Unit 4: Day 3
Mateo 15
Pasiuna
Samtang Siya didto sa Galilea, gipasabut ni Jesus ngadto sa mga escriba ug mga Pariseo ngano ang Iyang mga disipulo wala mosunod sa tradisyon sa paglimpyo sa ilang mga kaugalingon pinaagi sa paghugas sa ilang mga kamot sa dili pa mokaon. Dayon Siya mibiyahe ngadto sa kabaybayonan sa Mediterranean, diin Iyang giayo ang anak nga babaye sa usa ka Hentil nga babaye. Dayon si Jesus mibalik ngadto sa Galilea, diin daghan ang Iyang gipang-ayo ug milagrosong gipakaon ang labaw sa 4,000 ka katawhan.
Mateo 15:1–20
Nangutana ang mga Pariseo nganong ang mga disipulo ni Jesus dili manghugas sa ilang mga kamot sa dili pa sila mokaon
Basaha ang mosunod nga mga sitwasyon, nga mangita sa unsay kasagarang anaa kanila.
-
Usa ka batan-ong babaye giawhag sa iyang mga higala sa pagsul-ob og dili angay nga igsinina ngadto sa usa ka sayaw sa eskwelahan. Ang batan-ong babaye nahibalo nga ang igsinina dili makapasar sa sumbanan sa Ginoo sa ligdong nga paninina, bisan kon kini gidawat sa kinatibuk-an sa iyang kultura nga magsul-ob og igsinina nga sama niini.
-
Usa ka batan-ong lalaki sakop sa usa ka pamilya nga Santos sa Ulahing mga Adlaw nga gusto og mga bangga sa sport. Kon ang bantugang mga bangga sa sport ipakita sa telebisyon, ang pamilya kasagaran nga mohiklin sa pamilyang pag-ampo, pagtuon sa kasulatan, family home evening, pagsimba inig ka Dominggo sa Simbahan aron manan-aw sa mga bangga.
-
Usa ka batan-ong pares ang nangandam alang sa kaminyoon. Nagpuyo sila sa usa ka dapit nga gidawat sa kadaghanan ang pag-apil og sekswal nga relasyon bisan dili pa minyo. Pipila ka mga tawo ang misulti niini nga pares nga sila kinaraan ug salikwaut sa paghulat nga maminyo aron makahimo og panghilawas.
Imo tingaling natan-aw nga ang kada sitwasyon nagpakita og panagsupak tali sa pagsunod sa mga sugo sa Dios ug pagbuhat sumala sa mga tradisyon o mga kostumbre. Ang mga tradisyon o mga kostumbre naglakip og mga tinuohan ug mga nabatasan sa usa ka kultura, komunidad, pamilya, o grupo sa mga higala.
-
Diha sa imong scripture study journal, pagsulat og usa o dugang pa nga mga tradisyon o mga kostumbre nga magpugong kanimo gikan sa pagsunod sa mga sugo sa Dios. Samtang imong tun-an ang Mateo 15, pangitaa ang mga kamatuoran nga makatabang kanimo kon ikaw kinahanglan nga mopili tali sa pagsunod sa mga sugo sa Dios ug sa pag-apil diha sa mga tradisyon ug mga kostumbre.
Basaha ang Mateo 15:1–2, nga mangita mahitungod sa tradisyon nga gipangutana sa mga escriba ug mga Pariseo ni Jesus. Unsa nga tradisyon ang wala sunda sa mga disipulo ni Jesus?
Ang paghugas sa kamot nga gihisgutan sa mga Pariseo ug mga escriba nagpasabut ngadto sa seremonyas nga paghugas alang sa ritwal nga pagkaputli ug wala magpasabut og paghugas alang sa kalimpyo.
Basaha ang Mateo 15:3, nga mangita sa tubag ni Jesus sa ilang pangutana. Mahimo nimong markahan diha sa imong mga kasulatan unsay gisulti sa Manluluwas nga gibuhat sa mga escriba ug mga Pariseo pinaagi sa pagsunod sa ilang mga tradisyon.
Ingon nga narekord diha sa Mateo 15:4–6, si Jesus miila og usa ka ehemplo kon giunsa sa mga escriba ug mga Pariseo paglapas ang usa ka sugo sa Dios pinaagi sa pag-apil sa ilang mga tradisyon. Gilikayan nila ang pagtuman sa ilang obligasyon sa pag-amuma sa ilang tigulang nga mga ginikanan pinaagi sa pagpahayag nga ang ilang salapi giandam isip usa ka gasa ngadto sa Dios, o Korban (tan-awa sa Marcos 7:10–12; ). Sa pagbuhat sa mao, gilapas nila ang sugo sa pagtahud sa amahan ug sa inahan.
Basaha ang Mateo 15:7–9, nga mangita sa unsay gigiya sa mga escriba ug mga Pariseo nga buhaton sa mga tawo pinaagi sa paggamit sa ilang mga tradisyon isip usa ka pasangil sa dili pagsunod sa mga sugo sa Dios.
Gikan niini nga mga bersikulo atong nakat-unan ang mosunod nga baruganan: Kon kita magtinguha sa pagpaduol ngadto sa Dios, kinahanglan gayud kita mobutang sa Iyang mga sugo ibabaw sa bisan hain nga mga tradisyon ug mga kostumbre nga kita aduna.
Basaha og usab ang mga sitwasyon gikan sa sinugdanan niini nga leksyon. Alang sa kada sitwasyon, pamalandungi ang mosunod nga duha ka mga pangutana:
-
Unsa ang mabuhat sa indibidwal o mga indibidwal niini nga sitwasyon sa pagsunod sa mga sugo sa Dios?
-
Sa unsa nga paagi nga ang pagbuhat niini nagtabang sa indibidwal o mga indibidwal sa pagpaduol ngadto sa Dios?
-
-
Unsa ang gikinahanglan nimong buhaton aron sa pagbutang sa mga sugo sa Dios ibabaw sa ubang mga tradisyon o mga kostumbre aron ka mapaduol ngadto Kaniya?
-
Giunsa niini pagtabang kanimo nga mas mapaduol ngadto sa Langitnong Amahan?
-
Hinumdumi nga ang mga escriba ug mga Pariseo mituo nga ang pagkaon nga walay himoon nga seremonyas sa paghugas sa mga kamot mohugaw sa usa ka tawo, o mohimo niana nga tawo og hugaw sa espirituhanong paagi. Basaha ang Mateo 15:10–11, mangita sa unsay gitudlo sa Manluluwas nga sa tinuod naghugaw kanato. Mahimo nimong markahan ang unsay imong nakit-an.
Ang Manluluwas miingon, “Ang magagula sa ba-ba … kini mao ang makapahugaw sa tawo” (Mateo 15:11). Dayon, human sultihi ang Iyang mga disipulo sa dili pagpakabalaka sa ilang mga kaugalingon uban sa mga Pariseo kinsa nasakitan sa Iyang mga pulong (tan-awa sa Mateo 15:12–16), mipadayon pa Siya og pasabut mahitungod sa unsa gayud sa tinuod ang makahugaw kanato.
Basaha ang Mateo 15:17–20, nga mangita sa unsay gisulti sa Manluluwas nga makahugaw kanato.
Diha sa mga kasulatan, ang kasingkasing kasagaran nagrepresentar sa atong mga hunahuna ug mga tinguha. Unsa ang gisulti sa Manluluwas nga sa tinuod makahugaw kanato?
Kompletuha ang mosunod nga baruganan pinasikad sa mga pagtulun-an sa Manluluwas diha sa Mateo 15:19–20: Kon mopili kita sa pag-abiabi sa dautang mga hunahuna ug mga tinguha, niana .
-
Mateo 15:21–28
Giayo sa Manluluwas ang anak nga babaye sa Hentil nga babaye
Diha sa mosunod nga luna, paglista og usa o sobra pa sa imong matarung nga mga tinguha.
Samtang ikaw nagpadayon sa pagtuon sa Mateo 15, pangitaa ang mga baruganan nga makatabang kanimo sa pagsabut unsay imong kinahanglan nga buhaton aron madawat ang imong matarung nga mga tinguha.
Kon kini anaa sa imong mga kasulatan, tan-awa ang mapa sa Biblia nu. 11, “Ang Balaang Yuta sa mga Panahon sa Bag-ong Tugon.” Pangitaa ang mga siyudad sa Tiro ug Sidon diha sa mapa. Samtang si Jesus mibiyahe gikan sa Galilea ngadto sa kabaybayon sa siyudad sa Tiro ug Sidon, nasugatan Niya ang usa ka babayeng Canaanhon. Sama sa daghang uban nga mga tawo niana nga rehiyon, kini nga babaye usa ka Hentil—nagpasabut nga siya dili usa ka Judeo. Niana nga panahon ang misyon sa Manluluwas mao ang pagsangyaw sa ebanghelyo ngadto lamang sa mga Judeo ug dili pa ngadto sa mga Hentil (tan-awa sa Mateo 10:5–6).
Basaha ang Mateo 15:21–27, nga mangita og mga tubag sa mosunod nga mga pangutana:
-
Unsay matarung nga tinguha nga aduna ang Canaanhon nga babaye?
-
Unsa ang gibuhat ug gisulti sa babaye nga nagpakita sa iyang hugot nga pagtuo ni Jesukristo?
Tan-awa nga ang kasusama sa pagkumparar sa mga Hentil ngadto sa binuhi nga mga iro misulay sa hugot nga pagtuo niini nga babaye. Sa unsang paagi nga ang tubag sa babaye niini nga pasumbingay nagpakita sa iyang hugot nga pagtuo ni Jesukristo?
Basaha ang Mateo 15:28, nga mangita sa unsay gibuhat sa Manluluwas alang niini nga babaye.
Nganong gihimo Niya kini?
Gikan niini nga istorya atong nakat-unan nga samtang kita naggamit sa atong hugot nga pagtuo diha ni Jesukristo, makadawat kita og mga panalangin sumala sa atong matarung nga mga tinguha.
Pamalandungi ang mosunod nga mga pangutana: Agi og dugang sa kanunay nga pagpangayo sa Langitnong Amahan sa pagpanalangin kanato sumala sa atong matarung nga mga tinguha, unsa pa ang atong mabuhat sa paggamit og hugot nga pagtuo diha ni Jesukristo?
Basaha ang mosunod nga pahayag ni Elder Dallin H. Oaks, sa Korum sa Napulog Duha ka mga Apostoles.
“Kon kita adunay hugot nga pagtuo diha ni Ginoong Jesukristo, kinahanglan gayud nga kita adunay pagsalig Kaniya. Kita kinahanglan gayud nga mosalig kaniya igo nga kita kontento nga modawat sa iyang kabubut-on, nahibalo nga siya nasayud unsay labing maayo alang kanato. …
“… Ang hugot nga pagtuo, bisan unsa kalig-on niini, dili makahimo og resulta nga supak ngadto sa kabubut-on kaniya kansang gahum kini iya. Ang paggamit og hugot nga pagtuo diha ni Ginoong Jesukristo kanunay nga nag-agad sa lagda sa langit, sa kaayo ug kabubut-on ug kaalam ug panahon sa Ginoo. Mao kana ngano nga kita dili makabaton og tinuod nga hugot nga pagtuo diha sa Ginoo kon walay hingpit nga pagsalig sa kabubut-on sa Dios ug sa panahon sa Ginoo” (“Faith in the Lord Jesus Christ,” Ensign, Mayo 1994, 99–100).
Sa unsa nga paagi ang pagpasabut ni Elder Oaks sa unsay kahulugan sa paggamit og hugot nga pagtuo diha ni Jesukristo nagtabang kanato kon ang Ginoo dili diha-diha dayon mopanalangin kanato sumala sa atong matarung nga mga tinguha?
-
Mateo 15:29–39
Nagpakaon si Jesus og sobra sa 4,000 ka mga sumusunod gikan sa pito ka pirasong pan ug pipila ka mga isda
Ingon nga narekord diha sa Mateo 15:29–39, si Jesukristo mibalik ngadto sa Galilea. Samtang Siya tua didto, daghang mga tawo ang mipundok Kaniya. Ang mga kasulatan nagrekord nga “dihay upat ka libong mga lalaki, gawas sa mga babaye ug sa mga bata” (Mateo 15:38), lakip sa mga katawhan kinsa nag-antus gikan sa nagkalainlaing pisikal nga mga sakit ug mga pagkabaldado. Giayo sila sa Manluluwas, ug human ang mga tawo migahin og tulo ka adlaw uban Kaniya, mihimo Siya og lain nga milagro pinaagi sa pagpakaon kanilang tanan sa pito lamang ka pirasong pan ug pipila ka gagmay nga mga isda.
-
Akong natun-an ang Mateo 15 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: