Unit 9: Day 1

Marcos 10–16

Pasiuna

Duol sa katapusan sa Iyang mortal nga pangalagad, ang Manluluwas mibiya sa Galilea ug mibiyahe agi sa Perea, usa ka dapit sa sidlakan sa Suba Jordan, sa Iyang pagpaingon sa Jerusalem. Samtang didto sa Perea, gidapit Niya ang gagmayng mga bata sa pagduol ngadto Kaniya ug mitambag sa usa ka dato nga batan-ong punoan sa pagbaligya sa tanan niyang katigayunan ug mosunod Kaniya. Sa Jerusalem ang Manluluwas nag-obserbar sa usa ka kabus nga biyuda nga mihatag sa iyang diyot ngadto sa panudlanan sa templo. Sa wala madugay, samtang nanihapon didto sa Betania, si Maria midihog ni Jesus agig pagpangandam sa Iyang paglubong. Ang Manluluwas nag-antus sa Getsemani, ug Siya sa wala madugay gihusay ug gihukman nga mamatay. Human sa Iyang kamatayon diha sa krus ug nabanhaw, ang Ginoo mipakita ngadto sa Iyang mga Apostoles ug misugo kanila sa pagdala sa ebanghelyo ngadto sa kalibutan.

Marcos 10:1–16

Si Jesus nagtudlo sa doktrina sa kaminyoon ug nagdapit sa gagmayng mga bata sa pagduol ngadto Kaniya

Paghunahuna mahitungod sa gagmayng mga bata nga imong nailhan.

Unsa nga mga kalidad o mga kinaiya ang imong gidayeg sa gagmayng mga bata?

Samtang ikaw magtuon sa Marcos 10:1–16, pangita og kamatuoran nga nagtudlo nganong kita kinahanglang mahisama sa gagmayng mga bata.

Sa Marcos 10:1–12 atong mabasa unsay gitudlo sa Manluluwas sa mga tawo mahitungod sa importansya sa kaminyoon. Alang sa dugang impormasyon mahitungod sa mga pagtulun-an sa Manluluwas, mahimo kang motan-aw sa luyo sa materyal alang sa Mateo 19:1–12.

Kabahin sa mga pagtulun-an ni Jesukristo sa kaminyoon ug panagbulag sa Mateo 19:1–12 ug sa Marcos 10:1–12, si Elder Bruce R. McConkie sa Korum sa Napulog Duha ka mga Apostoles mitudlo:

“Sumala sa narekord dinhi, ang pagtulun-an sa atong Ginoo mahitungod sa kaminyoon ug panagbulag mga tipik ug dili kompleto. Masabtan lamang kini kon ikonsiderar ang koneksyon ngadto sa balaod sa celestial nga kaminyoon ingon nga gipadayag pag-usab niining moderno nga mga panahon. Kining sama nga kinatibuk-ang mga baruganan nga nagdumala sa kaminyoon nahibaloan ug nasabtan sa mga tinun-an sa panahon ni Jesus ug usab, sa labing minus nga bahin, sa mga Pariseo. Apan ang mga istorya dinhi nga gipatunhay ni Mateo ug Marcos gikan sa panaghisgutan sa Manluluwas bahin sa kaminyoon ug panagbulag gimubo ug gilaktod pag-ayo nga kini wala maghatag og klarong hulagway sa problema. …

“… Ang panagbulag dili bahin sa plano sa ebanghelyo bisan unsa pa nga matang sa kaminyoon ang gihimo. Apan tungod kay ang mga tawo sa tinuod dili kanunay magpuyo nga nauyon sa mga sumbanan sa ebanghelyo, ang Ginoo nagtugot og panagbulag sa usa ka rason o sa lain, nag-agad sa espirituhanong kalig-on sa tawo nga nalakip. … Karon nga panahon ang mga panagbulag gitugutan pinasubay sa sibil nga mga balaod, ug ang mga tawo nga nagbulag gitugutan sa Simbahan nga magminyo og usab nga walay lama sa imoralidad diin ubos sa usa ka mas balaan nga sistema moresulta niana nga paagi” (Doctrinal New Testament Commentary, 3 vols. [1965–73], 1:546–47).

Basaha ang Marcos 10:13–14, nga mangita kon unsay nahitabo sa dihang ang pipila sa mga tawo nagdala og gagmayng mga bata aron makita si Jesus.

Basaha ang Marcos 10:15–16, nga mangita kon unsay gitudlo sa Manluluwas sa Iyang mga tinun-an samtang Siya midapit sa gagmayng mga bata sa pagduol ngadto Kaniya. Ang mga pulong “dawata ang gingharian sa Dios” sa bersikulo 15 nagpasabut sa pagdawat sa ebanghelyo ug ang pagkahimong usa ka miyembro sa Iyang Simbahan.

Basi niini nga mga bersikulo, unsay mahitabo samtang atong gidawat ang ebanghelyo sama sa gagmayng mga bata? Tubaga ang pangutana pinaagi sa pagkompleto sa mosunod nga baruganan: Samtang atong gidawat ang ebanghelyo sama sa gagmayng bata, maandam kita sa .

1. Tubaga ang mosunod nga mga pangutana diha sa imong scripture study journal:

   1. Unsa sa imong hunahuna ang ipasabut sa pagdawat sa ebanghelyo “sama sa usa ka gamayng bata” (Marcos 10:15)?

   2. Kon adunay usa ka tawo nga modawat sa ebanghelyo sama sa usa ka gamayng bata, sa imong hunahuna sa unsang paagi siya mobasa sa mga kasulatan, moampo, ug mosimba sa Simbahan?

Marcos 10:17–45

Ang Manluluwas nagtambag sa dato nga bantan-ong punoan sa pagbaligya sa iyang mga katigayonan ug mosunod Kaniya; Siya nagtambag sa Iyang mga tinun-an sa pagserbisyo sa usag usa

Basaha ang Marcos 10:17–20, nga mangita kon unsay nahitabo human nga si Jesus mipanalangin sa gagmayng mga bata. Ikonsiderar ang pagmarka sa unsay gipangutana sa tawo ngadto sa Manluluwas ug giunsa pagtubag sa Manluluwas.

Unsaon nimo sa paghulagway ang tawo kinsa miduol ngadto ni Jesus?

Ang Mateo 19 usab naglangkob sa istorya niining tawo nga miduol ngadto sa Manluluwas. Basaha ang Mateo 19:20, nga mangita kon giunsa pagtubag sa tawo ang tambag sa Manluluwas sa pagsunod sa mga kasugoan. Tingali gusto nimong markahan ang dugang nga pangutana nga gipangutana sa batan-ong lalaki ngadto Kaniya.

2. Isulat ang mosunod nga pangutana diha sa inyong scripture study journal: Unsa pay akong kulang? Imong tubagon ang dugang nga mga pangutana nga may kalabutan niini nga pangutana sa ulahing bahin sa leksyon.

Basaha ang Marcos 10:21, nga mangita kon giunsa pagtubag sa Manluluwas ang batan-on nga lalaki.

Timan-i ang mga pulong “si Jesus nagsud-ong kaniya ug nahigugma kaniya” sa bersikulo 21. Nganong importante kaha nga mahibaloan nga si Jesus nahigugma niining batan-on nga lalaki sa wala pa Siya misulti kaniya kon unsay iyang kulang?

Gikan niini nga mga bersikulo atong makat-unan nga tungod kay Siya nahigugma kanato, ang Ginoo motabang kanato nga masayud unsay atong kulang sa atong mga paningkamot sa pagsunod Kaniya, ug kon kita mangutana sa Ginoo, Siya motudlo kanato unsay kinahanglan natong buhaton aron mapanunod ang kinabuhing dayon.

Basaha ang Marcos 10:22, nga mangita kon giunsa sa batan-on nga lalaki pag-react sa dihang ang Manluluwas mitambag kaniya sa pagbaligya sa tanan nga anaa kaniya. Sumala sa bersikulo 22, nganong ingon niana ang iyang pag-react?

Ikinaugalingon ang Texto sa Kasulatan

Ang pagsukip sa imong pangalan diha sa teksto sa kasulatan makatabang sa mga kamatuoran sa tudling nga mahimong mas makahuluganon nganha kanimo. Ang pagbasa sa mga kasulatan ingon og kini gisulat alang kanimo mahimong usa ka makatabang nga paagi aron mabati ang tingog sa Espiritu nga nagsulti nganha kanimo.

Bisan tuod kita wala hangyoa sa pagbiya sa atong mga bahandi aron sa pagsunod sa Ginoo, Siya naghangyo kanato sa paghimo og laing mga sakripisyo sa pagserbisyo Kaniya ug sa pagsunod sa Iyang mga sugo.

3. Ubos sa pangutana nga “Unsa pay akong kulang?” tubaga ang mosunod nga mga pangutana diha sa imong scripture study journal:

   1. Unsa ang pipila sa mga sakripisyo nga ang Ginoo naghangyo kanato nga tingali lisud himoon?

   2. Pagsulat mahitungod sa usa ka sakripisyo nga ang Ginoo mihangyo (o naghangyo) kanimo nga tingali lisud buhaton.

Sa mainampoon nga paagi palandonga ang pangutana “Unsa pay akong kulang?” ug sunda ang bisan unsang mga pag-aghat nga mahimo nimong madawat kabahin sa mga sakripisyo nga ipabuhat sa Ginoo kanimo.

Basaha ang Marcos 10:23–27.

Sa imong hunahuna nganong lisud alang niadtong kinsa misalig sa mga bahandi o ubang kalibutanon nga mga butang nga makasulod sa gingharian sa Dios? Unsa kaha ang gipasabut nga ang tanang butang posible alang niadtong kinsa nagsalig sa Dios?

Basaha ang Marcos 10:28–31, nga mangita kon unsay gisaad ni Jesus niadtong kinsa andam sa pagbiya sa tanang butang aron sa pagsunod Kaniya.

Gikan niini nga mga bersikulo atong makat-unan ang mosunod nga baruganan: Aron madawat ang kinabuhing dayon, kita kinahanglan gayud andam mobiya sa bisan unsa nga gikinahanglan sa Ginoo kanato.

Ngano nga ang kinabuhing dayon takus sa bisan unsa nga sakripisyo nga kita gihangyo sa paghimo?

Sa Marcos 10:35–45 atong makat-unan nga sila si Santiago ug Juan nangutana ni Jesus kon mahimo ba silang molingkod sa halangdon nga mga dapit diha sa tuo nga kamot ug wala nga kamot ni Jesus diha sa mahangturon nga gingharian. Dayon ang Manluluwas mitudlo sa Napulog Duha ka mga Apostoles nga kinahanglan gayud dili sila mahisama sa mga lider sa Hentil kinsa migamit og awtoridad ngadto sa uban. Kadtong kinsa labing hawod diha sa gingharian sa Dios mao ang sulugoon sa tanan.

Marcos 11–13

Ang Manluluwas nagtudlo diha sa templo ug nag-obserbar sa usa ka biyuda nga mihatag og diyot ngadto sa panudlanan sa templo

Sa matag mosunod nga mga talan-awon, duha ka mga tawo naghatag og mga halad ngadto sa Ginoo. Hunahunaa unsay kalainan tali sa mga halad sa matag talan-awon.

• Usa ka babaye mihatag sa iyang bishop og dako kaayong kantidad sa kwarta isip halad sa puasa. Laing babaye kinsa nagpuyo sa samang ward mihatag og gamay kaayong kantidad ngadto sa iyang bishop isip halad sa puasa.

• Usa ka lalaki miserbisyo isip usa ka stake president. Laing lalaki diha sa samang stake nagserbisyo isip usa ka magtutudlo sa primary.

Unsa kaha nga mga pagbati aduna ang usa ka tawo kon ang iyang halad ngadto sa Ginoo ingon og gamay ra kon itandi ngadto sa mga halad sa uban?

Samtang ikaw magtuon sa Marcos 11–13, pangita sa mga kamatuoran nga motabang kanimo nga makahibalo kon sa unsang paagi ang Ginoo molantaw sa imong mga halad ngadto Kaniya.

Sa Marcos 11:1–12:40 atong makat-unan nga samtang ang Manluluwas nagkaduol sa katapusan sa Iyang mortal nga pagpangalagad, madaugon Siyang misulod sa Jerusalem, miabug sa mga tigpang-ilis og mga kwarta gikan sa templo, ug mitudlo sa katawhan didto.

Samtang didto siya sa templo, si Jesus nakasaksi og mga tawo nga nanagdala og kwarta ngadto sa panudlanan sa templo isip halad ngadto sa Dios. Basaha ang Marcos 12:41–44, nga mangita kon unsay nakita sa Manluluwas diha sa panudlanan.

Unsay gisulti sa Manluluwas kalabut sa halad sa biyuda itandi ngadto sa mga halad sa uban?

Hunahunaa ang sensilyo nga may pinakagamay nga kantidad sa kwarta sa imong nasud. Ang usa ka diyot mao ang “kinagamyan nga bronsi nga sensilyo nga gigamit sa mga Hudeo” (Bible Dictionary, “Money”).

4. Tubaga ang mosunod nga pangutana diha sa imong scripture study journal: Ngano kaha nga ang Manluluwas miisip sa halad sa biyuda nga mas labaw kaysa uban nga mga halad?

Basi sa unsay gisulti sa Ginoo mahitungod sa biyuda, atong makat-unan ang mosunod nga mga baruganan: Kon andam kita nga mohatag sa tanan nga anaa kanato ngadto sa Ginoo, Siya modawat sa atong halad bisan kini ingon og gamay kon itandi ngadto sa uban.

Gikinahanglan ang hugot nga patuo sa paghatag sa tanan nga anaa kanato ngadto sa Ginoo. Kini nga baruganan sa sakripisyo gitudlo diha sa Lectures on Faith: “Dinhi atong bantayan, nga ang relihiyon nga wala magkinahanglan og sakripisyo sa tanang mga butang wala gyuy gahum igo sa pagpakita og hugot nga pagtuo nga gikinahanglan sa kinabuhi ug sa kaluwasan” (Lectures on Faith [1985], 69).

Sa Marcos 13 atong makat-unan nga ang Manluluwas mitudlo sa Iyang mga Apostoles mahitungod sa Ikaduhang Pag-anhi. Nagtuon ka mahitungod niini sa Joseph Smith—Mateo (tan-awa ang leksyon alang sa Unit 6: Day 2).

Marcos 14:1–9

Si Maria midihog sa Manluluwas

Human ang Manluluwas mitudlo sa Iyang mga tinun-an mahitungod sa mga timailhan sa Iyang Ikaduhang Pag-anhi, mibiya Siya sa Jerusalem ug miadto sa Betania ngadto sa balay sa usa ka lalaki nga ginganlan og Simon, kinsa kanhi nataptan og sangla. Sa panahon sa katapusang semana sa kinabuhi sa Manluluwas, mibalik-balik Siya gikan sa Betania ngadto sa Jerusalem sa makadaghang higayon.

Basaha ang Marcos 14:3 ug Juan 12:3, nga mangita kon unsa nga buhat sa hugot nga pagtuo ug gugma nga gihimo ni Maria alang kang Jesus.

Si Elder James E. Talmage sa Korum sa Napulog Duha ka mga Apostoles mipahayag: “Ang pagdihog og lana sa usa ka dinapit gamit sa ordinaryo nga lana mao ang pagpasidungog kaniya; ang pagdihog usab og lana sa iyang mga tiil nagpakita og dili sagad ug talagsaon nga pagtagad; apan ang pagdihog og lana sa ulo ug tiil gamit ang lunsay nga nardo, ug sa ingon nga kadaghan, usa ka buhat sa balaang pagtahud nga panagsa rang buhaton bisan ngadto sa mga hari. Ang gibuhat ni Maria usa ka pagpakita og pagdayeg; usa kadto ka humot nga nangalimyon gikan sa kasingkasing nga nag-awas-awas uban sa pagsimba ug pagbati” (Jesus the Christ, ika-3 nga ed. [1916], 512512).

Pangitaa sa Marcos 14:4–9, nga mangita kon giunsa pag-react sa pipila ka mga tawo diha sa panihapon ngadto sa unsay gibuhat ni Maria.

Giunsa sa Manluluwas pagtubag kadtong mga nanaway ni Maria?

Ang mga pulong “usa ka maayong buhat kining iyang gihimo alang kanako” sa bersikulo 6 nagpakita nga ang Manluluwas nahimuot sa unsay gihimo ni Maria. Ang mga pulong “gihimo niya ang maarangan niya sa paghimo” sa bersikulo 8 nagpasabut nga mihatag siya sa iyang labing maayo ngadto sa Ginoo.

Gikan niini nga mga bersikulo atong makat-unan nga ang Manluluwas mahimuot kon kita mohatag Kaniya sa atong labing maayong mga paningkamot.

5. Ikonsiderar kini nga baruganan ug ang nag-unang baruganan nga atong naila gikan sa istorya sa diyot sa biyuda, ug kompletoha ang mosunod nga mga assignment diha sa imong scripture study journal:

   1. Ipasabut kon sa unsang paagi nga ang pagtuo diha niini nga mga kamatuoran lagmit motabang niadtong kinsa mibati nga wala silay daghang ikahatag ngadto sa Ginoo.

   2. Ihulagway ang usa ka panahon sa dihang imong nakita ang usa ka tawo nga mihatag sa iyang labing maayo ngadto sa Ginoo.

Hunahunaa kon sa karon ikaw naghatag ba sa imong labing maayo ngadto sa Ginoo. Pagpili og usa ka aspeto sa imong kinabuhi diin mahimo nimong mapalambo, ug pagtakda og usa ka tumong nga motabang kanimo sa paghatang sa imong labing maayo ngadto sa Ginoo.

Marcos 14:10–16:20

Nagsugod si Jesus sa Iyang Pag-ula samtang Siya nag-antus didto sa Getsemani; giluiban Siya ni Hudas Iscariote ug gidala sa atubangan sa Hudeo nga mga lider

Sa Marcos 14:10–16:20 atong makat-unan nga si Jesus ug ang mga Apostoles nag-obserbar sa Pagpalabay ug si Jesus mipaila sa mga timaan sa sacrament. Dayon miadto sila sa Tanaman sa Getsemani, diin si Jesus nag-antus alang sa atong mga sala. Dayon Siya gibudhian ni Hudas Iscariote, ilegal nga gihusay sa Sanhedrin, ug gihukman nga mamatay. Human namatay ang Manluluwas diha sa krus ug nabanhaw, mipakita Siya ngadto sa Iyang mga Apostoles ug misulti kanila sa pagdala sa ebanghelyo ngadto sa kalibutan, nagsaad kanila nga ang mga timailhan mosunod niadto kinsa motuo. (Natun-an nimo kining materyal diha sa mga leksyon alang sa Mateo 26–28.)

6. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Marcos 10-16 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: