Pasiuna sa 2 Juan

Ngano nga Kinahanglang Tun-an Kini nga Basahon?

Sa iyang ikaduhang sulat si Apostol Juan mipahayag sa iyang kabalaka kabahin sa mga impluwensya sa miapostasiya diha sa simbahan. Sa samang higayon, siya usab mipahayag og hingpit nga kalipay alang sa mga miyembro sa Simbahan kinsa nagpabiling lig-on ug maunungon sa ebanghelyo (tan-awa sa 2 Juan 1:4). Ang iyang mga pulong naghulagway sa hingpit nga kalipay ug pasalamat nga bation sa mga lider sa Simbahan alang niadtong nagpabilin nga matinud-anon sa Ginoo. Samtang imong tun-an ang 2 Juan, mahimo ka nga malig-on sa pahinumdom ni Juan nga maghigugmaay sa usag usa, mosunod sa mga sugo sa Dios, ug matinud-anong magpabilin diha sa doktrina ni Kristo.

Kinsa ang Nagsulat Niini nga Basahon?

Ang tagsulat mipaila sa iyang kaugalingon isip “ang anciano” (2 Juan 1:1), ug sumala sa tradisyon, si Juan, usa sa orihinal nga Napulog Duha ka mga Apostoles, misulat niini nga sulat (tan-awa sa Giya ngadto sa mga Kasulatan, scriptures.lds.org, “Juan, Anak nga Lalaki ni Zebedeo”).

Kanus-a ug Diin Kini Gisulat?

Wala gayud masayri kon kanus-a ug diin gisulat ang 2 Juan. Kon husto ang tradisyon nga dugay nga nagpuyo si Juan sa Efeso, tingali gihimo niya kini nga sulat gikan didto tali sa mga tuig A.D. 70 ug 100.

Para kang Kinsa Kini Gisulat ug Ngano?

Ang Ikaduhang Sulat ni Juan gisulat ngadto sa “pinili nga senyora ug sa iyang mga anak” (2 John 1:1). Wala masayri kon si Juan namulong ba ngadto sa iyang pamilya o sa laing piho nga grupo sa mga tawo o namulong ngadto sa tibuok Simbahan sa pinasumbingay nga paagi.

Si Elder Bruce R. McConkie sa Korum sa Napulog Duha ka mga Apostoles misulat nga ang 2 ug 3 Juan posible nga mga sulat nga gisulat ni Juan ngadto sa direkta nga mga sakop sa iyang pamilya (tan-awa sa Doctrinal New Testament Commentary, 3 vols. [1965–73], 3:409–10, 12–14).

Ang lain nga posibilidad mao nga ang mga pulong nga “pinili nga senyora” sa tinuoray nagpasabut ngadto sa Kristiyanong kongregasyon (tan-awa sa 2 Juan 1:13). Ang Gresyanhon nga pulong alang sa simbahan pangbabaye, ug kasagaran nga ipasabut ang Simbahan isip usa ka babaye (tan-awa sa Mga Taga-Efeso 5:25–27, 32; Hubad ni Joseph Smith, Pinadayag 12:1–3, 7 [sa Giya ngadto sa mga Kasulatan, scriptures.lds.org]; Pinadayag 19:7–8).

Sama sa 1 Juan, tataw nga gisulat ni Juan kini nga sulat aron sa pagtubag sa sayop nga mga pagtulun-an nga si Jesukristo dili literal nga mianhi sa yuta sa pisikal nga lawas. Siya mipasabut nga ang mga miyembro kinsa mitudlo nga si Kristo wala makaangkon og pisikal nga lawas kinahanglan dili pasudlon sa balay, o sa kongregasyon (tan-awa sa 2 Juan 1:7–10).

Unsa Ang Pipila ka mga Butang nga Nakalahi Niini nga Basahon?

Dinhi niini nga sulat si Juan mipasidaan kabahin sa mini nga mga magtutudlo nga nakasulod sa Simbahan. Siya mitambag sa mga miyembro sa Simbahan nga dili maminaw o makig-uban niini nga mga indibidwal.

Outline

2 Juan 1. Si Juan nagpahinumdom sa Simbahan sa sugo nga higugmaon ang usag usa. Siya nagpasidaan kabahin sa mini nga mga magtutudlo ug mga malimbungon sulod sa Simbahan ug nagtambag sa mga miyembro sa Simbahan nga dili motugot nga sila magpabilin sa ilang mga kongregasyon.