kasingkasing,” ug Siya “mahimong ilang Dios, ug sila mahimong [Iyang] katawhan” (Mga Hebreohanon 8:10). Kini nga pakigsaad, kon dawaton sa tawo, makatabang nga sila “makaila sa Ginoo” (Mga Hebreohanon 8:11) ug malimpyuhan sa “ilang kasal-anan ug kalapasan” (Mga Hebreohanon 8:12).

Mga Hebreohanon 9–10

Gipakita ni Pablo sa unsang paagi ang mga ordinansa sa panahon ni Moises nagtumong sa Pag-ula sa Manluluwas

Atong mabasa sa Mga Hebreohanon 9–10 nga si Apostol Pablo padayon nga mikumpara sa Levitical nga halangdong mga pari kang Jesukristo pinaagi sa paghisgot sa mga katungdanan nga gipanghimo sa halangdong mga pari sa Adlaw sa Pag-ula.

Kausa sa usa ka tuig sa balaang adlaw sa mga Judeo nga gitawag og Adlaw sa Pag-ula (gitawag usab og Yom Kippur), ang halangdon nga mga pari tugutan nga mosulod sa Dapit nga Labing Balaan (gitawag usab ug Balaan sa tanang Balaan o ang Dapit nga Labing Balaan) diha sa tabernakulo o, sa wala madugay, ang templo sa Jerusalem. Sa dili pa mosulod, ang halangdon nga pari o high priest mosakripisyo og toro nga baka isip usa ka buhat sa pag-ula “alang sa iyang kaugalingon ug sa iyang balay” ug dayon mosakripisyo og laki nga kanding isip usa ka buhat sa pag-ula “alang sa kongregasyon sa Israel.” Iyang isablig ang dugo sa hayop ngadto sa espesyal nga mga dapit ug sa piho nga mga butang diha sa Dapit nga Labing Balaan isip dugang nga buhat sa pag-ula. Dayon iyang “ikumpisal ang tanang sala sa katawhan sa Israel” ngadto sa laing laki nga kanding (gitawag og kanding nga kapasanginlan), nga dad-on ngadto sa kamingawan, magsimbolo sa pagkatangtang sa mga sala sa katawhan. Pagkahuman mag-ilis siya og sinina ug “ihalad ang halad nga sinunog nga duha ka laki nga karnero alang sa iyang kaugalingon ug sa iyang katawhan” (Giya ngadto sa mga Kasulatan, “Pagpuasa”; tan-awa usab sa Levitico 16).

Basaha ang Mga Hebreohanon 9:11–12, 24, 28 ug ang Mga Hebreohanon 10:1, 4, 10–12, nga mangita kon sa unsang paagi ang mga panghitabo sa Adlaw sa Pag-ula mga matang ug larawan sa maulaon nga sakripisyo ni Jesukristo.

Ang halangdon nga mga pari gitugutan nga makasulod sa Dapit nga Labing Balaan sa tabernakulo kausa sa usa ka tuig sa Adlaw sa Pag-ula. Unsa nga “dapit nga balaan” (Mga Hebreohanon 9:12) ang sudlan sa Manluluwas (ug sa tanang binuhat usab) tungod sa Iyang Pag-ula?

Unsa ang mahimo sa sakripisyo ni Jesukristo nga dili mahimo sa “dugo sa mga toro nga baka ug mga kanding” (Mga Hebreohanon 10:4)?

Bisan og ang dugo sa hayop sa aktwal dili makaula sa mga sala sa katawhan, ang Levite nga halangdon nga mga pari mihimo niining mga ordinansa sa pagpakita “og larawan sa maayong mga butang nga moabut” (Mga Hebreohanon 10:1), o pagtumong ngadto sa Pag-ula sa Manluluwas.

Basaha ang Mga Hebreohanon 10:17–20, nga mangita kon unsay nahimong posible tungod sa sakripisyo sa Manluluwas.

Sumala sa Mga Hebreohanon 10:19, makasulod kita sa “labing balaan” nga dapit, o sa presensya sa Dios sa celestial nga gingharian, tungod sa sakripisyo ni Kristo. Ang mga pulong nga “bag-o ug buhi nga agianan” diha sa Mga Hebreohanon 10:20 nagpasabut sa ebanghelyo ni Jesukristo, o sa plano diin kita mapasaylo ug mabalaan pinaagi sa Iyang Pag-ula ug sa ingon mahimong takus nga makabalik sa presensya sa Dios.

Basaha ang Mga Hebreohanon 10:22–24, nga mangita kon unsay angay natong buhaton aron makasulod sa celestial nga gingharian. Dayon kompletuha ang mosunod nga baruganan: Tungod sa Pag-ula ni Jesukristo, makasulod kita sa celestial nga gingharian kon .

Sa imong hunahuna unsay ipasabut sa “pangusgan ta pagkupot” (Mga Hebreohanon 10:23) ang atong pagtuo kang Jesukristo?

Basaha ang Mga Hebreohanon 10:35, nga mangita sa tambag nga gihatag ni Pablo nga makatabang nga kita makapangusog sa pagkupot sa atong pagtuo kang Jesukristo. Mahimo nimong markahan ang unsay imong makit-an.

Unsa sa imong hunahuna ang ipasabut sa “ayaw ninyo pagwad-a … ang inyong pagsalig”? (Mga Hebreohanon 10:35.).

Si Elder Jeffrey R. Holland sa Korum sa Napulog Duha ka mga Apostoles mipasabut kon unsay ipasabut sa “ayaw pagwad-a ang [atong] pagsalig”: “Sa Ulahing Adlaw nga Santos nga pagkasulti nagpasabut kana nga, Sigurado nga lisud kini—sa dili ka pa mamiyembro sa Simbahan, samtang naningkamot ka pa nga mamiyembro, ug human sa imong pagkamiyembro. Ingon ana gayud kana ug kanunay nga ingon niana, miingon si Pablo, apan ayaw pagsibug. Ayaw kataranta ug ayaw pag-atras. Ayaw wad-a ang imong pagsalig. Ayaw kalimti ang kausa imong gibati. Ayaw wad-a ang pagsalig nga kaniadto imong nasinati. Kana nga [kalig-on] mao ang nakaluwas ni Moises ug ni Joseph Smith dihang ang kaaway miharong kanila, ug mao kini ang moluwas kaninyo” (“Cast Not Away Therefore Your Confidence,” Ensign, Mar. 2000, 8).

2. Sa imong scripture study journal, isulat ang mahitungod sa tawo nga imong nailhan kinsa usa ka maayong ehemplo sa kusog nga pagkupot sa iyang pagtuo kang Jesukristo ug dili wad-on ang iyang pagsalig.

3. Hunahunaa ang imong komitment sa kusog nga pagkupot sa imong pagtuo kang Jesukristo. Sa imong scripture study journal, isulat kon unsaon nimo sa pagpatubo sa imong komitment ug abilidad sa paghimo niini.

4. Isulat ang mosunod diha sa ubos sa mga assignment karong adlawa diha sa imong scripture study journal:

   Akong natun-an ang Mga Hebreohanon 7–10 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: