Mga Taga-Filipos 4

Pasiuna

Si Apostol Pablo mimando sa mga Santos didto sa Filipos nga magmainampuon ug magtinguha sa bisan unsa nga matarung. Mipahayag usab siya sa iyang pagsalig sa kalig-on ni Jesukristo. Gitapos ni Pablo ang iyang epistola uban sa laing pagpahayag sa pagpasalamat ngadto sa mga Santos nga taga-Filipos alang sa suporta nga ilang gihatag ngadto niya sa mga panahon sa iyang panginahanglan.

Mga Taga-Filipos 4:1–14

Gimandoan ni Pablo ang mga Santos didto sa Filipos nga magmainampuon ug magtinguha sa bisan unsa nga matarung

Sa tibuok natong kinabuhi makasinati kita og mga hagit o mga kahimtang nga mahimong makapabalaka nato. Sama pananglit:

“Nabalaka ko bahin sa pagpasar sa umaabut nga eksamin.”
“Nabalaka ko bahin sa usa ka sakop sa pamilya nga nasakit.”
“Nabalaka ko bahin sa pagbarug alang sa akong mga gituohan.”
“Nabalaka ko kon mahimo ba kong malampuson nga misyonaryo.”

Unsa ang pipila ka mga kabalaka o mga problema nga kasamtangan nimong nasinati sa imong kinabuhi?

Samtang magtuon ka sa Mga Taga-Filipos 4, pangitaa ang kamatuoran nga makatabang nato kon mag-atubang kita og mga kahimtang nga mahimong makapabalaka nato.

Diha sa Mga Taga-Filipos 4:1–5 atong mabasa kon giunsa pagtambag ni Pablo ang mga Santos nga lig-ong mobarug diha sa pagkamatinud-anon ngadto sa Ginoo, sa pagmaya diha sa Ginoo, ug tugutan ang ilang pagkamapailubon, o pagkalumo, nga makita sa uban.

Basaha ang unang mga pulong sa Mga Taga-Filipos 4:6, nga mangita sa unsay tambag ni Pablo ngadto sa mga Santos.

Ang mga pulong nga “ayaw pagkabalaka mahitungod sa bisan unsang butang” sa bersikulo 6 nagpasabut nga dili gayud mabalaka pag-ayo bahin sa bisan unsang butang.

Basaha ang nahabilin sa Mga Taga-Filipos 4:6, nga mangita sa unsay gitambag ni Pablo nga buhaton sa mga Santos imbis nga mabalaka. (Ang pagpangamuyo usa ka mapaubsanon, kinasingkasing nga hangyo.)

Basaha ang Mga Taga-Filipos 4:7, nga mangita sa panalangin nga gisaad ni Pablo tungod sa mapaubsanon ug sinsero nga pag-ampo uban sa pagpasalamat. Hinumdumi nga ang pulong nga keep dinhi nga bersikulo nagpasabut nga magabantay.

Usa ka baruganan nga atong makat-unan gikan niining mga bersikulo mao nga isip matinud-anong mga sumusunod ni Jesukristo, kon mag-ampo kita uban sa pagpangamuyo ug pagpasalamat, nan makabaton kita sa kalinaw sa Dios. Ang pagsunod sa maalamong tambag ni Pablo nga ipahayag ang tanan ngadto sa Dios diha sa pag-ampo ug pangamuyo uban sa pasalamat makatabang nato nga mapabilin ang tukma nga balanse sa kinabuhi, imbis nga sobra ra kaayo nga kahingawa o wala kinahanglana nga kabalaka bahin sa tanang detalye ug sa mga resulta niini.

Si Elder Richard G. Scott sa Korum sa Napulog Duha ka mga Apostoles nagtudlo kon sa unsang paagi nga ang pagpili nga mosunod niini nga baruganan makatabang kanato: “Kay gitahud Niya ang inyong kabubut-on, ang Amahan sa Langit dili gayud mamugos ninyo nga mag-ampo Kaniya. Apan sa paggamit ninyo nianang kabubut-on ug paglakip Kaniya sa matag aspeto sa inyong inadlaw nga kinabuhi, masudlan ang inyong kasingkasing og kalinaw, madagayaong kalinaw. Kana nga kalinaw mag-focus og mahangturong kahayag sa inyong panlimbasug. Motabang kini ninyo sa pag-atiman niadto nga mga hagit gikan sa mahangturong panglantaw” (“Himoa ang Paggamit sa Pagtuo nga Inyong Unang Prayoridad,” Ensign o Liahona, Nob. 2014, 93).

Hibaloi nga diha sa Mga Taga-Filipos 4:6 nga misugyot si Pablo nga ang atong mga pag-ampo ug mga hangyo kinahanglang ihalad uban sa pasalamat. Tubaga ang mosunod nga mga pangutana diha sa imong scripture study journal:
1. Sa imong hunahuna sa unsang paagi nga ang pagpahayag og pasalamat makahatag kanato sa kalinaw sa Dios?
2. Sumala ni Elder Scott, sa unsang paagi nga ang kalinaw sa Dios makatabang nato sa mga hagit nga atong nasinati?

Ikonsiderar ang mga kabalaka o mga problema nga imong nahunahunaan sa sayong bahin niini nga leksyon. Pilia ang paggamit sa baruganan nga gitudlo ni Pablo pinaagi sa pag-ampo uban sa pangamuyo ug pasalamat imbis nga mabalaka. Samtang mahibaloan nimo ang mga kabalaka sa uban nga nagpalibut nimo, ikonsiderar ang pagpakigbahin sa mga pulong ni Pablo ug kining baruganan ngadto nila.

Sulod sa mosunod nga 30 segundos, itutok ang imong mga hunahuna diha sa Manluluwas ug sa unsay Iyang nahimo alang kanimo.

Unsay epekto sa pagtutok niini nga hunahuna nganha nimo?

Basaha ang Mga Taga-Filipos 4:8–9, nga mangita sa unsay gitambag ni Pablo sa mga Santos nga taga-Filipos nga ilang hunahunaon ug buhaton. Ikonsiderar ang pagmarka o pagsulat sa matag matang sa butang nga gimando ni Pablo sa mga Santos nga tutokan sa ilang hunahuna. Ang pulong nga “palandunga” diha sa bersikulo 8 nagpasabut nga maghunahuna sa mainampingon ug sa padayon nga paagi.

Diha sa bersikulo 9, unsay gitambag ni Pablo sa mga miyembro sa Simbahan nga ilang buhaton? Unsa nga panalangin ang iyang gisaad sa mga Santos kon tutokan nila ang pagkamatarung ug mosunod sa iyang mga pagtulun-an ug ehemplo?

Usa ka baruganan nga atong makat-unan gikan sa instruksyon ni Pablo mao nga kon ang matinud-anong mga Santos motutok sa ilang mga hunahuna sa bisan unsang matarung ug kon mosunod sila sa mga apostoles ug mga propeta, nan ang kalinaw sa Dios magauban kanila.

Diha sa imong scripture study journal, isulat kon sa unsang paagi nga ang pagtutok sa atong mga hunahuna sa bisan unsang matarung makaimpluwensya sa atong mga tinguha ug mga kinaiya.

Basaha ang Mga Artikulo sa Hugot nga Pagtuo 1:13 (diha sa Perlas nga Labing Bililhon), nga mangita kon unsa kini ka pareho sa Mga Taga-Filipos 4:8.

Sa dihang gikutlo ni Propeta Joseph Smith kining “tambag ni Pablo” gikan sa Mga Taga-Filipos 4:8 diha sa ika-trese nga artikulo sa hugot nga pagtuo, giusab niya ang “palandunga ninyo kining mga butanga” ngadto sa mas aktibo nga “naninguha sa pagpangita niining mga butanga.” Hunahunaa kon nganong importante nga maninguha kita sa pagpangita sa mga butang nga tinuod, matinuoron, makiangayon, putli, matahum, mahiyason, ug maayo og dungog o dalaygon.

Basaha ang tambag mahitungod sa usa sa mosunod nga mga hilisgutan gikan sa Alang sa Kalig-on sa mga Kabatan-onan nga booklet: “Pagpakig-date,” “Sinina ug Panagway,” “Edukasyon,” “Kalingawan ug Media,” “Mga Higala,” “Pinulongan,” o “Musika ug Pagsayaw.” Sa imong scripture study journal, isulat ang hilisgutan nga imong gipili. Dayon isulat ang imong mga tubag sa mosunod nga mga pangutana:
1. Unsaon nato paggamit ang instruksyon ni Pablo nga narekord diha sa Mga Taga-Filipos 4:8–9 sa paggiya sa atong mga pagpili kalabut niining hilisgutan?
2. Samtang naningkamot kita sa pagsunod sa instruksyon ni Pablo, unsa nga mga hagit ang mahimo natong masugatan kalabut niining hilisgutan?
3. Ngano man nga “ang Dios sa kalinaw … magauban kaninyo” (Mga Taga-Filipos 4:9) angay man sa paningkamot sa pagtinguha sa matarung nga mga butang ug pagsunod sa mga apostoles ug mga propeta?

Unsaon man nimo sa pagpalambo sa imong mga paningkamot sa pagtutok sa imong mga hunahuna diha sa matarung nga mga butang? Hunahunaa ang mga panalangin nga miabut kanimo samtang misunod ka sa pagtulun-an sa mga apostoles ug mga propeta. Ipadayon ang pagsunod niining baruganan aron ang Ginoo padayon nga makahatag sa Iyang pagpakig-uban ug kalinaw diha sa imong kinabuhi.

Sama sa narekord diha sa Mga Taga-Filipos 4:10, gipasalamatan ni Pablo ang mga Santos nga taga-Filipos alang sa suporta ug pagpakabana nga ilang gitanyag kaniya sa panahon sa iyang mga pagsulay. Basaha ang Mga Taga-Filipos 4:11–12, nga mangita sa unsay gisulti ni Pablo sa mga Santos nga iyang nakat-unan.

Unsa may nakat-unan ni Pablo nga angayang buhaton sa tanang sitwasyon?

Basaha ang Mga Taga-Filipos 4:13–14, nga mangita sa tinubdan sa kalig-on ni Pablo. (Ang Mga Taga-Filipos 4:13 usa ka scripture mastery passage. Mahimo nimo kining markahan o sulatan diha sa imong mga kasulatan sa usa ka talagsaong paagi aron matultulan nimo kini sa umaabut.)

Ang pamahayag ni Pablo diha sa bersikulo 13 dunay kalabutan sa iyang abilidad, pinaagi sa kalig-on nga gihatag ni Jesukristo, sa pagbuhat sa tanang mga butang nga makapahimuot o gikinahanglan sa Dios, lakip na ang pagkahimong kontento diha sa bisan unsang kahimtang. Sama ni Pablo, makahimo kita sa tanang mga butang pinaagi ni Jesukristo, kinsa mihatag nato og kalig-on.

Unsa may atong mabuhat aron makadawat sa kalig-on nga mahatag ni Jesukristo?

Si Presidente Dieter F. Uchtdorf sa Unang Kapangulohan nagtudlo bahin sa unsay mapahimo sa kalig-on sa grasya sa Dios ngari nato: “[Usa ka] lain nga elemento sa grasya sa Dios mao ang pag-abli sa mga bintana sa langit, diin ang Dios mobu-bu og mga panalangin sa gahum ug kalig-on, naghimo kanato sa pagkab-ut sa mga butang nga unta lisud nato nga kab-uton. Pinaagi kini sa katingalahang grasya sa Dios nga ang Iyang mga anak makabuntog sa mga makuyaw ug tinago nga mga tintasyon sa tiglingla, makahunong sa pagpakasala, ug ‘[ma]hingpit diha ni Kristo’ [Moroni 10:32]” (“Ang Gasa sa Grasya,” Ensign o Liahona, Mayo 2015, 108).

Pipila ka mga paagi nga masinati nato kini nga kalig-on maglakip sa napalambo nga abilidad sa pagpabiling lig-on bisan pa man sa mga problema, determinasyon, kaisug, pailub, ug pagpadayon, ingon man usab ang napalambo nga pisikal, mental, ug espiritwal nga paglahutay ug gahum.

Diha sa imong scripture study journal, isulat ang usa ka kasinatian sa dihang ang imong hugot nga pagtuo diha ni Jesukristo nakahatag nimo og kalig-on sa pagbuhat og maayo nga butang.

Scripture Mastery—Mga Taga-Filipos 4:13

Ang pagmemorya sa Mga Taga-Filipos 4:13 makatabang nga kining kamatuoran mosantup sa imong hunahuna samtang ikaw o kadtong naglibut kanimo nanlimbasug nga makabaton sa kalig-on nga mabuntog ang mga kalisdanan ug magpuyo nga matarung. Balik-balika og basa ang Mga Taga-Filipos 4:13 sa pagtabang nimo nga mamemorya kini. I-recite kini sa usa ka sakop sa pamilya o higala, ug dapita kana nga tawo sa pagpakigbahin og kasinatian sa dihang ang pagbaton og hugot nga pagtuo diha ni Jesukristo nakahatag niya og kalig-on sa pagbuhat og maayo nga butang. Dayon pirmahi ang imong ngalan diha sa imong scripture study journal.

Mga Taga-Filipos 4:15–23

Gitapos ni Pablo ang iyang epistola ngadto sa mga taga-Filipos pinaagi sa pagpahayag og pasalamat

Diha sa Mga Taga-Filipos 4:15–23 atong mabasa nga si Apostol Pablo mipasalamat pag-usab sa mga Santos nga taga-Filipos alang sa pagsuporta kaniya sa mga panahon sa iyang panginahanglan. Ang mga gasa sa mga Santos makapahimuot nga halad ngadto sa Dios, ug misaad si Pablo nga tubagon usab sa Dios ang ilang mga panginahanglan.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Mga Taga-Filipos 4 ug nahuman kini nga leksyon sa (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: