Gitudloan ni Apostol Pablo ang mga Santos nga Hebreohanon, o mga Judeo nga Kristiyanos, mahitungod sa tinuod nga kinaiyahan ni Jesukristo. Gitudlo usab niya ngadto nila ang mahitungod sa Pag-ula sa Manluluwas ug ang pipila ka mga panalangin nga moabut isip resulta sa Pag-ula. Gipakigbahin ni Pablo ang kasinatian sa karaang mga Israelite nga nahisalaag sa kamingawan sa pagtudlo sa mga Santos kon unsay kinahanglan gayud nilang buhaton aron makasulod sa kapahulayan sa Ginoo.
Gitudlo ni Pablo ang mahitungod sa kinaiyahan ni Jesukristo
Basaha ang mosunod nga mga sitwasyon [scenario]:
Usa ka batan-ong babaye napul-an na sa tawag sa iyaha nga “buotan” nga babaye tungod kay dili siya moapil sa pipila ka mga kalihokan sa iyang mga higala. Naghunahuna siya nga lugakan lang una niya ang pagsunod sa mga sumbanan aron makig-uban siya sa grupo.
Usa ka batan-ong lalaki nga nagserbisyo og misyon nakamatikud nga ang misyonaryo nga buhat mas lisud kay sa iyang gidahuman, ug naghunahuna siya nga mopauli.
Unsa ang komon niini nga mga sitwasyon? Unsa ang ubang mga rason nganong undangon man sa ubang tawo ang ilang mga paningkamot sa pagbuhat sa butang nga nahibaloan nilang eksakto?
Gihimo ni Apostol Pablo kini nga Sulat ngadto sa mga Hebreohanon dihang ang pipila ka mga Judeo (o Hebreohanon) nga mga kinabig wala na magtambungan og mga miting sa Simbahan tungod sa pagpanggukod ug ubang matang sa pagpamugos [pressure]. Mibalik sila sa mga butang nga komon ug, mao nga, mibati nga may kasiguroan sa naandang pagsimba sa mga Judeo, nga wala maglakip sa pagtuo kang Jesukristo (tan-awa sa Mga Hebreohanon 10:25, 38–39). Gihimo ni Pablo kini nga sulat sa pag-awhag niini nga mga miyembro sa Simbahan sa pagpabiling matinud-anon kang Jesukristo.
Samtang imong tun-an kini nga sulat ngadto sa mga Hebreohanon, pangita og mga kamatuoran nga makatabang nimo sa pagpabiling matinud-anon kang Kristo kon bation nimo nga maayo nang iundang.
Basaha ang Mga Hebreohanon 1:1–3, 10, nga mangita og mga doktrina nga gitudlo ni Pablo sa Judeo nga mga Santos mahitungod sa Manluluwas.
Diha sa imong scripture study journal, isulat ang mga doktrina mahitungod ni Jesukristo nga imong makit-an diha sa Mga Hebreohanon 1:1–3, 10. Sama pananglit, gikan sa mga bersikulo 2 ug 10 imong mahibaloan ang mosunod nga doktrina: Gimugna ni Jesukristo ang mga langit ug yuta. Samtang tutukan nimo pag-ayo imong madiskubrihan nga kini nga mga bersikulo nagtudlo og daghang dugang nga makahuluganong mga doktrina mahitungod sa Manluluwas.
Bantayi ang mga pulong nga “tukma nga hulad sa iyang kinaiya” diha sa Mga Hebreohanon 1:3. Kini nga mga pulong nagpasabut nga si Jesukristo sama og panagway sa Langitnong Amahan ug mipakigbahin sa Iyang balaanon nga kinaiya. Ang mga pulong nga “nagasapnay sa kalibutan pinaagi sa gamhanan nga gipamulong niya” sa mao gihapon nga bersikulo nagpasabut nga si Jesukristo gamhanan sa tanan.
Hunahunaa kon asa niana nga mga kamatuoran nga imong nahibaloan diha sa Mga Hebreohanon 1:1–3, 10 ang tingali makatabang nimo kon ikaw tintalon nga mopahilayo sa pagbuhat sa kabubut-on sa Ginoo.
Ang tema nga sagad makit-an diha sa Mga Hebreohanon mao ang pagkalabaw ni Jesukristo. Sama pananglit, diha sa Mga Hebreohanon 1:4–14, gipakita ni Pablo nga ang Manluluwas mas labaw kay sa mga anghel. Sa sunod nga mga kapitulo, padayon niya nga gipakita ang kahamili ug pagkalabaw ni Kristo.
Ngano kaha nga ang pagkaila nga si Jesukristo mas labaw kay sa tanang butang makatabang sa tawo nga nagkalisud sa pagpabiling matinud-anon Kaniya?
Ipadayon ang pagpangita niini nga tema samtang tun-an nimo ang nahibilin sa sulat ni Pablo ngadto sa mga Hebreohanon.
Gitudlo ni Pablo nga si Jesukristo mao ang Kapitan [Tigpasiugda] sa atong kaluwasan
Hunahunaa ang proseso sa pagpili og usa ka kapitan [tigpasiugda] o lider sa lain-laing mga team o pundok nga imong apilan (sama pananglit, sa athletics, debate, drama, o mga club sa eskwelahan). Unsa nga mga kwalipikasyon ang imong pangitaon kon magpili ka og kapitan o lider?
Diha sa Mga Hebreohanon 2, gidugang sa pagpasabut ni Apostol Pablo ang mahitungod sa kinaiyahan ug pagkatawo ni Jesukristo ngadto sa mga kinabig nga mga Judeo aron matabangan sila nga makasabut nganong gikinahanglan nga sila mosunod Kaniya. Basaha ang Mga Hebreohanon 2:10, nga mangita sa gitudlo ni Pablo nga si Jesukristo mao ang kapitan.
Gikan niini nga bersikulo atong makat-unan nga si Jesukristo mao ang Tigpasiugda sa atong kaluwasan.
Tubaga ang mosunod nga pangutana diha sa imong scripture study journal: Sa unsang paagi si Jesukristo ang Tigpasiugda sa atong kaluwasan?
Basaha ang Mga Hebreohanon 2:8–9, 14–18 nga mangita sa mga pulong nga naghulagway nganong ang Manluluwas kwalipikado nga mahimong Tigpasiugda sa atong kaluwasan. Mahimo nimong markahan ang unsay imong makit-an.
Diha sa Mga Hebreohanon 2:9, ang gitudlo ni Pablo nga si Jesukristo “sa makadiyot nahimo una nga ubos sa mga manolunda” nagpasabut sa pagkanaog sa Manluluwas gikan sa Iyang premortal nga trono aron mosinati sa mortalidad ug sa Iyang pag-antus ug kamatayon, diin Siya “nakasinati sa tanan nga mga butang” (D&P 88:6). Ang mga pulong nga “nakaambit man sa unod ug dugo” diha sa Mga Hebreohanon 2:14 nagpasabut nga kita mga mortal. Ang mga pulong nga “paghimog halad-pasiuli [reconciliation] alang sa mga sala sa katawhan” diha sa Mga Hebreohanon 2:17 nagpasabut nga si Kristo nakahimo sa pagtubos sa atong mga sala.
Sumala sa bersikulo 9, unsa ang gihimo ni Jesus para sa tanang katawhan? Sumala sa bersikulo 14, kinsa ang iyang gibuntog pinaagi sa Iyang Pag-ula?
Timan-i nga si Pablo wala lamang mag-refer sa Manluluwas isip Tigpasiugda sa atong kaluwasan, apan siya mitawag usab Kaniya og “maloloy-on ug kasaligang labawng sacerdote [high priest]” (Mga Hebreohanon 2:17). Gipahisama ni Pablo si Jesukristo ngadto sa usa ka Judeo nga high priest tungod kay ang high priest gitan-aw nga usa ka tigpataliwala tali sa mga tawo ug sa Dios.
Sumala sa Mga Hebreohanon 2:18, ngano nga ang Manluluwas nakahimo man sa pagluwas (paghupay o pagtabang) kanato?
Basaha ang Mga Hebreohanon 4:14–16, nga mangita og dugang nga panabut nga gihatag ni Pablo kon sa unsang paagi ang Manluluwas usa ka maloloy-on ug matinud-anong high priest.
Gikan sa Mga Hebreohanon 2:17–18 ug sa 4:14–16, atong mahibaloan ang mosunod nga kamatuoran: Tungod kay si Jesukristo nag-antus ug gitintal sa tanang butang, Siya hingpit nga nakasabut kanato ug makatabang kanato sa mga panahon sa panginahanglan. (Tan-awa usab sa Alma 7:11–13.)
Sa imong scripture study journal, isulat ang imong mga pagbati kon sa unsang paagi ang mga kamatuoran nga nailhan o nahibaloan diha sa Mga Hebreohanon 2 makatabang kanimo nga magmasaligon sa imong desisyon nga sundon si Jesukristo isip imong lider.
Gitudlo ni Pablo kon unsaon nato sa pagsulod sa kapahulayan sa Ginoo
Unsa nga butang ang gibati nimo nga usahay makabalaka o makahingawa? Hunahunaa kon unsaon nimo sa pagkaplag og kalinaw ug kapahulayan gikan niini ug sa ubang tinubdan sa kasamok ug kahingawa.
Sa kapanahunan ni Pablo ang Judeo nga mga Santos gipanggukod tungod sa pagsunod sa ebanghelyo ni Jesukristo. Sigun sa narekord sa Mga Hebreohanon 3–4, gihisgutan ni Pablo ang kasinatian gikan sa Daang Tugon aron sa pagtudlo sa mga Santos kon unsaon sa pagkaplag og kapahulayan sa kinabuhi karon ug sa sunod.
Sa karaang panahon, human nga nakalayas sila gikan sa Ehipto, nasuko ang Ginoo sa mga anak sa Israel tungod sa ilang pagsupak. Isip sangputanan, wala sila tuguti nga makasulod sa kapahulayan sa Ginoo (tan-awa sa Numeros 14; Jacob 1:7–8; Alma 12:33–37; 13:6, 12–13, 28–29).
Ikonsiderar ang pagmarka sa mga pulong nga “akong kapahulayan” diha sa Mga Hebreohanon 3:11.
Basaha ang Doktrina ug mga Pakigsaad 84:24, nga mangita kon unsa nga tudling ang nagtudlo mahitungod sa kapahulayan sa Ginoo.
Imahe
Elder Bruce R. McConkie
Si Elder Bruce R. McConkie sa Korum sa Napulog Duha ka mga Apostoles mitudlo nga, “Ang tinuod nga mga santos makasulod ngadto sa kapahulayan sa Ginoo samtang ania niining kinabuhia, ug pinaagi sa pagtuman sa kamatuoran, padayon sila nianang bulahan nga kahimtang hangtud nga sila mopahulay kauban sa Ginoo didto sa langit. … Ang kapahulayan sa Ginoo, kon ang pagkamortal ang hisgutan, mao ang pagkaangkon og hingpit nga kahibalo sa kabalaan sa talagsaong buhat sa ulahing mga adlaw. … Ang kapahulayan sa Ginoo, sa kahangturan, mao ang pagkaangkon og kahingpitan sa himaya sa Ginoo” (Mormon Doctrine, 2nd ed. [1966], 633).
Basaha ang Mga Hebreohanon 4:1 nga mangita sa gikabalak-an ni Pablo nga dili unya mabuhat sa pipila ka mga miyembro sa Simbahan.
Timan-i ang mga pulong nga “ayaw ninyo pagahia ang inyong mga kasingkasing” (Mga Hebreohanon 3:8, 15; 4:7). Kini nga mga pulong nagpasabut nga kinahanglang dili nato sirad-an ang atong mga kasingkasing ngadto sa kamatuoran ug inspirasyon; kinahanglang ablihan nato kanunay ang atong mga kasingkasing, andam, ug magmasulundon sa Dios ug sa Iyang mga sugo.
Gikan sa mga pagtulun-an ni Pablo atong makat-unan nga kon magpabilin kitang matinud-anon sa Manluluwas ug dili pagahion ang atong mga kasingkasing, makasulod kita ngadto sa kapahulayan sa Ginoo.
Sa unsang mga paagi nga ang pagpili nga motuo sa Manluluwas ug pag-abli kanunay sa atong mga kasingkasing ngadto sa katuyoan ug plano sa Dios makatabang nato sa pagpabiling matinud-anon sa Ginoo? Paghunahuna og tawo nga imong nailhan kinsa usa ka maayong ehemplo bahin niini nga baruganan. Sa piho nga paagi unsa ang gihimo niining tawhana aron magpabiling matinud-anon?
Sa imong scripture study journal, isulat kon unsay imong buhaton aron magpabiling matinud-anon ngadto ni Jesukristo ug abli kanunay ang imong kasingkasing ngadto Kaniya.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Mga Hebreohanon 1-4 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: