Unit 32: Day 2
Pinadayag 14–16
Pasiuna
Sa usa ka panan-awon, si Apostol Juan nakakita og usa ka anghel nga mianhi sa yuta aron sa pagpahiuli sa ebanghelyo ni Jesukristo sa ulahing mga adlaw. Nakadungog usab siya og usa ka tingog gikan sa langit nga naghulagway sa mga panalangin nga natagamtam niadtong namatay nga nagmatinud-anon ngadto sa Ginoo. Nakita ni Juan ang pagpundok sa mga matarung ug ang pagpundok sa mga dautan sa ulahing mga adlaw ug ang mga paghukom sa Dios nga gibu-bu ngadto sa mga dautan.
Pinadayag 14
Nakita ni Juan ang pagpahiuli sa ebanghelyo ug ang pagpundok sa mga matarung ug sa mga dautan
Pipila ka mga tawo naghunahuna kon posible ba nga mobati og kalinaw sa kalibutan nga puno sa kadautan, kalamidad, ug kagubot. Hunahunaa kon unsay imong isulti niini nga mga tawhana.
Samtang imong tun-an ang Pinadayag 14–16, pangita og mga kamatuoran nga makahatag kanimo og kalinaw bisan kon nagpuyo ka sa usa ka kalibutan nga puno sa kadautan, kalamidad, ug kagubot.
Sa Pinadayag 14:1–13 atong mabasa nga si Apostol Juan nakakita og usa ka panan-awon sa ulahing mga adlaw, o sa atong panahon. Sa iyang panan-awon iyang nakita ang mga katalagman nga moabut sa mga dautan. Siya usab nakakita kon unsay makahatag og kalinaw sa mga matarung sa atong panahon.
Basaha ang Pinadayag 14:1–5, nga mangita kon kinsay nakita ni Juan nga nagbarug uban sa Manluluwas “sa bukid sa Sion” (Pinadayag 14:1), o Zion.
Tingali imong mahinumduman nga nakat-on nga ang 144,000 nga gihisgutan diha sa bersikulo 1 mao ang mga high priest sa napulog duha ka mga tribo sa Israel gikan sa matag nasud ug gi-orden sa pagdala sa katawhan “ngadto sa simbahan sa Unang Natawo” (D&P 77:11; tan-awa sa Pinadayag 7:4–8). Ang mga pulong nga “wala mahugaw tungod sa mga babaye” (Pinadayag 14:4) nagpasabut nga sila putli, o limpyo sa moral nga paagi. Sa Pinadayag 14:5 ang mga pulong nga “sa ilang mga baba walay hingkaplagang bakak” nagpasabut nga sila matinuoron ug sinsero ug ang mga pulong nga “wala may lama” nagpasabut nga sila limpyo gikan sa sala.
-
Tubaga ang mosunod nga pangutana sa imong scripture study journal: Ngano kaha nga ang pagkaputli, pagkamatinuoron, ug pagkalimpyo gikan sa sala makatabang sa 144,000 ka mga high priest sa pagdala sa ebanghelyo ngadto sa uban?
Sa panan-awon ni Juan sa ulahing mga adlaw, nakakita siya og dugang tulo ka mga anghel. Basaha ang Pinadayag 14:6, nga mangita kon unsay anaa sa unang anghel.
Human mokutlo sa Pinadayag 14:6, si Presidente Gordon B. Hinckley mipahayag: “Kana nga anghel miabut. Ang iyang ngalan si Moroni” (“Stay the Course—Keep the Faith,” Ensign, Nob. 1995, 70).
Si anghel Moroni unang mipakita kang Joseph Smith ug misulti kaniya nga ang Dios adunay importante nga ipabuhat kaniya (tan-awa sa Joseph Smith—Kasaysayan 1:29–35). Sumala sa Joseph Smith—Kasaysayan 1:34, ubos sa direksyon sa Dios, unsay gisulti ni Moroni kang Joseph Smith nga mitabang sa pagpahiuli sa walay katapusan nga ebanghelyo dinhi sa yuta?
Ang pagkasayud sa tahas ni Moroni diha sa Pagpahiuli makatabang kanimo nga makasabut nganong ang iyang estatuwa gibutang sa ibabaw sa daghan natong mga templo.
Ang anghel nga gihulagway diha sa Pinadayag 14:6 mahimong nagrepresentar usab og kombinasyon sa daghang langitnong mga mensahero, lakip ni Moroni, kinsa nakatabang sa pagpahiuli sa ebanghelyo ni Jesukristo sa ulahing mga adlaw (tan-awa sa Bruce R. McConkie, Doctrinal New Testament Commentary, 3 vols. [1965–73], 3:529–31; tan-awa usab sa D&P 13; 110:11–16; 128:20–21).
Basaha ang Pinadayag 14:7, nga mangita kon unsay gisulti sa anghel. Ang mga pulong nga “nahiabut na ang takna sa iyang paghukom” nagpasabut sa panahon nga ang Manluluwas mohukom sa tanang katawhan sa yuta. Ang Iyang mga paghukom mahitabo sa Iyang Ikaduhang Pag-anhi ug sa Katapusang Paghukom.
Gikan sa panan-awon ni Juan sa anghel, atong makat-unan nga usa ka rason nga ang Dios mipahiuli sa ebanghelyo ni Jesukristo mao ang pag-andam sa mga lumulupyo sa yuta alang sa Ikaduhang Pag-anhi ni Jesukristo.
Sa unsang mga paagi nga ang ebanghelyo ni Jesukristo nag-andam sa katawhan alang sa Iyang Ikaduhang Pag-anhi?
Sa unsang paagi ang gipahiuli nga ebanghelyo ni Jesukristo mihatag og kalinaw kanimo samtang nagpuyo sa usa ka dautan ug nagkaguliyang nga kalibutan?
Basaha ang Pinadayag 14:8–11, nga mangita kon unsay gisulti sa ikaduha ug ikatulo nga mga anghel.
Gitudloan si Juan nga ang Babelonia, o ang pagkadautan, maanaa sa matag nasud. Usa ka kahulugan sa mga pulong nga “nagun-ob na ang … Babelonia” (Pinadayag 14:8) mao nga moabut ang adlaw nga ang pagkadautan sa kalibutan matapos.
Hunahunaa kon sa unsang paagi ang pagkasayud nga ang pagkadautan sa kalibutan matapos makahatag kanimo og kalinaw.
Si Propeta Joseph Smith mipasabut kon unsa ang masinati sa dautan human sila mamatay:
“Ang hilabihan nga pag-antus sa mipanaw na nga mga espiritu ngadto sa kalibutan sa mga espiritu, nga maoy ilang padulngan human mamatay, mao ang pagkaamgo nga napakyas sila sa pagkab-ot sa himaya nga naangkon sa uban ug nga unta maangkon usab nila, ug sila ang motulisok sa ilang mga kaugalingon” (Mga Pagtulun-an sa mga Presidente sa Simbahan: Joseph Smith [2007], 268).
“Ang tawo maoy mopaantus sa iyang kaugalingon ug mosilot sa kaugalingon. Sigon sa panultihon, Sila adto padulong sa linaw sa nagdilaab nga kalayo ug asupre [tan-awa sa Pinadayag 21:8]. Ang pag-antus sa pagkapakyas nga anaa sulod sa hunahuna sa tawo ingon kapait sa linaw sa nagdilaab nga kalayo ug asupre” (Mga Pagtulun-an: Joseph Smith, 268).
Human masayud kon unsay masinati sa mga dautan human sila mamatay, si Juan nakadungog og usa ka tingog gikan sa langit nga naghulagway kon unsay masinati sa mga matarung human sila mamatay.
Basaha ang Pinadayag 14:12–13, nga mangita kon unsay masinati sa mga matarung human sila mamatay.
Ang “makapahulay na … gikan sa [atong] mga paghago” (bersikulo 13) human kita mamatay nagpasabut nga kita dili na mabug-atan sa mga kasamok, kabalaka, ug kagul-anan (tan-awa sa Alma 40: 12).
Usa ka baruganan nga atong makat-unan gikan sa Pinadayag 14:12–13 mao nga kon kita magpuyo nga matarung, niana kita mapanalanginan sa atong mga buhat ug mopahulay gikan sa atong mga kahago human kita mamatay. Mahimo nimong isulat o timan-an kini nga baruganan diha sa imong mga kasulatan tupad sa Pinadayag 14:12–13.
-
Atong mabasa diha sa Pinadayag 14:14–20 nga sa iyang panan-awon si Juan nakakita og duha ka pag-ani. Iyang nakita nga atol sa unang pag-ani ang mga matarung pagapundukon gikan sa mga dautan (tan-awa sa Pinadayag 14:14–16) ug nga atol sa ikaduhang pag-ani ang mga dautan pagapundukon ug sa katapusan pagalaglagon (tan-awa sa Pinadayag 14:17–20).
Pinadayag 15–16
Si Juan nakakita sa mga matarung diha sa celestial nga gingharian ug sa pito ka mga hampak sa ulahing mga adlaw
Ang Pinadayag 15:2–4 naglakip sa dugang paghulagway ni Apostol Juan kon sama sa unsa ang umaabut niadtong makabuntog ni Satanas ug maluwas diha sa celestial nga gingharian. Ang uban sa Pinadayag 15–16 naglakip sa iyang paghulagway sa pito ka mga hampak nga mohasol sa mga dautan sa katapusang mga adlaw. Kini nga mga hampak mag-una sa Ikaduhang Pag-anhi sa Ginoo.
Sa panan-awon ni Juan, ang matag hampak girepresentahan sa usa ka anghel nga nagbu-bu og “panaksan nga napuno sa kapungot sa Dios” (Pinadayag 15:7). Basaha ang mosunod nga mga tudling gikan sa Pinadayag 16, nga mangita sa pito ka mga hampak. Pagsulat og mubo nga deskripsyon sa matag hampak tupad sa tukma nga numero sa mosunod nga tsart:
|
| |
|
| |
|
| |
|
| |
|
| |
|
| |
|
|
Basaha ang Pinadayag 16:15, nga mangita kon unsay atong mabuhat aron maandam sa Ikaduhang Pag-anhi ni Jesukristo.
Ang mga pulong nga “magabantay sa iyang mga bisti aron dili siya magalakaw nga hubo” (Pinadayag 16:15) nagpasabut nga andam sa espirituhanong paagi. Kadtong “magabantay sa [iyang] mga bisti” ug andam sa espirituhanong paagi sa katapusan magsul-ob sa kupo sa pagkamatarung nga ihatag ngadto sa tanan nga takus nga mopuyo uban sa Dios sa celestial nga gingharian (tan-awa sa Pinadayag 3:3–5; 7:13–17).
Mahimo nimong isulat o timan-an ang mosunod nga kamatuoran diha sa imong mga kasulatan tupad sa Pinadayag 16:15: Kon kita magmabinantayon ug andam sa espirituhanong paagi, niana kita andam alang sa Ikaduhang Pag-anhi ni Jesukristo.
Importanteng hinumduman nga ang Ginoo nahigugma sa Iyang mga katawhan ug magbantay kanila sa ulahing mga adlaw, bisan sa taliwala sa grabe nga kalaglagan ug dako nga gubat. Kinahanglan kitang magmabinantayon ug andam sa espirituhanong paagi aron makadawat kita sa proteksyon ug mga panalangin sa Ginoo. Kon gusto nimong masayud og dugang mahitungod sa Armagedon nga gihisgutan sa Pinadayag 16:16, tan-awa ang natala sa Giya ngadto sa mga Kasulatan nga “Armagedon.”
-
Akong natun-an ang Pinadayag 14–16 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: