Ang Tahas sa Tigkat-on

Pasiuna

Ang Espiritu Santo, ang magtutudlo, ug ang tigkat-on dunay importante nga tahas sa pagkat-on sa ebanghelyo. Kini nga leksyon makatabang nimo nga makasabut sa kada usa niini nga mga tahas aron ikaw magmalampuson sa imong paningkamot sa pagkat-on. Kinahanglan nga imong ribyuhon kanunay ang mga baruganan niini nga leksyon sa paghinumdom sa imong kaugalingon nga responsibilidad sa pagkat-on sa ebanghelyo.

Ang mga Tahas sa Espiritu Santo, sa Magtutudlo, ug sa Tigkat-on sa Pagkat-on sa Ebanghelyo

Ikonsiderar ang mosunod nga senaryo:

Usa ka batan-ong babaye mibati nga nadasig ug nabayaw samtang nagtuon siya sa iyang mga leksyon sa home study seminary. Iyang gibati ang impluwensya sa Espiritu Santo. Mapasalamaton siya sa mga butang nga iyang nakat-unan ug namalandong og mga paagi sa paggamit niini sa iyang kinabuhi. Laing batan-ong babaye ang nakakompleto sa pareha nga leksyon, pero laayan siya pirme ug mobati nga wala siyay nakat-unan.

Tubaga ang mosunod nga mga pangutana diha sa imong scripture study journal: Unsa ang posible nga mga rason ngano nga kining duha ka batan-ong babaye dunay lahi nga mga kasinatian samtang nagkompleto sa pareha nga mga leksyon sa seminary?

Samtang ikaw magtuon sa leksyon karon, pangitaa ang mga doktrina ug mga baruganan nga makatabang nimo sa pagtuman sa imong tahas isip tigkat-on sa seminary ug makapalig-on nimo sa imong pagpamatuod sa ebanghelyo ni Jesukristo.

Tulo ka mga indibidwal adunay importante nga mga tahas sa pagkat-on sa ebanghelyo sama sa seminary: ang Espiritu Santo, ang magtutudlo, ug ang estudyante.

Basaha ang Juan 14:26 ug Juan 16:13, nga mangita sa pipila ka mga tahas sa Espiritu Santo.

Usa ka kamatuoran nga atong makat-unan gikan niini nga mga bersikulo mahitungod sa mga tahas sa Espiritu Santo mao nga ang Espiritu Santo nagtudlo sa kamatuoran.

Base sa unsay imong nasinati sa imong kinabuhi, unsaon nato sa pagkahibalo kon ang Espiritu Santo nagtudlo nato sa kamatuoran? (Basin og ang Doktrina ug mga Pakigsaad 8:2–3 makatabang.)

Basaha ang Doktrina ug mga Pakigsaad 50:13–14, mangita sa tahas sa usa ka magtutudlo sa ebanghelyo. Timan-i nga kini nga mga bersikulo gihatag sa unang mga miyembro sa Simbahan kinsa naordinahan sa pagtudlo sa ebanghelyo.

Unsa ang tahas sa usa ka magtutudlo sa ebanghelyo?

Basaha ang 2 Nephi 33:1, nga mangita kon unsay buhaton sa Espiritu Santo kon ang kamatuoran gitudlo pinaagi sa Iyang gahum.

Sumala sa 2 Nephi 33:1, unsay buhaton sa Espiritu Santo kanato?

Basaha ang Doktrina ug mga Pakigsaad 88:118, nga mangita kon sa unsa nga paagi kita naningkamot sa pagkat-on.

Usa ka paagi nga kita maningkamot sa pagkat-on mao ang pinaagi sa hugot nga pagtuo. Si Elder David A. Bednar sa Korum sa Napulog Duha ka mga Apostoles mipasabut unsay mahitabo kon kita maningkamot sa pagkat-on pinaagi sa hugot nga pagtuo. Human mokutlo sa 2 Nephi 33:1, si Elder Bednar miingon: “Palihug timan-i kon sa unsa nga paagi nga ang gahum sa Espiritu modala sa mensahe paingon pero dili gayud mosulod sa kasingkasing. Ang usa ka magtutudlo makapasabut, makapakita, makadani, ug makapamatuod, ug makabuhat og daghang espirituhanong gahum ug sa pagkaepektibo. Sa kaulahian, hinoon, ang sulod sa usa ka mensahe ug ang saksi sa Espiritu Santo mosulod lamang ngadto sa kasingkasing kon ang nagdawat motugot niini nga mosulod. Ang pagkat-on pinaagi sa hugot nga pagtuo moabli sa agianan pasulod sa kasingkasing” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 17).

Gikan niini nga pamahayag atong makat-unan nga kon kita maningkamot sa pagkat-on pinaagi sa hugot nga pagtuo, dayon atong imbitaron ang Espiritu Santo diha sa atong mga kasingkasing sa pagtudlo ug sa pagpamatuod sa kamatuoran.

Ang hugot nga pagtuo mas labaw pa kay sa pagtuo nga walay gibuhat. Atong ipakita ang atong hugot nga pagtuo pinaagi sa lihok. Tubaga ang mosunod nga mga pangutana diha sa imong scripture study journal: Sa imong hunahuna unsa ang atong mahimo sa pagkat-on pinaagi sa hugot nga pagtuo?

Hunahunaa nga kamo wala gayud makadula og soccer, pero ang magtutudlo misaad nimo nga siya makatudlo nimo sa pagdula og soccer nga mahimo nang makadula sa soccer team. Kamo mituo sa abilidad sa magtutudlo sa pagtudlo ug sa imong abilidad sa pagkat-on. Gidala kamo sa magtutudlo ngadto sa soccer field. Iyang gipasabut ug gipakita unsaon sa pagdribble sa bola sa soccer, pero wala ka niya pasulaya niini sa imong kaugalingon. Dayon iyang gipasabut unsaon sa pagpasa sa bola sa soccer ug gipakita pinaagi sa pagpasa niini kanimo. Hinoon, sa wala pa ka makahigayon sa pagpasa niini og balik, ang magtutudlo miabut diha nimo ug mikuha sa bola. Mao sad ang iyang gibuhat sa paglabay sa bola sa soccer pabalik human kini gilabay pagawas. Nagpasalamat siya nimo sa imong panahon ug mibiya.

Human niining matang sa leksyon, unsa ka kaandam aron mo-try out sa soccer team? Ngano man?

Bisan tuod og ang pagkat-on ug pagtan-aw sa uban nga modula og soccer makatabang, kon gusto nimo nga mopalambo sa gikinahanglan nga mga kahanas aron molampos sa soccer, unsay kinahanglan nimong buhaton?

Sa unsa nga paagi kini nga ehemplo pareha sa pagkat-on pinaagi sa hugot nga pagtuo?

Ang pagtuo lamang ug pagsalig niana nga Espiritu nga makatudlo nato dili pa igo. Aron makaangkon sa kahibalo sa kamatuoran sa Dios, kinahanglan usab nga maningkamot sa pagkat-on ug paggamit unsay atong nakat-unan. Si Elder Bednar mitudlo mahitungod sa lihok nga dinasig sa hugot nga pagtuo nga nalakip sa pagkat-on pinaagi sa hugot nga pagtuo:

“Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa hugot nga pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Ang kinasingkasing ug pagkamakanunayon sa atong paglihok nga dinasig sa hugot nga pagtuo nga atong gipakita ngadto sa atong Amahan sa Langit ug sa Iyang Anak, nga si Jesukristo, sa atong pagkaandam nga makat-on ug pagdawat og panudlo gikan sa Espiritu Santo. …

“… Ang pagkat-on pinaagi sa hugot nga pagtuo nagkinahanglan ‘sa kasingkasing ug sa usa ka andam nga hunahuna’ (D&P 64:34). Ang pagkat-on pinaagi sa hugot nga pagtuo mao ang resulta sa Espiritu Santo nga nagdala sa gahum sa pulong sa Dios ug paingon ug pasulod sa kasingkasing. Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante pinaagi sa pagtudlo, sa pagpakita, o sa pag-eksperimento, hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.(“Paningkamot sa Pagkat-on pinaagi sa Hugot nga Pagtuo,” 64).

Hinumdumi ang batan-ong babaye ang nakakompleto sa pareha nga leksyon, pero laayan siya pirme ug mobati nga wala siyay nakat-unan sa mga leksyon sa seminary. Hunahunaa nga mipadayag siya niini nga kasagmuyo diha nimo. Sa unsay iyang gisulti kaniadto mahitungod kon giunsa niya pagkompleto ang mga leksyon, imong nahibaloan nga kasagaran mosulat siya og taphaw nga mga tubag sa mga assignment sa iyang scripture study journal kanunay nga mabalda sa laing mga interes samtang siya naghimo sa iyang mga leksyon. Dili usab siya moapil sa mga kalihokan sa klasrom o panaghisgutan panahon sa mga sesyon sa sinemana nga klase.

Sa imong scripture study journal, isulat ang tulo o upat ka mga ehemplo sa espirituhanon, mental, ug pisikal nga mga paningkamot nga imong iawhag niining batan-ong babaye nga buhaton aron siya makabenepisyo sa pagkat-on pinaagi sa hugot nga pagtuo.

Mga ehemplo gikan sa kinabuhi ni apostol Pedro naghulagway kon sa unsa nga paagi nga ang pagkat-on pinaagi sa hugot nga pagtuo nagdapit sa Espiritu Santo diha sa atong mga kasingkasing sa pagtudlo ug sa pagpamatuod sa kamatuoran. Basaha ang Mateo 4:18–20, nga mangita sa imbitasyon sa Manluluwas ngadto ni Pedro ug sa iyang igsoon nga si Andres.

Unsay giimbitar sa Manluluwas nga buhaton ni Pedro ug Andres?

Jesukristo nagtawag sa mga Apostoles — Mitawag si Jesukristo ni Pedro ug Andres sa pagsunod Kaniya.

Sa unsa nga paagi nga ang ilang mga tubag sa pagpaningkamot sa pagkat-on pinaagi sa hugot nga pagtuo usa ka ehemplo?

Ang aksyon ni Pedro sa pagsunod ni Jesukristo nakapahimo niya nga makauban sa Manluluwas sa Iyang mortal nga pangalagad. Duna siyay kahigayunan nga kanunay nga makadungog sa Manluluwas nga motudlo ug mosaksi Kaniya nga mohimo og daghang mga milagro. Human sa imbitasyon sa Manluluwas, si Pedro naglakaw ibabaw sa tubig (tan-awa sa Mateo 14:28–29).

Usa ka okasyon si Jesus nangutana sa Iyang mga tinun-an og duha ka pangutana. Basaha ang Mateo 16:13–17,nga mangita sa imbitasyon sa Manluluwas ngadto ni Pedro ug sa iyang igsoon nga si Andres.

Tan-awa sa bersikulo 17 unsay gipasabut sa Manluluwas kon sa unsa nga paagi si Pedro nakadawat sa iyang kahibalo. Nakadawat si Pedro sa iyang kahibalo pinaagi sa pagpadayag gikan sa Langitnong Amahan pinaagi sa gahum sa Espiritu Santo. Palandunga kon sa unsa nga paagi nga ang kasinatian ni Pedro naghulagway niini nga mga kamatuoran nga gitudlo niini nga leksyon.

Kompletuha ang mosunod nga mga assignment sa imong scripture study journal:
1. Ihulagway ang panahon sa dihang ikaw nagtinguha sa pagkat-on pinaagi sa hugot nga pagtuo. Sa unsa nga paagi nga ang Espiritu Santo nakatuman sa Iyang tahas sa pagkat-on sa ebanghelyo sa dihang gihimo nimo kini?
2. Unsay imong buhaton sa pagkat-on pinaagi sa hugot nga pagtuo ug imbitaron ang Espiritu Santo diha sa imong kasingkasing sa pagtudlo ug sa pagpamatuod sa kamatuoran. Kon nagkinahanglan kamo og piho nga mga ideya unsay imong mabuhat, mahimong mopili ka sa usa o duha sa mosunod nga mga aksyon nga tutukan:
  - Pagtuon sa mga kasulatan kada adlaw.
  - Pagpalambo og mga kahanas sa pagtuon sa kasulatan, sama sa pagmarka, pag-cross-reference, ug paggamit sa mga tabang sa pagtuon sa kasulatan.
  - Sa matinahuron ug madasigong paagi apil sa mga kalihokan sa pagtuon, ug likaye ang mga makabalda.
  - Kompletuha sa makahuluganong paagi ang mga kalihokan sa pagkat-on sa kada leksyon.
  - I-rekord ang dugang nga mga impresyon, mga hunahuna ug mga mubo nga sulat sa imong scripture study journal.
  - Ipasabut ang mga doktrina ug mga baruganan sa ebanghelyo ngadto sa uban, i-rekord ug ipakigbahin ang mga panabut ug mga kasinatian kalabut sa mga doktrina ug mga baruganan sa ebanghelyo, ug ipamatuod ang katinuod sa mga doktrina ug mga baruganan sa ebanghelyo.
  - Gamita ang mga doktrina ug mga baruganan sa ebanghelyo sa imong kinabuhi (tan-awa sa Juan 7:17).

Samtang maningkamot ka sa pagkat-on pinaagi sa hugot nga pagtuo sa imong kasinatian sa seminary, imong gisunod ang tambag ni Presidente Thomas S. Monson: “Mga kabatan-onan, ako mohangyo kaninyo sa pag-apil sa seminary. Pagtuon sa imong mga kasulatan kada adlaw. Paminaw sa imong mga magtutudlo pag-ayo. Gamita sa mainampoon unsay imong nakat-unan” (“Participate in Seminary,” Ago. 12, 2011, seminary.lds.org).

Isulat ang mosunod sa ubos sa assignment karon diha sa imong scripture study journal.

Ako nakatuon sa leksyon sa “Ang Tahas sa Tigkat-on ug nakakompleto niini niadtong (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: