Pasiuna sa Mga Taga-Galacia

Ngano nga Kinahanglang Tun-an Kini nga Basahon?

Ang Epistola [Sulat] ni Pablo ang Apostol ngadto sa Mga Taga-Galacia gisulat ngadto sa mga Kristiyano nga Judeo nga nagpalayo sa Ginoo pinaagi sa pagsalig na usab sa mga buhat sa balaod ni Moises. Si Apostol Pablo naninguha sa pagkorihir niini nga problema pinaagi sa paghatag og gibug-aton sa kalainan tali sa bug-at nga “yugo” sa balaod ni Moises, nga miresulta sa espirituhanong pagkaulipon, ug sa ebanghelyo ni Jesukristo, nga moresulta sa espirituhanong kagawasan. Ang pagtuon niini nga epistola makatabang nimo nga mas makapasalamat sa kagawasan nga gitanyag pinaagi sa ebanghelyo ni Jesukristo.

Kinsa ang Nagsulat Niini nga Basahon?

Si Apostol Pablo ang misulat sa Mga Taga-Galacia (tan-awa sa Mga Taga-Galacia 1:1).

Kanus-a ug Diin Kini Gisulat?

Posible nga gisulat ni Pablo ang iyang Epistola ngadto sa Mga Taga-Galacia samtang nagbiyahe agi sa Macedonia atol sa iyang ikatulong misyonaryo nga biyahe mga A.D. 55–57 (tan-awa sa Bible Dictionary sa LDS English version sa Biblia, “Pauline Epistles”).

Para kang Kinsa Kini Gisulat ug Ngano?

“Adunay pipila ka butang nga dili sigurado kon unsa nga mga simbahan ang gitumong niini nga epistola. Mahimong sa amihanang Galacia kini, ang distrito diin ang Ancyra mao ang kapital, o sa distrito sa mga utlanan sa Frigia ug Galacia nga nabisitahan ni Pablo sa iyang unang misyonaryo nga biyahe. Sa bisan hain nga kahimtang ang mga simbahan sa Galacia siguradong nabisitahan ni Pablo sa iyang ikaduha (Mga Buhat 16:6) ug ikatulong (Mga Buhat 18:23) mga biyahe” (Bible Dictionary sa LDS English version sa Biblia, “Pauline Epistles”).

Misulat si Pablo ngadto sa mga Santos sa Galacia tungod kay hilabihan ang iyang kabalaka nga nagpalayo sila sa Ginoo pinaagi sa pagsunod sa mga pagtulun-an sa uban nga buot “magatuis sa Maayong Balita [ebanghelyo] mahitungod kang Kristo” (tan-awa sa Mga Taga-Galacia 1:6–7). Ang mga Kristiyano nga Judeo nagtudlo sa mga Kristiyano nga hentil sa sayop nga doktrina nga kinahanglan sila nga magpasirkunsisyon ug motuman sa ritwal nga mga gikinahanglan sa balaod ni Moises aron maluwas (tan-awa sa Mga Taga-Galacia 6:12; tan-awa usab sa Mga Buhat 15:1). Ang ubang mga Santos sa Galacia mihangup sa mga pagtulun-an niining mga tawhana (tan-awa sa Mga Taga-Galacia 4:10).

Ang nag-unang mga katuyoan ni Pablo sa pagsulat niini nga epistola naglakip sa:

Pagpanalipod sa iyang kaugalingon batok sa mga pasangil sa mini nga mga magtutudlo nga misupak kaniya.
Pagtudlo nga ang tanang mga tawo, Judeo man o Hentil, maluwas pinaagi sa Pag-ula ni Jesukristo pinaagi sa pagbutang sa ilang hugot nga pagtuo kang Jesukristo imbis nga magsalig sa mga buhat sa balaod ni Moises.
Pagklaro sa tahas sa balaod ni Moises diha sa plano sa Dios.
Paghatag og kalainan tali sa karaang pakigsaad nga gihimo sa Dios pinaagi kang Moises ug sa bag-ong pakigsaad diha ni Kristo.
Pagtawag sa mga Santos nga magpakabuhi pinaagi sa Espiritu.

Unsa Ang Pipila ka mga Butang nga Nakalahi Niini nga Basahon?

Ang basahon sa Mga Taga-Galacia naila isip ang labing emosyonal nga sulat ni Pablo, diin mihatag siya og grabe nga pagbadlong sa mga miyembro sa Simbahan nga nahisalaag ug sa mini nga mga magtutudlo nga mipahisalaag kanila. Ang Mga Taga-Galacia naglangkob sa labing una sa sinulat nga pagpresentar bahin sa doktrina sa pagpangatarungan—dili kita makapangatarungan pinaagi sa mga buhat sa balaod ni Moises apan pinaagi sa hugot nga pagtuo diha ni Jesukristo. Ang epistola mihatag og kalainan sa “mga buhat sa unod” ngadto sa “bunga sa Espiritu” (tan-awa sa Mga Taga-Galacia 5:16–25).

Outline

Mga Taga-Galacia 1–2. Misulat si Pablo ngadto sa mga Santos nga taga-Galacia tungod kay nagpalayo sila sa Ginoo ug mihangup sa sayop nga mga pagtulun-an. Gipanalipdan niya ang iyang tawag isip usa ka Apostol pinaagi sa pagsaysay sa iyang pagsupak pirmero sa Simbahan ug sa iyang pagkakabig. Gihatagan niya og gibug-aton nga nakadawat siya og pinadayag direkta gikan sa Dios ug giklaro nga ang iyang pagpangalagad ngadto sa mga Hentil giaprubahan sa mga Apostoles. Gisulti niya nga kausa wala siya miuyon kang Pedro kalabut sa mga Santos nga hentil. Gitudlo niya nga ang mga tawo dili makapangatarungan pinaagi sa mga buhat sa balaod ni Moises apan pinaagi sa hugot nga pagtuo diha ni Jesukristo.

Mga Taga-Galacia 3–4. Gipanalipdan ni Pablo ang mensahe sa ebanghelyo. Nagtudlo siya nga si Abraham usa ka ehemplo sa tawo nga makapangatarungan pinaagi sa hugot nga pagtuo ug dili pinaagi sa mga buhat sa balaod ni Moises. Pinaagi sa Pag-ula, gitubos ni Jesukristo ang katawhan gikan sa tunglo sa balaod. Ang katuyoan sa balaod ni Moises mao ang mahimong “magtatagad sa pag-agak ngadto kang Kristo” (Mga Taga-Galacia 3:24). Pinaagi sa hugot nga pagtuo ug sa bunyag, ang mga Santos makadawat og mga panalangin sa Pag-ula, mosulod sa pakigsaad sa ebanghelyo, mahimong manununod sa Dios pinaagi kang Kristo, ug dili na mga sulugoon apan mga anak sa Dios.

Mga Taga-Galacia 5–6. Nanawagan si Pablo sa mga Santos nga magpabilin nga lig-on diha sa pakigsaad sa ebanghelyo nga gitanyag ni Kristo. Gihatagan ni Pablo og kalainan ang kinabuhi sa usa ka tawo nga nalambigit sa “mga buhat sa unod” (Mga Taga-Galacia 5:19) ngadto sa usa ka tawo nga nakatagamtam sa “bunga sa Espiritu” (Mga Taga-Galacia 5:22). Nagtudlo siya nga ang mga Santos kinahanglang mopas-an sa palas-anon sa usag usa ug dili maluya sa pagbuhat og maayo. Atong anihon kon unsay atong gipugas.