Unit 16: Day 1

Juan 16

Pasiuna

Human sa Pagpalabay nga pagpangaon, si Jesukristo mipadayon sa pagtudlo sa Iyang mga disipulo. Iya silang giingnan nga Siya hapit na moadto sa Iyang Amahan ug nga ang Espiritu Santo, o ang Maghuhupay, moabut ug mogiya kanila ngadto sa kamatuoran. Si Jesus nanagna sa kaugalingon Niyang kamatayon ug Pagkabanhaw ug mipahayag nga gidaug na Niya ang kalibutan.

Juan 16:1–15

Si Jesus mipasabut kabahin sa tahas sa Espiritu Santo

Hunahunaa nga nagbiyahe ka sa unang higayon agi sa nindot apan makuyaw nga dapit. Usa ka suod ug sinati nga higala ang imong giya. Sa imong pag-abut sa usa ka lisud kaayo nga lugar sa imong biyahe, milingi ka ug nadiskubrehan nga wala na ang imong higala ug ikaw nag-inusara ug nawala. Unsa kaha ang imong mga kabalaka ug mga pagbati sa ingon niana nga sitwasyon?

Aduna ka bay susama nga mga kabalaka ug mga pagbati atol sa mga mahagiton ug magul-anong panahon sa imong kinabuhi? Samtang magtuon ka sa Juan 16, pangita og mga baruganan nga makatabang kanimo nga masayud unsaon sa pagpangita og giya ug kalinaw kon nagkinahanglan ka niini.

Human mogahin og hapit tulo ka tuig uban sa Iyang mga disipulo, si Jesukristo misulti kanila nga Siya kinahanglan nga mobiya (tan-awa sa Juan 14:28). Sa Juan 16:1–4 atong nakat-unan nga human mokaon si Jesus sa pagkaon sa Pagpalabay uban sa Iyang mga disipulo, Iya silang giingnan nga moabut ang panahon nga ang mga tawo masilag kanila ug nga kini nga mga tawo motuo nga naghimo sila og serbisyo sa Dios pinaagi sa pagpatay kanila.

Basaha ang Juan 16:5–6, nga mangita kon unsay gisulti ni Jesus sa Iyang mga disipulo ug unsay ilang gibati kabahin niini.

Basaha ang Juan 16:7, nga mangita kon kinsa ang gisaad ni Jesus nga ipadala human Siya mobiya.

Si Elder Bruce R. McConkie sa Korum sa Napulog Duha ka mga Apostoles mitudlo: “Samtang si Jesus personal pa nga nag-uban sa mga disipulo, wala silay hingpit nga panginahanglan alang sa kanunay nga pakig-uban sa Espiritu nga maoy mahitabo human mobiya si Jesus kanila” (Doctrinal New Testament Commentary, 3 vols. [1965–73], 1:753).

Sa Juan 16:8–12 si Jesus mipasabut nga usa sa mga tahas sa Espiritu Santo mao ang “[pagpaila] sa kalibutan mahitungod sa sala” (Juan 16:8). Basaha ang Juan 16:13, nga mangita sa ubang mga tahas nga buhaton sa Maghuhupay sa mga kinabuhi sa mga disipulo human si Jesus mibiya kanila.

Nagkomentaryo sa Juan 16:9–11, si Elder McConkie mipasabut: “Kini lisud nga mga bersikulo nga miabut kanato sa ingon ka kubus ug pinamubo nga porma nga nagpalisud sa paghubad niini. Ang daw masabtan nga kahulugan mao kini: ‘Kon imong madawat ang pagpakig-uban sa Espiritu, nga ikaw mamulong sa unsay iyang ipadayag nganha kanimo, niana ang imong mga pagtulun-an mokombikto sa kalibutan sa sala, ug sa pagkamatarung, ug sa paghukom. Ang kalibutan makombikto sa sala tungod sa pagsalikway kanako, sa dili pagtuo sa imong dinasig sa Espiritu nga pagpamatuod nga Ako mao ang Anak sa Dios pinaagi kang kinsa ang kaluwasan moabut. Sila makombikto tungod sa pagsalikway sa imong pagpamatuod sa akong pagkamatarung—tungod sa ilang pasangil nga ako mapanamastamason, usa ka mangingilad, ug usa ka impostor—nga sa pagkatinuod ako miadto sa akong Amahan, usa ka butang nga dili nako mahimo gawas kon ang tanan nakong mga buhat matinuoron ug matarung. Sila makombikto sa sayop nga paghukom tungod sa pagsalikway sa imong pagpamatuod batok sa mga relihiyon niana nga panahon, ug sa pagpili hinoon sa pagsunod kang Satanas, ang prinsipe niini nga kalibutan, kinsa mismo, uban sa iyang tanan nga relihiyoso nga mga pilosopiya, pagahukman ug makita nga nagkulang.’” (Doctrinal New Testament Commentary, 1:754).

Sa unsang paagi ang mga disipulo makabenepisyo sa giya ug panabut nga mahatag sa Espiritu Santo?

Unsa nga kamatuoran mahitungod sa Espiritu Santo ang atong makat-unan gikan sa Juan 16:13?

1. Tubaga ang mosunod nga mga pangutana diha sa imong scripture study journal:

   1. Unsa ang pipila ka mga paagi nga ang Espiritu Santo mogiya kanato ngadto sa kamatuoran?

   2. Sa unsang mga paagi ang Espiritu Santo mopakita kanato sa umaabut nga mga butang?

Salig sa Imong Abilidad sa Pagkat-on ug Pagsunod sa Ebanghelyo

Pagbaton og pagsalig sa imong abilidad sa pagsabut sa mga kasulatan, pag-ila sa mga doktrina ug mga baruganan, pagpasabut sa ebanghelyo ngadto sa uban, ug paggamit sa mga pagtulun-an diha sa imong kinabuhi. Uban sa tabang sa Espiritu Santo, malig-on ka sa imong abilidad sa pagkat-on ug pagsunod sa ebanghelyo.

Pinaagi sa Espiritu Santo, ang Dios makahatag og kasiguroan, paglaum, panglantaw, mga pasidaan, ug giya alang sa atong umaabut.

Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, nga mangita kon unsaon nimo pagdapit sa Espiritu Santo nga mogiya kanimo sa imong kinabuhi: “Sa unsang paagi nato makuha ang Espiritu Santo isip atong giya? Kita kinahanglang maghinulsol sa atong mga sala matag semana ug bag-uhon ang atong mga pakigsaad pinaagi sa pag-ambit sa sakrament uban sa limpyo nga mga kamot ug putli nga kasingkasing, sama nga kita gimandoan sa pagbuhat (tan-awa sa D&P 59: 8–9, 12). Sa ingon lamang niini nga paagi nga maangkon nato ang balaang saad nga kita ‘sa kanunay makabaton sa Iyang Espiritu uban [kanato]’ (D&P 20:77). Kana nga Espiritu mao ang Espiritu Santo, kansang misyon mao ang pagtudlo kanato, paggiya kanato ngadto sa kamatuoran, ug pagpamatuod kabahin sa Amahan ug Anak (tan-awa sa Juan 14:26; Juan 15:26; Juan 16:13; 3 Nephi 11:32, 36)” (“Be Not Deceived,” Ensign o Liahona, Nob. 2004, 46).

2. Tubaga ang mosunod nga mga pangutana diha sa imong scripture study journal:

   1. Kanus-a ka mibati sa Espiritu Santo nga naggiya kanimo ngadto sa kamatuoran o nagpakita kanimo sa umaabut nga mga butang?

   2. Giunsa nimo pagkahibalo nga ang Espiritu Santo kadto nga naggiya kanimo?

Hunahunaa ang mga pagpili nga mahimo nimong buhaton sa pagdapit sa Espiritu Santo nga mogiya nimo. Paningkamot nga magpakabuhi sa paagi nga makadapit sa Iyang magiyahong impluwensya diha sa imong kinabuhi.

Sa Juan 16:13 si Jesus mitudlo nga ang Espiritu Santo “dili magasulti sa iyang kinaugalingong pagbulut-an, hinonoa ang iyang madungog mao ang iyang igasulti.” Basaha ang Juan 16:14–15, nga mangita kon kang kinsa nga mga mensahe ang ipamulong sa Espiritu Santo kanato.

Gikan sa unsay imong nakat-unan niini nga mga bersikulo, kompletuha ang mosunod nga baruganan: Ang Espiritu Santo nagpadayag sa mga kamatuoran ug mga panudlo nga nagagikan .

Nganong makatabang man nga masayran nga kon ang Espiritu Santo mamulong kanato, Siya namulong alang sa Langitnong Amahan ug ni Jesukristo?

“Ang komunikasyon [gikan sa Espiritu Santo] ngadto sa imong espiritu magdala og labaw pa nga kasiguroan kay sa bisan unsa nga komunikasyon nga imong madawat pinaagi sa imong natural nga mga pagbati” (Matinud-anon sa Tinuhoan [2004], 32). Kini nagpasabut nga ang Espiritu Santo mao ang imong labing bililhon nga giya sa pagkat-on sa kamatuoran. Ang iyang impluwensya mas bililhon kay sa pisikal nga ebidensya, sa mga opinyon sa ubang tawo, o sa pagpangatarungan sa kalibutan. Ang mga disipulo sa Manluluwas kinahanglan nga makat-on nga mosalig sa Espiritu Santo isip giya sa pisikal nga pagkawala sa Ginoo, sama nga kita kinahanglang mosalig sa Espiritu Santo karon.

Juan 16:16–33

Ang Manluluwas naghisgut sa Iyang kamatayon ug Pagkabanhaw ug nagpahayag nga gidaug na Niya ang kalibutan

Paghunahuna og higayon nga kinahanglan ka nga manamilit ngadto sa usa ka higala o sakop sa pamilya alang sa usa ka taas o wala hisayri nga gidugayon sa panahon. Unsay inyong gisulti aron sa paghupay sa usag usa samtang nanamilit mo?

Basaha ang Juan 16:16, nga mangita kon unsa ang gisulti ni Jesus sa mga disipulo nga tingali nakahupay kanila samtang sila naghunahuna kabahin sa Iyang pagbiya.

Sa Juan 16:17–19 atong mabasa nga ang mga disipulo wala makasabut unsay gipasabut ni Jesus sa dihang Siya miingon nga Siya mobiya apan nga sila makakita Kaniya pag-usab.

Basaha ang Juan 16:20–22, nga mangita kon unsay gisulti sa Ginoo nga bation sa Iyang mga disipulo sa Iyang pagbiya ug unsay ilang bation kon sila makakita Kaniya pag-usab. Makatabang nga masayud nga ang mga pulong nga “inigbati sa usa ka babaye” diha sa bersikulo 21 nagpasabut sa usa ka babaye nga mosinati og kasakit sa dayon na niyang pagpanganak sa iyang masuso.

Sumala niini nga bersikulo, unsay bation sa mga disipulo kon mawala na si Jesus? Unsay Iyang gisaad nga ilang bation kon makakita sila pag-usab Kaniya?

Si Jesus nasayud nga ang Iyang mga disipulo makakita Kaniya pag-usab human Siya mabanhaw. Bisan og ang ilang kaguol sa Iyang kamatayon mahimong hilabihan, ang hingpit nga kalipay nga ilang bation human sa Iyang Pagkabanhaw malungtaron.

Sa Juan 16:23–32 atong mabasa nga si Jesus mitudlo sa Iyang mga disipulo nga direkta nga mag-ampo ngadto sa Langitnong Amahan diha sa Iyang (Jesukristo) ngalan (tan-awa sa Juan 16:23) ug mipaniguro kanila sa gugma sa Amahan alang kanila ug alang Kaniya. Siya mipaniguro usab kanila nga ang ilang mga pag-ampo, gitumong ngadto sa Langitnong Amahan, pagatubagon.

Basaha ang Juan 16:33, nga mangita sa mga pulong nga gigamit sa Manluluwas sa paghupay sa Iyang mga disipulo. Mahimo nimong markahan ang unsay imong makit-an.

Ngano man nga makahimo kita sa pagbaton og kalipay ug kalinaw bisan sa usa ka kalibutan nga puno sa kalisdanan, kasal-anan, ug kamatayon?

Gikan sa Juan 16:33 kita makakat-on nga tungod kay gidaug na ni Jesukristo ang kalibutan, kita mahimong magmaya ug makabaton og kalinaw. Unsa kaha ang gipasabut sa gidaug na ni Jesukristo ang kalibutan?

Isip Bugtong Anak sa Amahan, si Jesukristo nagpakabuhi nga walay sala, mibuntog sa tanang kalibutanong mga tintasyon. Siya usab nakasinati sa tanang matang sa sakit ug kasakit ug mitubos sa mga sala sa tanang anak sa Langitnong Amahan. Pinaagi sa Iyang kinabuhi, Iyang pag-antus ug kamatayon, ug Iyang Pagkabanhaw, Siya mibuntog sa tanang mga babag nga makapugong nato sa pagkalimpyo, pagkaplag og kalinaw, ug pagpuyo pag-usab uban sa atong Amahan sa Langit ug niadtong atong gihigugma.

3. Tubaga ang mosunod nga pangutana diha sa imong scripture study journal: Sa unsang mga paagi ang pagkahibalo nga gidaug na ni Jesukristo ang kalibutan makatabang kanimo nga magmaya ug makabaton og kalinaw?

Basaha ang mosunod nga pamahayag gikan ni Presidente Thomas S. Monson, nga mangita nganong mahimo kita nga magmaya bisan sa mga pagsulay ug kalisud niini nga kalibutan:

“Magmaya kita samtang magpakabuhi kita. Bisan og nagpuyo kita sa makuyaw nga panahon, ang Ginoo nahigugma nato ug naghunahuna nato. Anaa sa atong kiliran kanunay kon mohimo kita sa matarung. Motabang Siya nato sa panahon sa panginahanglan. … Mapuno usab sa kalipay ang atong kinabuhi kon mosunod kita sa mga pagtulun-an sa ebanghelyo ni Jesukristo.

“Ang Ginoo mipahimangno, ‘Apan sumalig kamo; gidaug ko na ang kalibutan’ [Juan 16:33]. Pagkadako sa kalipay nga ikahatag niini nga kahibalo ngari nato. Nagpakabuhi Siya alang nato ug nagpakamatay Siya alang nato. Iyang gibayran ang bili sa atong mga sala. Hinaut nga atong sundon ang Iyang ehemplo. Hinaut nga atong ipakita ang atong dakong pasalamat ngadto Kaniya pinaagi sa pagdawat sa Iyang sakripisyo ug pagpakabuhi nga makapabalik nato sa pagpuyo uban Kaniya” (“Ang Dios Magauban Kanimo,” Ensign o Liahona, Nob. 2012, 110–11).

Pamalandungi ang mosunod nga pangutana: Kanus-a man nga ang pagkasayud nga si Jesukristo midaug sa kalibutan nakatabang kanimo nga magmaya ug makabaton og kalinaw?

Tinguhaa nga magmaya ug mosunod sa ebanghelyo ni Jesukristo. Samtang imo kining buhaton imong mabati ang kalinaw ug paglaum nga anaa pinaagi sa maulaong sakripisyo ug Pagkabanhaw sa Ginoo.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 16 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: