Unit 23: Day 1

1 Mga Taga-Corinto 15:1–29

Pasiuna

Si Apostol Pablo nakahibalo nga ang pipila ka mga miyembro sa Simbahan sa Corinto nagtudlo nga walay Pagkabanhaw sa mga patay. Siya mipamatuod nga si Jesukristo mibangon gikan sa mga patay ug mipasabut kon unsay kahulugan sa Pagkabanhaw alang sa tanang anak sa Langitnong Amahan.

1 Mga Taga-Corinto 15:1–10

Si Pablo naghatag og ebidensya sa Pagkabanhaw ni Jesukristo

Basaha ang mosunod nga pamahayag ni Presidente Thomas S. Monson: “Akong mga kaigsoonan, kita mokatawa, kita mohilak, kita motrabaho, kita modula, kita mohigugma, kita mabuhi. Ug unya kita mamatay. Kitang tanan mamatay gayud. Ang tanan kinahanglang moagi sa iyang mga ganghaan. Ang kamatayon moabot sa mga tigulang, sa mga gikapoy ug naluya. Mobisita kini sa kabatan-onan samtang anaa sa tumang paglaum ug pagpaabot sa maayong kaugmaon. Ni ang gagmayng mga bata libre niini. Sa mga pulong ni Apostol Pablo, “‘Ug maingon nga ang tawo ginabut-an nga mamatay sa makausa ra’ [Mga Hebreohanon 9:27]” (“Ako Nasayud nga ang Akong Manunubos Buhi!” Ensign o Liahona, Mayo 2007, 24).

Pamalandongi ang mga hunahuna o pagbati nga imong nasinati sa dihang ang usa ka tawo nga imong kaila namatay.

Samtang magtuon ka sa 1 Mga Taga-Corinto 15:1–29, pangita og mga baruganan nga makatabang kanimo kon ang usa ka tawo nga imong kaila mamatay.

Sa pagtapos ni Apostol Pablo sa iyang sulat ngadto sa mga Santos sa Corinto, iyang gihisgutan ang usa ka sayop nga tinuohan nga gitudlo sa ubang mga miyembro sa Simbahan. Basaha ang 1 Mga Taga-Corinto 15:12, nga mangita kon unsa nga sayop nga tinuohan ang gitudlo.

Ngano kaha nga nabalaka man si Pablo niining sayop nga tinuohan?

Basaha ang 1 Mga Taga-Corinto 15:3–8, nga mangita kon unsay gisulat ni Pablo aron sa pagtabang sa mga miyembro sa Simbahan nga makasabut sa katinuod sa Pagkabanhaw sa Manluluwas. (Timan-i nga Cefas ang laing pangalan ni Apostol Pedro.)

Atong makat-unan gikan niini nga mga bersikulo nga ang mga Apostoles nagpamatuod nga si Jesukristo namatay alang sa atong mga sala ug nabanhaw gikan sa mga patay. (Mahimo nimong markahan o timan-an kini nga kamatuoran diha sa imong mga kasulatan.)

Si Presidente Monson mipakigbahin sa mosunod nga pagpamatuod: “Uban sa tanan nakong kasingkasing ug tumang pagbati sa akong kalag, mangusog ako sa akong tingog agig pagpamatuod isip usa ka linain nga saksi ug mamahayag nga ang Dios tinuod gayud nga buhi. Si Jesus Iyang Anak, ang Bugtong Anak sa Amahan diha sa unod. Siya ang atong Manunubos; Siya ang atong Tigpataliwala sa Amahan. Siya kadto ang namatay sa krus aron sa pagtubos sa atong mga kasal-anan. Nahimo Siya nga unang mga bunga sa Pagkabanhaw. Tungod kay Siya namatay, ang tanan gayud mabuhi pag-usab. ‘Matam-is nga pulong kini: “Ang Manunubos ko buhi!”’ [“Ako Nasayud Nga Akong Manunubos Buhi!” Mga Himno ug Mga Awit sa mga Bata, nu. 38]. Hinaut ang tibuok kalibutan masayud niini ug mosunod niana nga kahibalo” (“Ako Nasayud Nga ang Akong Manunubos Buhi!” 25).

Pamalandongi kon sa unsang paagi ang mga pagpamatuod sa mga Apostoles kabahin sa Pagkabanhaw ni Jesukristo nakatabang sa paglig-on sa imong hugot nga pagtuo sa Manluluwas ug sa Iyang Pagkabanhaw.

1 Mga Taga-Corinto 15:11–29

Si Pablo nagpasabut sa doktrina sa Pagkabanhaw

Sama sa narekord diha sa 1 Mga Taga-Corinto 15:11–15, si Apostol Pablo nangutana nganong ang mga Santos nga taga-Corinto nagsugod sa pagduha-duha sa katinuod sa Pagkabanhaw. Siya mirason nga kon wala ang Pagkabanhaw sa mga patay, nan si Jesukristo wala mabanhaw. Ug kon si Jesukristo wala pa mobangon gikan sa mga patay, niana ang tanang mga saksi sa Iyang Pagkabanhaw sayop ug walay pulos ang pagsangyaw sa ebanghelyo.

Si Propeta Joseph Smith mitudlo: “Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini.” (Mga Pagtulun-an sa mga Presidente sa Simbahan: Joseph Smith [2007], 58; ang mga sumpay mao ang mga dugang ngadto sa usa ka butang o mga bahin nga gitipon ngadto sa mas dako nga butang).

1. Kopyaha ang kauban nga tsart diha sa imong scripture study journal. Dayon basaha ang mga tudling sa kasulatan nga gilista diha sa wala nga kolum sa tsart, nga mangita kon unsaon nimo pagkompleto ang katugbang nga mga sentence diha sa tuo nga kolum. Dayon kompletuha ang mga sentence diha sa imong scripture study journal:

   Note that the word firstfruits in 1 Corinthians 15:20 refers to the first crop that is harvested by a farmer. (Timan-i nga ang 1 Mga Taga-Corinto 15:20–22 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)

   1 Mga Taga-Corinto 15:16–19	Kon si Jesus wala pa mobangon gikan sa mga patay, niana …
   1 Mga Taga-Corinto 15:20–22	Tungod kay si Jesus mibangon gikan sa mga patay, niana …

Tan-awa ang pamahayag ni Pablo sa 1 Mga Taga-Corinto 15:19: “Kon niini rang kinabuhia may paglaum kita kang Kristo, nan, sa tanang mga tawo kita mao ang labing takus pagakaloy-an.” Usa ka kamatuoran nga atong makat-unan gikan sa pagpamatuod ni Pablo diha sa mga bersikulo 20–22 mao nga tungod sa Pagkabanhaw ni Jesukristo, kita adunay paglaum.

2. Sa imong scripture study journal, isulat kon sa unsang paagi ang Pagkabanhaw ni Jesukristo makahatag og paglaum kanimo kon ang imong kaila namatay o kon ikaw nahadlok sa imong kaugalingong umaabut nga kamatayon.

3. Tubaga ang usa o duha sa mosunod nga mga assignment diha sa imong scripture study journal:

   1. Isulat ang imong pagpamatuod sa katinuod sa Pagkabanhaw ug sa kaimportante niini diha sa plano sa Langitnong Amahan sa kaluwasan. Ikonsiderar ang pagpakigbahin sa imong pagpamatuod mahitungod sa Pagkabanhaw ngadto sa laing tawo.

   2. Hangyoa ang usa ka ginikanan, higala, o lider sa Simbahan nga ipakigbahin kanimo ang iyang pagpamatuod kabahin sa Pagkabanhaw. Pagsulat kabahin sa unsay imong nakat-unan ug gibati samtang naminaw ka niana nga pagpamatuod.

Sama sa narekord diha sa 1 Mga Taga-Corinto 15:23–24, si Pablo mitudlo nga adunay han-ay sa Pagkabanhaw. Si Jesukristo ang unang mibangon, ug mosunod pagbangon ang Iyang matinud-anong mga sumusunod. Ang Doktrina ug mga Pakigsaad nagtudlo nga kining matinud-anong mga sumusunod makapanunod sa celestial nga himaya (tan-awa sa D&P 76: 50–70; 88: 97–98). Kadtong dili maisugon sa ilang pagpamatuod kabahin ni Jesukristo ug kadtong mga dautan ulahi nga pagabanhawon (tan-awa sa D&P 76:71–86; 88: 99–101). Si Pablo mitudlo usab nga sa “katapusan” (panahon sa Milenyum), si Jesukristo “[motugyan] sa gingharian” ngadto sa Langitnong Amahan human matapos ang tanang porma sa yutan-on (o kalibutanon) nga “kamandoan ug kagahum” (1 Mga Taga-Corinto 15:24).

Basaha ang 1 Mga Taga-Corinto 15:25–26, nga mangita kon unsay gitudlo ni Pablo nga mahitabo sa mga kaaway ni Jesukristo sa panahon sa Milenyum.

Timan-i ang katapusang kaaway nga pagalaglagon ni Jesukristo. Nganong makonsiderar man ang kamatayon nga usa ka kaaway ngadto ni Jesukristo ug sa plano sa Langitnong Amahan? (Tan-awa sa Moises 1:39.)

Basaha ang 1 Mga Taga-Corinto 15:29, nga mangita sa ordinansa nga gipahigayon sa mga Santos nga taga-Corinto.

Sa imong kaugalingong mga pulong, i-summarize kon unsa ang gipangutana ni Pablo sa mga Santos kabahin sa ilang pag-apil sa mga bunyag alang sa mga patay:

Usa ka kamatuoran nga atong makat-unan gikan sa 1 Mga Taga-Corinto 15:29 mao nga kadtong nangamatay nga walay bunyag mahimong modawat niining importante nga ordinansa.

Si Presidente Gordon B. Hinckley mipasabut nga ang mga templo nagbarug isip simbolo sa atong pagtuo diha sa Pagkabanhaw: “Matag templo, dako man kini o gamay, daan o bag-o, maoy usa ka pagpadayag sa atong pagpamatuod nga ang kinabuhi human sa kamatayon tinuod ug sigurado sama sa pagkamortal. Dili na kinahanglanon ang mga templo kon ang espiritu ug kalag sa tawo dili mahangturon. Ang matag ordinansa nga gipahigayon dinhi niining sagrado nga mga balay mahangturon ang mga sangputanan” (“This Peaceful House of God,” Ensign, Mayo 1993, 74).

Payson Utah Temple

Kon nagpuyo ka duol sa templo, paghunahuna og higayon nga mipahigayon ka sa bunyag alang sa mga patay o miandam sa mga ngalan sa imong katigulangan aron madala sa templo. Unsay imong mga pagbati samang nag-andam ka og mga ngalan o mipahigayon sa buhat alang kanila diha sa templo? Kon wala ka magpuyo duol sa templo, ikonsiderar kon unsay imong mabuhat aron sa pagtabang diha sa buhat sa kaluwasan alang sa mga patay.

4. Tubaga ang mosunod nga pangutana diha sa imong scripture study journal: Unsay imong mabuhat aron mas hingpit ka nga makaapil sa family history ug buhat sa templo, ug sa unsang paagi kaha ang imong partisipasyon makatabang sa paglig-on sa imong pagpamatuod sa Pagkabanhaw?

Sa usa ka piraso nga papel, pagsulat og usa ka personal nga tumong kon unsaon nimo nga mas makaapil sa family history ug buhat sa templo. Ibutang ang papel sa usa ka dapit diin makapahinumdom kini kanimo sa pagtrabaho sa imong tumong.

Scripture Mastery—1 Mga Taga-Corinto 15:20–22

5. Ang pagsag-ulo niini nga scripture mastery passage (1 Mga Taga-Corinto 15:20–22) makatabang nimo nga makabaton sa mga pulong ug salabutan aron sa pagtabang nimo sa pagtudlo sa doktrina sa Pagkabanhaw ngadto sa uban. Paggahin og pipila ka gutlo sa pagsag-ulo sa bersikulo 22, ug dayon i-recite kini nga dili motan-aw sa imong mga kasulatan. Buhata usab kini sa bersikulo 21, mag-recite sa mga bersikulo 21–22; ug dayon bersikulo 20, mag-recite sa tulo ka mga bersikulo nga pasunod. Sa katapusan, sulayi pagsulat ang tibuok scripture mastery passage diha sa imong scripture study journal basi sa imong nasag-ulo.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Mga Taga-Corinto 15:1–29 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: