Si Apostol Juan nakakita sa pag-abli sa ikapito nga silyo ug nakakat-on sa iyang misyon sa pag-apil diha sa pagpundok sa Israel sa ulahing mga adlaw. Bisan pa sa daghang mga hampak [kasakitan], mga kalaglagan, ug mga paghukom nga moabut sa mga lumulupyo sa yuta, nakita ni Juan nga kadtong mga takus maluwas gikan sa kadaghanan niini.
Tan-awa ang kauban nga tsart sa basahon sa Pinadayag. Tan-awa unsa ka daghan ang mga bersikulo nga naghisgut sa mga panghitabo sa unang unom ka mga silyo ikumpara sa gidaghanon sa mga bersikulo nga naghisgut sa mga panghitabo sa ikapito nga silyo.
Imahe
John’s vision of seven seals
Si Apostol Juan mas daghan og gisulat mahitungod sa mga panghitabo kalabut sa ikapitong 1,000 ka tuig nga panahon kay sa iyang gihimo mahitungod sa mga panghitabo kalabut sa bisan hain sa ubang 1,000 ka tuig nga mga panahon. Partikular siya nga misulat mahitungod sa mga panghitabo nga mahitabo tali sa pagbukas sa ikapito nga silyo ug sa Ikaduhang Pag-anhi ni Jesukristo.
Ngano kaha nga daghan kaayo og gisulat si Juan mahitungod sa mga panghitabo sa ikapito nga silyo?
Samtang imong tun-an ang panan-awon ni Juan diha sa Pinadayag 8–11, ikonsiderar kon unsay atong makat-unan gikan sa iyang gisulat kabahin niini nga mga panghitabo.
Ang Pinadayag 8:1–6 naghulagway sa Manluluwas nga nag-abli sa ikapito nga silyo. Nakita ni Juan ang pito ka mga anghel nga gihatagan og pito ka mga trumpeta. “Ang mga trumpeta gigamit sa karaang panahon aron sa pag-alarma, pagsinyas [sa kasundalohan] alang sa pagpakig-away, o pagpahibalo sa pag-abut sa harianon nga binuhat. Busa, ang pagpatingog sa trumpeta nagbalita o nagpahibalo og usa ka hilabihan ka mahinungdanon nga butang” (Gerald N. Lund, “Seeing the Book of Revelation as a Book of Revelation,” Ensign, Dis. 1987, 50).
Sa Pinadayag 8:1–6, ang paghuyop sa mga trumpeta motimaan sa pagsugod sa nagkalain-laing mga hampak ug kalaglagan isip pagpangandam sa Ikaduhang Pag-anhi ni Jesukristo ug sa Iyang paghari sa tibuok Milenyum.
Basaha ang matag usa sa mosunod nga mga reference, nga nagpasabut sa mga panghitabo nga may kalabutan sa pagpatingog sa unang unom ka mga trumpeta. Samtang magbasa ka, pangitaa ang mga tubag sa tukma nga mga pangutana.
Una—Pinadayag 8:7. Unsay nahitabo isip resulta sa “ulan nga nanibug-ok ug kalayo” nga nangatagak sa yuta sa dihang ang unang anghel mipatingog sa iyang trumpeta?
Ikaduha—Pinadayag 8:8–9. Unsang tulo ka mga butang ang naapektuhan sa dihang gipatingog ang ikaduha nga trumpeta?
Ikatulo—Pinadayag 8:10–11. Unsay nahitabo sa dihang ang bitoon natagak gikan sa langit? (Timan-i nga ang panyawan usa ka hilba; kini gigamit sa pagsimbolo sa “mapait nga kalamidad o kagul-anan” [tan-awa sa Bible Dictionary sa LDS English version sa Biblia, “Wormwood”].)
Ikaupat—Pinadayag 8:12. Human sa pagpatingog sa ikaupat nga trumpeta, unsa ang tulo ka butang nga dunay mga bahin nga mingit-ngit?
Ikalima—Pinadayag 9:1–3. Unsa ang migawas gikan sa bung-aw sa kahiladman nga walay kinutuban sa dihang giablihan kini sa ikalima nga anghel?
Ikaunom—Pinadayag 9:13–16, 18. Pila ka mga sundalo ang apil sa grabe nga gubat nga nakita ni Juan human gipatingog ang ikapito nga trumpeta? Pila ka bahin sa katawhan ang iyang nakita nga nangamatay niini nga gubat?
Basaha ang Pinadayag 9:20–21, nga mangita kon unsay buhaton sa mga dautan nga makalahutay sa mga hampak.
Usa ka anghel nagtudlo ni Juan mahitungod sa iyang misyon sa ulahing mga adlaw
Ang Pinadayag 10 naglakip og temporaryong paghunong sa paghulagway sa pagtingog sa pito ka mga trumpeta ug sa kauban niini nga mga hampak. Dinhi niini nga kapitulo atong mabasa nga si Juan gitudloan sa lain nga anghel.
Imahe
sweet, bitter
Unsa ang pipila ka mga kasinatian sa kinabuhi nga makonsiderar nga parehong tam-is ug pait?
Basaha ang Pinadayag 10:1–3, nga mangita kon unsay gigunitan sa anghel.
Basaha ang Pinadayag 10:8–11, nga mangita kon unsay gisulti kang Juan nga iyang buhaton sa gamay nga basahon. Timan-i kon unsa ang lami niini ngadto kaniya.
Si Apostol Juan napanalanginan ni Jesukristo nga mabuhi hangtud sa Iyang Ikaduhang Pag-anhi ug sa pagdala og mga katawhan ngadto Kaniya (tan-awa sa Juan 21:20–24; D&P 7:1–4). Ang misyon ni Juan mao ang pagtabang sa pagpundok sa mga anak sa Israel. Sa unsang mga paagi nga ang ingon nga misyon mahimong tam-is ug pait?
Sa imong scripture study journal, gamita ang Pinadayag 10:8–11 sa pagsulat og tubag sa usa o duha sa mosunod nga mga kabalaka:
Nakadungog ko kon unsa ka lisud ang pagserbisyo og misyon. Maglisod ko kon balibaran. Dili ko sigurado kon ganahan ba kong moserbisyo.
Naningkamot ko sa pagbuhat sa unsay husto. Mobasa ko sa akong mga kasulatan, mag-ampo, ug naningkamot sa pagpakigbahin sa ebanghelyo, apan pipila ka mga butang sa akong kinabuhi dili gihapon maayo—ug wala pa ko kasulay nga dunay gustong magpamiyembro sa Simbahan tungod kanako. Basin og moundang ra ko.
Si Juan nakakita og duha ka mga propeta nga gipatay diha sa Jerusalem, ug sa pagpatingog sa ikapito nga trumpeta
Ang Pinadayag 11 nagsugod sa paghulagway ni Apostol Juan sa mga panghitabo nga mahitabo tali sa pagpatingog sa ikapito nga trumpeta ug sa Ikaduhang Pag-anhi ni Jesukristo. Niini nga panahon ang dautan adunay dugang gahum ug pagkontrolar sa yuta, ug usa ka kasundalohan mosulay sa pagbuntog sa Jerusalem, nga kabahin sa katapusang dako nga gubat sa Armagedon.
Gihulagway ni Juan ang siyudad sa Jerusalem ug ang pagkabuntog niini sa mga Hentil (kadtong wala naghimo ug nagsunod sa mga pakigsaad uban sa Ginoo) sulod sa 42 ka bulan, nga tulo og tunga ka tuig.
Basaha ang Pinadayag 11:3–6, nga mangita kon unsay buhaton diha sa Jerusalem sa duha sa mga saksi sa Manluluwas sa dayon nang pagkahitabo sa Iyang Ikaduhang Pag-anhi.
Kining duha ka mga propeta, sama ni Elijah ug Moises, adunay awtoridad ug gahum sa pagsira sa kalangitan ug sa pagbunal sa yuta og mga hampak. Ang kalayo nga mogawas gikan sa mga baba niining duha ka mga saksi mahimong simbolo sa gahum sa ilang mga pagpamatuod (tan-awa sa Jeremias 5:14; 20:9).
Basaha ang Pinadayag 11:7–12, nga mangita kon unsay mahitabo niining duha ka mga propeta. Timan-i kon unsay buhaton sa mga dautan.
Basaha ang Pinadayag 11:13–15, nga mangita kon unsay mahitabo human ang duha ka mga propeta pagabuhion gikan sa mga patay ug mokayab ngadto sa langit.
Human sa pagpatingog sa ikapito nga trumpeta, kinsa ang maghari sa “gingharian sa kalibutan” (Pinadayag 11:15)?
Sa Pinadayag 11:16–19 atong mabasa nga ang 24 ka mga anciano kinsa naglingkod duol sa trono sa Dios mipasalamat ug midayeg sa Dios tungod sa pagganti sa mga matarung ug pagsilot sa mga dautan.
Hinumdumi gikan sa miaging leksyon ang mosunod nga baruganan nga makita diha sa Pinadayag 7: Kon matinud-anon kitang molahutay sa kalisdanan ug mahimong putli pinaagi sa Pag-ula ni Jesukristo, kita makatagamtam sa celestial nga himaya uban sa Dios. Hunahunaa ang mga panghitabo sa ikapito nga silyo nga imong gitun-an karon. Sa imong scripture study journal, isulat kon sa unsang paagi kini nga mga baruganan makahatag og kahupayan ug kalinaw niadtong makasinati og pipila ka makahahadlok nga mga kalamidad nga mahitabo sa dili pa ang Ikaduhang Pag-anhi sa Ginoo.
Si Elder Neil L. Andersen sa Korum sa Napulog Duha ka mga Apostoles mitudlo nga bisan pa sa mga kalamidad sa atong panahon, kita makapaabut sa pag-anhi sa Ginoo uban sa balaan nga pagtahud ug kahinam:
Imahe
Elder Neil L. Andersen
“Kita nagpuyo, mga kaigsoonan, sa kapanahunan diin duol na ang Ikaduhang Pag-anhi sa Ginoo, panahon nga dugay nang gipaabut sa mga tumutuo. Kita nagpuyo sa kapanahunan sa mga gubat ug hungihong sa mga gubat, sa kinaiyanhong mga kalamidad, kapanahunan diin ang kalibutan nag-atubang sa grabeng kalibug ug kagubot.
“Apan kita nagpuyo usab sa mahimayaong panahon sa Pagpahiuli, panahon nga ang ebanghelyo gipakatap sa kalibutan—panahon diin ang Ginoo misaad nga Siya ‘mopasanay … og usa ka putli nga mga katawhan’ [D&P 100:16] kinsa Iyang sangkapan ‘sa katarung ug uban sa gahum sa Dios’ [1 Nephi 14:14].
“Kita nagmaya niini nga kapanahunan ug nag-ampo nga kita sa maisugong paagi makasagubang sa atong mga panglimbasug ug kawalay kasiguroan. Ang mga kalisdanan sa uban mas grabe kay sa uban, apan ang tanan makasinati niini. …
“Bisan tuod ang Ginoo balik-balik nga misiguro nato nga kita ‘dili mahadlok’ [D&P 10:55], ang pagbaton og klarong pagsabut nga may kinabuhi lapas pa sa pagkamortal dili kanunayng sayon kon kita anaa sa mga pagsulay. …
“Motubo ang atong pagtuo samtang kita magpaabut sa mahimayaong adlaw sa pagbalik sa Manluluwas dinhi sa yuta. Ang paghunahuna sa Iyang pag-anhi nagpahinam kanako. Kini kulbahinam gayud! Ang gidak-on ug kahalangdon, ang gilapdon ug katalagsaon, mas molabaw pa sa makita sa mortal nga mga mata o masinati. …
“… Kita moluhod uban sa pagtahud, ‘ug ang Ginoo mopadungog sa iyang tingog, ug ang tanan nga mga lumulupyo sa yuta makadungog niini’ [D&P 45:49]. ‘Kini mao ang … tingog sa daghan nga mga tubig, ug ingon sa tingog sa usa ka dako nga dugdug’ [D&P 133:22]. ‘[Dayon] ang Ginoo, … ang Manluluwas, mobarug sa taliwala sa iyang mga katawhan’ [D&P 133:25]” (“Paanhia ang Imong Gingharian,” Ensign o Liahona, May 2015, 119–20, 122).
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Pinadayag 8–11 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: